Yisaya 6:1-13
6 Na mbula oyo mokonzi Uzia akufaki,+ namonaki Yehova afandi na kiti moko ya bokonzi oyo ezalaki likoló mpe etombwaná,+ bansongɛ ya elamba na ye etondaki na tempelo.
2 Baserafɛ batɛlɛmaki likoló na ye. Mokomoko azalaki na mapapu motoba. Na mibale, azipaki elongi na ye mpe na mibale, azipaki makolo na ye mpe na mibale, azalaki kopumbwapumbwa.
3 Mpe bazalaki kobelelana na mongongo makasi ete:
“Mosantu, mosantu, mosantu ezali Yehova ya mampinga.+
Mabele mobimba etondi na nkembo na ye.”
4 Mpe makonzí ya baporte eninganaki na makɛlɛlɛ ya mongongo ya mokomoko na bango,* mpe ndako etondaki na milinga.+
5 Bongo nalobaki ete: “Mawa na ngai!
Mpo nakufi nde kokufa,*Mpo nazali moto oyo azali na mbɛbu ya mbindo,Mpe nazali kofanda na kati ya bato oyo bazali na mbɛbu ya mbindo;+Mpo miso na ngai emoni Mokonzi, Yehova ya mampinga!”
6 Bongo moko ya baserafɛ apumbwaki epai na ngai, mpe na lobɔkɔ na ye, azalaki na likala oyo ezalaki kongala+ oyo azwaki na bapɛnsi na etumbelo.+
7 Asimbaki monɔkɔ na ngai mpe alobaki boye:
“Talá! Eloko oyo esimbi mbɛbu na yo.
Ozali lisusu na ngambo te,Mpe lisumu na yo elimbisami.”
8 Bongo nayokaki mongongo ya Yehova ezali koloba boye: “Nakotinda nani, mpe nani akokende mpo na biso?”+ Mpe nalobaki: “Ngai oyo! Tindá ngai.”+
9 Mpe alobaki lisusu boye: “Kende mpe yebisá bato oyo ete:
‘Bokoyoka lisusu mpe lisusu,Kasi bokokanga ntina te;Bokomona lisusu mpe lisusu,Kasi bokoyeba eloko ata moko te.’+
10 Kómisá motema ya bato oyo makasi,+Kómisá matoi na bango mangbongi,+Mpe kangá bango miso,Mpo bámona te na miso na bangoMpe báyoka te na matoi na bango,Mpo motema na bango ekanga ntina teMpe bázongela ngai te mpe bábika te.”
11 Bongo nalobaki boye: “Ee Yehova, tii ntango nini?” Mpe alobaki ete:
“Tii bingumba ekobeba mpenza kobeba mpe moto ata moko te akofanda kuna,Bandako ekozala na bato teMpe mabele ekobeba mpe ekotikala mpamba;+
12 Tii Yehova akobengana bato mosika+Mpe bisika oyo etikali mpamba na mokili ekokóma mingi mpenza.
13 Kasi moko ya bandambo zomi ekozala naino na kati na yango, mpe ekotumbama lisusu, lokola nzete monene mpe lokola ebakata ya nzete oyo, soki bakati yango, ekumu na yango etikalaka; momboto mosantu ekozala ekumu na yango.”
