•  Oyo osengeli koyeba

•  Oyo okoki kosala

•  Makambo bilenge mosusu balobi

•   Boninga oyo ezangi mikakatano ezalaka te. Lokola tozali bato ya kozanga kokoka, moninga malamu; ata mpe moto oyo ozwaka ye moninga na yo ya motema akoki kosala to koloba likambo oyo ekopesa yo mpasi na motema. Toboyi te, yo mpe ozali moto ya kozanga kokoka. Boye, na bosembo nyonso, okoki kokanisa mokolo oyo ozokisaki moto moko na motema?​—Yakobo 3:2.

•   Internet ekoki kosala ete ezala mpasi te báyokisa yo mpasi na motema. Na ndakisa, elenge moko na nkombo David, alobi boye: “Ntango okɔti na Internet mpe omoni bafɔtɔ ya moninga na yo na fɛti moko, okoki kobanda kokanisa mpo na nini babengisaki yo te na fɛti yango. Na nsima, okoki komiyoka lokola atɛki yo mpe koyoka mawa.”

•   Okoki koyeba ndenge ya kobongisa likambo.

 Mitalelá malamumalamu. Biblia elobi: “Elimo na yo esilika nokinoki te, mpo nkanda efandaka nde na ntolo ya bazoba.”​—Mosakoli 7:9.

 “Na bantango mosusu okoya komona ete likambo esilikisaki yo ezalaki na yango monene te.”​—Alyssa.

 Kanisá naino: Olingaka kolandela likambo nyonso? Okoki koyekola ndenge ya kokanga motema mingi lisusu na mabunga ya basusu?​—Mosakoli 7:21, 22.

 Talelá matomba ya kolimbisa. Biblia elobi: ‘Ezali kitoko kolimbisa likambo oyo ebuki mibeko.’​—Masese 19:11.

 “Ata soki ozali na likambo ya komilelalela, ezali malamu kolimbisa na motema moko; yango elingi koloba kotika kolobela moto yango likambo yango lisusu mpo akoba kosɛngaka yo bolimbisi. Soki olimbisi ye, kozongela lisusu likambo yango te.”​—Mallory.

 Kanisá naino: Ezali mpenza likambo monene? Okoki kolimbisa mpo na kobatela kimya?​—Bakolose 3:13.

 Talelá mpe litomba ya moninga. Biblia elobi: “Bótyaka likebi kaka na makambo na bino moko te, kasi bótyaka mpe likebi na makambo ya bamosusu.”​—Bafilipi 2:4.

 “Soki bolingo mpe limemya ezali na boninga na bino, bozali na ntina ya kobongisa nokinoki mikakatano mpo na nyonso oyo bosali mpo bózala baninga. Bosí bosali milende mingi mpo bózala baninga mpe bokolinga te milende yango ekende na mai.”​—Nicole.

 Kanisá naino: Okoki komona ete likanisi ya moninga ezali na mwa makambo mosusu ya malamu?​—Bafilipi 2:3.

 Na mokuse: Koyeba ndenge ya kosala ntango bayokisi yo mpasi na motema ezali likambo oyo ekosalisa yo ntango okokóma mokóló. Mpo na nini te koyekola yango sikoyo?