“Nkisi mpo na motɔlu na yo”

BALOBAKA ete bamaladi mingi oyo bato babɛlaka eutaka mingimingi na kobanga, mawa, zuwa, nkanda, koyina, mpe komiyoka lokola nde omemi ngambo. Yango wana, Biblia ezali mpenza kobɔndisa biso ntango ezali koloba ete ‘kobanga Yehova’ ezali “nkisi mpo na motɔlu na yo mpe mafuta mpo na mikuwa na yo”!​—Masese 3:7, 8, NW.

Mikuwa ezali makonzi oyo esimbaka nzoto. Yango wana, Biblia esalelaka liloba “mikuwa” mpo na kolobela moto, mingimingi ntango azali kotungisama makasi. Kasi, ndenge nini kobanga Yehova ezali “nkisi mpo na motɔlu na yo”?

Balimboli ya Biblia bazali na makanisi ndenge moko te na ndenge oyo liloba “mikuwa” esalelami na vɛrsɛ yango. Molimboli moko alobi ete lokola motɔlu ezali na “katikati ya nzoto,” ekoki komonisa binama nyonso ya ntina mingi na kati ya nzoto. Molimboli mosusu alobi ete liloba “motɔlu” ekoki kolimbola nsinga ya motɔlu, oyo elobelami na Ezekiele 16:4. Soki ezali bongo, ekoki kozala ete Masese 3:8 ezali komonisa mpenza ete bomoi na biso mobimba esimbami na Nzambe, ndenge moko na mwana oyo azali na libumu ya mama, alyaka na nzela ya mama na ye. Likanisi mosusu ezali ete na vɛrsɛ yango, liloba “motɔlu” ekoki kolimbola misuni mpe misisa ya nzoto. Soki totaleli makambo oyo ezali liboso mpe oyo elandi vɛrsɛ yango, ekoki kozala ete bakesenisi binama yango na “mikuwa” oyo ezali enama ya makasi mingi na nzoto.

Ata soki ndimbola na yango mpenza ezali nini, likambo ya solo yango oyo: Kobanga kosala mabe na miso ya Yehova ezali nzela ya mayele. Banda sikoyo soki tozali kotosa mitinda ya Nzambe tokozala nzoto kolɔngɔnɔ. Longola yango, kotosa mitinda ya Yehova ekosala ete Yehova andima biso, mpe ekomema biso na bomoi ya seko esika tokozala bato ya kokoka, na nzoto mpe na mayoki, na mokili na ye ya sika oyo ezali koya.​—Yisaya 33:24; Emoniseli 21:4; 22:2.

[Eutelo ya bafɔtɔ na lokasa 32]

Dr. G. Moscoso/SPL/Photo Researchers