Yobo 29:1-25
29 Yobo akobaki koloba* ete:
2 “Soki ata nazongaka na basanza oyo eleki,Na mikolo oyo Nzambe azalaki kobatela ngai,
3 Ntango azalaki kongɛngisa mwinda na ye likoló ya motó na ngai,Ntango natambolaki na molili na lisalisi ya pole na ye,+
4 Ntango nazalaki naino na* makasi ya bolenge,Ntango Nzambe azalaki moninga na ngai ya motema na hema na ngai,+
5 Ntango Mozwi-ya-Nguya-Nyonso azalaki naino elongo na ngai,Ntango bana* na ngai nyonso bazalaki zingazinga na ngai,
6 Ntango matambe na ngai ezalaki kosukolama na manteka,Mpe mabanga ezalaki kosopela ngai mikɛli ya mafuta.+
7 Ntango nazalaki kokende na porte ya engumba+Mpe kofanda na esika ya bato nyonso!+
8 Soki bilenge bamoni ngai bazalaki kolongwa wana mpo na kopesa ngai limemya,*Mpe ata mibange bazalaki kotɛlɛma mpe kotikala bongo.+
9 Bankumu bazalaki kotika koloba;Bazalaki kotya lobɔkɔ na monɔkɔ na bango.
10 Bato ya lokumu balobaki eloko te;Liloba moko te ebimaki na monɔkɔ na bango.
11 Moto nyonso oyo azalaki koyoka ngai, azalaki koloba malamu mpo na ngai,Mpe baoyo bazalaki komona ngai, bazalaki kotatola mpo na ngai.
12 Mpo nazalaki kobikisa mobola oyo azalaki kobelela mpo na kosɛnga lisalisi,+Ná mwana oyo tata akufá mpe moto oyo azalaki na moto ya kosalisa ye te.+
13 Moto oyo azalaki pene ya kokufa, azalaki kopambola ngai,+Mpe nazalaki kosepelisa motema ya mwasi oyo mobali akufá.+
14 Nazalaki kolata bosembo* lokola elamba;Bosembo na ngai ezalaki lokola kazaka oyo ezangá mabɔkɔ mpe tirba.
15 Nakómaki miso ya moto oyo akufá misoMpe makolo ya motɛngumi.
16 Nazalaki tata ya mobola;+Nazalaki kolandela likambo ya kosamba ya moto oyo nayebi te.+
17 Nazalaki kobuka mbanga ya mosali mabe,+Mpe kobɔtɔla nyama oyo akangi na mino na ye.
18 Mbala mingi nazalaki koloba: ‘Nakokufa na ndako* na ngai moko,+Mpe mikolo na ngai ekozala mingi lokola bambuma ya zɛlo.
19 Misisa na ngai ekokende tii na mai,Mpe mamwɛ* ekotikala butu mobimba na bitape na ngai.
20 Nkembo na ngai ezali kokóma ntango nyonso ya sika,Mpe litimbo na lobɔkɔ na ngai ekokoba kobwaka makula.’
21 Bato bazalaki koyoka ngai na likebi,Bazalaki kofanda nyɛɛ mpo na kozela toli na ngai.+
22 Soki nasilisi koloba, bazalaki lisusu na likambo ya koloba te,Maloba na ngai ezalaki kokita malɛmbɛ* na matoi na bango.
23 Bazalaki kozela ngai lokola mbula;Bazalaki na mposa ya koyoka maloba na ngai ndenge bato bazalaka na mposa makasi ya mbula ya eleko ya prɛnta.*+
24 Ntango nazalaki komungamunga epai na bango, ezalaki kolekela bango;Pole ya elongi na ngai ezalaki kopesa bango elikya.*
25 Nazalaki kopesa bango malako lokola mokonzi,Mpe nazalaki kofanda lokola mokonzi na kati ya bituluku ya basoda na ye,+Lokola moto oyo azali kobɔndisa baoyo bazali kolela.+
Maloba na nse
^ Lil., “na lisɛsɛ oyo.”
^ Lil., “na mikolo ya.”
^ To, “basaleli.”
^ Lil., “komibomba.”
^ To, “boyengebene.” Talá Ndimbola ya maloba.
^ Lil., “zumbu.”
^ Matangá ya mai oyo ezalaka na milona na ntɔngɔntɔngɔ.
^ Lil., “kotánga.”
^ Lil., “Bazalaki kofungola monɔkɔ na bango polele mpo na mbula ya eleko ya prɛnta.”
^ To mbala mosusu, “Bazalaki te kolɛmbisa pole ya elongi na ngai.”
