Epai ya Baefese 3:1-21
3 Na yango ngai, Paulo, nazali na bolɔkɔ+ mpo nazali moto ya Kristo Yesu mpe mpo nazali kosalisa bino, baoyo bozali Bayuda te—
2 soki, ya solo, boyokaki nsango etali mosala oyo bapesi ngai ya kapita+ ya boboto monene ya Nzambe mpo na bolamu na bino,
3 ete na nzela ya emoniseli moko nde bayebisaki ngai sekele mosantu, kaka ndenge nakomaki yango liboso na mokuse.
4 Bongo, ntango bokotánga yango, bokomona ete nayebi mpenza sekele mosantu+ ya Kristo.
5 Na mabota mosusu, sekele yango eyebisamaki te epai ya bana ya bato ndenge emonisami sikoyo epai ya bantoma na ye basantu mpe basakoli na lisalisi ya elimo,+
6 elingi koloba, na bomoko elongo na Kristo Yesu mpe na nzela ya nsango malamu, bato ya bikólo basengeli kozala bazwi-ya-libula elongo na biso, biteni ya nzoto elongo na biso+ mpe bato oyo bakozwa elaka elongo na biso.
7 Nakómaki mosaleli na yango na kotalela likabo ya ofele ya boboto monene ya Nzambe oyo emonisamaki epai na ngai na ndenge oyo nguya na ye esalaka.+
8 Bapesá boboto monene wana epai na ngai,+ moto moke koleka moto oyo aleki moke na kati ya basantu nyonso,+ mpo nasakola na bikólo nsango malamu oyo etali bomɛngo ya Kristo oyo ekoki komekama te
9 mpe nasala ete moto nyonso amona ndenge sekele mosantu+ yango ezali kotambwisama, oyo uta bantango ya kalakala mpenza, ebombamá na kati ya Nzambe, oyo azalisaki biloko nyonso.
10 Ezalaki bongo mpo ete, na nzela ya lisangá,+ bwanya ya Nzambe oyo ezali ndenge na ndenge mpenza eyebana sikoyo na baguvɛrnema mpe bakonzi na bisika ya likoló.+
11 Yango eyokani na mokano ya seko oyo abongisaki na likambo oyo etali Kristo,+ Yesu Nkolo na biso.
12 Lokola tozali na kondima epai ya Kristo, tozali na elobeli ya polele mpe tozali na bonsomi+ ya kobondela Nzambe wana tozali kotyela ye motema.
13 Na yango, nasɛngi bino bólɛmba nzoto te mpo na minyoko oyo nazali kokutana na yango mpo na bino, mpamba te yango elakisi nkembo mpo na bino.+
14 Mpo na ntina yango nagumbaka mabɔlɔngɔ liboso ya Tata,
15 mpo ye nde asali ete mabota nyonso na likoló mpe na mabele ezala.*
16 Nazali kobondela ete Nzambe oyo azali na nkembo mingi akómisa bino makasi na bomoto na bino ya kati,+ na nzela ya nguya oyo elimo na ye epesaka,
17 mpo ete na nzela ya kondima na bino, bófandisa Kristo na mitema na bino na bolingo.+ Bópika misisa+ mpe bótɛlɛma makasi likoló ya moboko,+
18 mpo bino elongo na basantu nyonso bózala mpenza na likoki ya kososola malamumalamu bonene, bolai, bosanda mpe bozindo,
19 mpe koyeba bolingo ya Kristo+ oyo eleki boyebi, mpo bótonda na nyonso oyo Nzambe apesaka.
20 Nzokande na moto oyo, na boyokani na nguya na ye oyo ezali kosala mosala na kati na biso,+ akoki kosala mingi mpenza koleka makambo nyonso oyo tosɛngaka to oyo eyelaka biso na makanisi,+
21 nkembo ezala na ye na nzela ya lisangá mpe na nzela ya Kristo Yesu mpo na mabota nyonso libela na libela. Amen.
Maloba na nse
^ Lil., “ezwa nkombo.”
