Nabotamaki na engumba moko moke ya Texcoco. Na ntango wana, babalabala mingi ezalaki ya mabele mpe etondá na putulu. Bato ya bamboka ya pembeni bazalaki na momeseno ya koya na bampunda na bango oyo ezalaki komema biloko ebele ya kotɛka na engumba. Tozalaki na libota moko ya bobola mpenza oyo ezalaki na bana libwa mpe ngai nazali mwana ya nsambo. Tata azalaki kobongisa basandale babengi guaraches mpo na koleisa libota. Kasi akufaki ntango nazalaki na mbula nsambo. Banda ntango wana, mama akómaki kobundabunda mpo na koleisa libota.

Nkɔkɔ na ngai ya mobali azalaki kobɛta violon mpe azalaki mokambi ya orkɛstrɛ moko oyo eyebaki mpenza kobɛta miziki oyo babɛtaka na eglize. Bato mingi ya libota na ngai bayebaki mpe kobɛta miziki. Mama azalaki koyemba na korale ya eglize, mpe nɔkɔ azalaki moyembi mpe mobɛti piano. Tomipesaki mpenza na makambo ya losambo​—Nazalaki kosalisa nsango na misa mpe nazalaki na mposa ya kokóma misionɛrɛ ya Lingomba ya Katolike. Kaka na ntango wana, nazalaki mpe kosepela mingi na bafilme ya karate. Kotala bafilme yango mbala na mbala esalaki ete nakóma mobulu makasi.

Nakɔtaki na eteyelo moko ya lingomba oyo ezalaki lokola seminɛrɛ na engumba Puebla. Nazalaki na mokano ya kokóma sango ya Lingomba ya Katolike. Kasi ntango nakómaki na mbula ya nsuka mpo nasilisa kelasi, makambo ya lingomba yango elɛmbisaki ngai nzoto. Mamelo moko oyo azalaki naino elenge, asɛngaki ngai nasangisa na ye nzoto. Atako naboyaki, likambo yango epesaki ngai mposa ya kobala. Lisusu, namonaki ete basango ebele bazalaki kosala makambo mingi  ya mabe na kobombana. Nsukansuka, natikaki mokano na ngai ya kokóma sango.

Nazwaki ekateli ya koyekola miziki na eteyelo oyo epesaka baalangá-nzembo formasyo ya miziki, na engumba Mexico. Ntango nasilisaki kelasi, nabalaki mpe ngai na mwasi yango tobotaki bana minei. Mpo na kokokisa mposa ya libota, nazalaki koyemba na misa na eglize ya Katolike.

Libala na biso ekɔtaki matata kaka na ebandeli. Ngai ná mwasi na ngai tozalaki kobunda, mingimingi mpo tozalaki koyokelana zuwa. Tozalaki kobanda na koswana mpe kosukisa na bitumba. Nsukansuka, nsima ya mbula 13, tozwaki ekateli ya kokabwana mpe na nsima tobomaki libala.

Mbala ya liboso oyo nakutanaki na Batatoli ya Yehova ezalaki liboso nakabwana ná mwasi na ngai. Batatoli ya Yehova mibale bayaki na ndako na biso mpe basɛngaki básolola na ngai masolo ya Biblia. Nakanisaki ete nayebi makambo mingi ya Nzambe, yango wana nalingaki namonisa bango ete bazali na libunga. Natunaki bango mituna ya makasi oyo nakanisaki ete ezangi biyano. Kasi likambo ya kokamwa, bazalaki ntango nyonso kopesa ngai biyano ya malamu na Biblia. Nakómaki komona ete oyo nayebi ezali mpenza moke. Kasi, mwasi na ngai azalaki na bonkonde te epai ya Batatoli, mpe ngai nazalaki na misala mingi, yango wana batikaki koya.

Mbula mitano na nsima, nakómaki kofanda na mwasi mosusu na nkombo Elvira; ezalaki na ntango yango nde nakutanaki lisusu na Batatoli ya Yehova. Lokola Elvira azalaki koboya Batatoli te, namonaki ete ezali mpasi te mpo nayekola Biblia kozanga kotika. Ata bongo, esɛngaki bambula ebele mpo natika bizaleli na ngai ya kala.

Namonaki ete soki nalingi kosambela Yehova na motema mobimba, nasengeli kobongola makambo mingi na bomoi na ngai. Ya liboso, nasengelaki kotika mosala na ngai ya koyemba na misa ya Lingomba ya Katolike mpe koluka mosala mosusu mpo na kobikela. (Emoniseli 18:4) Nasengelaki mpe kokomisa libala na ngai ná Elvira na leta.

Moko ya makambo oyo ezalaki pɛtɛɛ te mpo na kotika ezalaki ezaleli na ngai ya nkanda. Bavɛrsɛ mibale ya Biblia esalisaki ngai mingi: Nzembo 11:5, oyo elobaka ete Yehova ayinaka mobulu mpe 1 Petro 3:7 oyo eteyaki ngai ete soki nalingi Yehova ayoka mabondeli na ngai, nasengeli kopesaka mwasi na ngai lokumu. Ntango nazalaki kokanisa na mozindo makambo oyo ezali na bavɛrsɛ yango mpe kobondela Yehova asunga ngai, nakómaki mokemoke kolonga ezaleli yango.

Sikoyo nazali na libota moko ya esengo. Nazali kosala makasi mpo nabongisa boyokani na ngai ná bana oyo nabotaki ná mwasi na ngai ya liboso mpe nasalisa libota oyo nazali na yango lelo oyo ezala makasi na kondima.

Ntango nazalaki mwana moke, nazalaki na mposa ya kokóma sango mpe kosalisa bato. Sikoyo namonaka ete bomoi na ngai ekómi mpenza na ntina. Nakómá koteya miziki mpo na koleisa libota. Nazali mpenza na botɔndi mingi ndenge Yehova amoniselaki ngai motema molai, oyo epesi ngai libaku ya kobongwana mpe ya kokóma moto malamu!