ພະນິມິດທີ່ເປີດເຜີຍໃຫ້ໂຢຮັນ 11:1-19
11 ຈາກນັ້ນ ຂ້ອຍໄດ້ຮັບໄມ້ອໍ້ລຳໜຶ່ງທີ່ຄືກັບໄມ້ແທກ+ແລະມີສຽງບອກຂ້ອຍວ່າ: “ລຸກຂຶ້ນ ໄປແທກບ່ອນສັກສິດຂອງວິຫານຂອງພະເຈົ້າກັບແທ່ນບູຊາ ແລະນັບຈຳນວນຄົນທີ່ກຳລັງນະມັດສະການຢູ່ຫັ້ນ.
2 ແຕ່ເດີ່ນທີ່ຢູ່ທາງນອກບ່ອນສັກສິດຂອງວິຫານບໍ່ຕ້ອງແທກ ຍ້ອນເດີ່ນນັ້ນໄດ້ເອົາໃຫ້ຄົນຕ່າງຊາດແລ້ວ ແລະເຂົາເຈົ້າຈະຢຽບເມືອງບໍລິສຸດ+ເປັນເວລາ 42 ເດືອນ+ຈົນແປ.
3 ເຮົາຈະໃຫ້ພະຍານຂອງເຮົາ 2 ຄົນນຸ່ງຜ້າເນື້ອຫຍາບພະຍາກອນເປັນເວລາ 1.260 ມື້.”
4 ພະຍານ 2 ຄົນນີ້ໝາຍເຖິງຕົ້ນໝາກກອກ 2 ຕົ້ນ+ກັບຂາຕະກຽງ 2 ອັນ+ ແລະເຂົາເຈົ້າຢືນຢູ່ຕໍ່ໜ້າຜູ້ເປັນເຈົ້າຂອງໂລກ.+
5 ຖ້າຜູ້ໃດຈະທຳຮ້າຍພະຍານ 2 ຄົນນີ້ ຈະມີໄຟອອກຈາກປາກຂອງທັງສອງຄົນມາເຜົາທຳລາຍສັດຕູນັ້ນ. ຜູ້ໃດທີ່ຈະທຳຮ້າຍເຂົາເຈົ້າ ກໍຈະຕ້ອງຖືກຂ້າແບບນັ້ນແຫຼະ.
6 ພະຍານ 2 ຄົນນີ້ມີອຳນາດຈະປິດທ້ອງຟ້າ+ບໍ່ໃຫ້ຝົນຕົກ+ໃນເວລາທີ່ພະຍາກອນຢູ່. ເຂົາເຈົ້າມີອຳນາດເຮັດໃຫ້ນ້ຳຢູ່ທຸກບ່ອນກາຍເປັນເລືອດ+ ແລະເຮັດໃຫ້ເກີດໄພພິບັດຕ່າງໆໃນໂລກຈັກເທື່ອກໍໄດ້ຕາມທີ່ເຂົາເຈົ້າຕ້ອງການ.
7 ເມື່ອເຂົາເຈົ້າເຮັດວຽກປະກາດແລ້ວໆ ສັດຮ້າຍທີ່ຂຶ້ນມາຈາກເຫວເລິກຈະເຮັດສົງຄາມກັບ 2 ຄົນນີ້. ສັດຮ້າຍໂຕນັ້ນຈະຊະນະແລະຂ້າເຂົາເຈົ້າ.+
8 ສົບຂອງທັງສອງຄົນຈະຢູ່ເທິງທາງໃຫຍ່ໃນເມືອງໃຫຍ່ທີ່ຊື່ໂຊໂດມແລະເອຢິບເຊິ່ງເປັນຊື່ທີ່ມີຄວາມໝາຍເປັນໄນ. ຜູ້ເປັນນາຍຂອງເຂົາເຈົ້າໄດ້ຖືກປະຫານເທິງເສົາຢູ່ຫັ້ນຄືກັນ.
9 ຄົນຈາກຫຼາຍຊົນຊາດ ຫຼາຍຕະກູນ ຫຼາຍພາສາ ແລະປະເທດຕ່າງໆຈະແນມເບິ່ງສົບຂອງທັງສອງຄົນນັ້ນເປັນເວລາ 3 ມື້ເຄິ່ງ+ ແລະບໍ່ຍອມໃຫ້ເອົາສົບຂອງເຂົາເຈົ້າໄປໄວ້ໃນບ່ອນຝັງສົບ.
10 ຄົນທີ່ຢູ່ໃນໂລກຈະພາກັນດີໃຈແລະສະຫຼອງທີ່ 2 ຄົນນັ້ນຕາຍແລ້ວ. ເຂົາເຈົ້າຈະສົ່ງຂອງຂວັນໃຫ້ກັນຍ້ອນຜູ້ພະຍາກອນ 2 ຄົນນັ້ນເຄີຍທໍລະມານຄົນທີ່ຢູ່ໃນໂລກ.
11 ຫຼັງຈາກ 3 ມື້ເຄິ່ງຜ່ານໄປ ພະລັງຊີວິດຈາກພະເຈົ້າກໍເຂົ້າໄປໃນໂຕພະຍານ 2 ຄົນນັ້ນ+ ເຂົາເຈົ້າຈຶ່ງລຸກຂຶ້ນຢືນ ແລະເມື່ອຄົນເຫັນກໍພາກັນຢ້ານຫຼາຍ.
12 ທັງສອງຄົນໄດ້ຍິນສຽງດັງຈາກຟ້າເວົ້າກັບເຂົາເຈົ້າວ່າ: “ຂຶ້ນມາເທິງພີ້.” ເຂົາເຈົ້າຈຶ່ງຂຶ້ນໄປເທິງຟ້າແລ້ວເຂົ້າໄປໃນຂີ້ເຝື້ອ ແລະພວກສັດຕູກໍແນມເບິ່ງຢູ່.
13 ໃນຕອນນັ້ນກໍເກີດແຜ່ນດິນໄຫວໃຫຍ່ເຊິ່ງເຮັດໃຫ້ 1 ສ່ວນ 10 ຂອງເມືອງນັ້ນພັງລົງມາ ແລະຄົນທີ່ຕາຍຍ້ອນແຜ່ນດິນໄຫວນັ້ນມີ 7.000 ຄົນ. ສ່ວນຄົນອື່ນໆກໍຢ້ານແລະຍ້ອງຍໍສັນລະເສີນພະເຈົ້າຜູ້ຢູ່ໃນສະຫວັນ.
14 ຄວາມເດືອດຮ້ອນທີ 2+ ຜ່ານໄປແລ້ວ. ຖ້າເບິ່ງເດີ້! ຄວາມເດືອດຮ້ອນທີ 3 ກຳລັງຈະມາ.
15 ເມື່ອທູດສະຫວັນອົງທີ 7 ເປົ່າແກ+ ມີສຽງດັງຂຶ້ນໃນສະຫວັນເວົ້າວ່າ: “ຕອນນີ້ ອຳນາດກະສັດເໜືອໂລກນີ້ເປັນຂອງຜູ້ເປັນນາຍຂອງພວກເຮົາ+ແລະເປັນຂອງຜູ້ທີ່ພະເຈົ້າເລືອກໃຫ້ເປັນພະຄລິດແລ້ວ+ ແລະເພິ່ນ*ຈະປົກຄອງເປັນກະສັດຕະຫຼອດໄປ.”+
16 ຜູ້ປົກຄອງ 24 ຄົນ+ທີ່ນັ່ງຢູ່ເທິງບັນລັງຕໍ່ໜ້າພະເຈົ້າກໍໝູບລົງນະມັດສະການພະເຈົ້າ.
17 ເຂົາເຈົ້າເວົ້າວ່າ: “ຂອບໃຈພະເຢໂຫວາ*ພະເຈົ້າຜູ້ມີລິດເດດສູງສຸດ ຜູ້ມີຊີວິດຢູ່ຕອນນີ້+ແລະມີຊີວິດຢູ່ໃນອະດີດ ຍ້ອນພະອົງໄດ້ໃຊ້ອຳນາດຍິ່ງໃຫຍ່ຂອງພະອົງແລະເລີ່ມປົກຄອງເປັນກະສັດແລ້ວ.+
18 ແຕ່ຊາດຕ່າງໆພາກັນໃຈຮ້າຍ ແລະພະອົງສະແດງຄວາມໃຈຮ້າຍອອກມາ. ແລ້ວກໍຮອດເວລາກຳນົດທີ່ພະອົງຈະຕັດສິນຄົນຕາຍ ແລະຈະໃຫ້ລາງວັນ+ພວກຜູ້ພະຍາກອນ+ທີ່ເປັນທາດຂອງພະອົງແລະພວກຜູ້ບໍລິສຸດກັບຄົນທີ່ຢ້ານຢຳຊື່ຂອງພະອົງ ເຊິ່ງມີທັງຄົນທຳມະດາແລະຄົນທີ່ມີອຳນາດ ແລະຮອດເວລາແລ້ວທີ່ພະອົງຈະທຳລາຍຄົນທີ່ທຳລາຍໂລກນີ້.”+
19 ແລ້ວບ່ອນບໍລິສຸດ*ໃນວິຫານຂອງພະເຈົ້າໃນສະຫວັນກໍເປີດອອກ. ໃນບ່ອນບໍລິສຸດນັ້ນ ຂ້ອຍເຫັນຫີບສັນຍາຂອງເພິ່ນ.+ ຈາກນັ້ນກໍມີຟ້າແມບ ສຽງເວົ້າ ສຽງຟ້າຮ້ອງ ແຜ່ນດິນໄຫວ ແລະໝາກເຫັບຮ່າໃຫຍ່.
