Kobima 17:1-16
17 Liyangani mobimba ya Bayisraele elongwaki na esobe ya Sine+ mpe esalaki mobembo ndambondambo na kolanda etinda ya Yehova,+ mpe batyaki kaa na Refidime.+ Kasi mai ezalaki te mpo bato bámɛla.
2 Bongo bato babandaki koswanisa Moize+ mpe koloba ete: “Pesá biso mai mpo tómɛla.” Kasi Moize alobaki na bango ete: “Mpo na nini bozali koswanisa ngai? Mpo na nini bozali kaka komeka Yehova?”+
3 Kasi kuna bato bazalaki mpenza na mposa ya mai, mpe bakobaki koimaima mpo na Moize+ mpe koloba ete: “Mpo na nini obimisi biso na Ezipito mpo na koboma biso ná bana na biso mpe bibwɛlɛ na biso na mposa ya mai?”
4 Nsukansuka Moize abelelaki Yehova ete: “Nasala nini na bato oyo? Etikali moke bábamba ngai mabanga!”
5 Bongo Yehova alobaki na Moize ete: “Leká liboso ya bato mpe zwá bato mosusu kati na bankulutu ya Yisraele bázala elongo na yo mpe zwá lingenda na yo oyo obɛtaki na yango Ebale Nile.+ Zwá yango na lobɔkɔ na yo mpe kende.
6 Mpe talá! nakotɛlɛma liboso na yo kuna likoló ya libanga na Horebe. Osengeli kobɛta libanga, mpe mai ekobima na yango, mpe bato bakomɛla yango.”+ Moize asalaki bongo na miso ya bankulutu ya Yisraele.
7 Na yango apesaki esika yango nkombo Masa*+ mpe Meriba,*+ mpo na koswanisa oyo Bayisraele baswanisaki Moize mpe mpo batyaki Yehova na komekama+ na ndenge bazalaki koloba ete: “Yehova azali kati na biso to te?”
8 Na nsima Baamaleke+ bayaki kobundisa Yisraele na Refidime.+
9 Na yango Moize alobaki na Yosua+ ete: “Ponelá biso mibali mpe kende kobunda na Baamaleke. Lobi nakotɛlɛma na nsɔngɛ ya ngomba moke, nakozala na lingenda ya Nzambe ya solo na lobɔkɔ na ngai.”
10 Bongo Yosua asalaki kaka ndenge Moize alobaki na ye,+ mpe abundisaki Baamaleke. Mpe Moize, Arona ná Hure+ bamataki na nsɔngɛ ya ngomba moke.
11 Ntango nyonso oyo Moize azalaki kotombola mabɔkɔ na ye, Bayisraele bazalaki kolonga, kasi ntango azalaki kokitisa mabɔkɔ na ye, Baamaleke bazalaki kolonga.
12 Ntango mabɔkɔ ya Moize ekómaki kilo, bazwaki libanga mpe batyaki yango na nse na ye, mpe afandaki likoló na yango. Na nsima, Arona ná Hure basimbaki mabɔkɔ na ye, moko asimbaki epai oyo mpe mosusu epai oyo, na yango mabɔkɔ na ye etikalaki kaka likoló* tii moi elalaki.
13 Mpe Yosua alongaki Amaleke ná bato na ye na mopanga.+
14 Sikoyo Yehova alobaki na Moize ete: “Komá likambo oyo na buku mpo ezala ekaniseli,* yebisá yango mpe Yosua ete: ‘Nakolongola mpenza Baamaleke na nse ya lola mpe bakokanisa bango lisusu te.’”+
15 Na yango Moize atongaki etumbelo mpe apesaki yango nkombo Yehova-nisi,*
16 alobaki ete: “Mpo mabɔkɔ ya Baamaleke etɛmɛli kiti ya bokonzi ya Yah,+ Yehova akobunda etumba ná bango libota na libota.”+
Maloba na nse
^ Elimboli, “koswanisa.”
^ Elimboli, “komeka; komekama.”
^ To, “etikalaki ngwi.”
^ To, “bokundoli.”
^ Elimboli, “Yehova azali esika na ngai ya komibomba.”
