Mokanda ya mibale ya 15:1-38
15 Na mbula ya 27 ya boyangeli ya Yeroboame* mokonzi ya Yisraele, Azaria*+ mwana ya Amazia+ mokonzi ya Yuda akómaki mokonzi.+
2 Azaria azalaki na mbula 16 ntango akómaki mokonzi, mpe ayangelaki mbula 52 na Yerusaleme. Nkombo ya mama na ye ezalaki Yekolia, moto ya Yerusaleme.
3 Azaria akobaki kosala makambo oyo ezali malamu na miso ya Yehova, kaka ndenge tata na ye Amazia asalaki.+
4 Nzokande bisika oyo etombwaná elongwaki te na ekólo.+ Bato bazalaki se kopesa mbeka mpe kobimisa milinga ya mbeka na bisika oyo etombwaná.+
5 Yehova abɛlisaki mokonzi Azaria maladi moko, mpe atikalaki moto ya maba+ tii mokolo ya liwa na ye. Azalaki kofanda ye moko na ndako mosusu,+ wana mwana na ye Yotame+ azalaki kokamba ndako ya mokonzi mpe kosambisa bato ya ekólo.+
6 Makambo mosusu ya lisolo ya Azaria,+ ná nyonso oyo asalaki, ekomami na buku ya masolo ya kala ya bakonzi ya Yuda.
7 Na nsima, Azaria akufaki,*+ mpe bakundaki ye esika moko na bankɔkɔ na ye na Sité ya Davidi. Mpe mwana na ye Yotame akómaki mokonzi na esika na ye.
8 Na mbula ya 38 ya boyangeli ya Azaria+ mokonzi ya Yuda, Zekaria+ mwana ya Yeroboame akómaki mokonzi ya Yisraele na Samaria, mpe ayangelaki sanza motoba.
9 Asalaki makambo oyo ezali mabe na miso ya Yehova, kaka ndenge bankɔkɔ na ye basalaki. Atikaki te kosala masumu oyo Yeroboame mwana ya Nebate asalisaki Yisraele.+
10 Na nsima Shalume mwana ya Yabeshe asalelaki ye likita mpe abomaki ye+ na Ibleame.+ Nsima ya koboma ye, Shalume akómaki mokonzi na esika na ye.
11 Makambo mosusu ya lisolo ya Zekaria ekomami na buku ya masolo ya kala ya bakonzi ya Yisraele.
12 Yango ekokisaki maloba oyo Yehova alobaki na Yehu, ete: “Bana+ na yo bakofanda na kiti ya bokonzi ya Yisraele tii na libota ya minei.”+ Mpe esalemaki kaka bongo.
13 Mpe Shalume mwana ya Yabeshe akómaki mokonzi na mbula ya 39 ya boyangeli ya Uzia+ mokonzi ya Yuda, mpe ayangelaki sanza moko na Samaria.
14 Bongo Menaheme mwana ya Gadi autaki na Tireza,+ akendaki na Samaria, mpe abomaki Shalume+ mwana ya Yabeshe na Samaria. Nsima ya koboma ye, akómaki mokonzi na esika na ye.
15 Makambo mosusu ya lisolo ya Shalume, mpe likita oyo asalelaki mokonzi, ekomami na buku ya masolo ya kala ya bakonzi ya Yisraele.
16 Na ntango yango nde Menaheme alongwaki na Tireza mpe abebisaki engumba Tifisa ná bato na yango mpe teritware na yango, mpo baboyaki kofungolela ye baporte ya engumba. Abomaki bafandi ya engumba yango mpe apasolaki mabumu ya basi ya zemi.
17 Na mbula ya 39 ya boyangeli ya Azaria mokonzi ya Yuda, Menaheme mwana ya Gadi akómaki mokonzi ya Yisraele, mpe ayangelaki mbula zomi na Samaria.
18 Akobaki kosala makambo oyo ezali mabe na miso ya Yehova. Mikolo nyonso ya bomoi na ye, Menaheme atikaki te kosala masumu oyo Yeroboame mwana ya Nebate asalisaki Yisraele.+
19 Mokolo moko, Pulu+ mokonzi ya Asiri ayaki kobundisa ekólo Yisraele. Menaheme apesaki Pulu talanta* 1 000 ya palata mpo asalisa ye, mpo bokonzi na ye epikama makasi.+
20 Mpo na kozwa palata ya kopesa mokonzi ya Asiri, Menaheme afutisaki bato ya lokumu mpe ya bozwi+ na Yisraele mpako ya shekele* 50 ya palata na moto mokomoko. Bongo mokonzi ya Asiri atikaki Yisraele mpe azongaki na mboka na ye.
21 Makambo mosusu ya lisolo ya Menaheme,+ ná nyonso oyo asalaki, ekomami na buku ya masolo ya kala ya bakonzi ya Yisraele.
22 Na nsima Menaheme akufaki,* mpe mwana na ye Pekahia akómaki mokonzi na esika na ye.
23 Na mbula ya 50 ya boyangeli ya Azaria mokonzi ya Yuda, Pekahia mwana ya Menaheme akómaki mokonzi ya Yisraele na Samaria, mpe ayangelaki mbula mibale.
24 Akobaki kosala makambo oyo ezali mabe na miso ya Yehova. Atikaki te kosala masumu oyo Yeroboame mwana ya Nebate asalisaki Yisraele.+
25 Mokolo moko Peka+ mwana ya Remalia, oyo azalaki komanda-mosungi na ye, asalelaki mokonzi likita mpe abomaki ye na Samaria, na linɔ́ngi ya ndako ya mokonzi. Azalaki elongo na Argobe mpe Ariye.* Mibali 50 ya Gileade bazalaki mpe elongo na ye. Nsima ya koboma Pekahia, Peka akómaki mokonzi na esika na ye.
26 Makambo mosusu ya lisolo ya Pekahia, ná nyonso oyo asalaki, ekomami na buku ya masolo ya kala ya bakonzi ya Yisraele.
27 Na mbula ya 52 ya boyangeli ya Azaria mokonzi ya Yuda, Peka+ mwana ya Remalia akómaki mokonzi ya Yisraele na Samaria, mpe ayangelaki mbula 20.
28 Akobaki kosala makambo oyo ezali mabe na miso ya Yehova. Atikaki te kosala masumu oyo Yeroboame mwana ya Nebate asalisaki Yisraele.+
29 Na eleko ya boyangeli ya Peka mokonzi ya Yisraele, Tiglate-pilesere+ mokonzi ya Asiri ayaki kobɔtɔla bingumba oyo: Iyone, Abele-bete-maaka,+ Yanoa, Kedeshe,+ Hazore, Gileade+ mpe Galile, teritware mobimba ya Nafatali.+ Amemaki bafandi na yango na Asiri.+
30 Na nsima, Hoshea+ mwana ya Ela asalelaki Peka mwana ya Remalia likita mpe abomaki ye. Bongo akómaki mokonzi na esika na ye. Ezalaki na mbula ya 20 ya boyangeli ya Yotame+ mwana ya Uzia.
31 Makambo mosusu ya lisolo ya Peka, ná nyonso oyo asalaki, ekomami na buku ya masolo ya kala ya bakonzi ya Yisraele.
32 Na mbula ya mibale ya boyangeli ya Peka mwana ya Remalia mokonzi ya Yisraele, Yotame+ mwana ya Uzia+ mokonzi ya Yuda akómaki mokonzi.
33 Azalaki na mbula 25 ntango akómaki mokonzi, mpe ayangelaki mbula 16 na Yerusaleme. Nkombo ya mama na ye ezalaki Yerusha mwana ya Zadoke.+
34 Akobaki kosala makambo oyo ezali malamu na miso ya Yehova, kaka ndenge tata na ye Uzia asalaki.+
35 Nzokande bisika oyo etombwaná elongwaki te na ekólo. Bato bazalaki se kopesa mbeka mpe kobimisa milinga ya mbeka na bisika oyo etombwaná.+ Ye nde atongaki porte ya likoló ya ndako ya Yehova.+
36 Makambo mosusu ya lisolo ya Yotame, ná nyonso oyo asalaki, ekomami na buku ya masolo ya kala ya bakonzi ya Yuda.
37 Na mikolo wana, Yehova abandaki kotinda Rezine mokonzi ya Siri mpe Peka+ mwana ya Remalia mpo na kobundisa Yuda.+
38 Na nsima, Yotame akufaki* mpe bakundaki ye esika moko na bankɔkɔ na ye na Sité ya Davidi nkɔkɔ na ye. Mpe mwana na ye Ahaze akómaki mokonzi na esika na ye.
Maloba na nse
^ Elimboli, “Yehova asalisi.” Abengami Uzia na 2Bak 15:13; 2Nt 26:1-23; Yis 6:1; mpe Zek 14:5.
^ Elingi koloba, Yeroboame II.
^ To, “alalaki na liwa esika moko na bankɔkɔ na ye.”
^ To, “alalaki na liwa esika moko na bankɔkɔ na ye.”
^ To mbala mosusu, “Peka mwana ya Remalia elongo na Argobe mpe Ariye basalelaki ye likita mpe babomaki ye.”
^ To, “alalaki na liwa esika moko na bankɔkɔ na ye.”
