Masolo ya Basakoli ya Bokonzi

Bazali kondima nsango malamu na Ekólo Lettonie

BIBLIA emonisi polele ete mokano ya Nzambe ezali ete “bato ya lolenge nyonso bábika mpe bákóma na boyebi ya sikisiki ya solo.” (1 Timote 2:4, NW) Baoyo bazwaki te libaku ya koyoka nsango malamu na boumeli ya bambula ebele, bazali lelo oyo koyoka yango! Na ekólo Lettonie, lokola mpe na mikili mosusu, bilenge mpe mikóló, babola mpe bazwi, bato oyo batángá mingi mpe baoyo batángá mingi te, bazali kondima nsango malamu, lokola masolo oyo elandi emonisi yango.

• Na Rēzekne, engumba moko ya ɛsti ya ekólo Lettonie, mama moko na mwana na ye ya mwasi batunaki mwasi moko na balabala mpo alakisa bango nzela. Nsima ya kolakisa bango, mwasi yango, oyo azalaki Motatoli ya Yehova, apesaki bango lokasa ya libyangi na makita ya Batatoli ya Yehova.

Lokola mama yango na mwana na ye bazalaki bango nyonso komipesa mingi na makambo ya losambo, bandimaki kokende na likita yango. Na nzela, bayokanaki ete soki bakuti likambo moko ya malonga kuna te, bakoumela te, bakobima. Nzokande, likita ebendaki mpenza likebi na bango mpe likambo ya kobima eyaki lisusu na makanisi na bango te. Bandimaki koyekola Biblia mpe babandaki koyangana na makita mbala na mbala. Nsima ya sanza misato mpamba, bamonisaki mposa ya kosangana na mosala ya kosakola mpe bakómaki pene ya kozwa batisimo.

• Na engumba moko na wɛsti ya ekólo Lettonie, Motatoli moko akutanaki na Anna, mwasi moko mobange ya mbula 85, oyo amonisaki mposa makasi mpe andimaki koyekola Biblia. Mwana na ye ya mwasi mpe bandeko na ye mosusu batɛmɛlaki ye makasi. Kasi Anna apesaki nzela na botɛmɛli wana te—to amilɛmbisaki te mpo azali mobange mpe atako nzoto na ye ezali lisusu mpenza kolɔngɔnɔ te—ete epekisa ye kokoba koyekola Biblia.

Mokolo moko, Anna ayebisaki mwana na ye ya mwasi ete alingi kozwa batisimo. Mwana na ye ayanolaki ete “soki ozwi batisimo, nakokende kotika yo na ndako ya mibange.” Likanisi wana elɛmbisaki Anna te. Lokola azalaki mpenza mobange, abatisamaki na ndako na ye moko.

Mwana na ye wana asalaki nini mpo na yango? Abongolaki makanisi na ye mpe alambaki biloko ya kolya ya kitoko mpo na mama na ye nsima ya batisimo. Na nsima, atunaki mama ye ete: “Ozali komiyoka ndenge nini sikoyo lokola ozwi batisimo?” Anna azongisaki ete: “Lokola mwana abotami sika!”

• Na sanza ya Desɛmbɛ 1998, Batatoli mibale bakutanaki na moto moko oyo azalaká kala mokonzi ya basoda ya ex-Union soviétique. Lokola abandaki kondima ete Mozalisi azali, andimaki koyekola Biblia, mpe mwasi na ye alandaki ye na nsima. Bakolaki nokinoki mpe eumelaki te bakómaki basakoli oyo bazwi naino batisimo te. Na eleko ya molunge oyo elandaki, mokonzi yango ya kala ya basoda azwaki batisimo. Lokola mobali yango na mwasi na ye bazalaki kolinga makambo ya elimo mingi, yango elendisaki bandeko nyonso kati na lisangá. Lisusu, basanganaki na mosala ya kobongola ndako moko oyo ezalaki ndako ya kolala mpo ekóma Ndako ya Bokonzi moko ya kitoko.