Babalani oyo bamoniselanaka limemya batyelanaka likebi, ata soki bayokani te na likambo moko. Buku moko (Ten Lessons to Transform Your Marriage) elobi: “Babalani yango basalaka makasi báyokana mpe balingaka te kokóma tii na esika oyo ekozala mpasi bábongisa makambo. Bakobaka nde kosolola mpo na koluka kosilisa matata na bango. Bayokaka na limemya ntango mosusu azali koloba mpe bayokanaka mpo na koluka kosilisa mokakatano oyo ebimi.”

TOLI YA BIBLIA: “Bolingo . . . elukaka matomba na yango moko te.”​—1 Bakorinti 13:4, 5.

“Komemya mwasi na ngai elimboli kozwa ye na valɛrɛ mingi mpe koboya kosala likambo oyo ekoki konyokola ye to kobebisa libala na biso.”​—Micah.

Soki mwasi ná mobali bapesanaka limemya te, masolo na bango ekoki kosuka kaka na maloba mabe, kokatelana mangala, ata mpe maloba ya kotyola; bato ya mayele balobi ete bizaleli wana ememaka babalani tii na koboma libala.

“Koloba na mwasi na yo maloba mabe to ya kokitisa ye, to mpe kosalisa ye masɛki oyo ekoki koyokisa ye nsɔni, ekoki kotinda ye amimona ete azali na valɛrɛ te mpe atika kotyela yo motema; yango ekoki kobebisa libala na bino.”​—Brian.

MITALELÁ

Kebá na maloba na yo mpe makambo oyo okosala na boumeli ya pɔsɔ mobimba. Na nsima, omituna boye:

• ‘Mbala boni nalobaki na mwasi na ngai maloba mabe, mpe mbala boni nakumisaki ye?’

• ‘Na makambo nini namonisaki ete namemyaka molongani na ngai?’

SOLOLÁ NA MOLONGANI NA YO

• Makambo nini mpe maloba nini ekoki kosalisa mokomoko na bino amiyoka ete moninga azali komemya ye?

• Makambo nini to maloba nini etindaka mokomoko na bino amona ete moninga azali komemya ye te?

TOLI

• Komá na papye ndenge misato oyo okolinga ete molongani na yo amonisela yo limemya. Sɛngá molongani na yo asala mpe bongo. Pesá ye papye na yo mpe sɛngá ye apesa yo papye na ye, na nsima, salá makasi omonisela ye limemya na makambo oyo akomaki.

• Salá liste ya bizaleli oyo osepelaka na yango epai ya molongani na yo. Na nsima, yebisá molongani na yo ete osepelaka mingi na bizaleli yango.

“Komemya mobali na ngai elimboli komonisa na makambo oyo nazali kosala ete nazali kozwa ye na valɛrɛ mingi mpe nalingi azala na esengo. Mbala mingi, yango esɛngaka makambo ya minene te; ntango mosusu, kaka mwa makambo ya mikemike oyo nalobaka to nasalelaka ye nde emonisaka ete namemyaka ye.”​—Megan.

Mpo na koloba solo, yo te moto okoloba ete omemyaka molongani na yo; ye nde asengeli komona ete omemyaka ye.

TOLI YA BIBLIA: “Bólata bolingo ya motema oyo euti na mawa, boboto, elimo ya komikitisa, motema pɛtɛɛ mpe motema molai.”​—Bakolose 3:12.