Kobima 22:1-31
22 “Soki moto ayibi ngɔmbɛ-mobali to mpate mpe abomi yango to atɛki yango, akofuta ngɔmbɛ-mibali mitano mpo na ngɔmbɛ-mobali yango mpe bampate minei mpo na mpate yango.+
2 (“Soki bakuti moyibi+ azali kobuka ndako mpo ayiba, babɛti ye mpe akufi, ngambo ya makila na ye ezali te.
3 Kasi soki esalemi nsima ya kobima ya moi, ngambo ezali mpo na makila na ye.)
“Asengeli kofuta. Soki azali na eloko te, bongo asengeli kotɛkama mpo na biloko oyo ayibaki.
4 Soki eloko oyo ayibaki emonani epai na ye na bomoi, ezala ngɔmbɛ-mobali to mpunda to mpe mpate, asengeli kofuta yango mbala mibale.
5 “Soki moto azali koleisa banyama na ye na elanga to na elanga ya vinyo mpe atiki yango ekende kolya na elanga ya moto mosusu, asengeli kofuta eloko oyo eleki malamu na elanga na ye to eloko oyo eleki malamu na elanga na ye ya vinyo.
6 “Soki mɔtɔ ebandi kopela mpe epalangani tii na matiti ya nzubɛ, mpe ezikisi maboke ya matiti ya mbuma ya blé* to mbuma oyo etɛlɛmi naino to elanga, moto oyo apelisaki mɔtɔ yango asengeli kofuta eloko oyo eziki.
7 “Soki moto apesi moninga na ye mbongo to biloko mpo abatela mpe bayibi yango na ndako ya moto yango, soki moyibi yango amonani, asengeli kofuta mbala mibale.+
8 Soki moyibi amonani te, basengeli komema nkolo-ndako epai ya Nzambe ya solo+ mpo na koyeba soki azwaki* biloko ya moninga na ye to te.
9 Na likambo nyonso etali kobuka mobeko, oyo etaleli ngɔmbɛ-mobali, mpunda, mpate, elamba, to eloko nyonso oyo ebungi, oyo moto akoki koloba ete: ‘Ezali ya ngai!’ bango nyonso mibale bakokende liboso ya Nzambe ya solo.+ Moto oyo Nzambe akoloba ete azali na ngambo akofuta moninga na ye mbala mibale.+
10 “Soki moto apesi moninga na ye mpunda to ngɔmbɛ-mobali to mpate to nyama nyonso ya mboka mpo abatela, mpe yango ekufi to eteni moko ya nzoto na yango ebebi to ememami ntango moto moko te amonaki yango,
11 bango mibale bakolapa ndai liboso ya Yehova, mpo na komonisa ete azwaki biloko ya moninga na ye te; mpe nkolo ya nyama yango asengeli kondima yango. Moninga ya moto yango akofuta te.+
12 Kasi soki bayibi nyama yango epai na ye, akofuta nkolo na yango.
13 Soki nyama ya zamba epasoli yango, akomema yango mpo ezala litatoli. Akofuta te nyama oyo nyama ya zamba epasoli.
14 “Kasi soki moto adefi nyama ya moninga na ye, mpe eteni moko ya nzoto na yango ebebi to nyama yango ekufi wana nkolo na yango azali elongo na yango te, moto oyo adefaki yango asengeli kofuta.
15 Soki nkolo na yango azali elongo na yango, akofuta te. Soki bafutelaki yango mpo na mosala, yango esengeli kokɔta na motuya ya lifuti ya mosala yango.
16 “Sikoyo soki mobali moko alengoli ngɔndɔ moko oyo alakami na libala te mpe alali na ye, asengeli kofuta motuya oyo bapesaka mpo na libala mpe akokóma mwasi na ye.+
17 Soki tata na ye aboyi mpenza kopesa ye mwana mwasi yango, akofuta motuya ya mbongo oyo bakatá mpo na libala.
18 “Osengeli te kotika na bomoi mwasi oyo azali nganga-nkisi.+
19 “Moto nyonso oyo alali na nyama asengeli mpenza kobomama.+
20 “Moto oyo apesi banzambe mosusu mbeka oyo esengeli kopesama kaka na Yehova, asengeli kobomama.+
21 “Osengeli te komonisa moto oyo afandi mopaya mpasi to konyokola ye,+ mpo bino mpe bofandaki bapaya na mokili ya Ezipito.+
22 “Bosengeli te konyokola mwasi oyo mobali akufá to mwana oyo tata akufá.+
23 Soki onyokoli ye ata moke mpe aleleli ngai, nakoyoka mpenza kolela na ye;+
24 mpe nkanda na ngai ekongala, mpe nakoboma bino na mopanga, mpe basi na bino bakokóma basi oyo mibali bakufá, mpe bana na bino bakozala bana oyo batata bakufá.
25 “Soki odefisi mbongo epai ya mobola* na kati ya bato na ngai, oyo azali kofanda elongo na yo, osengeli te kokóma lokola modefisi oyo azali kosɛnga ye benefisi. Bosengeli kosɛnga ye benefisi te.+
26 “Soki okangi elamba ya moto mosusu lokola ndanga,+ okozongisela ye yango na ntango moi ekolala.
27 Mpo yango kaka nde eloko na ye ya komizipa, ezali elamba na ye mpo na kozipa nzoto na ye;* ntango akolala akomizipa nini?+ Ntango akolelela ngai, nakoyoka mpenza, mpo nazali na motema mawa.*+
28 “Osengeli te kolakela Nzambe mabe+ to kolakela mokonzi ya bato na yo mabe.+
29 “Osengeli te kokakatana kopesa mbeka ya ebele ya biloko na yo mpe biloko oyo etondani na ekamwelo na yo.*+ Okopesa ngai mwana na yo ya liboso kati na bana na yo ya mibali.+
30 Talá ndenge osengeli kosalela ngɔmbɛ-mobali na yo mpe mpate na yo:+ Ekozala elongo na mama na yango mikolo nsambo. Na mokolo ya mwambe, okopesa ngai yango.+
31 “Bosengeli kozala basantu liboso na ngai,+ mpe bosengeli kolya ata mosuni moko te ya nyama oyo nyama ya zamba epasoli na esobe.+ Bosengeli kobwakela yango bambwa.
Maloba na nse
^ To, “ɔrje.”
^ Lil., “atyaki lobɔkɔ na.”
^ To, “moto ya mpasi.”
^ Lil., “loposo.”
^ To, “ngolu.”
^ Elingi koloba, ekamwelo ya mafuta mpe ekamwelo ya vinyo.
