Na lisolo oyo

•  Kolingana na moto elimboli nini?

•  Okoki mpo na kolingana na moto?

 Bato mosusu bamonaka ete kolingana na moto ezali kaka lisano mpamba. Kasi, na lisolo oyo “kolingana na moto” elakisi ntango oyo mwasi ná mobali balekisaka elongo mpo na koyeba soki bakoki mpenza kobalana. Na yango, kolingana na moto esengeli kozala na mokano. Kasi ezali kaka te mpo na kosepela na likebi oyo mwasi to mobali azali kotyela yo.

 Kendekende, kolingana na moto esengeli kotinda yo ozwa ekateli moko: Ya kobalana na moto yango to ya kokata boninga yango. Ntango obandi kolingana na moto moko, osengeli komibongisa na makambo oyo yango ekobimisa.

 Na mokuse: Soki omindimisi ete osengeli kobanda kolingana na moto, osengeli mpe komindimisa ete okómi pene mpo na kobala.

 Kolingana na moto ekoki komema na libala, yango wana ekozala malamu otalela bizaleli oyo ozali na yango oyo ekoki kosala ete boninga na bino ezala malamu to ebeba. Na ndakisa, talelá makambo oyo elandi:

•   Boyokani na bato ya libota. Lolenge oyo osalelaka baboti mpe bandeko na yo makambo, mingimingi ntango ozali komitungisa, mbala mingi yango emonisaka ndenge oyo okobanda mpe kosalela molongani na yo makambo.

   Etinda ya Biblia: “Bólongola mosika na bino makambo nyonso ya bololo oyo eyokisaka mpasi, nkanda, nkanda makasi, koganga mpe maloba ya kofinga, ezala mpe likambo nyonso ya kozokisa.”​​—Baefese 4:31.

   Omituna boye: ‘Baboti mpe bandeko na ngai bakoki koloba ete nasalelaka bango makambo na limemya? Soki toyokani te na likambo moko, nazalaka pene ya kosolola na bango na kimya mpe na limemya, to nasilikaka mpe toswanaka?’

•   Komipimela. Ntango okobala, ekosɛnga ete otalelaka makambo oyo molongani na yo alingi mpe mbala mingi omipimelaka makambo mosusu mpo na kosepelisa ye.

   Etinda ya Biblia: “Moto na moto akoba koluka, litomba na ye moko te, kasi oyo ya moto mosusu.”​​—1 Bakorinti 10:24.

   Omituna boye: ‘Nalingaka makambo esalema kaka ndenge nalingi? Bato mosusu bamonaka ngai ete nazalaka makambo makasimakasi te? Na makambo nini namonisaka ete natyaka bamposa ya basusu na esika ya liboso?’

•   Komikitisa. Molongani ya malamu andimaka mabunga na ye mpe asɛngaka bolimbisi.

   Etinda ya Biblia: “Biso nyonso tobɛtaka mabaku mbala mingi.”​​—Yakobo 3:2, maloba na nse ya lokasa.

   Omituna boye: ‘Nandimaka mbala moko mabunga na ngai, to nalukaka nde komilongisa? Nasilikaka ntango bato bapesi ngai toli na likambo oyo nasengeli kobongisa?’

•   Mbongo. Moto oyo ayebi kosalela mbongo na lolenge ya malamu akoki koyeba kokima mitungisi ya mbongo oyo ebimisaka mikakatano mingi na libala.

   Etinda ya Biblia: “Nani kati na bino oyo alingi kotonga ndako molai akofanda liboso te mpo na koyeba mosolo boni yango ekosɛnga, mpe komona soki azali na oyo esengeli mpo na kosilisa yango?”​​—Luka 14:28.

   Omituna boye: ‘Nasalelaka mbongo na ngai na mayele, to nazalaka ntango nyonso na banyongo ya kofuta? Ndenge nini nakoki komonisa ete nasalelaka mbongo na mayele?’

•   Makambo ya elimo. Soki ozali Matatoli ya Yehova, osengeli kozala na programɛ ya kotánga Biblia mpe koyangana na makita ya bokristo.

   Etinda ya Biblia: “Esengo na baoyo bayebi mposa na bango ya elimo.”—Matai 5:3.

   Omituna boye: ‘Nazwaka bibongiseli mpo na kobatela boyokani na ngai ná Nzambe? Namonaka nde boyokani na ngai ná Nzambe ezali na ntina mingi, to natyaka makambo mosusu na esika ya liboso?’

 Na mokuse: Moto oyo okobala esengeli azala molongani ya malamu oyo abongi na yo. Soki ozali kosala milende mpo na kozala moto malamu, mbala mosusu yo mpe okoki kokutana na moto oyo azali kosala kaka bongo.