Nzembo 119:1-176
-
Botɔndi mpo na liloba ya Nzambe oyo ezali na motuya
-
‘Ndenge nini elenge akoki kopɛtola nzela na ye?’ (9)
-
“Nalingaka makundoli na yo mingi” (24)
-
“Nalingaka mobeko na yo mingi mpenza!” (97)
-
“Nakómi na mayele ya kososola mingi koleka bateyi na ngai nyonso” (99)
-
“Liloba na yo ezali mwinda na lokolo na ngai” (105)
-
“Liloba na yo mobimba ezali solo” (160)
-
Kimya mpo na baoyo balingaka mobeko ya Nzambe (165)
-
א [Alef]
119 Esengo na bato oyo bazali kotambola na ezaleli ya kozanga mbeba,*Baoyo batambolaka na mobeko ya Yehova.+
2 Esengo na baoyo bazali kotosa makundoli na ye,+Oyo bazali kolukaluka ye na motema na bango mobimba.+
3 Bazali kosala likambo moko te ya kozanga bosembo;Batambolaka na banzela na ye.+
4 Opesá etindaEte bátosa mpenza mitindo na yo.+
5 Soki napikamaka makasi*+Mpo na kotosa malako na yo!
6 Boye nalingaki koyoka nsɔni te+Ntango nataleli mitindo na yo nyonso.
7 Nakosanzola yo na bosembo ya motemaNtango nazali koyekola bikateli na yo ya lisambisi ya boyengebene.
8 Nakobatela malako na yo.
Kosundola ngai ata moke te.
ב [Bet]
9 Ndenge nini elenge mobali akoki kopɛtola nzela na ye?
Soki amibateli mpe asaleli liloba na yo.+
10 Naluki yo na motema na ngai mobimba.
Kotika te nabunga nzela ya mitindo na yo.+
11 Nabombi liloba na yo malamu mpenza na motema na ngai+Mpo nasalela yo lisumu te.+
12 Ee Yehova, osanzolama;Teyá ngai malako na yo.
13 Na mbɛbu na ngai, nasakoliBikateli nyonso ya lisambisi oyo olobi.
14 Nasepeli mingi na makundoli na yo+Koleka biloko mosusu nyonso ya motuya.+
15 Nakokanisa na mozindo* mitindo na yo,+Mpe nakotala banzela na yo.+
16 Nalingaka mitinda na yo mingi.
Nakobosana liloba na yo te.+
ג [Gimel]
17 Salelá mosaleli na yo makambo na boboto,Mpo nazala na bomoi mpe nabatela liloba na yo.+
18 Fungolá miso na ngai mpo namona poleleMakambo ya kokamwa oyo euti na mobeko na yo.
19 Nazali kaka moto oyo afandi mopaya na mokili.+
Kobombela ngai mitindo na yo te.
20 Ntango nyonso, natondaka* na mposa makasiYa bikateli na yo ya lisambisi.
21 Opameli bato ya lofundo,Bato oyo balakelami mabe, baoyo batiki mitindo na yo.+
22 Longolá kosɛka mpe lityo liboso na ngai,*Mpo natosi makundoli na yo.
23 Ata ntango bankumu bafandi elongo mpe balobi mpo na kotɛmɛla ngai,Mosaleli na yo azali kokanisa na mozindo* malako na yo.
24 Nalingaka makundoli na yo mingi;+Ezali bapesi-toli na ngai.+
ד [Dalet]
25 Namilalisi na putulu.+
Batelá ngai na bomoi ndenge olobaki.+
26 Nayebisaki yo banzela na ngai, mpe oyanolaki ngai;Teyá ngai malako na yo.+
27 Salisá ngai nakanga ntina* ya mitindo na yo,Mpo nakanisa na mozindo* misala na yo ya kokamwa.+
28 Nazangi mpɔngi mpo na mawa.
Pesá ngai makasi ndenge olobaki.
29 Longolá nzela ya lokuta mosika na ngai,+Mpe moniselá ngai boboto na mobeko na yo.
30 Naponi nzela ya bosembo.+
Nandimi ete bikateli na yo ya lisambisi ebongi mpenza.
31 Nakangami na makundoli na yo.+
Ee Yehova, koyokisa ngai nsɔni te.+
32 Nakolanda mpenza* nzela ya mitindo na yoMpo ofungoli motema na ngai mpo na yango.*
ה [He]
33 Ee Yehova, teyá ngai+ nzela ya malako na yo,Mpe nakotosa yango tii na nsuka.+
34 Pesá ngai mayele,Mpo natosa mobeko na yoMpe nabatela yango na motema na ngai mobimba.
35 Tambwisá ngai na nzela ya mitindo na yo,+Mpo yango nde esepelisaka ngai.
36 Salá ete motema na ngai elinga makundoli na yo,Kasi na matomba ya moimi te.+
37 Salisá ngai natala te eloko oyo ezangi ntina;+Batelá ngai na bomoi na nzela na yo.
38 Kokiselá mosaleli na yo elaka* na yoMpo bábanga yo.*
39 Longolá nsɔni oyo nazali kobanga,Mpo bikateli na yo ya lisambisi ezali malamu.+
40 Talá ndenge nazali na mposa makasi ya mitindo na yo.
Na bosembo na yo, batelá ngai na bomoi.
ו [Waw]
41 Ee Yehova, moniselá ngai bolingo na yo ya sembo,+Lobiko na yo, na kolanda elaka* na yo;+
42 Boye nakoyanola moto oyo azali kotumola ngai,Mpo natyeli liloba na yo motema.
43 Kolongola te liloba ya solo na monɔkɔ na ngai,Mpo natye elikya na* ekateli na yo ya lisambisi.
44 Nakobatela mobeko na yo ntango nyonso,Libela na libela.+
45 Mpe nakotambolatambola na esika ya libateli,*+Mpo naluka mitindo na yo.
46 Nakolobela makundoli na yo liboso ya bakonzi,Mpe nakoyoka nsɔni te.+
47 Nalingaka mitindo na yo mingi,Ɛɛ, nalingaka yango.+
48 Nakotombola mabɔkɔ na ngai mpo na mitindo na yo oyo nalingá,+Mpe nakokanisa na mozindo* malako na yo.+
ז [Zayin]
49 Kanisá lisusu liloba olobaki* na mosaleli na yo,Oyo na nzela na yango opesi ngai elikya.*
50 Yango nde libɔndisi na mpasi na ngai,+Mpo liloba na yo ebateli ngai na bomoi.
51 Bato ya lofundo basɛki ngai mingi mpenza,Kasi natiki mobeko na yo te.+
52 Ee Yehova, nakanisi lisusu bikateli na yo ya lisambisi ya kala,+Mpe yango ebɔndisaka ngai.+
53 Nazali na nkanda makasi mpo na bato mabe,Oyo basundoli mobeko na yo.+
54 Malako na yo ezali nzembo na ngaiEsika nyonso oyo nafandi.*
55 Ee Yehova, na butu, nakanisaka lisusu nkombo na yo,+Mpo nabatela mobeko na yo.
56 Namesani kosala bongoMpo natosi mitindo na yo.
ח [Het]
57 Yehova azali likabo na ngai;+Nalaki ete nakobatela maloba na yo.+
58 Nabondeli yo na motema* na ngai mobimba;+Moniselá ngai boboto na kolanda elaka* na yo.+
59 Natali malamumalamu banzela na ngai,Mpo nazongisa makolo na ngai na makundoli na yo.+
60 Nasalaki nokinoki, mpe naumelaki teMpo na kobatela mitindo na yo.+
61 Bansinga ya bato mabe ezingaki ngai,Kasi nabosanaka mobeko na yo te.+
62 Na katikati ya butu nalamukaka mpo na kopesa yo matɔndi+Mpo na bosembo ya bikateli na yo ya lisambisi.
63 Nazali moninga ya baoyo nyonso babangaka yoMpe ya baoyo bazali kobatela mitindo na yo.+
64 Ee Yehova, bolingo na yo ya sembo etondisi mabele;+Teyá ngai malako na yo.
ט [Tet]
65 Osaleli mosaleli na yo malamu,Ee Yehova, na kolanda liloba na yo.
66 Teyá ngai bososoli mpe boyebi,+Mpo natyeli mitindo na yo motema.
67 Liboso namona mpasi, nazalaki kobunga nzela,*Kasi sikoyo nabateli liloba na yo.+
68 Ozali malamu+ mpe misala na yo ezali malamu.
Teyá ngai malako na yo.+
69 Bato ya lofundo bazali koloba makambo ya lokuta mingi mpo na ngai.Kasi nakotosa mitindo na yo na motema na ngai mobimba.
70 Motema na bango ezali makasi,*+Kasi ngai, nalingaka mobeko na yo mingi.+
71 Ezali malamu ndenge namoni mpasi,+Mpo nayekola malako na yo.
72 Mobeko oyo opesi ezali malamu mpo na ngai,+Koleka ebele mpenza ya wolo mpe ya palata.+
י [Yod]
73 Mabɔkɔ na yo esalaki ngai, mpe ebongisaki ngai.
Pesá ngai mayele,Mpo nayekola mitindo na yo.+
74 Baoyo bazali kobanga yo basepelaka ntango bazali komona ngai,Mpo liloba na yo nde elikya na ngai.*+
75 Ee Yehova, nayebi ete bikateli na yo ya lisambisi ezali sembo+Mpe lokola ozali sembo, opesi ngai disiplini.+
76 Nabondeli yo, tiká bolingo na yo ya sembo+ ebɔndisa ngai,Na kolanda elaka* oyo opesaki mosaleli na yo.
77 Moniselá ngai motema mawa, mpo natikala na bomoi,+Mpamba te nalingaka mobeko na yo mingi.+
78 Bato ya lofundo báyoka nsɔni,Mpo basali ngai mabe kaka mpamba.*
Kasi nakokanisa na mozindo* mitindo na yo.+
79 Baoyo babangaka yo bázongela ngai,Baoyo bayebi makundoli na yo.
80 Motema na ngai ezala na mbeba te wana nazali kobatela malako na yo,+Mpo nayoka nsɔni te.+
כ [Kaf]
81 Nazali* na mposa makasi ya lobiko na yo,+Mpo liloba na yo nde elikya na ngai.*
82 Miso na ngai ezali na mposa makasi ya liloba na yo+Wana nazali koloba: “Okobɔndisa ngai ntango nini?”+
83 Mpo nazali lokola molangi ya mposo ya nyama oyo ekauki na milinga,Kasi nabosani malako na yo te.+
84 Mosaleli na yo asengeli kozela mikolo boni?
Ntango nini okopesa etumbu na baoyo bazali konyokola ngai?+
85 Bato ya lofundo batimoli mabulu mpo na ngai,Baoyo batosaka mobeko na yo te.
86 Mitindo na yo nyonso ebongi kotyelama motema.
Bato banyokoli ngai kaka mpamba; salisá ngai!+
87 Etikalaki moke mpenza bálongola ngai na mabele,Kasi nasundolaki mitindo na yo te.
88 Batelá ngai na bomoi mpo na bolingo na yo ya sembo,Mpo nakoba kobatela makundoli oyo olobaki.
ל [Lamed]
89 Ee Yehova, mpo na libela,Liloba na yo ekozala na likoló.+
90 Bosembo na yo ezali libota na libota.+
Otɛlɛmisi mabele makasi, mpo ekoba kaka kozala.+
91 Mpo na bikateli na yo ya lisambisi, yango* etikali tii na mokolo ya lelo,Mpo nyonso esalelaka yo.
92 Soki nalingaka mobeko na yo mingi te,Mbɛlɛ nakufaki na mpasi na ngai.+
93 Nakobosana ata moke te mitindo na yo,Mpo na nzela na yango nde obateli ngai na bomoi.+
94 Nazali moto na yo; bikisá ngai,+Mpo naluki mitindo na yo.+
95 Bato mabe bazali kozela ngai, mpo báboma ngai,Kasi nazali kotya likebi mingi na makundoli na yo.
96 Namoni ete eloko nyonso ya kokoka ezali na ndelo,Kasi mitindo na yo ezali na ndelo te.*
מ [Mem]
97 Nalingaka mobeko na yo mingi mpenza!+
Nakanisaka yango na mozindo* mokolo mobimba.+
98 Mitindo na yo ekómisaka ngai moto ya bwanya koleka banguna na ngai,+Mpo ezali elongo na ngai mpo na libela.
99 Nakómi na mayele ya kososola mingi koleka bateyi na ngai nyonso,+Mpo nakanisaka na mozindo* makundoli na yo.
100 Nazali kosala na mayele mingi koleka mikóló,Mpo natosi mitindo na yo.
101 Naboyi etamboli nyonso ya mabe,+Mpo nabatela liloba na yo.
102 Natiki te bikateli na yo ya lisambisi,Mpo yo nde oteyaka ngai.
103 Maloba na yo ezali elɛngi mpenza na lolemo na ngai,Koleka mafuta ya nzoi na monɔkɔ na ngai!+
104 Mpo na mitindo na yo, nazali kosala makambo na mayele.+
Yango wana nayini nzela nyonso ya lokuta.+
נ [Nun]
105 Liloba na yo ezali mwinda na lokolo na ngai,Mpe pole mpo na nzela na ngai.+
106 Nalapi ndai, mpe nakokokisa yango,Mpo na kobatela bikateli na yo ya lisambisi ya bosembo.
107 Namoni mpasi mpenza.+
Ee Yehova, batelá ngai na bomoi na kolanda liloba na yo.+
108 Nabondeli yo, Ee Yehova, sepelá na makabo ya bolingo ya masanzoli* na ngai,+Mpe teyá ngai bikateli na yo ya lisambisi.+
109 Bomoi na ngai ezali ntango nyonso na likama;*Kasi nabosani mobeko na yo te.+
110 Bato mabe batyeli ngai motambo,Kasi nalongwe te na mitindo na yo.+
111 Nakómisi makundoli na yo eloko na ngai mpo na libela,*Mpo ezali esengo ya motema na ngai.+
112 Nazwaki ekateli ya kotosa* malako na yoNtango nyonso, tii na nsuka.
ס [Samek]
113 Nayini bato ya mitema mibale,*+Kasi nalingi mobeko na yo.+
114 Ozali esika na ngai ya kobombana mpe nguba na ngai,+Mpo liloba na yo nde elikya na ngai.*+
115 Bólongwa mosika na ngai, bino bato mabe,+Mpo natosa mitindo ya Nzambe na ngai.
116 Sungá ngai ndenge olakaki,*+Mpo natikala na bomoi;Kotika te ete elikya na ngai ekóma likambo ya kolɛmbisa nzoto.*+
117 Sungá ngai mpo nabika;+Bongo nakotya likebi ntango nyonso na malako na yo.+
118 Oboyi baoyo nyonso basundoli malako na yo,+Mpo bazali bakosi mpe bato ya lokuta.
119 Olongoli bato mabe nyonso ya mabele lokola bosɔtɔ.+
Yango wana nalingaka makundoli na yo.
120 Nzoto* na ngai elɛngi na nsɔmɔ na yo;Nabangi bikateli na yo ya lisambisi.
ע [Ayin]
121 Nasali makambo oyo ezali sembo mpe boyengebene.
Kosundola ngai te epai ya banyokoli na ngai!
122 Pesá mosaleli na yo elaka ete okosalisa ye;Bato ya lofundo bányokola ngai te.
123 Miso na ngai elɛmbi mpo na kozela lobiko na yo+Mpe elaka* na yo ya bosembo.+
124 Moniselá mosaleli na yo bolingo na yo ya sembo,+Mpe teyá ngai malako na yo.+
125 Nazali mosaleli na yo; pesá ngai mayele,+Mpo nayeba makundoli na yo.
126 Ntango ekoki mpo osala, Ee Yehova,+Mpo babuki mobeko na yo.
127 Yango wana nalingaka mitindo na yoKoleka wolo, koleka ata wolo oyo epɛtolami.*+
128 Yango wana, namonaka ete mitinda na yo nyonso ebongi;+Nayinaka nzela nyonso ya lokuta.+
פ [Pe]
129 Makundoli na yo ezali ya kokamwa.
Yango wana natosaka* yango.
130 Ntango balimboli maloba na yo, epesaka pole,+Epesaka mayele epai ya bato oyo bazangi yango.+
131 Nafungoli monɔkɔ na ngai polele mpe napemi makasi,*Mpo nazali na mposa makasi ya mitindo na yo.+
132 Baluká epai na ngai mpe moniselá ngai boboto,+Na kolanda ekateli na yo ya lisambisi epai ya baoyo balingaka nkombo na yo.+
133 Tambwisá matambe na ngai na kimya* na nzela ya liloba na yo;Eloko moko te ya mabe ekonza ngai.+
134 Bikisá ngai na banyokoli,Mpe nakobatela mitindo na yo.
135 Ngɛngiselá mosaleli na yo elongi na yo,+Mpe teyá ngai malako na yo.
136 Mai ya miso esopani na miso na ngai lokola mikɛliMpo bato babateli mobeko na yo te.+
צ [Tsade]
137 Ee Yehova, ozali sembo,+Mpe bikateli na yo ya lisambisi ezali sembo.+
138 Makundoli oyo opesi ezali semboMpe ebongi mpenza kotyelama motema.
139 Molende na ngai mpo na yo ezali kopela kati na ngai,+Mpo banguna na ngai babosani maloba na yo.
140 Liloba na yo epɛtolami malamu mpenza,+Mpe mosaleli na yo alingaka yango.+
141 Nazangi ntina mpe nayinami;+Kasi, nabosani mitindo na yo te.
142 Bosembo na yo ezali bosembo mpo na libela,+Mpe mobeko na yo ezali solo.+
143 Atako mpasi mpe mokakatano ezali kosopanela ngai,Nalingaka mitindo na yo mingi.
144 Bosembo ya makundoli na yo ezali mpo na libela.
Pesá ngai mayele,+ mpo natikala na bomoi.
ק [Kof]
145 Nabeleli na motema na ngai mobimba. Ee Yehova, yanolá ngai.
Nakotosa malako na yo.
146 Nabeleli yo; bikisá ngai!
Nakobatela makundoli na yo.
147 Nalamuki liboso ntɔngɔ etana* mpo nabelela mpe nasɛnga lisalisi.+Mpo maloba na yo nde elikya na ngai.*
148 Nafungolaka miso na katikati ya butu,*Mpo nakanisa* liloba na yo na mozindo.+
149 Yoká mongongo na ngai mpo na bolingo na yo ya sembo.+
Ee Yehova, batelá ngai na bomoi na kolanda bosembo na yo.
150 Baoyo bazali na etamboli ya nsɔni* bakómi pene;Bazali mosika na mobeko na yo.
151 Ee Yehova, ozali pene,+Mpe mitindo na yo nyonso ezali solo.+
152 Banda kala nayebi ete,Otyá makundoli na yo mpo eumela libela.+
ר [Resh]
153 Talá mpasi na ngai mpe bikisá ngai,+Mpo nabosani mobeko na yo te.
154 Sambá likambo na ngai mpe bikisá ngai;+Batelá ngai na bomoi na kolanda elaka* na yo.
155 Lobiko ezali mosika na bato mabe,Mpo baluki malako na yo te.+
156 Ee Yehova, motema mawa na yo ezali monene.+
Batelá ngai na bomoi na kolanda bosembo na yo.
157 Banyokoli na ngai mpe banguna na ngai bazali ebele;+Kasi, natiki makundoli na yo te.
158 Ntango natalaka baoyo basalaka na bokosi, nayokaka bango mpii,Mpo babatelaka liloba na yo te.+
159 Moná ndenge nalingaka mitindo na yo!
Ee Yehova, batelá ngai na bomoi na kolanda bolingo na yo ya sembo.+
160 Liloba na yo mobimba ezali solo,+Mpe bikateli na yo nyonso ya lisambisi ya sembo eumelaka mpo na libela.
ש [Sin] to [Shin]
161 Bankumu banyokolaka ngai+ kaka mpamba,Kasi motema na ngai eyokaka maloba na yo nsɔmɔ.+
162 Nasepelaka mingi na liloba na yo+Ndenge moto asepelaka ntango amoni biloko mingi oyo bapunzi.
163 Nayinaka lokuta, nayinaka yango mpenza.+Nalingaka mobeko na yo.+
164 Nasanzolaka yo mbala nsambo na mokoloMpo na bikateli na yo ya lisambisi ya sembo.
165 Baoyo balingaka mobeko na yo bazali na kimya mingi;+Eloko moko te ekoki kobɛtisa bango libaku.*
166 Ee Yehova, natye elikya na misala na yo ya lobiko,Mpe natosaka mitindo na yo.
167 Nabatelaka* makundoli na yo,Mpe nalingaka yango mingi mpenza.+
168 Natosaka mitindo na yo mpe makundoli na yo,Mpo nyonso oyo nasalaka oyebi yango malamu.+
ת [Taw]
169 Ee Yehova, kolela na ngai mpo na kosɛnga lisalisi ekómela yo.+
Pesá ngai mayele oyo euti na liloba na yo.+
170 Kosɛnga na ngai mpo na kondimama ekóma liboso na yo.
Bikisá ngai ndenge olakaki.*
171 Mbɛbu na ngai esopa masanzoli,+Mpo oteyaka ngai malako na yo.
172 Liloba na yo ekóma loyembo na lolemo na ngai,+Mpo mitindo na yo nyonso ezali sembo.
173 Lobɔkɔ na yo ezala pene ya kosalisa ngai,+Mpo naponi kotosa mitindo na yo.+
174 Ee Yehova, nayoki mposa makasi ya lobiko na yo,Mpe nalingaka mobeko na yo mingi.+
175 Tiká nazala na bomoi mpo nakoka kosanzola yo;+Bikateli na yo ya lisambisi ezala lisalisi na ngai.
176 Nayengiyengi lokola mpate oyo ebungi.+ Luká mosaleli na yo,Mpo nabosani mitindo na yo te.+
Maloba na nse
^ To, “bazali kobatela boyengebene.”
^ Lil., “Ee tiká banzela na ngai epikama makasi.”
^ To, “Nakoyekola.”
^ To, “molimo na ngai etondaka.”
^ Lil., “Longolá kosɛka mpe lityo likoló na ngai.”
^ To, “koyekola.”
^ Lil., “nzela.”
^ To, “nayekola.”
^ Lil., “Nakopota mbangu na.”
^ To mbala mosusu, “osali ete motema na ngai ebanga te.”
^ To, “liloba.”
^ To mbala mosusu, “Oyo esalemi epai ya baoyo babangaka yo.”
^ To, “liloba.”
^ To, “nazeli.”
^ To, “esika monene.”
^ To, “nakoyekola.”
^ To, “elaka opesaki.”
^ To, “Oyo ozelisi ngai mpo na yango.”
^ To, “Na ndako oyo nafandi mopaya.”
^ To, “Nakitisaka elongi na yo motema.”
^ To, “liloba.”
^ To, “nazalaki kosala masumu na nko te.”
^ Lil., “Motema na bango ezali koyoka eloko te lokola mafuta.”
^ To, “nazeli liloba na yo.”
^ To, “liloba.”
^ To mbala mosusu, “na lokuta.”
^ To, “nakoyekola.”
^ To, “Molimo na ngai elɛmbi.”
^ To, “nazeli liloba na yo.”
^ Elingi koloba, misala na ye nyonso ya bozalisi.
^ Lil., “ezali monene mingi.”
^ To, “Nayekolaka yango.”
^ To, “nayekolaka.”
^ Lil., “sepelá na makabo ya bolingo ya monɔkɔ na ngai.”
^ To, “Molimo na ngai ezali na lobɔkɔ na ngai ntango nyonso.”
^ To, “libula na ngai ya seko.”
^ Lil., “Na motema na ngai nakani kotosa.”
^ To, “bato oyo motema na bango ekabwani.”
^ To, “nazeli liloba na yo.”
^ To, “na kolanda liloba na yo.”
^ To, “ekóma likambo ya nsɔni.”
^ Lil., “Mosuni.”
^ To, “liloba.”
^ To, “ebongisami.”
^ To, “molimo na ngai etosaka.”
^ To, “nakimeli.”
^ To, “Piká matambe na ngai makasi.”
^ To, “Nalamuki ntango ntɔngɔ ebandi kotana.”
^ To, “nazelaka maloba na yo.”
^ To, “liboso ya bileko ya kokɛngɛla na butu.”
^ To, “nayekola.”
^ To, “etamboli ya mbindo.”
^ To, “liloba.”
^ To, “Mpo na bango likambo ya kobɛtisa libaku ezali te.”
^ To, “Molimo na ngai ebatelaka.”
^ To, “na kolanda liloba na yo.”
