MITUNA OYO BILENGE BATUNAKA
Bomoi ekelamá to ebimá yango moko?—Eteni 3: Mpo na nini kondima ete bomoi ekelamá?
“Soki ondimaka ete bomoi ekelamá, bato mosusu bakoki kokanisa ete ozali zoba, ete okangamá kaka na makambo oyo baboti na yo bateyá yo, to ete lingomba na bino ebebisá yo makanisi.”—Jeanette.
Yo mpe okanisaka lokola Jeanette? Soki okanisaka bongo, okoki kobanda komituna soki bomoi ekelamá mpenza. Moto moko te alingaka bámona ye ete ayebi makambo te. Nini ekoki kosalisa yo?
Makanisi ya bato
1. Soki ondimaka ete bomoi ekelamá, bato bakokanisa ete ondimaka siansi te.
“Molakisi na biso alobaki ete bato bakómaka kondima ete bomoi ekelamá soki bakoki te kolimbola ndenge mokili etambolaka.”—Maria.
Oyo osengeli koyeba: Bato oyo balobaka bongo bazali na libunga. Bato minene ya siansi, na ndakisa Galilée mpe Isaac Newton bazalaki kondima ete Mozalisi azali. Atako bazalaki kondima yango, bazalaki mpe kolinga siansi. Lelo oyo mpe, bato mosusu ya siansi bandimaka siansi kasi bandimaka mpe ete bomoi ekelamá.
Meká kosala boye: Kende na Watchtower MIKANDA OYO EZALI NA INTERNET mpe bɛtá maloba (na kati ya guillemets) “alobeli kondima na ye” na esika ya kosala bolukiluki mpo omona minganga minene mpe bato ya siansi oyo bandimaka ete bomoi ekelamá. Talá makambo oyo esalisaki bango bándima yango.
Na mokuse: Kondima ete bomoi ekelamá elakisi te ete oboyi siansi. Kutu, koyekola malamumalamu biloko oyo ezali na mokili ekoki kosalisa yo ondima lisusu makasi ete bomoi ekelamá.—Baroma 1:20.
2. Soki ondimaka lisolo ya Biblia oyo elobeli ndenge bomoi ekelamá, bato bakomona ete ozali na molende ya mabe na makambo ya lingomba.
“Bato mingi bamonaka ete kondima lisolo oyo elobeli ndenge bomoi ekelamá ezali masɛki. Bamonaka ete makambo oyo ezali na mokanda ya Ebandeli ezali lisapo.”—Jasmine.
Oyo osengeli koyeba: Bato mingi bazalaka na makanisi ya libunga mpo na lisolo ya Biblia oyo elobeli ndenge biloko nyonso ekelamá. Na ndakisa, bato mosusu balobaka ete mabele ekelamá eleki kaka mwa bambula mpe ete bomoi ekelamaki na boumeli ya mikolo motoba ya pɔsɔ. Biblia endimi ata likanisi moko te ya ndenge wana.
Ebandeli 1:1 elobi polele ete: “Na ebandeli Nzambe azalisaki likoló mpe mabele.” Yango eyokani na ndenge bato ya siansi bamonisaka ete mabele ekelamá esali bamiliare ya bambula.
Liloba “mokolo” oyo mokanda ya Ebandeli esaleli ekoki kolimbola bileko ya ntango molai. Kutu, na Ebandeli 2:4 basaleli liloba “mokolo” mpo na kolobela mikolo nyonso motoba ya bozalisi.
Na mokuse: Lisolo ya Biblia oyo elobi ete biloko nyonso ekelamá eyokani na makanisi ya bato ya siansi.
Kanisá mateya oyo ondimaka
Kondima ete bomoi ekelamá elimboli te kozala bindimelá. Esɛngi nde kokanisa malamu. Talelá makambo oyo:
Na mokili, soki omoni eloko moko boye, oyebaka mbala moko ete ezali na moto oyo asalaki yango. Soki omoni aparɛyi ya kokanga fɔtɔ, aviɔ, to ndako, okoloba mbala moko ete moto nde asalaki yango. Bongo mpo na nini koloba bongo te mpo na liso ya moto, ndɛkɛ na likoló to mabele esika tofandi?
Kanisá naino: Mbala mingi bato ya mayele bayekolaka biloko oyo ezali na mokili mpo básala biloko ya sika, mpe balingaka ete bato bándima mosala na bango. Okanisi ete ebongi kondima moto mpe biloko oyo abimisi, mpe koboya kondima Mozalisi mpe makambo ya kokamwa koleka oyo asalá?
Ebongi mpenza kokanisa ete moto nde asalá aviɔ, bongo koloba ete ndɛkɛ ebimá yango moko?
Biloko oyo ekoki kosalisa yo
Kotalela biloko oyo ezali na mokili ekoki kosalisa yo ondima mpenza malamumalamu ete bomoi ekelamá.
Meká kosala boye: Kende na Watchtower MIKANDA OYO EZALI NA INTERNET mpe komá maloba (na kati ya guillemets) “ebimá kaka yango moko” na esika ya kosala bolukiluki. Na motó ya likambo “Ebimá kaka yango moko?” oyo ezalaka na Lamuká! poná mwa masolo oyo esepelisi yo. Na lisolo mokomoko, talá likambo ya kokamwa oyo balobeli wana. Ndenge nini ezali kondimisa yo ete ezali na Moto oyo asalaki yango?
Kɔtá na mozindo: Tángá mwa babuku oyo elandi mpo oyeba makambo mosusu oyo emonisi mpenza ete bomoi ekelamá.
La vie a-t-elle été créée?
Mabele etyamá na esika oyo ebongi mpe ezali na nyonso oyo esengeli mpo na kobatela bomoi.—Talá nkasa 4-10.
Biloko ya kokamwa oyo ezali na mokili emonisaka ete ezali na moto oyo asalá yango.—Talá nkasa 11-17.
Lisolo ya mokanda ya Ebandeli oyo elobeli kokelama ya biloko nyonso eyokani na siansi.—Talá nkasa 24-28.
Cinq questions à se poser sur l’origine de la vie
Bomoi ebimá kaka na pwasa boye te.—Talá nkasa 4-7.
Biloko mikemike lokola baselile ebimá na pwasa te, kaka yango moko.—Talá nkasa 8-12.
Likoki ya ADN ya kobomba makambo ebele eleki mosika baaparɛyi ya mikolo oyo.—Talá nkasa 13-21.
Bomoi nyonso eutá esika moko te. Mikuwa ya banyama mpe biloko ya kalakala emonisi ete banyama ndenge na ndenge ebimaki na mbala moko, kasi te malɛmbɛmalɛmbɛ.—Talá nkasa 22-29.
“Bikolo oyo ezali na mokili endimisaka ngai ete Nzambe azali, kobanda na banyama awa na mabele tii na molɔ́ngɔ́ mpe biloko nyonso oyo ebongisamá malamu kati na yango.”—Thomas.
Talá mpe...
MAKAMBO BILENGE MOSUSU BALOBI
Bilenge bazali kolobela likambo etali kondima ete Nzambe azali
Na video oyo ya miniti 3, bilenge bamonisi ntina oyo bandimaka ete Mozalisi azali.
MITUNA OYO BILENGE BATUNAKA
Bomoi ekelamá to ebimá yango moko?—Eteni 1: Mpo na nini kondima ete Nzambe azali?
Olingi koyeba ndenge ya kolimbola kozanga kobanga ntina oyo ondimaka ete Nzambe azali? Talá oyo okoki koloba soki moto atuni yo ntina oyo ondimaka ete Nzambe azali.
MITUNA OYO BILENGE BATUNAKA
Bomoi ekelamá to ebimá yango moko?—Eteni 2: Mpo na nini koboya kondima liteya ya evolisyo?
Ntina mibale oyo emonisi mpo na nini osengeli te kondima liteya ya evolisyo.
MITUNA OYO BILENGE BATUNAKA
Bomoi ekelamá to ebimá yango moko?—Eteni 4: Ndenge nini nakoki kolimbola ete bomoi ekelamá?
Esɛngi te ozala mayele mingi na makambo ya siansi mpo olimbola ntina oyo omoni ete ebongi kondima ete biloko nyonso oyo ezali na mokili ekelamá. Salelá likanisi moko ya malamu oyo ezali na Biblia.
