Yisaya 38:1-22
38 Na mikolo yango, Ezekiasi abɛlaki mpe etikalaki moke akufa.+ Mosakoli Yisaya+ mwana ya Amoze ayaki epai na ye mpe alobaki na ye ete: “Yoká oyo Yehova alobi: ‘Pesá bato ya libota na yo malako ya nsuka mpo okokufa, okobika na maladi oyo te.’”+
2 Ntango Ezekiasi ayokaki bongo abalusaki elongi na ye na efelo mpe abandaki kobondela Yehova boye:
3 “Nabondeli yo, Ee Yehova, nabondeli yo, kobosana te+ ete natambolaki liboso na yo na bosembo mpe na motema mobimba,+ mpe nasalaki makambo oyo ezali malamu na miso na yo.” Mpe Ezekiasi alelaki mingi mpenza.
4 Bongo Yehova alobaki na Yisaya ete:
5 “Zongá, mpe lobá na Ezekiasi:+ ‘Yehova Nzambe ya nkɔkɔ na yo Davidi alobi ete: “Nayoki libondeli na yo.+ Namoni mai ya miso na yo.+ Talá, nazali kobakisa mbula 15 na bomoi na yo.*+
6 Nakobikisa yo mpe engumba oyo na lobɔkɔ ya mokonzi ya Asiri, mpe nakobatela engumba oyo.+
7 Talá elembo oyo euti epai ya Yehova. Yango ekomonisa yo ete Yehova akokokisa liloba oyo alobi:+
8 Talá nakosala ete elili oyo moi ebimisi, oyo ekitaki na matambe ya eskalye ya Ahaze ezonga nsima matambe zomi.”’”+ Mpe elili ezongaki nsima matambe zomi, na matambe ya eskalye* epai yango ekitaki.
9 Mokanda oyo Ezekiasi mokonzi ya Yuda akomaki, ntango abɛlaki mpe abikaki na maladi na ye.
10 Nalobaki ete: “Na katikati ya bomoi na ngai,Nasengeli kokɔta na baporte ya Nkunda.*
Nakozanga bambula na ngai oyo etikali.”
11 Nalobaki: “Nakomona Yah* te, ɛɛ Yah, na mokili ya bato ya bomoi.+
Nakotala lisusu bato teNtango nazali elongo na bato oyo bafandi na mokili epai makambo nyonso esukaka.
12 Esika na ngai ya kofanda epikolami mpe balongoli yango epai na ngai+Lokola hema ya mobateli ya mpate.
Nalíngilíngi bomoi na ngai ndenge mosali-bilamba asalaka na elamba;Akati ngai ndenge bakataka elamba nsima ya kolita yango.
Banda na moi tii na butu, ozali kaka kokómisa ngai tii na nsuka.+
13 Nafandaki kimya tii na ntɔngɔ.
Azali kaka kobuka mikuwa na ngai nyonso ndenge nkɔsi ebukaka;Banda na moi tii na butu, ozali kaka kokómisa ngai tii na nsuka.+
14 Nazali se kosala swiswiswi lokola ndɛkɛ babengi martinɛ to ndɛkɛ babengi bulubulu;+Nazali se konguluma lokola ebenga.+
Miso na ngai elɛmbi mpo na kotala likoló:+
‘Ee Yehova, nazali kotungisama mpenza;Salisá ngai!’*+
15 Naloba nini?
Alobi na ngai mpe asali.
Bambula na ngai nyonso, nakotambola na komikitisa*Mpo na bololo ya mitungisi na ngai.*
16 ‘Ee Yehova, moto nyonso atikalaka na bomoi mpo na makambo yango,*Mpe na nzela na yango nde elimo na ngai ezali na bomoi.
Okokómisa nzoto na ngai kolɔngɔnɔ mpe okobatela ngai na bomoi.+
17 Talá! Na esika nazwa kimya, natungisami nde mingi;Kasi lokola olingaka ngai mingi,Obateli ngai mpo nakita te na libulu ya libebi.+
Obwaki masumu na ngai nyonso nsima ya mokɔngɔ na yo.*+
18 Mpo Nkunda* ekoki te kokumisa yo,+Liwa ekoki kosanzola yo te.+
Baoyo bazali kokita na libulu bakoki te kotyela bosembo na yo motema.+
19 Moto ya bomoi, moto ya bomoi, akoki kosanzola yo,Lokola ngai na mokolo ya lelo.
Tata akoki koyebisa bana na ye bosembo na yo.+
20 Ee Yehova, bikisá ngai,Mpe tokobɛta nzembo na ngai, na bibɛtɛlo ya bansinga+Mikolo nyonso ya bomoi na biso, na ndako ya Yehova.’”+
21 Na nsima, Yisaya alobaki boye: “Bóya na gato ya figi ya kokauka oyo bafinafiná mpe bópakola yango na bibɔ ya mokonzi mpo abika.”+
22 Ezekiasi atunaki boye: “Elembo nini emonisi ete nakomata na ndako ya Yehova?”+
Maloba na nse
^ Lil., “na mikolo na yo.”
^ Mbala mosusu bazalaki kosalela eskalye yango mpo na kotala esika elili ekómi mpo na koyeba ngonga.
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ “Yah” ezali ebengeli ya mokuse ya nkombo Yehova.
^ Lil., “kɔtelá ngai.”
^ To, “malɛmbɛmalɛmbɛ.”
^ To, “bololo ya molimo na ngai.”
^ Elingi koloba, maloba mpe misala ya Nzambe.
^ To, “Olongoli masumu na ngai nyonso na miso na yo.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
