ຈົດໝາຍຈາກຄະນະກຳມະການປົກຄອງ
ທ່ານທັງຫລາຍທີ່ຮັກພະເຢໂຫວາ:
ພະເຍຊູກ່າວວ່າ “ພວກທ່ານຈະຮູ້ຈັກຄວາມຈິງແລະຄວາມຈິງຈະໄຖ່ທ່ານໃຫ້ພົ້ນຈາກເປັນທາດ.” (ໂຢຮັນ 8:32) ຖືວ່າເປັນຖ້ອຍຄຳທີ່ຫນູນກຳລັງໃຈແທ້ໆ! ແມ່ນແລ້ວ ເປັນໄປໄດ້ທີ່ຈະຮູ້ຈັກຄວາມຈິງ ແມ່ນແຕ່ໃນ “ຍຸກສຸດທ້າຍ” ອັນວິກິດນີ້ເຊິ່ງການເວົ້າຕົວະແລະເລື່ອງທີ່ບໍ່ເປັນຄວາມຈິງມີຢູ່ຢ່າງແພ່ຫລາຍ. (2 ຕີໂມເຕ 3:1, ທ.ປ.) ເຈົ້າຈື່ໄດ້ບໍເຖິງຕອນທຳອິດທີ່ເຈົ້າຍອມຮັບເອົາຄວາມຈິງທີ່ອະທິບາຍໄວ້ໃນພະຄຳຂອງພະເຈົ້າ? ນັ້ນເປັນສິ່ງທີ່ຫນ້າຕື່ນເຕັ້ນແທ້ໆ!
ແນວໃດກໍຕາມ ສິ່ງທີ່ສຳຄັນທໍ່ໆກັບການມີຄວາມຮູ້ຖ່ອງແທ້ກ່ຽວກັບຄວາມຈິງແລະການມີສ່ວນຮ່ວມເປັນປະຈຳໃນການບອກຄວາມຈິງດັ່ງກ່າວກັບຄົນອື່ນ ກໍຄືເຮົາຕ້ອງປະພຶດສອດຄ່ອງກັບຄວາມຈິງ. ເພື່ອຈະເຮັດເຊັ່ນນັ້ນໄດ້ ເຮົາຕ້ອງຮັກສາຕົວໄວ້ໃນຄວາມຮັກຂອງພະເຈົ້າຕໍ່ໆໄປ. ເລື່ອງນີ້ກ່ຽວຂ້ອງກັບສິ່ງໃດ? ຖ້ອຍຄຳຂອງພະເຍຊູໃນຄືນກ່ອນທີ່ພະອົງຈະສິ້ນຊີວິດໄດ້ຕອບຄຳຖາມນີ້. ພະອົງບອກເຫລົ່າອັກຄະສາວົກທີ່ສັດຊື່ວ່າ “ຖ້າທ່ານທັງຫລາຍຖືຮັກສາຄຳສັ່ງທັງຫລາຍຂອງເຮົາ ທ່ານຈະຕັ້ງຢູ່ໃນຄວາມຮັກຂອງເຮົາເຫມືອນດັ່ງເຮົາໄດ້ຖືຮັກສາຄຳສັ່ງທັງຫລາຍແຫ່ງພະບິດາຂອງເຮົາ ແລະເຮົາຕັ້ງຢູ່ໃນຄວາມຮັກຂອງພະເຈົ້າ.”—ໂຢຮັນ 15:10.
ຂໍໃຫ້ສັງເກດວ່າພະເຍຊູຕັ້ງຢູ່ໃນຄວາມຮັກຂອງພະເຈົ້າໂດຍການເຮັດຕາມຄຳສັ່ງຂອງພໍ່. ເປັນເຊັ່ນນັ້ນກັບເຮົາໃນທຸກມື້ນີ້. ເພື່ອຈະຮັກສາຕົວໄວ້ໃນຄວາມຮັກຂອງພະເຈົ້າ ເຮົາຕ້ອງໃຫ້ການປະພຶດໃນຊີວິດປະຈຳວັນຂອງເຮົາສອດຄ່ອງກັບແນວທາງແຫ່ງຄວາມຈິງ. ຕອນຄໍ່າມື້ດຽວກັນນັ້ນພະເຍຊູໄດ້ກ່າວວ່າ “ຖ້າທ່ານທັງຫລາຍຮູ້ຈັກສິ່ງທັງຫລາຍນີ້ທ່ານກໍເປັນສຸກ ຖ້າທ່ານທັງຫລາຍຂັບຕາມ.”—ໂຢຮັນ 13:17.
ພວກເຮົາຫວັງເປັນຢ່າງຍິ່ງວ່າປຶ້ມຫົວນີ້ຈະຊ່ວຍເຈົ້າໃຫ້ປະຕິບັດຕາມຄວາມຈິງຕໍ່ໆໄປໃນຊີວິດ ແລະໂດຍວິທີນີ້ຈຶ່ງຮັກສາຕົວໄວ້ “ໃນຄວາມຮັກຂອງພະເຈົ້າ . . . ຈົນໄດ້ຊີວິດອັນຕະຫລອດໄປເປັນນິດ.”—ຢູເດ 21.
ຄະນະກຳມະການປົກຄອງຂອງພະຍານພະເຢໂຫວາ
