Nzembo 30:1-12
-
Mawa ebongwani esengo
-
Boboto ya Nzambe ezali mpo na bomoi mobimba (5)
-
Mondule. Loyembo ya molulu ya bofungoli ndako. Ya Davidi.
30 Ee Yehova, nakokumisa yo mpo otomboli ngai;*Otiki te ete banguna na ngai básepela mpo na likambo na ngai.+
2 Ee Yehova Nzambe na ngai, nalelelaki yo mpo na kosɛnga lisalisi, mpe obikisaki ngai.+
3 Ee Yehova, obimisi ngai* na Nkunda.*+
Obateli ngai na bomoi; osali ete nakwea na libulu* te.+
4 Bóyemba mpo na kosanzola* Yehova, bino bato na ye ya sembo,+Bópesa nkombo* na ye mosantu matɔndi;+
5 Mpo nkanda oyo ayokelaka moto ezalaka kaka mpo na mwa ntango,+Kasi amoniselaka moto boboto bomoi mobimba.+
Kolela ekoki kozala na mpokwa, kasi na ntɔngɔ koganga ya esengo.+
6 Ntango nazalaki na kimya nalobaki ete:
“Nakokwea ata moke te.”*
7 Ee Yehova, ntango ozalaki komonisela ngai boboto, okómisaki ngai makasi lokola ngomba.+
Kasi ntango obombaki elongi na yo, nabangaki makasi.+
8 Nazalaki kaka kobelela yo, Ee Yehova;+Mpe nakobaki kobondela Yehova amonisela ngai boboto.
9 Liwa* na ngai mpe kokita na ngai na libulu* ekopesa litomba nini?+
Putulu ekosanzola yo?+ Yango ekosakola bosembo na yo?+
10 Ee Yehova, yoká mpe moniselá ngai boboto.+
Ee Yehova, kómá mosungi na ngai.+
11 Obongoli mawa na ngai mabina;Olongoli ngɔtɔ* na ngai, mpe olatisi ngai esengo,
12 Mpo nayemba loyembo* ya kosanzola yo mpe nafanda nyɛɛ te.
Ee Yehova Nzambe na ngai, nakosanzola yo libela na libela.
Maloba na nse
^ To, “obendi ngai.”
^ To, “molimo na ngai.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “nkunda.”
^ To, “Bóbɛta miziki mpo na.”
^ Lil., “ekaniseli.”
^ To, “Nakotengatenga ata moke te.”
^ Lil., “Makila.”
^ To, “nkunda.”
^ Talá Ndimbola ya maloba.
^ To, “nkembo na ngai eyemba loyembo.”
