Mobu 2023 ebandi, na ntembe te biso nyonso tozali na elikya ete makambo ya malamu ekokómela biso mpe mabota na biso. Mpo na nini tosengeli kozala na elikya?

 Biblia ezali mpenza na nsango moko ya malamu; eyebisi biso ete bampasi oyo tozali kokutana na yango sikoyo ezali kaka mpo na mwa ntango moke mpe ekosila mosika te. Kutu Biblia “ekomamaki mpo eteya biso, mpo, . . . na libɔndisi oyo euti na Makomami, tózala na elikya.”​—Baroma 15:4.

•   Mpo na koyeba makambo mosusu oyo Biblia elaki, tángá lisolo “Elikya ya solosolo mpo na mikolo ezali koya.”

 Elikya oyo Biblia epesi ekoki kozala lokola ‘longo mpo na bomoi na biso.’ (Baebre 6:19) Elikya yango ekoki kosalisa biso tózala kimya mpe tóbanga te. Ekoki kosalisa biso tóyika mpiko na mikakatano oyo tozali na yango lelo, tózala na makanisi malamu mpe tózala na elikya ete tokozala na esengo ya libela. Na ndakisa:

•   Talá ndenge elikya oyo Biblia epesaka esalisaki mobali moko alonga ezaleli ya kolangwa masanga. Talá video: Nalɛmbaki bomoi oyo nazalaki na yango.

•   Talá ndenge elikya oyo Biblia epesi ekoki kosalisa biso ntango moto moko oyo tolingaka akufi. Talá video Libɔndisi mpo na baoyo babungisi bato na liwa.

 Bato mingi bazalaka na elikya ete makambo ya malamu ekosalema, kasi bamonaka te ete makambo yango ekoki mpenza kosalema. Nzokande makambo oyo Biblia elobi ekosalema mpenza. Mpo na nini? Mpo Yehova Nzambe, a “oyo akoki kobuka lokuta te,” nde alaki makambo oyo Biblia elobi. (Tito 1:2) Kaka Yehova nde azali na nguya ya kokokisa makambo nyonso oyo alaki. Lisusu akoki kosala “nyonso oyo asepeli kosala.”​—Nzembo 135:5, 6.

 Na esengo mpenza tosɛngi yo otya motema na elikya ya solosolo oyo Biblia epesi. Mpo okómisa elikya na yo makasi, ‘taleláká Makomami malamumalamu.’ (Misala 17:11) Mpo na kosala yango, tokosepela koyekola na yo Biblia ofele. Na ndenge yango okobanda mobu 2023 na elikya moko kitoko!