Na mokolo ya 6/07/2018, tribinale ya etúká ya Barda, na Azerbaïdjan elobaki ete Emil Mehdiyev elenge mobali ya mbula 18, oyo azali Motatoli ya Yehova akoki kosala mbula moko ya bolɔkɔ. Tribinale ekweisaki Emil na likambo mpo elobaki ete aboyaki mosala ya soda, kasi ekatelaki ye etumbu ya bolɔkɔ te. Atako bongo, akoki kolongwa na ndako na ye te kozanga ndingisa ya bakonzi ya Leta mpe akoki kobima Azerbaïdjan te.

Na sanza ya 12/2017, departema ya etúká ya Barda oyo etalaka likambo ya kokomisa nkombo na mosala ya soda ebengisaki ndeko Mehdiyev, akende kokomisa nkombo mpo na mosala ya soda, kasi aboyaki bátya nkombo na ye na liste mpo lisosoli na ye epekisi ye mosala ya soda. Babengisaki ye lisusu mpo na mbala ya mibale, kasi amonisaki bango ntina oyo aboyaki kokomisa nkombo mpo na kotosa lisosoli na ye mpe asɛngaki bápesa ye mosala mosusu na esika ya mosala ya soda. Bayebisaki ye ete mosala mosusu ezali te mpe bakotinda dosye na ye na biro ya prokirɛrɛ na etúká ya Barda.

Nsima ya koyoka ye mbala mingi mpe kopusapusa mokolo ya kosamba na ye, tribinale yango ekweisaki ye na likambo mpe elobaki ete akoki kosala mbula moko ya bolɔkɔ. Atako bakɔtisaki Emil na bolɔkɔ te, kasi bakotalela ye kaka lokola mosali mabe mpo guvɛrnema ya Azerbaïdjan etye naino te programɛ ya mosala mosusu ya Leta na esika ya mosala ya soda, atako elakaki banda kala ete ekotya yango.

Tozali na esengo ete ndeko na biso Mehdiyev azali kokoba koboya komikɔtisa na makambo ya mokili atako akutani na likambo wana ya mpasi.​—1 Petro 2:19.