Nahumu 1:1-15
1 Liyebisi mpo na Ninive:+ Buku ya emonaneli ya Nahumu,* moto ya Elekoshe:
2 Yehova azali Nzambe oyo asɛngaka kokangama kaka na ye+ mpe oyo azongisaka mabe;Yehova azongisaka mabe mpe alingi komonisa nkanda na ye.+
Yehova azongiselaka batɛmɛli na ye mabe,Mpe akangelaka banguna na ye nkanda.
3 Yehova ayokaka nkanda noki te+ mpe azali na nguya mingi,+Kasi Yehova akozanga soki moke te kopesa etumbu oyo esengeli.+
Ayaka na* kati ya mopɛpɛ makasi oyo ebebisaka mpe na kati ya mbula ya mopɛpɛ makasi,Mpe mapata ezali putulu ya makolo na ye.+
4 Apamelaka mbu,+ mpe akaukisaka yango;Asalaka ete bibale nyonso ekauka.+
Na Bashane mpe na Karamele, matiti ekauki.+Bafololo ya Liban mpe ekauki.
5 Bangomba minene eninganaka mpo na ye,Mpe bangomba mike enyangwaka.+
Mabele ekotombwama mpo na elongi na ye,Mabele mpe baoyo nyonso bafandaka wana.+
6 Nani akoki kotɛlɛma liboso ya nkanda na ye?+
Nani akoki kokanga motema soki nkanda na ye engali?+
Nkanda na ye ekosopana lokola mɔtɔ,Mpe mabanga minene ekopasuka mpo na ye.
7 Yehova azali malamu,+ esika makasi ya libateli na mokolo ya mpasi.+
Atyaka likebi* na baoyo bayei komibomba epai na ye.+
8 Na nzela ya mpela moko monene, akobebisa mpenza esika yango,*Mpe molili ekolanda banguna na ye.
9 Eloko nini bokokana kosala Yehova?
Ye azali kobebisa nyonso.
Mpasi ekoya mpo na mbala ya mibale te.+
10 Mpo bazali lokola banzubɛ oyo elíngamalíngamá,Mpe bazali lokola bato oyo balangwe masanga,*Kasi bakozika lokola matiti oyo ekauká.
11 Moto moko akobima epai na yo oyo azali kokana kosalela Yehova mabe,Oyo azali kopesa toli oyo ezangá ntina.
12 Talá oyo Yehova alobi:
“Atako bazali na makasi mpe bazali ebele,Bakolongolama mpe bakobebisama.*
Nasambwisaki yo,* kasi nakosambwisa yo lisusu te.
13 Mpe sikoyo nakobuka ekanganeli na ye mpo elongwa likoló na yo,+Mpe nakokata bansinga oyo ekangi yo.
14 Yehova apesi mitindo mpo na yo* ete:‘Okozala lisusu na mokitani te oyo akobengama na nkombo na yo.
Nakolongola bikeko ya nzete mpe ya mabanga mpe bikeko ya ebende* na ndako* ya banzambe na yo.
Nakobongisela yo lilita, mpo ozali na ntina te.’
15 Talá likoló ya bangomba, makolo ya moto oyo azali koya na nsango malamu,Moto oyo azali kosakola kimya.+
Salá bafɛti na yo,+ Ee Yuda, kokisá bilako na yo,Mpo moto mpamba akoleka lisusu epai na yo te.
Akobebisama mpenza.”
Maloba na nse
^ Elimboli, “mobɔndisi.”
^ Lil., “Nzela na ye ezali na.”
^ To, “Akipaka.” Lil., “Ayebaka.”
^ Lil., “esika na ye,” elingi koloba Ninive.
^ To, “masanga oyo basali na mbuma ya blé.”
^ To mbala mosusu, “mpe akoleka.”
^ Elingi koloba, Yuda.
^ Elingi koloba, Asiri.
^ To, “ya ebende oyo enyangwisami.”
^ To, “tempelo.”
