Biblia elobi ete “Yehova akoboya te kopesa eloko moko ya malamu na baoyo bazali kotambola na bosembo.” (Nzembo 84:11) “Kotambola na bosembo” elimboli nini? Elimboli kozala na bomoi oyo emonisi ete ozali kotosa elaka oyo opesaki Yehova ntango omipesaki na ye. (Mosakoli 5:4, 5) Ndenge nini okoki kotambola na bosembo nsima ya batisimo na yo?

Na lisolo oyo

•  Kobá kokanga motema na makambo ya mpasi

•  Kobá kotɛmɛla komekama

•  Kobá kobakisa molende na yo

 Vɛrsɛ ya ntina: “Tosengeli kokɔta na Bokonzi ya Nzambe na nzela ya malɔzi mingi.”​—Misala 14:22.

 Elimboli: Mpo na koloba solo, bakristo nyonso bakokutana na makambo ya mpasi na bomoi na bango. Makambo mosusu oyo okokutana na yango, na ndakisa kotyola to botɛmɛli, ezali kaka mpo ozali mokristo. Mikakatano mosusu, lokola ya mbongo to maladi, ekoki kokómela moto nyonso.

 Oyo ekoki kosalema: Na bantango mosusu, makambo ya bomoi na yo ekoki kobongwana, mpe mbala mosusu na ndenge oyo olingi te. Biblia elobi ete makambo ya mabe ekoki kokómela moto nyonso, ezala bakristo to baoyo bazali bakristo te.​—Mosakoli 9:11.

 Oyo okoki kosala: Lokola oyebi ete okokutana na makambo ya mpasi, okoki komibongisa mpo na kolonga yango. Monáká makambo ya mpasi lokola libaku ya kokómisa makasi kondima na yo mpe ya kotyela Yehova motema mingi koleka. (Yakobo 1:2, 3) Na nsima, makambo oyo okutanaki na yango ekotinda yo oloba lokola ntoma Paulo ete: “Na makambo nyonso, nazwaka makasi na lisalisi ya Nzambe, moto oyo apesaka ngai nguya.”​—Bafilipi 4:13.

 Likanisi: Yekolá bomoi ya Yozefe. Okoki kotánga lisolo na ye na Ebandeli mokapo 37 mpe 39 tii 41. Omituna boye: Makambo nini ya mpasi oyo akanaki te ekómelaki ye, mpe asalaki nini mpo na yango? Ndenge nini Yehova asalisaki Yozefe?

 Ozali na mposa ya lisalisi?

•   Tángá:

   “Nasala nini soki likambo ya mawa ekómeli ngai?”

   “Suis-je quelqu’un de « résilient »?”

   “Ntango makambo ebongwani”

•   Zwá:

   “Ntango tata to mama azali kobɛla”

 Vɛrsɛ ya ntina: “Moto na moto amekamaka nde na mposa na ye moko oyo ezali komema ye mpe kobenda ye.”​—Yakobo 1:14.

 Elimboli: Na bantango mosusu, biso nyonso toyokaka bamposa oyo, soki topekisi yango te ekoki kotinda biso tósala makambo ya mabe.

 Oyo ekoki kosalema: Nsima ya batisimo, okokoba koyoka “bamposa ya mosuni.” (2 Petro 2:18) Okoki kutu koyoka mposa ya kosangisa nzoto liboso obala.

 Oyo okoki kosala: Bongisá makanisi banda sikoyo​—liboso komekama eya​—mpo otika te ete bamposa na yo ezwela yo bikateli. Kobosana te, Yesu alobaki: “Moto moko te akoki kozala moombo ya bankolo mibale.” (Matai 6:24) Okoki kopona nkolo oyo olingi. Poná Yehova. Ata soki mposa mabe ezali makasi ndenge nini, okoki koboya kokokisa yango.​—Bagalatia 5:16.

 Likanisi: Yekolá koyeba makasi na yo mpe bolɛmbu na yo. Poná baninga oyo bakosalisa yo obimisa bizaleli na yo ya malamu oyo ebombaná. Kimá bato, bisika, mpe makambo oyo ekoki kotinda yo osala oyo ezali mabe.​—Nzembo 26:4, 5.

 Ozali na mposa ya lisalisi?

•   Tángá:

   “Ndenge nini nakoki kotɛmɛla komekama?”

   “Ndenge nini nakoki kobengana makanisi ya kosangisa nzoto?”

   “Nasala nini mpo naboya makanisi mabe ya baninga”

   “Olandaka makanisi ya Yehova?”

 Vɛrsɛ ya ntina: “Mokomoko na bino amonisa molende ya ndenge wana . . . tii na nsuka, mpo bókóma gɔigɔi te.”​—Baebre 6:11, 12.

 Elimboli: Moto azali kotya makanisi nyonso na mosala na ye akoki kolɛmbisa mabɔkɔ mpe kokóma gɔigɔi.

 Oyo ekoki kosalema: Na ntembe te ozalaki na esengo mpe na molende makasi nsima ya batisimo. Ozalaki mpenza kolinga Yehova. Kasi na nsima, okoki komona ete ekómi mpasi okoba kotosa Yehova na makambo nyonso, mpe yango ekoki kolɛmbisa yo nzoto mpe kosala ete molende na yo ekita.​—Bagalatia 5:7.

 Oyo okoki kosala: Kobá kosala oyo ezali malamu, ata na ntango oyo motema na yo ezali kolinga te osala yango. (1 Bakorinti 9:27) Na ntango yango, pusaná penepene na Tata na yo ya likoló, yekolá koyeba ye malamu mpe sololáká na ye mbala na mbala na libondeli. Lisusu, kobá kozala moninga makasi ya bato oyo balingaka kosalela Yehova.

 Likanisi: Kobosana te ete Yehova alingaka yo mingi mpe azali pene ya kosalisa yo. Kokanisa te ete asilikeli yo mpo molende na yo ekiti mwa moke. Biblia elobi: “Apesaka nguya na moto oyo alɛmbi Mpe baoyo bazangi makasi, atondisaka bango na nguya.” (Yisaya 40:29) Na nsima, akopambola milende oyo ozali kosala mpo na kozongela molende na yo.

 Ozali na mposa ya lisalisi?

•   Tángá:

   “Bilenge: Bókoba kosala mpo na lobiko na bino moko”

   “Ndenge nini nakoki kozwa esengo ya kosambela Nzambe?”

•   Talá:

   Makambo bilenge mosusu balobi​—Bomoi oyo eleki malamu

 Na mokuse: Soki ozali kotambola na bosembo, okosepelisa motema ya Yehova! (Masese 27:11) Akosepela ndenge oponi kozala na ngámbo na ye, mpe akopesa yo nyonso oyo osengeli na yango mpo otɛmɛla Satana.