Ndenge moko na bikólo mosusu, bakonzi ya Leta ya Sri Lanka bapekisi bato kotambola na mboka mobimba mpo maladi ya coronavirus epalangana te. Mpo na kotosa epekiseli yango, bandeko na biso oyo bazali na etuluku ya bababa, bazali kosalela bisaleli ya teknoloji mpo na kosakwela bababa mpe bato oyo bayokaka malamu te.

Ndeko mwasi Vihanga Fernando, azali mobongisi-nzela, asakolaka na nzela ya kokoma mikanda. Lokola bababa bayebaka kotánga malamu te, ayemaka mayemi na mikanda na ye mpo na koteya mateya ya Biblia.

Liboso ndeko mwasi Rosie Chithravelautham azalaki kokanisa ete akokoka te koyekola na moto Biblia na nzela ya video. Alobi boye: “Liboso nazalaki kobenga moto moko ya baba na telefone, mpe telefone yango ezalaki kosala malamu te. Ezalaki mpasi mpo bababa mosusu báyeba bajɛstɛ nazalaki kosala.” Nzokande ndeko Rosie azalaki na ekateli ya kokoba koyekola na bato Biblia na ntango ya maladi mabe oyo. Amekaki lisusu. Banda wana azali koyekola Biblia na bato misato, mpe bato yango bazali kolanda makita na nzela ya video.

Ndeko mwasi Nirosha Shiranthi, azali baba, azwaki batisimo na sanza ya 03/2020, azalaki kobanga kosakola na video. Abondelaki Yehova mpo kobanga na ye esila. Na nsima, asɛngaki mosala ya mobongisi-nzela mosungi na eleko ya Ekaniseli. Bababa mingi bandimaki libyangi ya ndeko Nirosha ya kolanda Ekaniseli na video, mpe mingi na bango balingaki koyeba makambo ebele oyo etali elembo ya mikolo ya nsuka. Ndeko Nirosha abandaki koyekola Biblia na bato nsambo. Alobi boye: “Ntango nazali kosakola, nayokaka esengo. Atako tokoki kobima libándá te, tozali na likoki ya kosakola. Yehova azali ntango nyonso kokokisa mokano na ye.” Ndeko Nirosha azwaki ekateli ya kotikala mobongisi-nzela mosungi.

Tozali na esengo ya koyoka makambo malamu oyo bandeko ya Sri Lanka basalaki. Yango ezali milende oyo bandeko na biso oyo bazali bababa mpe baoyo bayokaka malamu te basalaki mpo na kosanzola nkombo ya Yehova.​—Nzembo 113:1.