Yisaya 3:1-26
3 Mpo talá oyo Nkolo ya solo, Yehova ya mampinga,Azali kolongola na Yerusaleme mpe na Yuda eloko nyonso oyo ekoki kosunga mpe kosalisa,Elingi koloba mampa nyonso mpe mai nyonso,+
2 Mobali ya nguya ná mobundi-etumba,Mosambisi ná mosakoli,+ mosakoli ya makambo oyo ebombaná ná nkulutu,
3 Mokonzi ya bato 50,+ moto ya lokumu ná mopesi-toli,Moto oyo ayebi malamu misala ya maji ná moto oyo ayebi mpenza kolengola.+
4 Nakokómisa bilenge mibali bankumu na bango,Mpe bato ya bongolabongola* bakoyangela bango.
5 Bato bakonyokolana,Moto na moto akonyokola moninga na ye.+
Elenge mobali akobundisa mobange,Mpe moto oyo batyolaka akowelana na moto oyo bamemyaka.+
6 Moto na moto akosimba ndeko na ye ya mobali na ndako ya tata na ye, mpe akoloba:
“Yo ozali na zambala; zalá mokonzi na biso,
Liboke ya bisika oyo ebebabebá ezala na mabɔkɔ na yo.”
7 Na mokolo yango, akoboya mpe akoloba ete:
“Nakozala mokangi ya mpota na yo te;Nazali na bilei te to bilamba te na ndako na ngai.
Bótya ngai mokonzi ya bato te.”
8 Mpo Yerusaleme abɛti libaku,Mpe Yuda akwei,Mpamba te bazali kotɛmɛla Yehova na maloba mpe na misala na bango;Bazali kotomboka liboso ya nkembo na ye.*+
9 Ndenge bilongi na bango ezali komonana ezali kofunda bango,Mpe bazali kolobela lisumu na bango lokola Sodoma;+Baluki te kobomba yango.
Mawa na bango! Mpo bazali komibendela mpasi.
10 Bóyebisa bato ya sembo ete makambo ekotambola malamu mpo na bango;Bakozwa mbano mpo na misala na bango.*+
11 Mawa na moto mabe!
Mpasi ekokwela ye,Bakosala ye kaka ndenge asalaki!
12 Nzokande bato oyo bapesaka bato na ngai mosala banyokolaka bango,Mpe basi bazali koyangela bango.
Bato na ngai, baoyo bazali kotambwisa bino bazali kosala ete bóyengayenga,Mpe babulunganisi banzela oyo bosengeli kolanda.+
13 Yehova atɛlɛmi mpo na kosamba likambo na ye;Atɛlɛmi mpo na kopesa bato ya bikólo etumbu.
14 Yehova akopesa etumbu na bankulutu mpe bankumu ya bato na ye.
“Botumbi elanga ya vinyo,Biloko oyo boyibi epai ya mobola ezali na bandako na bino.+
15 Ebandi boni bótutatuta bato na ngaiMpe bonyokoli mpenza bato ya mpasi?”+ Nkolo Mokonzi-Oyo-Aleki-Nyonso, Yehova ya mampinga nde alobi bongo.
16 Yehova alobi boye: “Lokola bana basi ya Siona bazali na lolendo,Bazali kotambola batomboli mitó na bango,*Bazali kofinafina miso na bango, kodenda,Bazali kolelisa bashɛnɛti ya makolo na bango,
17 Yehova akobimisa mpe mapaka* na motó ya bana basi ya Siona,Mpe Yehova akosala ete motó na bango ezala na nsuki te.+
18 Na mokolo yango, Yehova akolongola kitoko na bango: bikɔmɔ,Mwa elamba ya kozipa motó mpe babiju oyo basalá yango lokola sɛrklɛ,+
19 Biloko ya matoi, bikɔmɔ ná matambala,
20 Biloko ya kolata na motó, bashɛnɛti ya makolo ná bankamba ya ntolo,*Milangi ya malasi* mpe mayaka,
21 Bampɛtɛ ya misapi ná bampɛtɛ ya zolo,
22 Bazambala ya molulu, bazambala ya likoló, bakazaka ná bapotɔmɔni,
23 Batalatala ya mabɔkɔ,+ bilamba ya lini,*Batirba ná matambala.
24 Na esika ya mafuta ya balsame,+ ekozala nsolo moko ya mabe;Na esika ya mokaba, nsinga;Na esika ya nsuki oyo ebongisami malamu, libandi;+Na esika ya elamba ya ntalo, ngɔtɔ;*+Na esika ya bonzenga elembo ya mɔtɔ.
25 Bato na yo bakokwea na mopanga,Mpe bato na yo ya nguya na etumba.+
26 Bikɔtelo ya Siona ekolela mpe ekozala mawamawa,+Mpe akofanda na mabele oyo etikali mpamba.”+
Maloba na nse
^ To, “bato oyo bazali lokola bana mike.”
^ Lil., “Bazali kotomboka na miso na ye ya nkembo.”
^ Lil., “bakolya mbuma ya misala na bango.”
^ Lil., “batɛlɛmisi nkingo na bango.”
^ Bisika mosusu babengaka yango mpe lipata to panda.
^ Elingi koloba, “elamba oyo batyaka na ntolo.”
^ Lil., “bandako ya molimo.”
^ To, “bilamba ya nse.”
^ Talá Ndimbola ya maloba.
