ບົດທີ 02

ຄຳພີໄບເບິນເຮັດໃຫ້ເຮົາມີຄວາມຫວັງ

ເປີດ

ຫຼາຍຄົນເຈິກັບບັນຫາທີ່ເຮັດໃຫ້ເຂົາເຈົ້າຮູ້ສຶກໂສກເສົ້າ ອຸກໃຈ ແລະເຈັບປວດ. ເຈົ້າເດເຄີຍເຈິເລື່ອງທີ່ເຮັດໃຫ້ຮູ້ສຶກແບບນີ້ບໍ? ບາງເທື່ອເຈົ້າອາດມີຄວາມທຸກຍ້ອນຄວາມເຈັບປ່ວຍຫຼືຍ້ອນຄົນທີ່ເຈົ້າຮັກຕາຍໄປ. ເຈົ້າອາດສົງໄສວ່າ ‘ຍັງອີກດົນປານໃດເລື່ອງບໍ່ດີຈະໝົດໄປ?’ ຄຳພີໄບເບິນມີຄຳຕອບ.

1. ຄຳພີໄບເບິນໃຫ້ຄວາມຫວັງເຮົາແນວໃດ?

ຄຳພີໄບເບິນອະທິບາຍວ່າເປັນຫຍັງໂລກນີ້ຈຶ່ງມີແຕ່ບັນຫາແລະຍັງບອກຂ່າວດີວ່າອີກບໍ່ດົນບັນຫາຈະໝົດໄປ. ຄຳພີໄບເບິນສັນຍາວ່າເຮົາ “ຈະມີອະນາຄົດທີ່ດີແລະມີຄວາມຫວັງ.” (ອ່ານເຢເຣມີ 29:11, 12, ລ.ມ.) ຄຳສັນຍາໃນຄຳພີໄບເບິນຊ່ວຍເຮົາໃຫ້ອົດທົນກັບບັນຫາໄດ້ ຊ່ວຍເຮົາໃຫ້ຄິດໃນແງ່ບວກ ແລະເຮັດໃຫ້ໝັ້ນໃຈວ່າເຮົາຈະມີຄວາມສຸກໄດ້ແທ້ໆ.

2. ຄຳພີໄບເບິນບອກວ່າອະນາຄົດຈະເປັນແນວໃດ?

ຄຳພີໄບເບິນບອກວ່າໃນອະນາຄົດ “ຄວາມຕາຍຈະບໍ່ມີອີກຕໍ່ໄປ ຄວາມໂສກເສົ້າຫຼືສຽງຮ້ອງໄຫ້ເສຍໃຈຫຼືຄວາມເຈັບປວດຈະບໍ່ມີອີກເລີຍ.” (ອ່ານພະນິມິດ 21:4) ບັນຫາໃນທຸກມື້ນີ້ເຊັ່ນ ຄວາມທຸກຍາກ ຄວາມບໍ່ຍຸຕິທຳ ຄວາມເຈັບປ່ວຍ ແລະຄວາມຕາຍຈະໝົດໄປ. ຄຳພີໄບເບິນສັນຍາວ່າເຮົາຈະມີຊີວິດທີ່ມີຄວາມສຸກຕະຫຼອດໄປໃນໂລກທີ່ເປັນອຸທິຍານ.

3. ເພື່ອຈະໝັ້ນໃຈຄຳສັນຍາໃນຄຳພີໄບເບິນເຮົາຕ້ອງເຮັດຫຍັງ?

ຫຼາຍຄົນຫວັງຢາກໃຫ້ສິ່ງດີໆເກີດຂຶ້ນ ແຕ່ກໍບໍ່ຮູ້ວ່າສິ່ງທີ່ຫວັງໄວ້ຈະເກີດຂຶ້ນແທ້ຫຼືບໍ່. ແຕ່ເຮົາໝັ້ນໃຈໄດ້ວ່າຄຳສັນຍາໃນຄຳພີໄບເບິນຈະເກີດຂຶ້ນແທ້. ເຮົາຈະໝັ້ນໃຈຫຼາຍຂຶ້ນຖ້າເຮົາ “ສຶກສາຄົ້ນຄວ້າພະຄຳພີຢ່າງລະອຽດ.” (ກິດຈະການ 17:11) ເມື່ອຮຽນໄປເລື້ອຍໆ ເຈົ້າກໍຈະຮູ້ເອງວ່າຄຳສັນຍາໃນຄຳພີໄບເບິນເຊື່ອຖືໄດ້ຫຼືບໍ່.

ຮຽນຮູ້ຫຼາຍຂຶ້ນ

ມາເບິ່ງຄຳສັນຍາທີ່ຄຳພີໄບເບິນບອກວ່າຈະເກີດຂຶ້ນແທ້ໃນອະນາຄົດ ແລະເບິ່ງວ່າຄຳສັນຍານັ້ນມີປະໂຫຍດກັບເຮົາແນວໃດໃນທຸກມື້ນີ້.

4. ຄຳພີໄບເບິນສັນຍາວ່າເຮົາຈະມີຊີວິດຢູ່ຕະຫຼອດໄປໃນໂລກທີ່ບໍ່ມີຄວາມທຸກ

ຂໍໃຫ້ເບິ່ງຄຳສັນຍາຕ່າງໆໃນຄຳພີໄບເບິນທີ່ບອກໄວ້ທາງລຸ່ມນີ້. ເຈົ້າມັກເລື່ອງໃດຫຼາຍທີ່ສຸດ? ເປັນຫຍັງຈຶ່ງມັກ?

ອ່ານຂໍ້ຄຳພີທີ່ເວົ້າເຖິງຄຳສັນຍາແຕ່ລະຢ່າງ ແລະລົມກັນກ່ຽວກັບຄຳຖາມຕໍ່ໄປນີ້:

ເຈົ້າຮູ້ສຶກແນວໃດຫຼັງຈາກໄດ້ອ່ານຂໍ້ຄຳພີເຫຼົ່ານີ້? ເຈົ້າຄິດວ່າຄອບຄົວແລະໝູ່ຄູ່ຂອງເຈົ້າຈະມັກເລື່ອງນີ້ບໍ?

ຂໍໃຫ້ນຶກພາບວ່າເຈົ້າຢູ່ໃນໂລກທີ່

ບໍ່ມີໃຜຕ້ອງ . . .	ທຸກຄົນຈະ . . .
ຮູ້ສຶກເຈັບປວດ ເຖົ້າລົງ ແລະຕາຍ.—ເອຊາອີ 25:8	ໄດ້ເຈິຄົນທີ່ຮັກເຊິ່ງຕາຍໄປ ເຂົາເຈົ້າຈະຄືນມາມີຊີວິດໃນໂລກອີກ.—ໂຢຮັນ 5:28, 29
ເຈັບປ່ວຍຫຼືພິການ.—ເອຊາອີ 33:24; 35:5, 6	ມີສຸຂະພາບແຂງແຮງແລະມີເຫື່ອມີແຮງຄືຕອນທີ່ເປັນໜຸ່ມເປັນສາວ.—ໂຢບ 33:25
ເຈິເລື່ອງທີ່ບໍ່ຍຸຕິທຳ.—ເອຊາອີ 32:16, 17	ມີອາຫານອຸດົມສົມບູນ ມີເຮືອນທີ່ເປັນຕາຢູ່ ແລະມີວຽກທີ່ເຮັດໃຫ້ມີຄວາມສຸກ.—ຄຳເພງ 72:16; ເອຊາອີ 65:21, 22
ເຈິກັບຄວາມທຸກທີ່ເກີດຈາກສົງຄາມ.—ຄຳເພງ 46:9	ມີແຕ່ຄວາມສະຫງົບສຸກ.—ຄຳເພງ 37:11
ທຸກໃຈກັບເລື່ອງບໍ່ດີໃນອະດີດ.—ເອຊາອີ 65:17	ມີຊີວິດຕະຫຼອດໄປຢ່າງມີຄວາມສຸກ.—ຄຳເພງ 37:29

5. ຄຳສັນຍາໃນຄຳພີໄບເບິນຊ່ວຍໄດ້

ຫຼາຍຄົນຮູ້ສຶກທໍ້ຫຼືບໍ່ພໍໃຈເມື່ອເຫັນບັນຫາໃນສັງຄົມ. ບາງຄົນພະຍາຍາມຢ່າງໜັກເພື່ອປ່ຽນແປງສິ່ງຕ່າງໆໃຫ້ດີຂຶ້ນ. ມາເບິ່ງວ່າຄຳສັນຍາໃນຄຳພີໄບເບິນຊ່ວຍຜູ້ຄົນໄດ້ແນວໃດໃນຕອນນີ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້: