ປະຖົມມະການ 34:1-31
34 ດີນາລູກສາວຂອງຢາໂຄບທີ່ເກີດຈາກເລອາ+ມັກທຽວໄປຫຼິ້ນນຳພວກຜູ້ຍິງໄວລຸ້ນໃນເມືອງນັ້ນ.+
2 ຢູ່ເມືອງນັ້ນມີຜູ້ຊາຍຄົນໜຶ່ງຊື່ເຊເຄັມ. ພໍ່ຂອງລາວຊື່ຮາໂມ. ຮາໂມເປັນຄົນຮີວີ+ແລະເປັນຫົວໜ້າຄົນໜຶ່ງຂອງເມືອງນັ້ນ. ເຊເຄັມເຫັນດີນາ ແລະມີມື້ໜຶ່ງລາວໄດ້ຈັບດີນາໄປຂົ່ມຂືນ.
3 ເຊເຄັມຄິດຮອດດີນາລູກສາວຂອງຢາໂຄບຕະຫຼອດ. ລາວຮັກດີນາຫຼາຍແລະພະຍາຍາມເວົ້າເອົາໃຈດີນາ.
4 ເຊເຄັມບອກຮາໂມ+ພໍ່ຂອງລາວວ່າ: “ໄປຂໍຜູ້ຍິງຄົນນີ້ໃຫ້ມາເປັນເມຍຂອງລູກແດ່.”
5 ຕອນທີ່ຢາໂຄບຮູ້ວ່າດີນາຖືກຂົ່ມຂືນ ພວກລູກຊາຍຂອງລາວກຳລັງລ້ຽງສັດຢູ່ທົ່ງນາ ຢາໂຄບກໍເລີຍບໍ່ໄດ້ບອກໃຜຈົນພວກລູກຊາຍກັບມາ.
6 ຕໍ່ມາ ຮາໂມພໍ່ຂອງເຊເຄັມກໍອອກໄປເວົ້າກັບຢາໂຄບ.
7 ເມື່ອພວກລູກຊາຍຂອງຢາໂຄບຮູ້ເລື່ອງທີ່ເກີດຂຶ້ນກໍຟ້າວກັບມາເຮືອນທັນທີ. ເຂົາເຈົ້າຄຽດແຄ້ນແລະໃຈຮ້າຍຫຼາຍ ຍ້ອນເຊເຄັມຂົ່ມຂືນດີນາ ເຮັດໃຫ້ອິດສະຣາເອນອັບອາຍ.+ ການເຮັດແນວນີ້ເປັນເລື່ອງທີ່ຊົ່ວຫຼາຍ.+
8 ຮາໂມເວົ້າກັບເຂົາເຈົ້າວ່າ: “ເຊເຄັມລູກຊາຍຂອງຂ້ອຍຮັກລູກສາວຂອງເຈົ້າຫຼາຍ. ຂ້ອຍຢາກຂໍລູກສາວເຈົ້າມາເປັນລູກໃພ້ຂ້ອຍໄດ້ບໍ່?
9 ໃຫ້ຄອບຄົວພວກເຮົາມາເປັນດອງກັນ. ໃຫ້ພວກເຈົ້າຍົກລູກສາວໃຫ້ພວກເຮົາ ແລະພວກເຮົາກໍຈະຍົກລູກສາວໃຫ້ພວກເຈົ້າ.+
10 ພວກເຈົ້າມາຢູ່ນຳພວກເຮົາກໍໄດ້ ແລະຢາກເຮັດຫຍັງໃນແຜ່ນດິນພວກເຮົາກໍເຮັດໂລດ. ພວກເຈົ້າຢາກມາຄ້າຂາຍຢູ່ນີ້ຫຼືຈະຍ້າຍມາຢູ່ເລີຍກໍໄດ້.”
11 ແລ້ວເຊເຄັມກໍເວົ້າກັບຢາໂຄບແລະພວກອ້າຍຂອງດີນາວ່າ: “ຖ້າພວກເຈົ້າໃຫ້ຕາມທີ່ຂ້ອຍຂໍ ພວກເຈົ້າຢາກໄດ້ຫຍັງ ຂ້ອຍກໍຊິໃຫ້.
12 ພວກເຈົ້າຢາກໄດ້ຄ່າດອງແລະຂອງຂວັນເທົ່າໃດກໍໄດ້.+ ຂ້ອຍເຕັມໃຈໃຫ້ທຸກຢ່າງຕາມທີ່ພວກເຈົ້າຕ້ອງການ ຂໍພຽງແຕ່ໃຫ້ຂ້ອຍໄດ້ແຕ່ງດອງກັບດີນາ.”
13 ລູກຊາຍຂອງຢາໂຄບຄິດຊິລໍ້ເຊເຄັມກັບຮາໂມ ເພາະເຊເຄັມເຮັດໃຫ້ດີນາເສຍຄວາມບໍລິສຸດແລ້ວ.
14 ເຂົາເຈົ້າບອກວ່າ: “ພວກເຮົາເອົານ້ອງສາວໃຫ້ຄົນທີ່ຍັງບໍ່ຮັບສິນຕັດ*+ບໍ່ໄດ້ດອກ. ຖ້າເຮັດແນວນັ້ນ ພວກເຮົາກໍຈະອັບອາຍ.
15 ພວກເຮົາຈະຍອມໃຫ້ຕາມທີ່ພວກເຈົ້າຂໍ ຖ້າຜູ້ຊາຍທຸກຄົນຂອງພວກເຈົ້າຮັບສິນຕັດ*ຄືກັບພວກເຮົາ.+
16 ພວກເຮົາຈະຍົກລູກສາວໃຫ້ພວກເຈົ້າ ແລະພວກເຈົ້າກໍຈະຍົກລູກສາວໃຫ້ພວກເຮົາ. ພວກເຮົາຊິຢູ່ນຳພວກເຈົ້າແລະຊິເປັນພວກດຽວກັນ.
17 ຖ້າພວກເຈົ້າບໍ່ເຮັດຕາມແລະບໍ່ຮັບສິນຕັດ ພວກເຮົາກໍຈະພານ້ອງສາວຂອງພວກເຮົາໄປ.”
18 ຮາໂມ+ແລະເຊເຄັມ+ກໍເຫັນດີກັບຂໍ້ສະເໜີນັ້ນ.
19 ເຊເຄັມຟ້າວເຮັດຕາມທີ່ເຂົາເຈົ້າຂໍ+ ເພາະວ່າລາວມັກລູກສາວຂອງຢາໂຄບຫຼາຍ. ລາວເປັນຄົນໜຶ່ງທີ່ມີຄົນນັບຖືທີ່ສຸດໃນເຮືອນຂອງພໍ່ລາວ.
20 ຮາໂມກັບເຊເຄັມກໍເລີຍໄປທີ່ປະຕູເມືອງແລະເວົ້າກັບຄົນຢູ່ຫັ້ນ+ວ່າ:
21 “ຄົນພວກນີ້ຢາກຢູ່ກັບພວກເຮົາດີໆ. ໃຫ້ເຂົາເຈົ້າຢູ່ແລະຄ້າຂາຍໃນແຜ່ນດິນນີ້ ເພາະແຜ່ນດິນນີ້ກໍກວ້າງພໍໃຫ້ເຂົາເຈົ້າມາຢູ່ນຳໄດ້. ເຂົາເຈົ້າຈະຍົກລູກສາວໃຫ້ເປັນເມຍຂອງພວກເຮົາ ແລະພວກເຮົາກໍຈະຍົກລູກສາວໃຫ້ເຂົາເຈົ້າ.+
22 ແຕ່ເພື່ອເຂົາເຈົ້າຈະມາຢູ່ກັບພວກເຮົາແລະເປັນພວກດຽວກັບພວກເຮົາ ຜູ້ຊາຍທຸກຄົນຂອງພວກເຮົາຕ້ອງຮັບສິນຕັດຄືກັບເຂົາເຈົ້າ.+
23 ຖ້າພວກເຮົາເຮັດຕາມທີ່ເຂົາເຈົ້າບອກ ເຂົາເຈົ້າກໍຈະຢູ່ນຳພວກເຮົາ ແລ້ວເຄື່ອງຂອງ ຊັບສົມບັດ ແລະຝູງສັດທັງໝົດຂອງເຂົາເຈົ້າກໍຈະເປັນຂອງພວກເຮົາ.”
24 ທຸກຄົນທີ່ຢູ່ແຖວປະຕູເມືອງເຫັນດີກັບຄຳເວົ້າຂອງຮາໂມແລະເຊເຄັມ ແລ້ວຜູ້ຊາຍທຸກຄົນກໍໄດ້ຮັບສິນຕັດ.
25 ສາມມື້ຕໍ່ມາ ຕອນທີ່ພວກຜູ້ຊາຍໃນເມືອງນັ້ນຍັງເຈັບບາດຢູ່ ລູກຊາຍ 2 ຄົນຂອງຢາໂຄບ ອ້າຍຂອງດີນາທີ່ຊື່ຊີເມໂອນແລະເລວີ+ໄດ້ຖືດາບເຂົ້າໄປໃນເມືອງໂດຍທີ່ບໍ່ມີຜູ້ໃດສົງໄສ ແລ້ວກໍຂ້າຜູ້ຊາຍທຸກຄົນໃນເມືອງນັ້ນ.+
26 ເຂົາເຈົ້າໃຊ້ດາບຂ້າຮາໂມກັບເຊເຄັມ ແລະພາດີນາອອກຈາກເຮືອນຂອງເຊເຄັມແລ້ວກໍໄປ.
27 ຈາກນັ້ນ ລູກຊາຍຄົນອື່ນໆຂອງຢາໂຄບກໍເຂົ້າໄປປຸ້ນເອົາເຄື່ອງຂອງໃນເມືອງນັ້ນ ຍ້ອນວ່ານ້ອງສາວຂອງເຂົາເຈົ້າຖືກເຮັດໃຫ້ເສຍກຽດໃນເມືອງນັ້ນ.+
28 ເຂົາເຈົ້າປຸ້ນເອົາຝູງແກະ ຝູງແບ້ ຝູງງົວ ຝູງລາ ແລະເຄື່ອງຂອງທີ່ຢູ່ໃນເມືອງກັບຢູ່ທົ່ງຫຍ້າໄປນຳ.
29 ເຂົາເຈົ້າຍັງເອົາຊັບສົມບັດ ເອົາລູກເອົາເມຍຂອງຜູ້ຊາຍໃນເມືອງນັ້ນ ແລະປຸ້ນເອົາທຸກຢ່າງໃນເຮືອນໄປໝົດ.
30 ຢາໂຄບກໍເລີຍເວົ້າກັບຊີເມໂອນແລະເລວີ+ວ່າ: “ພວກເຈົ້າເຮັດໃຫ້ພໍ່ເຈິບັນຫາໜັກແລ້ວ. ພວກການາອານແລະພວກເປຣິຊີທີ່ຢູ່ແຜ່ນດິນນີ້ກຽດຊັງພໍ່ແລ້ວ. ພວກເຮົາມີຄົນແຕ່ໜ້ອຍດຽວ ຖ້າພວກເຂົາພາກັນມາໂຈມຕີ ພວກເຮົາກັບຄອບຄົວຄືຊິຕາຍໝົດ.”
31 ແຕ່ເຂົາເຈົ້າເວົ້າວ່າ: “ຊິປ່ອຍໃຫ້ພວກເຂົາເຮັດຄືກັບວ່ານ້ອງສາວພວກເຮົາເປັນແມ່ຈ້າງນີ້ຫວະ.”
ຂໍ
^ ແປຕາມໂຕວ່າ “ຄົນທີ່ມີໜັງຫຸ້ມປາຍອະໄວຍະວະເພດຊາຍ”
^ ຕັດໜັງຫຸ້ມປາຍອະໄວຍະວະເພດຊາຍ
