Yosua 18:1-28
18 Na nsima liyangani mobimba ya Bayisraele esanganaki na Shilo,+ mpe batyaki hema ya kokutana kuna,+ mpo sikoyo mokili yango etyamaki na nse ya bokonzi na bango.+
2 Kasi, etikalaki na mabota nsambo ya Bayisraele oyo bazwaki naino libula te.
3 Bongo Yosua alobaki na Bayisraele boye: “Bokozela tii ntango nini mpo na kokende kozwa mokili oyo Yehova Nzambe ya bankɔkɔ na bino apesi bino?+
4 Bópona mibali misato na libota mokomoko mpe bópesa ngai bango mpo natinda bango. Basengeli kokende mpe kotambola na mokili yango mobimba mpe kosala karte na yango, na kolanda bateritware oyo libota mokomoko ekozwa. Na nsima, basengeli kozonga epai na ngai.
5 Basengeli kokabola yango kati na bango na biteni nsambo.+ Yuda akotikala na teritware na ye na sudi,+ mpe bakitani ya Yozefe bakotikala na teritware na bango na nɔrdi.+
6 Nde bino, bósala karte ya mokili yango na biteni nsambo, mpe bóya na yango awa epai na ngai, bongo ngai nakobwaka mbɛsɛ+ mpo na bino liboso ya Yehova Nzambe na biso.
7 Kasi Balevi bakozwa libula te na kati na bino,+ mpo bonganga-nzambe ya Yehova nde libula na bango.+ Libota ya Gade, libota ya Rubene, ná ndambo ya libota ya Manase+ basilaki kozwa libula na bango na ngámbo ya ɛsti ya Yordani, oyo Moize mosaleli ya Yehova apesaki bango.”
8 Mibali yango bamibongisaki mpo na kokende, mpe Yosua apesaki baoyo basengelaki kosala karte ya mokili yango mitindo ete: “Bókende mpe bótambola na mokili yango mobimba, bósala karte na yango mpe bózonga epai na ngai, mpe nakobwaka mbɛsɛ mpo na bino liboso ya Yehova awa na Shilo.”+
9 Bongo mibali yango bakendaki mpe batambolaki na mokili yango mobimba. Basalaki karte ya bingumba na yango, bakabolaki yango na biteni nsambo, mpe bakomaki yango na buku moko. Nsima na yango, bazongaki epai ya Yosua na kaa, na Shilo.
10 Bongo Yosua abwakaki mbɛsɛ mpo na bango na Shilo, liboso ya Yehova.+ Kuna, Yosua akabolelaki Bayisraele mokili yango, libota na libota na eteni na yango.+
11 Nsima ya kobwaka mbɛsɛ, libula ya libota ya Benyamina ebimaki, na kolanda mabota na bango, mpe teritware ya libula na bango ezalaki na katikati ya libota ya Yuda+ mpe ya Yozefe.+
12 Na nɔrdi, ndelo na bango ebandaki na Yordani, mpe ndelo yango emataki tii na mopanzi ya ngomba ya Yeriko+ na nɔrdi. Na wɛsti, emataki na ngomba yango, mpe ekendaki tii na esobe ya Bete-avene.+
13 Ndelo yango ekobaki tii na Luze, na mopanzi ya sudi ya ngomba ya Luze, elingi koloba Betele,+ mpe ekitaki tii na Atarote-adare,+ likoló ya ngomba oyo ezali na sudi ya Bete-horone ya Nse.+
14 Mpe ndelo yango elekaki na ngámbo ya wɛsti mpe ebalukaki tii na sudi, banda na ngomba oyo etalani na Bete-horone na sudi mpe esukaki na Kiriate-baala, elingi koloba, Kiriate-yearime,+ engumba moko ya Yuda. Wana nde ndelo ya ngámbo ya wɛsti.
15 Ndelo ya ngámbo ya sudi ebandaki na nsuka ya Kiriate-yearime, mpe ndelo yango ekendaki na wɛsti; ekobaki tii na liziba ya mai ya Nefetoa.+
16 Ndelo yango ekitaki tii na nsuka ya ngomba oyo etalani na Lobwaku ya mwana ya Hinome,+ oyo ezali na Lobwaku* ya Barefaime+ na nɔrdi. Mpe ekitaki tii na Lobwaku ya Hinome, tii na mopanzi ya ngomba ya Moyebusi+ na sudi, mpe ekitaki tii na Ene-rogele.+
17 Mpe elekaki na ngámbo ya nɔrdi mpe ekendaki na Ene-shemeshe mpe na nsima elekaki na Giliote, oyo etalani na esika ya komata Adumime,+ mpe ekitaki tii na libanga+ ya Bohane,+ mwana ya Rubene.
18 Mpe ekobaki na mopanzi ya nɔrdi ya ngomba oyo etalani na Araba, mpe ekitaki tii na Araba.
19 Mpe ndelo yango ekobaki tii na mopanzi ya nɔrdi ya ngomba ya Bete-hogla,+ mpe esukaki na nɔrdi ya Mbu ya Mungwa,*+ esika oyo mai yango ekɔtá na mokili, na esika oyo Yordani esuká na sudi. Wana nde ndelo ya sudi.
20 Mpe Yordani ezalaki ndelo na yango na ngámbo ya ɛsti. Wana nde teritware ya libula ya bakitani ya Benyamina na kolanda mabota na bango, na kolanda bandelo na yango na ngámbo nyonso.
21 Mpe bingumba ya libota ya Benyamina, na kolanda mabota na bango, ezalaki: Yeriko, Bete-hogla, Emeke-kezize,
22 Bete-araba,+ Zemaraime, Betele,+
23 Avime, Para, Ofra,
24 Kefare-amoni, Ofini mpe Geba:+ bingumba 12 mpe bamboka na yango.
25 Gibeone,+ Rama, Beerote,
26 Mizipe, Kefira, Moza,
27 Rekeme, Irpeele, Tarala,
28 Zela,+ Haelefe, Yebusi, elingi koloba, Yerusaleme,+ Gibea,+ ná Kiriate: bingumba 14 mpe bamboka na yango.
Wana nde libula ya bakitani ya Benyamina, na kolanda mabota na bango.
