Yisaya 48:1-22
48 Ee bato ya libota ya Yakobo, bóyoka likambo oyo,Bino baoyo bomibengaka na nkombo ya Yisraele+Mpe bino baoyo bouti na mai ya* Yuda,Bino baoyo bolapaka ndai na nkombo ya Yehova+Mpe baoyo bobelelaka Nzambe ya Yisraele,Atako ezalaka na bosolo te mpe na bosembo te.+
2 Mpo bamibengaka bato ya engumba mosantu+Mpe balukaka lisalisi epai ya Nzambe ya Yisraele,+Oyo nkombo na ye ezali Yehova ya mampinga.
3 “Makambo oyo eleká* oyo nayebisaki yo banda kala,
Ebimaki na monɔkɔ na ngai moko,Mpe nayebisaki yango.+
Na mbala moko nasalaki eloko oyo, mpe yango esalemaki.+
4 Lokola nayebaki ete ozali motó makasiEte nkingo na yo ezali mosisa ya ebende mpe elongi na yo ezali ya kwivrɛ,+
5 Nayebisaki yo banda kala.
Nayebisaki yo yango liboso esalema,Mpo oloba te ete: ‘Ekeko na ngai esalaki yango;Ekeko* na ngai mpe ekeko na ngai ya ebende* epesaki yango mitindo.’
6 Oyokaki mpe omonaki yango nyonso.
Okolobela yango te?+
Banda sikoyo nazali koyebisa yo makambo ya sika,+Makambo oyo ebombaná, oyo oyebi te.
7 Makambo yango ezalisami kaka sikoyo, kasi banda kala te,Makambo oyo oyoká te liboso ya mokolo ya lelo,Mpo oloba te ete: ‘Talá! Nayebá yango kala.’
8 Te, oyoki eloko te,+ oyebi eloko te,Mpe na kala matoi na yo efungwamaki te.
Mpo nayebi ete ozali mpenza mokosi,+Banda kobotama na yo babengaka yo motomboki.+
9 Mpo na nkombo na ngai nakopekisa nkanda na ngai;+Mpo na lisanzoli na ngai,Nakomipekisa mpe nakoboma yo te.+
10 Talá! Napɛtoli yo, kasi lokola palata te.+
Nameki* yo na esika ya mɔtɔ makasi ya konyangwisa ya monyoko.+
11 Mpo na ngai, ɛɛ mpo na ngai moko nakosala,+Mpo ndenge nini nakoki kotika bákómisa nkombo na ngai eloko mpamba?+
Napesaka nkembo na ngai na moto mosusu te.*
12 Ee Yakobo, yoká ngai, mpe Yisraele moto oyo nabengá.
Nazali kaka ndenge nazalaka.+ Nazali moto ya liboso; nazali mpe moto ya nsuka.+
13 Lobɔkɔ na ngai moko nde etyaki moboko ya mabele,+Mpe lobɔkɔ na ngai ya mobali etandaki likoló.+
Ntango nabengaka yango, yango nyonso etɛlɛmaka elongo.
14 Bóyangana, bino nyonso mpe bóyoka.
Nani na kati na bango alobá makambo oyo?
Yehova alingá ye.+
Akosala Babilone makambo oyo esepelisi ye,+Mpe lobɔkɔ na ye ekobɛta Bakaladea.+
15 Ngai moko nalobi, mpe nabengi ye.+
Nayei na ye, mpe nzela na ye ekolonga.+
16 Bópusana pene na ngai. Bóyoka likambo oyo.
Banda na ebandeli mpenza nalobá na esika ya kobombana te.+
Banda ntango yango esalemaki, nazalaki wana.”
Mpe sikoyo Nkolo Mokonzi-Oyo-Aleki-Nyonso Yehova apesi ngai elimo na ye mpe atindi ngai.
17 Talá oyo Yehova alobi, Mosikoli na yo, Mosantu ya Yisraele:+
“Ngai Yehova nazali Nzambe na yo,Moto oyo azali koteya yo mpo na bolamu na yo moko,+Moto oyo azali kotambwisa yo na nzela oyo osengeli kotambola.+
18 Soki otyaka likebi na mibeko na ngai!+
Mbɛlɛ kimya na yo ekómi lokola ebale+Mpe bosembo* na yo lokola mbonge ya mbu.+
19 Mbɛlɛ bana na yo bakómi* ebele lokola zɛloMpe bato ya libota na yo lokola mbuma ya zɛlo.+
Mbɛlɛ nkombo na bango ebomami te mpe elongolami te liboso na ngai.”
20 Bóbima na Babilone!+
Bókima Bakaladea!
Bósakola yango na koganga ya esengo, bóyebisa yango!+
Bósala ete yango eyebisama tii na bansuka ya mabele.+
Bóloba ete: “Yehova asikoli mosaleli na ye Yakobo.+
21 Bayokaki mposa ya mai te ntango azalaki kotambwisa bango na bisika oyo ekauká.+
Abimiselaki bango mai na libanga;Apasolaki libanga mpe asalaki ete mai ebima.”+
22 Yehova alobi: “Bato mabe bazalaka na kimya te.”+
Maloba na nse
^ To mbala mosusu, “baoyo bouti na.”
^ Lil., “ya liboso.”
^ To, “ekeko oyo eyemami.”
^ To, “ekeko oyo enyangwisami.”
^ To, “natalitali yo.” To mbala mosusu, “naponi yo.”
^ To, “nakabolaka nkembo na ngai na moto mosusu te.”
^ To, “boyengebene.” Talá Ndimbola ya maloba.
^ Lil., “momboto na yo ekómi.”
