LITEYA 13
Ndenge oyo mangomba ya lokuta ekoselaka Nzambe makambo
Nzambe azali bolingo. Kasi mpo na nini mangomba oyo elobaka ete esalelaka Nzambe ezali kosala makambo ya mabe? Na mokuse, mangomba yango ezali ya lokuta. Ndenge nini ekoselaka Nzambe makambo? Nzambe ayokaka ndenge nini mpo na yango? Mpe akosala nini?
1. Ndenge nini mangomba ya lokuta ekoselaka Nzambe makambo na mateya na yango?
Mangomba ya lokuta eponá ‘kondima lokuta na esika ya kondima solo ya Nzambe.’ (Baroma 1:25) Na ndakisa, mangomba mingi eteyaka te bandimi na yango ete nkombo ya Nzambe ezali Yehova. Nzokande Biblia elobi ete tosengeli kobenga Nzambe na nkombo na ye. (Baroma 10:13, 14) Bakonzi mosusu ya mangomba balobaka ete soki likambo ya mabe ekómeli moto, ezali mokano ya Nzambe. Kasi ezali lokuta. Nzambe abimiselaka bato mpasi te. (Tángá Yakobo 1:13.) Likambo ya mawa, makambo ya lokuta oyo mangomba eteyaka esali ete bato bákóma mosika na Nzambe.
2. Ndenge nini mangomba ya lokuta ekoselaka Nzambe makambo na misala na yango?
Mangomba ya lokuta esalelaka bato makambo te ndenge Yehova alingaka. Kutu Biblia elobi ete “masumu [ya mangomba ya lokuta] etondi tii na likoló.” (Emoniseli 18:5) Banda kala, mangomba ya lokuta ekɔtaka na makambo ya politiki, epesaka mabɔkɔ na bitumba, ebomaka mpe ebomisaka bato mingi. Bakonzi mosusu ya mangomba balingá bozwi, yango wana basɛngaka bandimi na bango mbongo. Makambo oyo bakonzi yango ya mangomba basalaka emonisi ete bayebi Nzambe ata moke te mpe babongi te kobengama basaleli ya Nzambe.—Tángá 1 Yoane 4:8.
3. Ndenge nini Nzambe atalelaka mangomba ya lokuta?
Soki makambo oyo mangomba ya lokuta esalaka epesaka yo nkanda, yebá ete epesaka Yehova nkanda koleka. Yehova alingaka bato, kasi asepelaka te na bakonzi ya mangomba ya lokuta mpo bakoselaka ye makambo mpe banyokolaka bandimi na bango. Alaki ete akoboma mangomba ya lokuta mpe “ekomonana lisusu te.” (Emoniseli 18:21) Etikali moke Nzambe alongola mangomba nyonso ya lokuta.—Emoniseli 18:8.
KƆTÁ NA MOZINDO
Luká koyeba makambo mosusu oyo emonisi ndenge Nzambe atalelaka mangomba ya lokuta. Luká koyeba mpe makambo oyo mangomba yango esalá, mpe ntina oyo yango esengeli te kopekisa yo oyeba Yehova.
4. Nzambe andimaka mangomba nyonso te
Bato mingi bandimaka ete mangomba ezali lokola banzela ekeseni mpe nyonso ememaka epai ya Nzambe. Yango ezali solo? Tángá Matai 7:13, 14, mpe na nsima yanolá na motuna oyo:
-
Biblia elobi ete nzela oyo ememaka na bomoi ezali ndenge nini?
Talá VIDEO, mpe na nsima yanolá na motuna oyo elandi.
-
Biblia elobi ete Nzambe asepelaka na mangomba nyonso?
5. Mangomba ya lokuta emonisaka te ete Nzambe azali bolingo
Mangomba ya lokuta ekoseli Nzambe makambo na ndenge mingi. Likambo ya mabe koleka ezali ndenge epesaka mabɔkɔ na bitumba. Mpo na komona ndakisa moko, talá VIDEO. Mpe na nsima yanolá na mituna oyo elandi.
-
Mangomba mingi esalaki nini na Etumba ya mibale ya mokili mobimba?
-
Omiyoki ndenge nini mpo na makambo oyo mangomba yango esalaki?
Tángá Yoane 13:34, 35 mpe 17:16. Na nsima yanolá na mituna oyo:
-
Yehova ayokaka ndenge nini ntango mangomba emikɔtisaka na bitumba?
-
Mangomba ya lokuta ebimisaka mpe esalaka makambo ya mabe mingi. Makambo nini endimisi yo ete mangomba ya lokuta emonisaka te ete Nzambe azali bolingo?
Mangomba ya lokuta emonisaka te ete Nzambe azali bolingo
6. Nzambe alingi kosalisa bato bálongwa na mangomba ya lokuta
Tángá Emoniseli 18:4, a mpe na nsima yanolá na motuna oyo:
-
Omiyoki ndenge nini lokola Nzambe alingi kosalisa bato oyo bakosamá na mangomba ya lokuta?
7. Kobá koyekola makambo mingi etali Nzambe ya solo
Makambo ya mabe oyo mangomba ya lokuta esalaka ezali kotinda yo olinga Nzambe to oyina ye? Tozwá ndakisa, kanisá ete mwana moko aboyi kotosa batoli ya tata na ye. Alongwe na ndako mpe akómi kosala makambo ya mabe. Tata na ye azali kosepela te na makambo oyo mwana na ye azali kosala. Okanisi ete ebongi mpenza kopesa tata yango foti mpo mwana na ye akómi motomboki?
-
Okanisi ete ekozala malamu kopesa Yehova foti, mpe kotika koyekola makambo na ye mpo na mabe oyo mangomba ya lokuta ezali kosala?
SOKI MOTO ALOBI NA YO: “Mangomba nyonso ezali ndenge moko, mpo nyonso eteyaka kaka Liloba ya Nzambe.”
-
Yo mpe okanisaka bongo?
-
Ata soki mangomba nyonso elobaka ete eteyaka Liloba ya Nzambe, mpo na nini Nzambe andimaka yango nyonso te?
NA MOKUSE
Mangomba ya lokuta ekoselaka Nzambe makambo na mateya na yango mpe na makambo ya mabe oyo ezali kosala. Nzambe akobebisa mangomba ya lokuta.
Bozongeli
-
Oyokaka ndenge nini mpo na makambo oyo mangomba ya lokuta ezali koteya mpe kosala?
-
Ndenge nini Yehova atalelaka mangomba ya lokuta?
-
Likambo nini Nzambe akosala mangomba ya lokuta?
MAKANISI MOSUSU
Talá makambo mibale oyo esepelisaka Nzambe te kasi mangomba mingi esalaka yango.
“Mangomba nyonso ezali ndenge moko? Nyonso ememaka epai ya Nzambe?” (Lisolo oyo ezali na Internet)
Mpo na nini Yehova alingi ete tósambela ye elongo na basusu?
“Kozala mondimi ya lingomba moko ezali na ntina?” (Lisolo oyo ezali na Internet)
Sango moko abulunganaki mpo na makambo oyo lingomba na ye ezalaki kosala. Kasi yango epekisaki ye te ayekola mateya ya solo etali Nzambe.
“Ntina oyo sango moko alongwaki na lingomba na ye” (Lamuká! ya 02/2015)
Banda kala, mangomba eteyaka bato makambo oyo etindaka bango bámona ete Nzambe akipaka bango te mpe azali mabe. Talá oyo Biblia elobi mpo na mateya yango misato ya lokuta.
“Mateya ya lokuta oyo etindaka bato bálinga Nzambe te” (Linɔ́ngi ya Mosɛnzɛli ya 01/11/2013)
a Mpo na koyeba ntina oyo mokanda ya Emoniseli ebengi mangomba ya lokuta Babilone Monene, talá Maloba na nsuka ya lisolo 1.
Talá mpe...
MITUNA OYO BATO BATUNAKA MINGI
Koyekola Biblia elimboli nini?
Na lisalisi ya boyekoli ya Biblia ya ofele oyo Batatoli ya Yehova bayekolaka bato, okoki kosalela libongoli ya Biblia oyo olingi. Koyoka nsɔni te mpo na kobengisa bato nyonso ya libota na yo to baninga na yo mpo básangana na boyekoli na yo.
