•  Oyo osengeli koyeba

•  Oyo okoki kosala

•  Makambo bilenge mosusu balobi

 Bakotyela yo motema soki ozali komonisa ete obongi kotyelama motema. Kotosa mibeko ya baboti ezali lokola kofuta nyongo moko. Yo ozali na nyongo ya kotosa baboti, soki ozali ‘kofuta nyongo yango,’ bakoki kodefisa yo ‘nyongo’ mosusu (to bonsomi). Kasi, soki ozali kobuka mibeko ya baboti, kokamwa te soki bazali kotyela yo motema mingi lisusu te.

 Esɛngaka ntango mpo bákóma kotyela yo motema. Osengeli komonisa bizaleli oyo ebongi liboso baboti na yo bábakisela yo bonsomi.

 ISTWARE YA SOLO: “Ntango nazalaki elenge, nayebaki oyo baboti na ngai balingaki nasala, yango wana nazalaki kosala lokola nazalaki kosala makambo yango atako nazalaki kosala na kobombana makambo oyo nazalaki kolinga. Yango esalaki ete ezala mpasi baboti na ngai bátyela ngai motema. Na nsima, nayaki koyeba ete kokosa ekobakisela ngai bonsomi te. Esengeli nasala makambo oyo ekotinda bango bátyela ngai motema liboso bákóma kotyela ngai motema.”​—Craig.

 Lobáká solo ata soki ekosala yo mpasi. Moto nyonso asalaka mabunga, kasi koloba lokuta mpo na kozipa yango (to kobomba makambo mosusu mpo solo eyebana mpenza te) ekolongola konfianse nyonso oyo baboti na yo batyelaka yo. Kasi, soki bayebi ete ozalaka mpenza sembo, baboti na yo bakomona ete okɔmɛli ndenge ozali kondima mabunga na yo. Mpe moto ya ndenge wana nde bakoki kotyela ye motema.

 “Kosala mabunga ekolongola ntango nyonso te konfianse oyo batyelaka yo, kasi okolongola ntango nyonso konfianse oyo batyelaka yo soki oluki kobomba mabunga yango.”​—Anna.

 Biblia elobi: “Tolingi kozala sembo na makambo nyonso.”​—Baebre 13:18.

•   Kanisá naino: Soki baboti batuni esika ozali kokende mpe likambo okei kosala, obombelaka bango makambo mosusu te? To soki baboti batuni esika okendaki mpe oyo osalaki, ozwaka na lisɛki makambo mikemike oyo bazali na mposa ya koyeba?

 Yebá kokokisa mikumba na yo. Tosáká mibeko nyonso ya ndako. Kozela te mpo na kosala misala ya ndako. Kokende na retare te soki babengisi yo esika moko boye. Saláká badevuare na yo ya kelasi. Tosáká ngonga ya kozonga na ndako.

 “Soki baboti bapesi yo nzela ya kobima na baninga mpe bayebisi yo ete ngonga ya 21 ebɛtɛla yo na ndako, kozonga na ndako te na ngonga ya 22:30 bongo ozela ete bápesa nzela mbala ya nsima obima na baninga na yo!”​—Ryan.

 Biblia elobi: “Moto na moto akomema mokumba na ye moko.”​—Bagalatia 6:5.

•   Kanisá naino: Oyebani lokola moto oyo azongaka ndako na ngonga, asilisaka misala ya ndako oyo bapesi ye mpe atosaka mibeko; ata mibeko oyo olingaka te?

 Zalá motema molai. Soki osalaki likambo moko oyo etindaki baboti na yo bátyela yo lisusu konfianse te, ekosɛnga ntango eleka mpo ozongisa konfianse yango. Osengeli kozela.

 “Nazalaki koyoka mabe ndenge baboti na ngai bazalaki kopesa ngai te makambo mosusu ya kosala ntango nakómaki na mbula moko boye. Nayebaki te ete kokóma mokóló na mbula ezali ndenge moko te na kokɔmɛla. Nasɛngaki baboti na ngai bápesa ngai mabaku oyo nakomonisa bango ete nabongi bápesa ngai konfianse. Ezwaki mwa ntango, kasi makambo esimbaki. Mpe yango eteyaki ngai ete mbula ya kobotama ekipaka te mpo bátyela ngai motema; kasi nde makambo oyo nazali kosala.”​—Rachel.

 Biblia elobi: “Bókoba kotala soki bozali ndenge nini.”​—2 Bakorinti 13:5.

•   Kanisá naino: Mpo baboti na yo bápesa yo konfianse (to bázongela lisusu kopesa yo konfianse), wapi mwa makambo okoki kosala mpo ‘otala soki ozali ndenge nini’?

 TOLI: Mityelá mokano, ezala mpo na kotosa ngonga, kosilisaka misala na yo ya ndako, kozongaka ndako na retare te to mpo na likambo mosusu nyonso. Yebisá baboti na yo ekateli oyo ozwi mpe tuná bango makambo oyo okoki kosala mpo bátyelaka yo konfianse. Na nsima, salá nyonso mpo na kolanda toli oyo ya Biblia: “Bosengeli kolongola bomoto ya kala oyo eyokani na etamboli na bino ya liboso.” (Baefese 4:22) Nsima ya mikolo baboti bakomona milende osali!