Kobima 10:1-29
10 Bongo Yehova alobaki na Moize ete: “Kɔtá epai ya Farao, mpo natiki motema na ye mpe mitema ya basaleli na ye ekóma makasi,+ mpo namonisa bilembo na ngai oyo liboso na ye,+
2 mpe mpo osakola epai ya bana na yo mpe epai ya bana ya bana na yo mpasi oyo namonisi Ezipito mpe bilembo oyo nasali kati na bango;+ mpe bokoyeba mpenza ete nazali Yehova.”
3 Bongo Moize ná Arona bakɔtaki epai ya Farao mpe balobaki na ye ete: “Talá oyo Yehova Nzambe ya Baebre alobi: ‘Tii ntango nini okoboya kotosa ngai?+ Tiká bato na ngai bákende kosalela ngai.
4 Mpo soki ozali kaka koboya kotika bato na ngai bákende, talá lobi nakomema mayoyo na kati ya bandelo na yo.
5 Mpe yango ekozipa etando ya mabele, mpe likoki ya komona mabele ekozala te. Ekolya biloko oyo etikalaki oyo ebebaki te na mbula ya mabanga mpe oyo etikalaki mpo na bino, mpe ekolya nzete na bino nyonso oyo ezali kokola na elanga.+
6 Ekotonda na bandako na yo, na bandako ya basaleli na yo nyonso mpe na bandako ya Ezipito mobimba na ndenge oyo batata na yo mpe batata ya batata na yo bamoná yango naino te banda ntango oyo bango bazalaki na mokili oyo tii na mokolo ya lelo.’”+ Na yango abalukaki abimaki epai ya Farao.
7 Na nsima, basaleli ya Farao balobaki na ye ete: “Tii ntango nini mobali oyo akokoba kozala likama* mpo na biso? Tiká bango bákende mpo básalela Yehova Nzambe na bango. Ozali komona te ete Ezipito ebebi?”
8 Na yango, bazongisaki Moize ná Arona epai ya Farao, mpe alobaki na bango ete: “Bókende, bósalela Yehova Nzambe na bino. Kasi banani nde bakokende?”
9 Bongo Moize alobaki ete: “Tokokende elongo na bilenge na biso, mibange na biso, bana na biso ya mibali, bana na biso ya basi, bampate na biso mpe bangɔmbɛ na biso,+ mpo tokosalela Yehova fɛti.”+
10 Alobaki na bango ete: “Soki mpenza natiki bino bókende bino ná bana na bino, wana Yehova azali na bino!+ Ezali polele ete bozali kokana kosala likambo moko ya mabe.
11 Te! Kaka mibali nde bakoki kokende, mpo na kosalela Yehova, mpamba te yango nde bosɛngaki.” Na yango babenganaki bango liboso ya Farao.
12 Sikoyo Yehova alobaki na Moize ete: “Sembolá lobɔkɔ na yo likoló ya mokili ya Ezipito mpo mayoyo eya, mpe emata na mokili ya Ezipito mpe elya milona nyonso ya mokili, eloko nyonso oyo mbula ya mabanga etikaki.”
13 Na mbala moko Moize asembolaki lingenda na ye likoló ya mokili ya Ezipito, mpe Yehova asalaki ete mopɛpɛ ya ɛsti epɛpa likoló ya mokili na moi wana mobimba mpe na butu wana mobimba. Na ntɔngɔ mopɛpɛ ya ɛsti eyaki na mayoyo.
14 Mpe mayoyo emataki na mokili mobimba ya Ezipito mpe ekitaki na teritware mobimba ya Ezipito.+ Ezalaki mpenza nsɔmɔ;+ liboso na yango, mayoyo lokola oyo wana ebimá naino boye te, mpe ekotikala lisusu kobima ebele boye te.
15 Ezipaki etando mobimba ya mokili, mpe ekómisaki mokili molili; elyaki milona nyonso ya mokili mpe mbuma nyonso ya banzete oyo mbula ya mabanga etikaki; eloko ya mobesu ata moko te etikalaki na banzete to na milona ya elanga na mokili mobimba ya Ezipito.
16 Bongo Farao abengaki Moize ná Arona nokinoki mpe alobaki ete: “Nasaleli Yehova Nzambe na bino mpe bino lisumu.
17 Sikoyo nabondeli bino, bólimbisa lisumu na ngai kaka mbala oyo, mpe bóbondela Yehova Nzambe na bino ete alongolela ngai etumbu oyo ya liwa.”
18 Bongo abimaki* epai ya Farao mpe abondelaki Yehova.+
19 Bongo Yehova abongolaki mopɛpɛ, ekómaki mopɛpɛ makasi ya wɛsti, mpe yango elongolaki mayoyo mpe ememaki yango na Mbu Motane. Liyoyo ata moko te etikalaki na teritware mobimba ya Ezipito.
20 Kasi, Yehova atikaki motema ya Farao ekóma makasi,+ mpe atikaki Bayisraele bákende te.
21 Bongo Yehova alobaki na Moize ete: “Sembolá lobɔkɔ na yo na likoló mpo molili ezala na mokili ya Ezipito, molili makasi, oyo moto akoki ata kosimba yango.”
22 Na mbala moko, Moize asembolaki lobɔkɔ na ye na likoló, mpe molili makasi ezalaki na mokili mobimba ya Ezipito mpe eumelaki mikolo misato.+
23 Bazalaki komonana te bango na bango, mpe esalaki mikolo misato moto moko te kati na bango alongwaki na esika na ye; kasi Bayisraele nyonso bazalaki na pole na bisika na bango ya kofanda.+
24 Na nsima, Farao abengaki Moize mpe alobaki ete: “Bókende, bósalela Yehova.+ Kaka bampate na bino ná bangɔmbɛ na bino nde ekotikala. Bana na bino mpe bakoki kokende elongo na bino.”
25 Kasi Moize alobaki ete: “Yo moko okopesa biso* bambeka mpe makabo ya kotumba, mpe tokopesa yango Yehova Nzambe na biso.+
26 Bibwɛlɛ na biso mpe ekokende elongo na biso. Nyama* ata moko te ekotikala, mpo tokosalela mosusu mpo na kosambela Yehova Nzambe na biso, mpe toyebi te oyo tokopesa mpo na kosambela Yehova tii ntango tokokóma kuna.”
27 Kasi Yehova atikaki motema ya Farao ekóma makasi, mpe andimaki te kotika bango bákende.+
28 Farao alobaki na ye ete: “Longwá liboso na ngai! Komeka koluka komona elongi na ngai lisusu te, mpo mokolo okomona elongi na ngai okokufa.”
29 Na yango, Moize alobaki ete: “Kaka ndenge olobi, nakoluka lisusu komona elongi na yo te.”
Maloba na nse
^ Lil., “motambo.”
^ Emonani ete ezali Moize.
^ To, “Pesá biso nzela tózwa.”
^ Lil., “Sabo.”
