Yirimia 48:1-47
-
Esakweli mpo na oyo ekokómela Moabe (1-47)
48 Talá oyo Yehova ya mampinga, Nzambe ya Yisraele alobi mpo na Moabe:+
“Mawa na Nebo,+ mpo abebisami!
Kiriataime+ ayokisami nsɔni, mpe akangami.
Esika makasi ya kobombana* eyokisami nsɔni mpe eningisami.+
2 Bakosanzola lisusu Moabe te.
Na Heshibone,+ basali likita mpo na kokweisa ye:
‘Bóya, tóbebisa ye mpo azala lisusu ekólo te.’
Ee Madamene, yo mpe osengeli kofanda nyɛɛ.Mpo mopanga ezali kolanda yo.
3 Makɛlɛlɛ ya koganga ezali kouta na Horonaime,+Makɛlɛlɛ moko monene ya kobebisa mpe ya kobuka.
4 Moabe abebisami.
Bana na ye ya mike bazali koganga.
5 Na nzela oyo emati na Luhite, bato bazali komata na kolela.
Mpe na nzela oyo ekiti uta na Horonaime bato bazali koyoka koganga ya mpasi mpo na libebi.+
6 Bókima; bóbikisa bomoi na bino,*
Bosengeli kokóma lokola nzete ya jenevriye na esobe.
7 Lokola otyeli misala na yo mpe biloko na yo ya motuya motema,Yo mpe okokangama.
Mpe Kemoshe+ akomemama na mboka mopaya,Elongo na banganga-nzambe mpe bankumu na ye.
8 Mobebisi akokɔta na engumba nyonso,Mpe ata engumba moko te ekobika.+
Lobwaku* ekobebisamaMpe mabele ya patatalu ekosilisama nyɛɛ, kaka ndenge Yehova alobi.
9 Bótya elembo mpo na Moabe bino bato,Mpo ntango bingumba na ye ekokwea, bato na ye bakokimaMpe bingumba na ye ekokóma eloko ya nsɔmɔ,Moto akofanda kuna te.+
10 Alakelama mabe moto oyo azali kokokisa mosala ya Yehova na bolɛmbu!
Alakelama mabe moto oyo azali kopekisa mopanga na ye esopa makila!
11 Bamoabe bazali na kimya banda bolenge na bango,Lokola vinyo likoló ya mbɔtɔ na yango.
Basopami te longwa na mbɛki moko tii na mbɛki mosusu,Mpe batikalá ata te komemama na mboka mopaya.
Yango wana elɛngi na bango etikali kaka ndenge ezalaka,Mpe nsolo na bango ebongwani te.
12 “‘Na yango, talá! Mikolo ezali koya,’ Yehova alobi bongo, ‘nakotinda bato básopa yango. Bakobalusa yango mpe bakotika bambɛki yango mpamba mpe bakobukabuka bilokó na bango ya minene.
13 Mpe Bamoabe bakoyoka nsɔni mpo na Kemoshe, ndenge kaka bato ya Yisraele bayoki nsɔni mpo na Betele, eloko oyo bazalaki kotyela motema.+
14 Ndenge nini bozali koloba ete: “Tozali bilombe ya etumba, tozali pene mpo na etumba”?’+
15 ‘Moabe abebisami,Bato bakɔti na bingumba na ye,+Mpe bilenge na bango ya mibali ya makasi koleka babomami,’+
Yango nde liloba ya Mokonzi, oyo nkombo na ye ezali Yehova ya mampinga.+
16 Likama oyo ekokwela Bamoabe ezali mosika te,Mpe kokwea na bango ezali koya mbangu mpenza.+
17 Bato nyonso oyo bazali zingazinga na bango bakoyokela bango mawa,Bato nyonso oyo bayebi nkombo na bango.
Bóloba na bango ete: ‘Ee talá ndenge lingenda ya nguya ebukani, lingenda ya kitoko!’
18 Kitá, longwá na nkembo na yo,Mpe fandá na mposa,* Ee yo mwana mwasi oyo afandaka na Dibone,+Mpo mobebisi ya Moabe ayei mpo na kobundisa yo,Mpe akobebisa bisika na yo oyo ebatelami makasi.+
19 Tɛlɛmá pene na nzela mpe talá, mwasi oyo ofandi na Aroere.+
Tuná mobali oyo azali kokima mpe mwasi oyo azali komibikisa ete: ‘Likambo nini?’
20 Moabe ayokisami nsɔni, alɛngi na nsɔmɔ.
Gangá na kolela mpe belelá.
Bósakola na Arnone+ ete Moabe abebisami.
21 “Ngonga ya kosambisa eyei mpo na mabele ya patatalu:+ mpo na Holone, Yahaze,+ Mefaate,+
22 Dibone,+ Nebo,+ Bete-diblataime,
23 Kiriataime,+ Bete-gamule, Bete-meone,+
24 Keriote,+ Bozera ná bingumba nyonso ya mokili ya Moabe, oyo ezali mosika mpe oyo ezali pene.
25 “‘Nguya ya Moabe esili,*Lobɔkɔ na ye ebukani,’ Yehova alobi bongo.
26 ‘Bólangwisa ye,+ mpo amikumisi liboso ya Yehova.+
Moabe amibalolibaloli na kati ya biloko oyo asanzi,Mpe bato nyonso bazali kosɛka ye.
27 “‘Yo osɛkaki Yisraele te?+
Okutaki ye na kati ya miyibiMpo oningisa motó mpe oloba mabe mpo na ye?
28 Bótika bingumba mpe bófanda likoló ya libanga, bino bato oyo bofandi na Moabe,Mpe bókóma lokola ebenga oyo ezali kotonga bazumbu* na yango pembenipembeni ya monɔkɔ ya lidusu.’”
29 “Toyoki nsango ya lolendo ya Moabe—azali na lofundo mingi—Mpo na kotombwana na ye, lolendo na ye, komitombola na ye mpe lofundo ya motema na ye.”+
30 “‘Nayebi nkanda makasi na ye,’ Yehova alobi bongo,‘Kasi bilobaloba na ye ekosala eloko te.
Bakosala eloko moko te.
31 Yango wana nakoganga na kolela mpo na Moabe,Mpe nakoganga mpo na Moabe mobimba.Bakolelalela mpo na bato ya Kiri-herese.+
32 Nakolela mpo na yo, kolela moko oyo eleki kolela mpo na Yazere,+Ee nzete ya vinyo ya Sibima.+
Bitape na yo oyo ezali kobimisa bafololo ekatisi mbu.
Ekómi na mbu, na Yazere.
Mobebisi abebisi mbuma na yo ya eleko ya molungeMpe mbuma na yo ya vinyo na ntango ya kobuka mbuma ya vinyo.+
33 Kosepela mpe esengo elongolami na elanga ya banzete ya mbumaMpe na mokili ya Moabe.+
Nasali ete vinyo esila na bikamwelo ya vinyo.
Moto moko te akonyatanyata mbuma ya vinyo na koganga ya esengo.
Ekozala koganga ya ndenge mosusu.’”+
34 “‘Koganga ya Heshibone+ eyokani tii na Eleale,+
Mongongo na bango eyokani tii na Yahaze;+Kobanda na Zoare tii na Horonaime,+ tii na Eglate-shelishiya.
Mpo ata mai ya Nimirime ekokauka mpenza.+
35 Nakolimwisa na MoabeMoto oyo azali komema likabo na esika oyo etombwanáMpe moto oyo azali kopesa bambeka epai ya nzambe na ye. Yehova alobi bongo.
36 Yango wana motema na ngai ekolelalela* mpo na Moabe, lokola piololo,*+Mpe motema na ngai ekolelalela* mpo na bato ya Kiri-herese, lokola piololo.*
Mpo bozwi oyo akómi na yango ekosila.
37 Mpo motó nyonso ezali na libandi,+Mpe mandefu nyonso ekatami.
Bampota ezali na mabɔkɔ nyonso,+Mpe ngɔtɔ* ezali na loketo na bango!’”+
38 “‘Na bansamba nyonso ya MoabeMpe na bisika na yango minene ya bato nyonso,Bato bazali kaka kolela.
Mpo nabuki MoabeLokola mbɛki oyo babwaki,’ Yehova alobi bongo.
39 ‘Talá ndenge ayoki nsɔmɔ! Bóganga na kolela!
Talá ndenge Moabe apesi mokɔngɔ, ayoki nsɔni!
Moabe akómi eloko ya kosɛka,Mpe eloko ya nsɔmɔ epai ya bato nyonso oyo bazali zingazinga na ye.’”
40 “Mpo talá oyo Yehova alobi:
‘Talá! Kaka ndenge mpongo ekitaka na lombangu na nse,+Ndenge wana nde monguna akosembola mapapu na ye likoló ya Moabe.+
41 Bakozwa bingumba,Bakɔbɔtɔla bisika na ye ya makasi.
Na mokolo yango, babundi-bitumba ya MoabeBakoyoka mpasi lokola ya mwasi oyo azali kobota.’”
42 “‘Mpe Moabe akozala lisusu ekólo te,+Mpo amikumisi liboso ya Yehova.+
43 Nsɔmɔ ná libulu mpe motambo ezali liboso na yo,Ee moto oyo ofandi na Moabe,’ Yehova alobi bongo.
44 ‘Moto nyonso oyo akokima mpo na nsɔmɔ akokwea na libulu,Mpe moto nyonso oyo akobima na libulu akokangama na motambo.’
‘Mpo nakopesa Moabe etumbu na mbula oyo natyá,’ Yehova alobi bongo.
45 ‘Baoyo bazali kokima batɛlɛmi na elili ya Heshibone, makasi esili bango.
Mpo mɔtɔ ekouta na Heshibone,Mpe lolemo ya mɔtɔ ekouta kati na Sihone;+
Ekozikisa elongi ya MoabeMpe nsɔngɛ ya motó ya babundi ya mobulu.’+
46 ‘Mawa na yo, Ee Moabe!
Bato ya Kemoshe+ bakufi.
Mpo bana na yo ya mibali bamemami bakangami,Mpe bana na yo ya basi bakei na mboka mopaya.+
47 Kasi nakoyanganisa bakangami ya Moabe na eleko ya nsuka ya mikolo,’ Yehova alobi bongo.
‘Kosambisama ya Moabe esuki awa.’”+
Maloba na nse
^ To, “Esika ya kombombana oyo etombwaná.”
^ To, “milimo na bino.”
^ To, “Lobwaku patatalu.”
^ To mbala mosusu, “na mokili oyo ekauká.”
^ Lil., “Liseke ya Moabe ekatani.”
^ To, “bazála.”
^ To, “ekozala na yikiyiki.”
^ Elingi koloba, “piololo oyo bazali kobeta na ntango ya kokunda ebembe.”
^ To, “ekozala na yikiyiki.”
^ Elingi koloba, “piololo oyo bazalaki kobɛta na ntango ya kokunda ebembe.”
^ Talá Ndimbola ya maloba.
