Mary ná mobali na ye, John, a bafandaka na ekólo oyo bakoki kosakola nsango malamu epai ya bato mingi oyo bautá Philippines mpe bayá kosala na ekólo yango. Na ntango ya maladi mabe ya coronavirus, Mary abandaki koyekola Biblia kaka na bato ya ekólo na bango te kasi mpe ya bikólo mosusu. Ndenge nini asalaki yango?

Mary azalaki kotuna bayekoli na ye ya Biblia boye: “Oyebi moto mosusu oyo akosepela koyekola Biblia?” Soki balobi ete bayebi, azalaki kosɛnga asolola na bango. Kotuna mwa motuna yango ezalaki mbala mingi kobota mbuma malamu. Mpo na nini? Mpo mbala mingi bato oyo basepelaka na makambo oyo bazali koyekola na Biblia balingaka koyebisa bato ya libota mpe baninga na bango makambo oyo bayekoli. Nini esalemaki lokola azalaki kotuna motuna yango?

Jasmin, moyekoli ya Biblia ya Mary, alakisaki Mary bato minei oyo balingaki koyekola. Moko na bango, Kristine, asepelaki mingi mpenza na boyekoli na ye mpe asɛngaki Mary ayekolaka na ye mbala mibale na pɔsɔ. Ntango Mary atunaki Kristine soki ayebi moto mosusu oyo akolinga koyekola, Kristine alobaki, “Ɛɛ, nakolakisa yo baninga na ngai.” Nsima ya mwa bapɔsɔ, Kristine alakisaki Mary baninga na ye minei oyo balingaki koyekola. Na nsima, Kristine alakisaki ye baninga na ye mosusu, mpe basusu kati na bango bapesaki bankombo ya bato mosusu oyo bakosepela koyekola Biblia.

Kristine alingaki mpe ete bato ya libota na ye na Philippines báyekola Biblia. Na yango asololaki na mwana ye ya mwasi, Andrea. Na ebandeli, Andrea amilobelaki: ‘Batatoli ya Yehova bazali mwa lingomba, bandimelaka Yesu te, mpe basalelaka kaka Kondimana ya kala.’ Kasi kaka na boyekoli ya liboso, amonaki ete makanisi ya libunga oyo azalaki na yango mpo na Batatoli ya Yehova ezalaki bongo te. Mbala nyonso na boyekoli na ye, azalaki koloba: “Soki yango nde Biblia elobi, boye ezali solo!”

Na nsima, Andrea alakisaki Mary baninga na ye mibale ná moninga na ye moko ya mosala mpe bakómaki koyekola. Lisusu, kozanga ete Mary ayeba yango, Angela, tata-mwasi ya Andrea, oyo akufá miso, azalaki koyoka ntango Mary azalaki koyekola na Andrea. Mokolo moko, Angela ayebisaki Andrea asalisa ye básolola na Mary mpe asɛnga ye báyekola Biblia. Angela alingaki makambo oyo azalaki koyekola.  Nsima ya sanza moko mpamba, akangaki bavɛrsɛ mingi na motó mpe alingaki báyekolaka mbala minei na pɔsɔ! Akómaki koyangana pɔsɔ na pɔsɔ na makita na nzela ya video na lisalisi ya Andrea.

Ntango Mary ayebaki ete Joshua, mobali ya Kristine, azalaki ntango nyonso pembeni ntango azalaki koyekola na Kristine, atunaki ye soki akolinga koyekola na bango. Joshua alobaki: “Nakoyoka kaka, kasi kotuna ngai ata motuna moko te; soki te, nakotika.” Kaka na miniti mitano ya liboso, atunaki mituna ebele koleka Kristine mpe alingaki kokoba koyekola.

Mwa motuna ya Mary esalaki ete azwa bayekoli ya Biblia ebele. Lokola bazalaki ebele, apesaki mosusu epai ya bandeko. Mary abandaki boyekoli ya Biblia na bato 28 na bikólo minei.

Jasmin, moyekoli ya liboso oyo tolobelaki, azwaki batisimo na sanza ya 04/2021. Kristine azwaki batisimo na sanza ya 05/2022 mpe azongaki na Philippines mpo azala elongo na libota na ye. Bayekoli ya Biblia mosusu mibale oyo Kristine alakisaki Mary, bazwaki mpe batisimo. Angela azwaki batisimo mwa basanza na nsima mpe sikoyo azali mobongisi-nzela ya sanza na sanza. Mobali ya Kristine, Joshua, ná mwana na bango, mpe bayekoli mosusu mingi ya Biblia bazali kokola malamu na elimo.

Na siɛklɛ ya liboso, nsango malamu epalanganaki noki kati na bandeko ya libota mpe baninga. (Yoa. 1:​41, 42a; Mis. 10:​24, 27, 48; 16:​25-33) Mpo na nini te yo mpe otuna bayekoli na yo ya Biblia mpe bato mosusu oyo basepelaka koyekola: “Oyebi moto mosusu oyo akosepela koyekola Biblia?” Soki otuni mwa motuna yango, mbala mosusu okozwa bato mingi oyo balingi koyekola Biblia!