Na mokolo ya 24/02/2022 liboso ntɔngɔ etana, basoda ya ekólo Russie babandaki kobundisa ekólo Ukraine atako bakonzi ya mokili basali nyonso mpo etumba yango esalema te. Etumba yango ekomema mpasi ya ndenge nini na mokili? Na mikolo euti koleka, António Guterres, sécretaire général ya ONU, alobaki boye: “Etumba yango ekobimisa makama minene mpenza. Ekomemela bato mpasi mingi, ekobebisa makambo mingi na mpoto, mpe kimya ya mokili mobimba.”

•   Yesu asakolaki ete “ekólo ekobunda na ekólo mpe bokonzi ekobunda na bokonzi.” (Matai 24:7) Tángá lisolo “Elembo ya ‘mikolo ya nsuka,’ to ‘ntango ya suka’ ezali nini?” mpo na komona ndenge oyo Biblia emonisi ete bitumba ya lelo ezali kokokisa makambo oyo Yesu alobaki.

•   Mokanda ya Emoniseli ekokanisi bitumba na moto moko oyo afandi likoló ya “mpunda moko ya langi ya motane ngwaa.” Moto yango azali “kolongola kimya na mabele.” (Emoniseli 6:4) Tángá lisolo “Batambwisi-mpunda minei yango bazali banani?” mpo na koyeba ndenge nini esakweli yango oyo etali bitumba ezali kosalema lelo oyo.

•   Mokanda ya Danyele esakolaki ete bitumba ekozala kati na “mokonzi ya nɔrdi” mpe “mokonzi ya sudi” Talá video Esakweli moko ezali kokokisama: Danyele mokapo 11 mpo na koyeba ntina oyo Russie mpe bikólo oyo epesaka yango mabɔkɔ bazali mokonzi ya nɔrdi. a

•   Mokanda ya Emoniseli elobeli mpe “etumba ya mokolo monene ya Nzambe Mozwi-ya-Nguya-Nyonso.” (Emoniseli 16:14, 16) Kasi, yango ezali etumba mosusu. Ezali te etumba oyo bikólo ezali kobunda bango na bango ndenge tozali komona sikoyo. Tángá lisolo “Etumba ya Armagedone ezali nini?” mpo na koyeba makambo mosusu oyo etali etumba yango oyo ekosalema na mikolo ezali koya.

•   Biblia elobi ete Nzambe akosilisa “bitumba tii na nsuka ya mabele” (Nzembo 46:9) Tángá lisolo “Elikya ya solosolo mpo na mikolo ezali koya” mpo na koyeba makambo malamu oyo Nzambe alaki.

•   Yesu ateyaki bayekoli na ye bábondelaka ete Bokonzi ya Nzambe eya. (Matai 6:9, 10) Bokonzi yango ezali guvɛrnema ya likoló oyo ekokokisa makambo Nzambe alaki kosala mpo na mabele, na ndakisa kotya kimya na mokili. Mpo na koyeba mapamboli oyo Bokonzi ya Nzambe ekomemela yo, talá video Bokonzi ya Nzambe ezali nini?

 Batatoli ya Yehova koleka 129 000 bafandaka na Ukraine. Lokola Batatoli ya bikólo nyonso, bango mpe bakɔtaka na makambo ya politiki te mpe bakendaka etumba te. (Yoane 18:36) Na mokili mobimba, Batatoli ya Yehova bazali kokoba kosakola ‘nsango malamu ya Bokonzi’ mpe komonisa ete Bokonzi ya Nzambe nde ekosilisa mpasi nyonso ya mokili, ata mpe bitumba. (Matai 24:14) Tosɛngi yo okomela biso mpo na koyeba makambo mosusu ya malamu Biblia elaki.