LITEYA 44
Bafɛti nyonso esepelisaka Nzambe?
Yehova alingi ete tósepelaka mpe tósalaka fɛti na bantango mosusu. Kasi bafɛti mpe milulu nyonso esepelisaka ye? Ndenge nini tokoki komonisa ete tolingaka Yehova na likambo yango?
1. Mpo na nini bafɛti mingi esepelisaka Yehova te?
Mbala mosusu okokamwa soki oyebi ete bafɛti mingi euti na mateya ya bapakano to na mangomba ya lokuta. Bafɛti mosusu ya ndenge wana eyokani na misala ya bilimo mabe to na liteya oyo elobaka ete molimo ekufaka te. Bafɛti mosusu mpe eutá na biyambayamba (superstition). Bato basalaka mpe bafɛti mosusu mpo bakanisaka ete likambo moko ya mabe ekokómela bango soki basali yango te. Yehova ayebisi basaleli na ye ete: “Bókabwana . . . bótika kosimba eloko ya mbindo.”—2 Bakorinti 6:17. a
2. Ndenge nini Yehova atalelaka bafɛti oyo epesaka bato lokumu oyo babongi na yango te?
Yehova apekisi biso “kotyela moto mpamba motema.” (Tángá Yirimia 17:5.) Bafɛti mosusu ekumisaka bakonzi to bato oyo basalá makambo ya minene mpo na ekólo. Mosusu ekumisaka bilembo ya ekólo to lipanda. (1 Yoane 5:21) Bafɛti mosusu mpe epesaka mabɔkɔ na ebongiseli ya politiki to na bibongiseli ya ekólo. Yehova ayokaka ndenge nini soki tozali kopesa moto to ebongiseli moko lokumu oyo babongi na yango te, mingimingi soki basalaka makambo oyo eyokani te na mokano na ye?
3. Makambo nini ekoki komonisa ete fɛti moko ezali mabe na miso ya Yehova?
Biblia epekisi biso “komɛla masanga mingi, bafɛti ya lokoso, [mpe] kolangwa masanga.” (1 Petro 4:3) Na bafɛti mosusu bato bazangaka komipekisa mpe basalaka makambo ya mbindo. Soki tolingi kotikala baninga ya Yehova, tosengeli koboya makambo ya mbindo ya ndenge wana.
KƆTÁ NA MOZINDO
Luká koyeba oyo okoki kosala mpo ozwa bikateli ya malamu oyo ekosepelisa Yehova na likambo etali bafɛti mpe milulu.
4. Boyá bafɛti mpe milulu oyo epesaka Yehova lokumu te
Tángá Baefese 5:10, mpe na nsima yanolá na mituna oyo:
-
Makambo nini tosengeli kotalela liboso ya kosala fɛti moko?
-
Bafɛti nini esalemaka na esika oyo ofandi?
-
Okanisi nini, bafɛti yango esepelisaka Yehova?
Na ndakisa, osí omituna ndenge oyo Yehova atalelaka bafɛti ya mbotama? Biblia elobi ata esika moko te ete basaleli ya Yehova bazalaki kosala bafɛti ya mbotama, kasi elobeli bafɛti ya mbotama mibale ya bato oyo bazalaki kosambela Yehova te. Tángá Ebandeli 40:20-22 mpe Matai 14:6-10. Mpe na nsima, yanolá na mituna oyo:
-
Makambo nini esalemaki na bafɛti yango nyonso mibale?
-
Okanisi nini: Na kotalela bavɛrsɛ yango, Yehova akanisaka nini mpo na bafɛti ya mbotama?
Mbala mosusu okoki komituna: ‘Soki nasangani na molulu ya fɛti ya mbotama to na bafɛti mosusu oyo Biblia epekisi, yango ezali mpenza mabe na miso ya Yehova?’ Tángá Kobima 32:1-8. Na nsima, talá VIDEO mpe yanolá na mituna oyo elandi.
-
Mpo na nini tosengeli koluka koyeba bafɛti oyo esepelisaka Yehova?
-
Ndenge nini tokoki kosala yango?
Ndenge oyo tokoki koyeba fɛti oyo esepelisaka Nzambe te
-
Euti na Biblia te? Mpo na koyeba yango, luká esika oyo yango euti.
-
Ezali kopesa bato mpe bibongiseli lokumu oyo ebongi te, to ezali kokumisa bilembo ya ekólo? Topesaka Yehova lokumu koleka moto to eloko mosusu nyonso mpe totyaka motema ete ye nde akosilisa bampasi nyonso ya mokili.
-
Mimeseno mpe makambo oyo esalemaka na fɛti yango, eyokani te na oyo Biblia elobi? Tosengeli kotikala pɛto na makanisi mpe na bizaleli.
5. Salisá bato mosusu bátyola te mateya oyo ondimaka
Ekoki kozala mpasi oboya ntango basusu batye yo mbamba mpo osala fɛti oyo esepelisaka Yehova te. Zalá na motema molai ntango ozali koyebisa bango ntina oyo ozwi ekateli wana mpe salá yango na mayele. Mpo na komona ndenge okoki kosala yango, talá VIDEO.
Tángá Matai 7:12, mpe na nsima yanolá na mituna oyo:
-
Na kotalela vɛrsɛ oyo, osengeli kopekisa bandeko ya libota na yo oyo basambelaka Yehova te kosala fɛti moko boye?
-
Okoki kosala nini mpo na komonisa bato ya libota na yo ete atako okosala fɛti wana na bango te, olingaka bango mpe ozwaka bango na valɛrɛ mingi?
6. Yehova alingi ete tózala na esengo
Yehova alingi ete tólekisaka ntango ya malamu ná libota mpe baninga na biso. Tángá Mosakoli 8:15, mpe na nsima yanolá na motuna oyo:
-
Ndenge nini vɛrsɛ oyo emonisi ete Yehova alingi tózala na esengo?
Yehova alingi ete bato oyo basambelaka ye básepelaka mpe bálekisaka ntango ya malamu elongo. Talá VIDEO mpo na komona ndenge yango emonisami polele na mayangani na biso oyo esangisaka mikili mingi.
Tángá Bagalatia 6:10, mpe na nsima yanolá na mituna oyo:
-
Mpo na kosalela bato “oyo ezali malamu,” tosengeli kosala bafɛti oyo bato mingi basalaka?
-
Nini ekopesa yo esengo: kokabela moto kaka mpo na fɛti moko boye to kokabela ye mpo olingi kosala yango?
-
Na bantango mosusu, Batatoli ya Yehova mingi basalelaka bana na bango fɛti mpe bapesaka bango bakado. Soki ozali na bana, makambo nini ya ntina okoki kosala mpo na bango?
SOKI MOTO ALOBI NA YO: “Ata soki oyebi te ndenge fɛti yango ebandá, ya ntina ezali kolekisa ntango elongo na libota mpe baninga.”
-
Okoyebisa ye nini?
NA MOKUSE
Yehova alingi tólekisaka ntango elongo na libota mpe baninga. Kasi alingi mpe ete tóboya bafɛti oyo esepelisaka ye te.
Bozongeli
-
Mituna nini tokoki komituna mpo na koyeba soki fɛti moko esepelisaka Yehova to te?
-
Ndenge nini tokoki kosalisa libota mpe baninga na biso báyeba ntina oyo toboyaka kosala fɛti moko?
-
Ndenge nini toyebi ete Yehova alingi tózala na esengo mpe tósepelaka?
MAKANISI MOSUSU
Talá mwa bafɛti oyo bakristo basalaka te.
“Mpo na nini Batatoli ya Yehova basalaka bafɛti mosusu te?” (Lisolo oyo ezali na Internet)
Talá makambo minei oyo etindi biso tóndima ete fɛti ya mbotama esepelisaka Nzambe te.
“Mpo na nini Batatoli ya Yehova basalaka fɛti ya mbotama te?” (Lisolo oyo ezali na Internet)
Talá ndenge bana oyo balingaka Yehova bakoki kosepelisa ye na ntango ya bafɛti ya mokili
Bamilio ya bakristo basalaka fɛti ya Noele te. Bayokaka ndenge nini mpo na yango?
“Bazwi eloko moko ya malamu koleka” (Linɔ́ngi ya Mosɛnzɛli ya 01/12/2012)
Talá mpe...
MITUNA OYO BATO BATUNAKA MINGI
Koyekola Biblia elimboli nini?
Na lisalisi ya boyekoli ya Biblia ya ofele oyo Batatoli ya Yehova bayekolaka bato, okoki kosalela libongoli ya Biblia oyo olingi. Koyoka nsɔni te mpo na kobengisa bato nyonso ya libota na yo to baninga na yo mpo básangana na boyekoli na yo.
