ປະຖົມມະການ 25:1-34
25 ອັບຣາຮາມເອົາເມຍອີກຄົນໜຶ່ງຊື່ເກຕຸຣາ.
2 ຕໍ່ມາ ລາວມີລູກຊາຍຊື່ຊິມຣານ ໂຢກຊານ ເມດານ ມີດີອານ+ ອີຊະບາກ ແລະຊູອາ.+
3 ໂຢກຊານມີລູກຊາຍຊື່ເຊບາ ແລະເດດານ.
ເດດານມີລູກຊາຍຊື່ອາຊູຣີມ ເລຕູຊີມ ແລະເລອຸມມີມ.
4 ມີດີອານມີລູກຊາຍຊື່ເອຟາ ເອເຟ ຮາໂນກ ອາບີດາ ແລະເອັນດາອາ.
ທັງໝົດນີ້ແມ່ນລູກຫຼານຂອງເກຕຸຣາ.
5 ຈາກນັ້ນ ອັບຣາຮາມໄດ້ເອົາທຸກສິ່ງທຸກຢ່າງໃຫ້ອີຊາກ.+
6 ສ່ວນລູກຊາຍທີ່ເກີດຈາກເມຍຄົນອື່ນໆ ລາວໄດ້ແບ່ງຂອງຂວັນບາງຢ່າງໃຫ້ເຂົາເຈົ້າ. ຕອນທີ່ລາວມີຊີວິດຢູ່ ລາວກໍໄດ້ແຍກເຂົາເຈົ້າໃຫ້ໄປຢູ່ຕ່າງຫາກຈາກອີຊາກ.+ ໃຫ້ເຂົາເຈົ້າໄປຢູ່ແຜ່ນດິນທາງທິດຕາເວັນອອກ.
7 ອັບຣາຮາມມີອາຍຸໄດ້ 175 ປີ.
8 ອັບຣາຮາມຕາຍຕອນທີ່ລາວເຖົ້າຫຼາຍ. ລາວມີຊີວິດຍືນຍາວແລະມີຄວາມສຸກ. ແລ້ວລາວກໍໄປຢູ່ນຳປູ່ຍ່າຕານາຍ.*
9 ອີຊາກແລະອິດຊະມາເອນລູກຊາຍຂອງລາວເອົາສົບຂອງລາວໄປຝັງຢູ່ຖ້ຳໃນມັກເປລາ ຢູ່ທົ່ງຂອງເອຟະໂຣນ ເຊິ່ງເປັນລູກຂອງໂຊຮາຄົນເຮດ ແລະຖ້ຳນັ້ນຢູ່ໃກ້ມາມເຣ.+
10 ອັບຣາຮາມໄດ້ຊື້ດິນຕອນນັ້ນຈາກລູກຫຼານຂອງເຮດ. ອັບຣາຮາມຖືກຝັງໄວ້ຢູ່ຫັ້ນກັບຊາຣາເມຍຂອງລາວ.+
11 ຫຼັງຈາກອັບຣາຮາມຕາຍ ພະເຈົ້າໄດ້ອວຍພອນອີຊາກລູກຊາຍຂອງລາວຕໍ່ໄປ.+ ແລ້ວອີຊາກກໍໄດ້ອາໄສຢູ່ໃກ້ເບເອລາຄາຍຣອຍ.+
12 ນີ້ແມ່ນປະຫວັດຂອງອິດຊະມາເອນ+ ລູກຊາຍຂອງອັບຣາຮາມທີ່ເກີດຈາກຮາກາ+ຄົນເອຢິບທີ່ເປັນຄົນຮັບໃຊ້ຂອງຊາຣາ.
13 ນີ້ແມ່ນຊື່ຂອງພວກລູກຊາຍຂອງອິດຊະມາເອນ ເຊິ່ງເປັນປູ່ຍ່າຕານາຍຂອງຕະກູນຕ່າງໆຕາມຊື່ຂອງເຂົາເຈົ້າ. ລູກກົກຂອງອິດຊະມາເອນຊື່ເນບາໂຢດ+ ຕໍ່ມາກໍແມ່ນເກດາ+ ອັດເບເອນ ມິບສາມ+
14 ມິຊະມາ ດູມາ ມັດສາ
15 ຮາດັດ ເຕມາ ເຢຕູເຣ ນາຟິດ ແລະເກເດມາ.
16 ຄົນເຫຼົ່ານີ້ເປັນລູກຊາຍຂອງອິດຊະມາເອນທີ່ເປັນຫົວໜ້າຂອງ 12 ຕະກູນ. ບ່ອນທີ່ເຂົາເຈົ້າຢູ່ແລະບ່ອນທີ່ເຂົາເຈົ້າຕັ້ງເຕັ້ນກໍຖືກເອີ້ນຕາມຊື່ຂອງເຂົາເຈົ້າ.+
17 ອິດຊະມາເອນມີອາຍຸໄດ້ 137 ປີ ແລ້ວລາວກໍຕາຍແລະໄປຢູ່ນຳປູ່ຍ່າຕານາຍຂອງລາວ.
18 ລູກຫຼານຂອງລາວອາໄສຢູ່ຕັ້ງແຕ່ຮາວິລາ+ທີ່ຢູ່ໃກ້ຊູເຣ+ ເຊິ່ງຢູ່ໃກ້ເຂດແດນຂອງເອຢິບໄປຈົນຮອດອັດຊີເຣຍ. ອິດຊະມາເອນອາໄສຢູ່ໃກ້ໆຍາດຕິພີ່ນ້ອງຂອງໂຕເອງ.*+
19 ນີ້ແມ່ນປະຫວັດຂອງອີຊາກລູກຊາຍຂອງອັບຣາຮາມ.+
ອັບຣາຮາມເປັນພໍ່ຂອງອີຊາກ.
20 ອີຊາກອາຍຸ 40 ປີຕອນທີ່ລາວແຕ່ງດອງກັບເຣເບກາ. ເຣເບກາເປັນລູກສາວຂອງເບທູເອນ+ຄົນອາຣາມທີ່ອາໄສຢູ່ປາດັນອາລຳ ແລະເປັນນ້ອງສາວຂອງລາບານຄົນອາຣາມ.
21 ອີຊາກອ້ອນວອນພະເຢໂຫວາເລື້ອຍໆກ່ຽວກັບເລື່ອງທີ່ເຣເບກາເປັນໝັນ. ພະເຢໂຫວາຈຶ່ງຕອບຄຳອ້ອນວອນຂອງລາວໂດຍໃຫ້ເຣເບກາຖືພາ.
22 ເຣເບກາຮູ້ສຶກຄືກັບວ່າລູກໃນທ້ອງຂອງລາວກຳລັງຕໍ່ສູ້ກັນ.+ ລາວຈຶ່ງເວົ້າວ່າ: “ຖ້າມີລູກແລ້ວເຈັບປວດແນວນີ້ ໃຫ້ຂ້ອຍຕາຍຊິບໍ່ດີກວ່າບໍ?” ແລ້ວລາວກໍຖາມພະເຢໂຫວາ.
23 ພະເຢໂຫວາເວົ້າກັບລາວວ່າ: “ໃນທ້ອງ+ຂອງເຈົ້າມີລູກຊາຍ 2 ຄົນ* ແລະຈະມີ 2 ຊົນຊາດເກີດມາຈາກເຈົ້າ.+ ຊາດໜຶ່ງຈະເຂັ້ມແຂງກວ່າອີກຊາດໜຶ່ງ+ ແລ້ວຜູ້ເປັນອ້າຍຈະຮັບໃຊ້ນ້ອງ.”+
24 ຕອນທີ່ເຣເບກາເກີດລູກ ລາວກໍໄດ້ລູກແຝດແທ້ໆ.
25 ຜູ້ທຳອິດທີ່ອອກມາ ມີຂົນສີແດງເຕັມໂຕຄືກັບເສື້ອຂົນສັດ.+ ເຂົາເຈົ້າຈຶ່ງຕັ້ງຊື່ໃຫ້ລາວວ່າເອຊາວ.*+
26 ແລ້ວຜູ້ທີ 2 ກໍອອກມາ ມືຂອງລາວຈັບສົ້ນຕີນຂອງເອຊາວ.+ ເຂົາເຈົ້າຈຶ່ງຕັ້ງຊື່ໃຫ້ລາວວ່າຢາໂຄບ.*+ ຕອນທີ່ເຣເບກາເກີດລູກ ອີຊາກອາຍຸ 60 ປີ.
27 ແລ້ວເດັກນ້ອຍ 2 ຄົນກໍໃຫຍ່ຂຶ້ນ. ເອຊາວເປັນນາຍພານທີ່ເກັ່ງຫຼາຍ.+ ລາວມັກອອກໄປລ່າສັດ. ສ່ວນຢາໂຄບເປັນຄົນມັກຄວາມສະຫງົບ* ແລະມັກຢູ່ໃນເຕັ້ນ.+
28 ອີຊາກຮັກເອຊາວຫຼາຍກວ່າ ຍ້ອນໄດ້ກິນຊີ້ນສັດທີ່ລາວຫາມາໄດ້. ແຕ່ເຣເບກາຮັກຢາໂຄບຫຼາຍກວ່າ.+
29 ມີມື້ໜຶ່ງ ຢາໂຄບກຳລັງຕົ້ມຖົ່ວເລັນທິວ*ຢູ່
30 ເອຊາວກັບມາແຕ່ລ່າສັດແລະເມື່ອຍຫຼາຍ. ເອຊາວເລີຍບອກຢາໂຄບວ່າ: “ໄວໆ ເອົາແກງສີແດງໆມາໃຫ້ອ້າຍກິນຈັກໜ້ອຍແດ່. ອ້າຍຫິວຈົນໝົດແຮງແລ້ວ!” ເອຊາວຈຶ່ງມີອີກຊື່ໜຶ່ງວ່າເອໂດມ.*+
31 ຢາໂຄບເວົ້າວ່າ: “ຂາຍສິດລູກກົກຂອງອ້າຍໃຫ້ນ້ອງກ່ອນແມ້!”+
32 ເອຊາວກໍເວົ້າວ່າ: “ອ້າຍຫິວຊິຕາຍແລ້ວ! ສິດລູກກົກຊິມີປະໂຫຍດຫຍັງ?”
33 ຢາໂຄບຈຶ່ງບອກວ່າ: “ສາບານກັບນ້ອງກ່ອນແມ້!” ແລ້ວເອຊາວກໍສາບານແລະຂາຍສິດລູກກົກໃຫ້ຢາໂຄບ.+
34 ຢາໂຄບຈຶ່ງເອົາເຂົ້າຈີ່ກັບຕົ້ມຖົ່ວເລັນທິວໃຫ້ເອຊາວ. ລາວກິນຈົນອີ່ມແລ້ວກໍລຸກໄປ. ເອຊາວເຮັດແບບນີ້ສະແດງວ່າລາວບໍ່ເຫັນຄຸນຄ່າສິດລູກກົກເລີຍ.
ຂໍ
^ ເປັນສຳນວນບົດກອນທີ່ໝາຍເຖິງຕາຍ
^ ຫຼືອາດແປວ່າ “ລາວເປັນສັດຕູກັບພວກພີ່ນ້ອງຂອງລາວທຸກຄົນ”
^ ແປຕາມໂຕວ່າ “2 ຊົນຊາດ”
^ ແປວ່າ “ຂົນດົກ”
^ ແປວ່າ “ຜູ້ທີ່ຈັບສົ້ນຕີນ; ຜູ້ທີ່ຍາດຊີງ”
^ ຫຼື “ເປັນຄົນບໍ່ມີບ່ອນຕິ”
^ ຖົ່ວຊະນິດໜຶ່ງເມັດນ້ອຍໆມົນໆ
^ ແປວ່າ “ແດງ”
