Kobima 33:1-23
33 Yehova alobaki lisusu na Moize ete: “Longwá awa mpe kende, yo ná bato oyo obimisaki na mokili ya Ezipito. Kende na mokili oyo nalapelaki Abrahama, Yisaka mpe Yakobo ndai ete: ‘Nakopesa yango libota* na yo.’+
2 Nakotinda anzelu liboso na yo+ mpe akobengana Bakanana, Baamore, Bahiti, Baperizi, Bahivi ná Bayebusi.+
3 Matá na mokili oyo etondi na miliki mpe na mafuta ya nzoi.+ Kasi nakokende te na kati na bino, mpo bozali bato moko ya motó makasi,*+ mpe nakoki kosilisa bino na nzela.”+
4 Ntango bato bayokaki liloba wana ya makasi, babandaki kolela, mpe moko te kati na bango alataki biloko na ye ya kobongisa nzoto.
5 Yehova alobaki na Moize ete: “Lobá na Bayisraele ete: ‘Bozali bato ya motó makasi.*+ Na ntango moke kaka, nakoki koleka na kati na bino mpe kosilisa bino mpenza.+ Sikoyo bólongola biloko na bino ya kobongisa nzoto, wana nazali kokanisa nini nakosala bino.’”
6 Na yango banda na Ngomba Horebe, Bayisraele balataki te* biloko na bango ya kobongisa nzoto.
7 Sikoyo Moize azwaki hema na ye mpe atɛlɛmisaki yango na libándá ya kaa, mwa mosika na kaa, mpe abengaki yango hema ya kokutana. Moto nyonso oyo alingaki kotuna Yehova,+ azalaki kobima mpe kokende na hema ya kokutana, oyo ezalaki na libándá ya kaa.
8 Ntango kaka Moize azalaki kobima mpe kokende na hema, bato nyonso bazalaki kotɛlɛma, mpe moto na moto azalaki na ekɔtelo ya hema na ye, mpe bazalaki kotala Moize tii ntango akokɔta na hema.
9 Ntango kaka Moize azalaki kokɔta na hema, likonzí ya lipata+ ezalaki kokita, mpe ezalaki kotɛlɛma na ekɔtelo ya hema wana Nzambe azalaki kosolola na Moize.+
10 Ntango bato nyonso bamonaki likonzí ya lipata etɛlɛmi na ekɔtelo ya hema, mokomoko na bango atɛlɛmaki mpe agumbamaki na ekɔtelo ya hema na ye.
11 Yehova azalaki koloba na Moize mpenza boye na miso,+ kaka ndenge moto akoki koloba na moto mosusu. Ntango azalaki kozonga na kaa, Yosua,+ mwana ya Nunu, mosungi mpe mosaleli na ye+ azalaki kolongwa te na hema.
12 Sikoyo Moize alobaki na Yehova ete: “Talá, ozali koloba na ngai ete: ‘Kambá bato oyo,’ kasi oyebisi ngai te nani okotinda elongo na ngai. Olobi lisusu ete: ‘Nayebi yo mpenza na nkombo,* mpe lisusu ondimami na miso na ngai.’
13 Nabondeli yo, soki nandimami na miso na yo, salá ete nayeba banzela na yo,+ mpo nayeba yo, mpe nakoba kondimama na miso na yo. Mpe talelá ekólo oyo ete ezali bato na yo.”+
14 Bongo alobaki ete: “Ngai moko nakokende* elongo na yo+ mpe nakopesa yo bopemi.”+
15 Na yango, Moize alobaki na ye ete: “Soki yo moko okokende* elongo na ngai te, kolongola biso te na esika oyo.
16 Ndenge nini ekoyebana ete nandimami na miso na yo, ngai ná bato na yo? Ezali te ndenge okotambola elongo na biso+ nde ekosala ete ngai ná bato na yo tókesana na bato mosusu nyonso oyo bazali na mabele?”+
17 Yehova alobaki lisusu na Moize ete: “Nakosala mpe likambo oyo osɛngi mpo ondimami na miso na ngai mpe nayebi yo na nkombo.”
18 Na yango, alobaki ete: “Nabondeli yo, monisá ngai nkembo na yo.”
19 Kasi alobaki ete: “Nakosala ete bolamu na ngai nyonso eleka liboso ya elongi na yo, mpe nakosakola nkombo ya Yehova liboso na yo;+ mpe nakondima moto oyo nakondima, mpe nakoyokela mawa moto oyo nakoyokela mawa.”+
20 Kasi abakisaki ete: “Okoki te komona elongi na ngai, mpo moto moko te akoki komona ngai mpe atikala na bomoi.”
21 Yehova alobaki lisusu ete: “Talá esika ezali pembeni na ngai. Tɛlɛmá likoló ya libanga.
22 Wana nkembo na ngai ezali koleka, nakotya yo na lidusu moko ya libanga, mpe nakotya lobɔkɔ na ngai mpo na kozipa yo tii nakoleka.
23 Nsima na yango nakolongola lobɔkɔ na ngai, mpe okomona mokɔngɔ na ngai. Kasi elongi na ngai ekoki komonana te.”+
Maloba na nse
^ Lil., “momboto.”
^ Lil., “nkingo makasi.”
^ Lil., “nkingo makasi.”
^ Lil., “balongolaki.”
^ To, “naponi yo.”
^ Lil., “elongi na ngai ekokende.”
^ Lil., “Soki elongi na yo ekokende.”
