Tii sikoyo, tolobeli makambo ndenge na ndenge mpo tózwa eyano na motuna oyo: Tokoki koyeba Nzambe? Liboso, tomoni na Biblia ete nkombo na ye ezali Yehova mpe ete ezaleli na ye ya libosoliboso ezali bolingo. Tolobeli mpe makambo oyo asalá mpe oyo akosala mpo na bato. Atako ezali na makambo mosusu mingi oyo tokoki koyekola mpo na Nzambe, mbala mosusu tokoki komituna soki nyonso wana ekomemela biso bolamu nini.

Yehova alobi ete “soki oluki ye, akosala ete omona ye.” (1 Ntango 28:9) Kanisá bolamu oyo okozwa soki oluki Nzambe mpe nsukansuka oyebi ye: okokóma moninga na ye ya motema! (Nzembo 25:14) Boninga yango ekoki komemela yo bolamu nini?

Esengo ya solosolo. Yehova abengami “Nzambe ya esengo.” (1 Timote 1:11) Kokóma moninga na ye mpe kolanda bizaleli na ye ekopesa yo esengo ya solosolo, oyo ekoki kopesa yo kimya na makanisi, na motema, mpe na nzoto. (Nzembo 33:12) Okokóma mpe na bomoi ya esengo mpamba te okoboya komipesa na makambo oyo ebebisaka nzoto, okokóma na bizaleli ya malamu, mpe okozala na boyokani malamu na bato mosusu. Yo mpe okoloba lokola mokomi ya nzembo ete: “Mpo na ngai, kobɛlɛma na Nzambe ezali malamu.”​—Nzembo 73:28.

Libateli. Yehova alaki basaleli na ye ete: “Nakopesa yo toli wana liso na ngai ezali kotala yo.” (Nzembo 32:8) Elingi koloba ete Yehova abatelaka basaleli na ye mpe akokisaka bamposa ya mokomoko na bango. (Nzembo 139:1, 2) Soki okómi moninga ya Yehova, okomona ete akozala ntango nyonso wana mpo na kobatela yo.

Avenire ya malamu. Longola kosalisa yo mpo ozala na bomoi ya malamu mpe ya esengo lelo, Yehova Nzambe alaki yo avenire ya malamu. (Yisaya 48:17, 18) Biblia elobi: “Oyo elakisi bomoi ya seko, báyekola koyeba yo, Nzambe ya solo kaka moko, mpe moto oyo yo otindaki, Yesu Kristo.” (Yoane 17:3) Na mokili oyo etondi na bampasi, elikya oyo Nzambe apesi ekoki kozala lokola longo oyo ekosalisa biso tózala “makasi mpe ngwi.”​—Baebre 6:19.

Nyonso wana ezali kaka mwa ndambo ya makambo oyo esengeli kotinda biso tóyeba Nzambe malamu mpe tókóma baninga na ye. Mpo na koyeba makambo mosusu, tolendisi yo osolola na Motatoli ya Yehova moko to okɔta na site Internet jw.org.