Yisaya 22:1-25
22 Liyebisi mpo na Lobwaku ya emonaneli:*+
Likambo nini boye oyo bato na yo nyonso bamati na bansamba?
2 Otondaki na yikiyiki,Engumba ya makɛlɛlɛ, sité oyo ezali kosepela makasi.
Bato na yo oyo babomami, babomami na mopanga te,Bakufi mpe na etumba te.+
3 Bakonzi na yo nyonso oyo bazali koyangela na makasi bakimi elongo.+
Bakangaki bango na bolɔkɔ kozanga kosalela litimbo.
Bato nyonso oyo bakutaki, bakangaki bango,+Ata baoyo bakimaki mosika.
4 Yango wana nalobi: “Bólongola miso na bino epai na ngai,Bótika kobɔndisa ngai.
Nakolela makasi+Mpo na libebi ya mwana mwasi ya* bato na ngai.+
5 Mpo ezali mokolo oyo Nkolo Mokonzi-Oyo-Aleki-Nyonso,Yehova ya mampinga, azali kobulunganisa,Kolonga mpe kobangisa+ na Lobwaku ya emonaneli.
Bazali kobuka efelo,+Mpe koganga eyokani na ngomba.
6 Bato ya Elame+ bazwi libenga ya makula,Batambwisi makalo ya etumba mpe bampunda,Kire+ ebimisi* nguba.
7 Mabwaku* na yo oyo eleki kitokoEkotonda mpenza na makalo ya etumba,Mpe bampunda ekotɛlɛma* na porte,
8 Mpe elamba ya kozipa* ya Yuda ekolongolama.
“Na mokolo yango, bokotala na ngámbo ya esika ya kobomba bibundeli ya Ndako ya zamba,+
9 ya solo bokomona madusu ebele na efelo ya Sité ya Davidi.+ Mpe bokoyanganisa mai ya liziba ya nse.+
10 Bokotánga bandako ya Yerusaleme. Mpe bokobuka bandako mpo na kokómisa efelo makasi.
11 Bokosala libulu ya mai kati na bifelo mibale mpo na mai ya liziba ya kala. Kasi bokotala te Mokeli Monene na yango, mpe bokomona te moto oyo asalaki yango banda kala.
12 Na mokolo yango, Nkolo Mokonzi-Oyo-Aleki-Nyonso, Yehova ya mampinga,Akosɛnga ete bólela mpe bózala na mawa,+Bókokola mitó mpe bólata ngɔtɔ.*
13 Kasi na esika na yango, ekozala nde kosepela makasi mpe esengo,Koboma bangɔmbɛ mpe koboma bampate,Kolya mosuni mpe komɛla vinyo.+
‘Tólya mpe tómɛla, mpo lobi tokokufa.’”+
14 Bongo Yehova ya mampinga alobaki na matoi na ngai ete: “‘Libunga na bino oyo ekozipama te tii bokokufa,’+ Yehova Nkolo Mokonzi-Oyo-Aleki-Nyonso alobi bongo.”
15 Talá oyo Nkolo Mokonzi-Oyo-Aleki-Nyonso, Yehova ya mampinga, alobi: “Kende epai ya kapita oyo, epai ya Shebena,+ oyo azali kokamba ndako, lobá boye:
16 ‘Eloko nini ozali na yango awa, mpe nani azali moto na yo awa, mpo omitimwela lilita awa?’ Na esika oyo etombwaná, azali kotimola lilita na ye; na libanga, azali kopasola esika na ye ya kopema.*
17 ‘Talá! Yehova akobwaka yo na nse na makasi nyonso, Ee moto, mpe akokanga yo makasi.
18 Na ntembe te, akolínga yo makasi, mpe akobwaka yo lokola ndembo na mokili moko monene. Okokufa kuna, mpe kuna makalo ya bitumba ya nkembo na yo ekozala nsɔni mpo na ndako ya nkolo na yo.
19 Nakobengana yo na ebonga na yo mpe nakobengana yo na esika na yo ya lokumu.
20 “‘Na mokolo yango, nakobenga mosaleli na ngai, Eliakime+ mwana ya Hilikiya.
21 Nakolatisa ye zambala na yo, nakokanga ye makasi elamba na yo ya kokanga na loketo,+ mpe nakopesa bokonzi na yo na mabɔkɔ na ye; akozala tata ya bafandi ya Yerusaleme mpe ya bato ya libota ya Yuda.
22 Nakotya fungola ya ndako ya Davidi+ na lipeka na ye; akofungola mpe moto moko te akokanga, akokanga mpe moto moko te akofungola.
23 Nakokɔtisa ye lokola pike na esika moko ya makasi, mpe akokóma lokola kiti ya bokonzi ya nkembo ya ndako ya tata na ye.
24 Mpe bakokakisa epai na ye nkembo* nyonso ya ndako ya tata na ye, bato ya libota mpe bana, bambɛki nyonso ya mikemike, bambɛki oyo ezali lokola mabakuli mpe bambɛki nyonso oyo basali yango bilokó minene.
25 “‘Na mokolo yango,’ yango nde liloba ya Yehova ya mampinga, ‘bakolongola pike oyo ekɔtisami na esika moko ya makasi,+ bakokata yango mpe ekokwea, mpe mokumba oyo ezali likoló na yango ekokwea mpe ekobeba, mpo Yehova ye moko alobi yango.’”
Maloba na nse
^ Na ntembe te, ezali kolobela Yerusaleme.
^ Maloba ya ntɔki mpo na kolobela moto, mbala mosusu komonisa mawa to komitya na esika ya moto.
^ To, “ebongisi.”
^ To, “mabwaku ya patatalu.”
^ To, “batambwisi-mpunda bakotɛlɛma.”
^ To, “libateli.”
^ Talá Ndimbola ya maloba.
^ Lil., “esika na ye ya kofanda.”
^ Lil., “kilo.”
