ບົດທີ 11
“ການເອົາຜົວເອົາເມຍຈົ່ງໃຫ້ເປັນທີ່ນັບຖື”
“ຈົ່ງຊົມຊື່ນຍິນດີດ້ວຍເມຍທີ່ເຈົ້າໄດ້ເອົາເວລາຍັງຫນຸ່ມຢູ່.”—ສຸພາສິດ 5:18.
1, 2. ເຮົາຈະພິຈາລະນາຄຳຖາມຫຍັງແດ່ ແລະເພາະເຫດໃດ?
ເຈົ້າແຕ່ງດອງແລ້ວບໍ? ຖ້າເປັນເຊັ່ນນັ້ນ ຊີວິດສົມລົດເຮັດໃຫ້ເຈົ້າມີຄວາມສຸກບໍ ຫລືເຈົ້າກຳລັງປະສົບກັບບັນຫາຮ້າຍແຮງໃນຊີວິດຄູ່? ເຈົ້າແລະຄູ່ສົມລົດຫ່າງເຫີນກັນບໍ? ເຈົ້າກຳລັງທົນກັບຊີວິດສົມລົດທີ່ຂັດແຍ່ງກັນແລະບໍ່ປະສົບຄວາມຍິນດີບໍ? ຖ້າເປັນແນວນັ້ນ ເຈົ້າຄົງຮູ້ສຶກເສົ້າໃຈທີ່ຄວາມຜູກພັນອັນອົບອຸ່ນໃນຊີວິດສົມລົດເຊິ່ງເຈົ້າເຄີຍມີນັ້ນໄດ້ຫລຸດຫນ້ອຍລົງ. ເນື່ອງຈາກເປັນຄລິດສະຕຽນ ແນ່ນອນວ່າເຈົ້າປາຖະຫນາຢ່າງຍິ່ງທີ່ຈະໃຫ້ຊີວິດສົມລົດຂອງເຈົ້ານຳຄຳສັນລະເສີນມາໃຫ້ພະເຢໂຫວາພະເຈົ້າທີ່ເຈົ້າຮັກ. ດັ່ງນັ້ນ ສະພາບການຂອງເຈົ້າໃນປັດຈຸບັນອາດຈະເປັນສາເຫດທີ່ເຈົ້າກັງວົນແລະເຈັບປວດໃຈ. ເຖິງຈະເປັນເຊັ່ນນັ້ນ ຂໍຢ່າສະຫລຸບວ່າເຈົ້າຢູ່ໃນສະພາບທີ່ສິ້ນຫວັງ.
2 ທຸກມື້ນີ້ ມີຄູ່ສົມລົດຄລິດສະຕຽນທີ່ດີບາງຄູ່ເຊິ່ງເຄີຍມີຊີວິດສົມລົດທີ່ເປັນພຽງການທົນຢູ່ນຳກັນໂດຍບໍ່ມີສາຍສຳພັນອັນແຫນ້ນແຟ້ນຕໍ່ກັນ. ເຖິງຢ່າງນັ້ນ ເຂົາເຈົ້າໄດ້ພົບວິທີທີ່ຈະເຮັດໃຫ້ສາຍສຳພັນຂອງຕົນແຫນ້ນແຟ້ນຂຶ້ນ. ເຈົ້າກໍເຊັ່ນກັນສາມາດພົບຄວາມພໍໃຈຫລາຍຂຶ້ນໃນຊີວິດສົມລົດ. ໂດຍວິທີໃດ?
ການເຂົ້າໃກ້ຊິດພະເຈົ້າແລະຄູ່ສົມລົດຂອງເຈົ້າໃຫ້ຫລາຍຂຶ້ນ
3, 4. ເປັນຫຍັງຄູ່ສົມລົດຈຶ່ງເຂົ້າໃກ້ຊິດກັນຫລາຍຂຶ້ນຖ້າທັງສອງພະຍາຍາມຈະເຂົ້າໃກ້ພະເຈົ້າຫລາຍຂຶ້ນ? ຂໍໃຫ້ຍົກຕົວຢ່າງ.
3 ເຈົ້າແລະຄູ່ສົມລົດຈະເຂົ້າໃກ້ຊິດກັນຫລາຍຂຶ້ນຫາກທັງສອງພະຍາຍາມຈະເຂົ້າໃກ້ພະເຈົ້າຫລາຍຂຶ້ນ. ເພາະເຫດໃດ? ຂໍໃຫ້ພິຈາລະນາຕົວຢ່າງສົມທຽບ ຂໍໃຫ້ນຶກພາບພູເຂົາຮູບຈວຍເຊິ່ງຕີນພູກວ້າງແລະຈອມພູແຫລມ. ຜູ້ຊາຍຢືນຢູ່ຕີນພູທາງເຫນືອແລະຜູ້ຍິງຢືນຢູ່ຕີນພູທາງໃຕ້. ທັງສອງເລີ່ມປີນພູ. ເມື່ອຍັງຢູ່ຕີນພູ ທັງສອງຄົນຢູ່ຫ່າງຈາກກັນຫລາຍ. ແຕ່ເມື່ອຕ່າງຄົນຕ່າງປີນຂຶ້ນໄປຫາຈອມພູ ທັງສອງກໍຈະເຂົ້າໃກ້ກັນຫລາຍຂຶ້ນ. ເຈົ້າເຫັນບົດຮຽນທີ່ເຮັດໃຫ້ຫມັ້ນໃຈຈາກຕົວຢ່າງສົມທຽບນີ້ບໍ?
4 ການທີ່ເຈົ້າພະຍາຍາມຢ່າງເຕັມທີທີ່ຈະຮັບໃຊ້ພະເຢໂຫວາອາດທຽບໄດ້ກັບການພະຍາຍາມປີນພູ. ເນື່ອງຈາກເຈົ້າຮັກພະເຢໂຫວາ ຈຶ່ງເວົ້າໄດ້ວ່າເຈົ້າໄດ້ພະຍາຍາມຢ່າງຫນັກຢູ່ແລ້ວທີ່ຈະປີນພູ. ແນວໃດກໍຕາມ ຖ້າເຈົ້າກັບຄູ່ສົມລົດຫ່າງເຫີນກັນຢູ່ ເຈົ້າທັງສອງອາດກຳລັງປີນພູຄົນລະເບື້ອງ. ຈະເກີດຫຍັງຂຶ້ນຖ້າເຈົ້າຍັງປີນຕໍ່ໄປອີກ? ແມ່ນຢູ່ ໄລຍະທີ່ຫ່າງຫລາຍອາດເຮັດໃຫ້ເຈົ້າທັງສອງແຍກຈາກກັນໃນຕອນທຳອິດ. ແຕ່ແຮ່ງເຈົ້າພະຍາຍາມເຂົ້າໃກ້ຊິດພະເຈົ້າຫລາຍຂຶ້ນ ຄືກັບການປີນພູສູງຂຶ້ນ ເຈົ້າກັບຄູ່ສົມລົດກໍແຮ່ງເຂົ້າໃກ້ຊິດກັນຫລາຍຂຶ້ນເທົ່ານັ້ນ. ທີ່ຈິງ ການເຂົ້າໃກ້ຊິດພະເຈົ້າຫລາຍຂຶ້ນເປັນປັດໄຈສຳຄັນທີ່ເຮັດໃຫ້ເຈົ້າຫຍັບເຂົ້າໃກ້ຄູ່ສົມລົດຫລາຍຂຶ້ນ. ແຕ່ໃນຕົວຈິງແລ້ວເຈົ້າຈະເຮັດເຊັ່ນນັ້ນໄດ້ແນວໃດ?
ເມື່ອເອົາມາໃຊ້ ຄວາມຮູ້ໃນຄຳພີໄບເບິນຍ່ອມມີພະລັງທີ່ຈະເສີມສ້າງຊີວິດສົມລົດຂອງເຈົ້າໃຫ້ເຂັ້ມແຂງ
5. (ກ) ອັນໃດເປັນວີທີຫນຶ່ງທີ່ຈະເຂົ້າໃກ້ພະເຢໂຫວາແລະຄູ່ສົມລົດໃຫ້ຫລາຍຂຶ້ນ? (ຂ) ພະເຢໂຫວາເບິ່ງສາຍສົມລົດວ່າເປັນແນວໃດ?
5 ວິທີສຳຄັນອີກຢ່າງຫນຶ່ງທີ່ເປັນຄືການປີນພູສຳລັບເຈົ້າແລະຄູ່ສົມລົດແມ່ນໂດຍເອົາໃຈໃສ່ຄຳແນະນຳໃນເລື່ອງຊີວິດສົມລົດຕາມທີ່ພົບໃນພະຄຳຂອງພະເຈົ້າ. (ຄຳເພງ 25:4; ເອຊາອີ 48:17, 18) ດັ່ງນັ້ນ ຂໍໃຫ້ພິຈາລະນາຈຸດສຳຄັນຈຸດຫນຶ່ງໃນຄຳແນະນຳທີ່ອັກຄະສາວົກໂປໂລກ່າວໄວ້. ລາວກ່າວວ່າ “ການເອົາຜົວເອົາເມຍຈົ່ງໃຫ້ເປັນທີ່ນັບຖືແຕ່ຄົນທັງປວງ.” (ເຫບເລີ 13:4) ຂໍ້ຄວາມນີ້ຫມາຍຄວາມວ່າແນວໃດ? ຄຳວ່າ “ເປັນທີ່ນັບຖື” ເປັນຄຳທີ່ບອກເປັນໄນເຖິງອັນໃດບາງຢ່າງທີ່ໄດ້ຮັບການຍົກຍ້ອງແລະຖືວ່າມີຄ່າ. ພະເຢໂຫວາເບິ່ງສາຍສົມລົດແບບນີ້ແຫລະ—ພະອົງຖືວ່າເປັນສິ່ງທີ່ມີຄ່າ.
ຄວາມຮັກແບບຈິງໃຈຕໍ່ພະເຢໂຫວາເປັນແຮງກະຕຸ້ນ
6. ເນື້ອໃນຄຳແນະນຳຂອງໂປໂລໃນເລື່ອງຊີວິດສົມລົດສະແດງໃຫ້ເຫັນຫຍັງ ແລະເປັນຫຍັງຈຶ່ງສຳຄັນທີ່ຈະຄິດເຖິງເລື່ອງນັ້ນ?
6 ແນ່ນອນ ໃນຖານະເປັນຜູ້ຮັບໃຊ້ຂອງພະເຈົ້າ ເຈົ້າແລະຄູ່ສົມລົດຮູ້ແລ້ວວ່າສາຍສົມລົດເປັນສິ່ງທີ່ມີຄ່າ ເຖິງຂັ້ນວ່າສັກສິດດ້ວຍຊໍ້າ. ພະເຢໂຫວາເອງເປັນຜູ້ເລີ່ມຕົ້ນຈັດກຽມການແຕ່ງດອງ. (ມັດທາຍ 19:4-6) ແນວໃດກໍຕາມ ຖ້າຕອນນີ້ເຈົ້າກຳລັງປະສົບບັນຫາໃນຊີວິດສົມລົດ ພຽງແຕ່ຮູ້ວ່າສາຍສົມລົດເປັນສິ່ງທີ່ຫນ້ານັບຖືອາດຍັງບໍ່ພໍທີ່ຈະກະຕຸ້ນເຈົ້າແລະຄູ່ສົມລົດໃຫ້ປະຕິບັດຕໍ່ກັນດ້ວຍຄວາມຮັກແລະຄວາມນັບຖື. ຖ້າເຊັ່ນນັ້ນ ສິ່ງໃດຈະກະຕຸ້ນເຈົ້າໃຫ້ປະຕິບັດໃນແບບດັ່ງກ່າວ? ຂໍໃຫ້ສັງເກດຢ່າງລະອຽດວ່າໂປໂລເວົ້າແນວໃດໃນເລື່ອງການສະແດງຄວາມນັບຖື. ລາວບໍ່ໄດ້ກ່າວວ່າ “ການເອົາຜົວເອົາເມຍເປັນ ທີ່ນັບຖື” ແທນທີ່ຈະເປັນແນວນັ້ນ ລາວກ່າວວ່າ “ການເອົາຜົວເອົາເມຍຈົ່ງໃຫ້ເປັນ ທີ່ນັບຖື.” ໂປໂລບໍ່ພຽງແຕ່ໃຫ້ຄຳຄິດເຫັນ ແຕ່ລາວກຳລັງໃຫ້ຄຳກະຕຸ້ນເຕືອນ. * ການຄິດເຖິງຄວາມແຕກຕ່າງດັ່ງກ່າວອາດຊ່ວຍເຈົ້າໃຫ້ມີແຮງກະຕຸ້ນຫລາຍຂຶ້ນເພື່ອຟື້ນຟູຄວາມນັບຖືຕໍ່ຄູ່ສົມລົດ. ເປັນຫຍັງຈຶ່ງເປັນແນວນັ້ນ?
7. (ກ) ເຮົາປະຕິບັດຕາມຄຳສັ່ງອັນໃດແດ່ໃນພະຄຳພີ ແລະເພາະເຫດໃດ? (ຂ) ການເຊື່ອຟັງກໍ່ຜົນດີແນວໃດ?
7 ຂໍໃຫ້ພິຈາລະນາບຶດຫນຶ່ງວ່າເຈົ້າເບິ່ງຂໍ້ຄຳສັ່ງອື່ນໆແນວໃດເຊິ່ງເປັນຕາມຫລັກການໃນພະຄຳພີ ເຊັ່ນ ວຽກມອບຫມາຍທີ່ໃຫ້ສອນຄົນເປັນສາວົກຫລືຄຳເຕືອນໃຈທີ່ໃຫ້ປະຊຸມກັນເພື່ອນະມັດສະການ. (ມັດທາຍ 28:19; ເຫບເລີ 10:24, 25) ຕ້ອງຍອມຮັບວ່າການປະຕິບັດຕາມຄຳສັ່ງເຫລົ່ານີ້ອາດເປັນເລື່ອງທ້າທາຍ. ຄົນທີ່ເຈົ້າປະກາດໃຫ້ຟັງອາດບໍ່ໄດ້ຕອບສະຫນອງໃນແບບທີ່ຫນ້າພໍໃຈ ຫລືວຽກອາຊີບອາດເຮັດໃຫ້ເຈົ້າຮູ້ສຶກຫມົດແຮງຈົນຍາກທີ່ຈະເຂົ້າຮ່ວມການປະຊຸມຄລິດສະຕຽນ. ເຖິງຈະເປັນແນວນັ້ນ ເຈົ້າກໍຍັງປະກາດຂ່າວສານເລື່ອງລາຊະອານາຈັກຕໍ່ໆໄປ ແລະເຂົ້າຮ່ວມການປະຊຸມຄລິດສະຕຽນສະເຫມີ. ບໍ່ມີໃຜສາມາດຢຸດເຈົ້າໄດ້ ແມ່ນແຕ່ຊາຕານກໍເຮັດບໍ່ໄດ້! ເພາະເຫດໃດ? ເພາະຄວາມຮັກອັນເລິກເຊິ່ງທີ່ມີຕໍ່ພະເຢໂຫວາກະຕຸ້ນເຈົ້າໃຫ້ເຊື່ອຟັງຄຳສັ່ງທັງຫລາຍຂອງພະອົງ. (1 ໂຢຮັນ 5:3) ນັ້ນເກີດຜົນດີຄືແນວໃດ? ການມີສ່ວນຮ່ວມໃນວຽກປະກາດແລະເຂົ້າຮ່ວມການປະຊຸມເຮັດໃຫ້ເຈົ້າມີຄວາມສະຫງົບໃຈແລະມີຄວາມຍິນດີຢ່າງແທ້ຈິງເພາະເຈົ້າຮູ້ວ່າຕົນເອງກຳລັງເຮັດຕາມໃຈປະສົງຂອງພະເຈົ້າ. ຜົນກໍຄື ຄວາມຮູ້ສຶກດັ່ງກ່າວຟື້ນກຳລັງຂອງເຈົ້າຄືນມາໃຫມ່. (ເນເຫມີ 8:10) ເຮົາໄດ້ບົດຮຽນຫຍັງຈາກເລື່ອງນີ້?
8, 9. (ກ) ສິ່ງໃດອາດກະຕຸ້ນເຮົາໃຫ້ເຊື່ອຟັງຄຳກະຕຸ້ນເຕືອນທີ່ໃຫ້ເຮັດຊີວິດສົມລົດໃຫ້ເປັນຕານັບຖື ແລະເພາະເຫດໃດ? (ຂ) ຕອນນີ້ເຮົາຈະພິຈາລະນາຈຸດສຳຄັນສອງຈຸດໃດແດ່?
8 ເຊັ່ນດຽວກັບຄວາມຮັກອັນເລິກເຊິ່ງທີ່ເຈົ້າມີຕໍ່ພະເຈົ້າກະຕຸ້ນເຈົ້າໃຫ້ເຊື່ອຟັງຄຳສັ່ງທີ່ໃຫ້ປະກາດແລະປະຊຸມນຳກັນເຖິງແມ່ນວ່າຈະມີອຸປະສັກຕ່າງໆ ດັ່ງນັ້ນ ຄວາມຮັກທີ່ເຈົ້າມີຕໍ່ພະເຢໂຫວາກໍສາມາດກະຕຸ້ນເຈົ້າໃຫ້ເຊື່ອຟັງຄຳແນະນຳທີ່ເປັນຕາມຫລັກການໃນພະຄຳພີທີ່ວ່າ “ການເອົາຜົວເອົາເມຍ [ຂອງເຈົ້າ] ຈົ່ງໃຫ້ເປັນທີ່ນັບຖື” ເຖິງແມ່ນຈະເບິ່ງວ່າເປັນເລື່ອງຍາກ. (ເຫບເລີ 13:4; ຄຳເພງ 18:29; ຜູ້ເທສະໜາປ່າວປະກາດ 5:4) ນອກຈາກນັ້ນ ເຊັ່ນດຽວກັບຄວາມພະຍາຍາມຂອງເຈົ້າທີ່ຈະມີສ່ວນຮ່ວມໃນການປະກາດແລະໃນການປະຊຸມເຮັດໃຫ້ເຈົ້າໄດ້ຮັບພະພອນຫລາຍຢ່າງຈາກພະເຈົ້າ ພະເຢໂຫວາກໍຈະສັງເກດເຫັນຄວາມພະຍາຍາມຂອງເຈົ້າທີ່ຈະເຮັດໃຫ້ຊີວິດສົມລົດຂອງເຈົ້າເປັນຕານັບຖື ແລະຈະປະທານບຳເຫນັດໃຫ້ເຈົ້າເຊັ່ນກັນ.—1 ເທຊະໂລນີກ 1:3; ເຫບເລີ 6:10.
9 ເຈົ້າຈະເຮັດໃຫ້ຊີວິດສົມລົດເປັນຕານັບຖືໄດ້ແນວໃດ? ເຈົ້າຕ້ອງຫລີກລ່ຽງການປະພຶດທີ່ກໍ່ຄວາມເສຍຫາຍແກ່ຊີວິດສົມລົດ. ນອກຈາກນັ້ນແລ້ວ ເຈົ້າຕ້ອງປະຕິບັດຕາມຂັ້ນຕອນຕ່າງໆທີ່ເສີມຄວາມຜູກພັນໃນສາຍສົມລົດໃຫ້ແຫນ້ນແຟ້ນຂຶ້ນ.
ຫລີກລ່ຽງຄຳເວົ້າແລະການກະທຳ ທີ່ເຮັດໃຫ້ຊີວິດສົມລົດບໍ່ເປັນຕານັບຖື
10, 11. (ກ) ການກະທຳແບບໃດທີ່ເຮັດໃຫ້ຊີວິດສົມລົດບໍ່ເປັນຕານັບຖື? (ຂ) ຄຳຖາມອັນໃດທີ່ເຮົາຄວນຖາມຄູ່ຂອງເຮົາ?
10 ເມຍຄົນຫນຶ່ງເຊິ່ງເປັນຄລິດສະຕຽນໄດ້ກ່າວເມື່ອບໍ່ດົນມານີ້ວ່າ “ຂ້ອຍອະທິດຖານເຖິງພະເຢໂຫວາເພື່ອຊ່ວຍຂ້ອຍໃຫ້ອົດທົນ.” ອົດທົນກັບຫຍັງ? ລາວອະທິບາຍວ່າ “ຜົວເຮັດໃຫ້ຂ້ອຍເຈັບຊໍ້າດ້ວຍຄຳເວົ້າ. ຂ້ອຍອາດບໍ່ມີຮອຍຊໍ້າໃຫ້ເຫັນ ແຕ່ຄຳເວົ້າສຽດສີທີ່ບໍ່ລົດລະຂອງລາວເຮັດໃຫ້ຂ້ອຍມີບາດແຜໃນໃຈ ເຊັ່ນຄຳເວົ້າທີ່ວ່າ ‘ເຈົ້າເປັນພາລະ!’ ແລະ ‘ເຈົ້າບໍ່ມີຫຍັງດີຈັກແນວ!’” ຜູ້ເປັນເມຍຄົນນີ້ເວົ້າເຖິງສິ່ງຫນຶ່ງທີ່ຫນ້າເປັນຫ່ວງຢ່າງຍິ່ງ ນັ້ນຄືການເວົ້າຫຍາບຄາຍໃນຊີວິດສົມລົດ.
11 ເປັນເລື່ອງເສົ້າໃຈພຽງໃດເມື່ອຄູ່ສົມລົດໃນຄອບຄົວຄລິດສະຕຽນໃຊ້ຄຳເວົ້າທີ່ສຽບແທງຕໍ່ກັນ ເຮັດໃຫ້ເກີດບາດແຜທາງໃຈເຊິ່ງບໍ່ສາມາດປິ່ນປົວໄດ້ງ່າຍໆ! ເຫັນໄດ້ແຈ້ງວ່າ ຊີວິດສົມລົດທີ່ຕ່າງຝ່າຍຕ່າງໃຊ້ຄຳເວົ້າທີ່ກໍ່ຄວາມເສຍຫາຍຕໍ່ກັນນັ້ນບໍ່ແມ່ນຊີວິດສົມລົດທີ່ເປັນຕານັບຖື. ຊີວິດສົມລົດຂອງເຈົ້າເປັນແນວໃດໃນເລື່ອງນີ້? ວິທີຫນຶ່ງທີ່ຈະຮູ້ໄດ້ກໍໂດຍການຖາມຄູ່ສົມລົດຂອງເຈົ້າຢ່າງຖ່ອມໃຈວ່າ “ຄຳເວົ້າຂອງຂ້ອຍມີຜົນກະທົບແນວໃດຕໍ່ເຈົ້າ?” ຖ້າຄູ່ຂອງເຈົ້າຮູ້ສຶກວ່າມີຫລາຍຄັ້ງທີ່ຄຳເວົ້າຂອງເຈົ້າເຮັດໃຫ້ເກີດບາດແຜໃນໃຈ ເຈົ້າຕ້ອງເຕັມໃຈທີ່ຈະປ່ຽນແປງການປະພຶດຂອງຕົນເພື່ອເຮັດໃຫ້ສະພາບການດີຂຶ້ນ.—ຄາລາຊີ 5:15; ເອເຟດ 4:31.
12. ການນະມັດສະການຂອງຄົນຜູ້ຫນຶ່ງອາດບໍ່ມີຄ່າແນວໃດໃນທັດສະນະຂອງພະເຈົ້າ?
12 ຈົ່ງຈື່ໄວ້ສະເຫມີວ່າໃນຊີວິດສົມລົດ ວິທີທີ່ເຈົ້າໃຊ້ລີ້ນກະທົບໃສ່ສາຍສຳພັນຂອງເຈົ້າກັບພະເຢໂຫວາ. ຄຳພີໄບເບິນກ່າວວ່າ “ຖ້າຜູ້ຫນຶ່ງຜູ້ໃດຖືວ່າຕົວເປັນຄົນຂັບຕາມສາສະໜາ [“ນະມັດສະການພະເຈົ້າຢ່າງຖືກວິທີ,” ລ.ມ.] ແລະບໍ່ໄດ້ລະວັງຫ້າມລີ້ນແຫ່ງຕົນໄວ້ ແຕ່ວ່າໄດ້ລໍ້ລວງໃຈແຫ່ງຕົນ ສາສະໜາ [“ການນະມັດສະການ,” ລ.ມ.] ຂອງຄົນນັ້ນເປັນການເປົ່າໆ.” (ຢາໂກໂບ 1:26) ຄຳເວົ້າແລະການນະມັດສະການຂອງເຈົ້າພົວພັນກັນຢ່າງໃກ້ຊິດ. ຄຳພີໄບເບິນບໍ່ໄດ້ສະຫນັບສະຫນູນແນວຄິດທີ່ວ່າ ຕາບໃດທີ່ອ້າງວ່າຮັບໃຊ້ພະເຈົ້າ ຈະເຮັດອັນໃດຢູ່ເຮືອນກໍບໍ່ສຳຄັນ. ຢ່າລໍ້ລວງຕົວເອງ. ນີ້ເປັນເລື່ອງສຳຄັນ. (1 ເປໂຕ 3:7) ເຈົ້າອາດມີຄວາມສາມາດແລະຄວາມກະຕືລືລົ້ນ ແຕ່ຖ້າເຈົ້າຕັ້ງໃຈທຳຮ້າຍຄູ່ສົມລົດຂອງເຈົ້າດ້ວຍຄຳເວົ້າທີ່ສຽບແທງ ເຈົ້າກໍເຮັດໃຫ້ຊີວິດສົມລົດບໍ່ເປັນຕານັບຖືແລະພະເຈົ້າອາດມອງວ່າການນະມັດສະການຂອງເຈົ້າບໍ່ມີຄ່າ.
13. ຄົນທີ່ແຕ່ງດອງແລ້ວອາດເຮັດໃຫ້ຄູ່ຂອງຕົນຮູ້ສຶກເຈັບປວດໄດ້ແນວໃດ?
13 ຄູ່ສົມລົດຕ້ອງຕື່ນຕົວດ້ວຍເຊັ່ນດຽວກັນທີ່ຈະບໍ່ເຮັດໃຫ້ອີກຝ່າຍຫນຶ່ງເກີດຄວາມຮູ້ສຶກເຈັບປວດໂດຍທາງອ້ອມ. ຂໍໃຫ້ພິຈາລະນາຕົວຢ່າງສອງເລື່ອງ ແມ່ທີ່ໄຮ້ຄູ່ໂທລະສັບລົມກັນເລື້ອຍໆກັບຊາຍຄລິດສະຕຽນທີ່ແຕ່ງດອງແລ້ວທີ່ຢູ່ໃນປະຊາຄົມເພື່ອຂໍຄຳແນະນຳ ແລະທັງສອງລົມກັນຢ່າງຍືດຍາວ; ພີ່ນ້ອງຊາຍຄລິດສະຕຽນທີ່ເປັນໂສດໃຊ້ເວລາຫລາຍໃນແຕ່ລະອາທິດໄປປະກາດນຳກັນກັບພີ່ນ້ອງຍິງຄລິດສະຕຽນທີ່ແຕ່ງດອງແລ້ວ. ຄົນທີ່ແຕ່ງດອງແລ້ວໃນສອງຕົວຢ່າງນີ້ອາດມີເຈຕະນາທີ່ຖືກຕ້ອງ; ແນວໃດກໍຕາມ ຄວາມປະພຶດຂອງເຂົາເຈົ້າມີຜົນກະທົບແນວໃດຕໍ່ຄູ່ຂອງຕົນ? ເມຍທີ່ປະສົບກັບສະພາບການແບບນັ້ນກ່າວວ່າ “ການສັງເກດເຫັນຜົວຂອງຂ້ອຍໃຫ້ເວລາແລະຄວາມສົນໃຈຫລາຍຕໍ່ພີ່ນ້ອງຍິງອີກຄົນຫນຶ່ງໃນປະຊາຄົມເຮັດໃຫ້ຂ້ອຍເຈັບປວດ. ມັນເຮັດໃຫ້ຂ້ອຍຮູ້ສຶກວ່າດ້ອຍຄ່າ.”
14. (ກ) ຕົ້ນເດີມ 2:24 ເນັ້ນພັນທະຫນ້າທີ່ອັນໃດໃນຊີວິດສົມລົດ? (ຂ) ຄຳຖາມອັນໃດທີ່ເຮົາຄວນຖາມຕົວເອງ?
14 ເປັນທີ່ເຂົ້າໃຈໄດ້ວ່າຜູ້ທີ່ແຕ່ງດອງແລ້ວດັ່ງທີ່ກ່າວມານີ້ແລະຄົນອື່ນທີ່ປະເຊີນສະພາບການທີ່ຄ້າຍກັນໃນຊີວິດສົມລົດຮູ້ສຶກເຈັບປວດ. ຄູ່ສົມລົດຂອງເຂົາເຈົ້າລະເລີຍຄຳສັ່ງພື້ນຖານຂອງພະເຈົ້າໃນເລື່ອງການແຕ່ງດອງທີ່ວ່າ “ຜູ້ຊາຍຈະລາພໍ່ແມ່ແຫ່ງຕົນແລະຈະຕິດພັນຢູ່ກັບເມຍແຫ່ງຕົນ.” (ຕົ້ນເດີມ 2:24) ແນ່ນອນ ຄົນທີ່ແຕ່ງດອງແລ້ວຍັງນັບຖືພໍ່ແມ່ຂອງຕົນ; ແນວໃດກໍຕາມ ການຈັດຕຽມຂອງພະເຈົ້າກໍຄືວ່າຜູ້ຊາຍມີພັນທະຫນ້າທີ່ຕໍ່ຄູ່ຂອງຕົນເປັນອັນດັບທຳອິດ. ຄ້າຍກັນ ຄລິດສະຕຽນຮັກເພື່ອນຮ່ວມຄວາມເຊື່ອຢ່າງຍິ່ງ ແຕ່ເຂົາເຈົ້າມີຄວາມຮັບຜິດຊອບຕໍ່ຄູ່ຂອງຕົນເປັນອັນດັບທຳອິດ. ດັ່ງນັ້ນ ເມື່ອຄລິດສະຕຽນທີ່ແຕ່ງດອງແລ້ວໃຊ້ເວລາແບບບໍ່ສົມຄວນຫລືສະຫນິດສະຫນົມກັນຫລາຍໂພດກັບເພື່ອນຮ່ວມຄວາມເຊື່ອໂດຍສະເພາະແລ້ວກັບເພດກົງກັນຂ້າມ ເຂົາເຈົ້າເຮັດໃຫ້ສາຍສຳພັນໃນຊີວິດສົມລົດເຄັ່ງຕຶງ. ເລື່ອງນີ້ອາດເປັນສາເຫດທີ່ເຮັດໃຫ້ສາຍສຳພັນໃນຊີວິດສົມລົດຂອງເຈົ້າເຄັ່ງຕຶງບໍ? ຈົ່ງຖາມຕົວເອງວ່າ ‘ຂ້ອຍໄດ້ໃຫ້ເວລາ ຄວາມເອົາໃຈໃສ່ ແລະຄວາມຮັກໄຄ່ແກ່ຄູ່ຂອງຂ້ອຍຢ່າງແທ້ຈິງແລ້ວບໍເຊິ່ງເປັນສິດທີ່ລາວຄວນໄດ້ຮັບ?’
15. ຕາມມັດທາຍ 5:28 ເປັນຫຍັງຄລິດສະຕຽນທີ່ແຕ່ງດອງແລ້ວຄວນຫລີກລ່ຽງການໃຫ້ຄວາມເອົາໃຈໃສ່ຢ່າງບໍ່ເຫມາະສົມຕໍ່ຄົນທີ່ເປັນເພດກົງກັນຂ້າມ?
15 ຍິ່ງກວ່ານັ້ນ ຄລິດສະຕຽນທີ່ແຕ່ງດອງແລ້ວທີ່ໃຫ້ຄວາມເອົາໃຈໃສ່ຢ່າງບໍ່ເຫມາະສົມກັບເພດກົງກັນຂ້າມເຊິ່ງບໍ່ແມ່ນຄູ່ຂອງຕົນເຮັດໃຫ້ຕົນເອງສ່ຽງຕໍ່ອັນຕະລາຍຢ່າງບໍ່ສຸຂຸມ. ຫນ້າເສົ້າໃຈທີ່ຄລິດສະຕຽນບາງຄົນເຊິ່ງແຕ່ງດອງແລ້ວໄດ້ເກີດມີຄວາມຮູ້ສຶກຮັກໄຄ່ຕໍ່ຄົນທີ່ຕົນເອງສະຫນິດສະຫນົມຫລາຍເກີນໄປ. (ມັດທາຍ 5:28) ຜົນກໍຄື ຄວາມຮູ້ສຶກຜູກພັນດັ່ງກ່າວໄດ້ນຳໄປສູ່ການປະພຶດທີ່ເຮັດໃຫ້ຊີວິດສົມລົດບໍ່ເປັນຕານັບຖືຍິ່ງຂຶ້ນອີກ. ຂໍໃຫ້ພິຈາລະນາສິ່ງທີ່ອັກຄະສາວົກໂປໂລກ່າວກ່ຽວກັບເລື່ອງນີ້.
“ບ່ອນນອນຈົ່ງໃຫ້ . . . ປາສະຈາກການຖ່ອຍຮ້າຍ”
16. ໂປໂລໃຫ້ຄຳສັ່ງອັນໃດກ່ຽວກັບຊີວິດສົມລົດ?
16 ທັນທີຫລັງຈາກທີ່ໂປໂລໃຫ້ຄຳກະຕຸ້ນເຕືອນທີ່ວ່າ “ການເອົາຜົວເອົາເມຍຈົ່ງໃຫ້ເປັນທີ່ນັບຖື” ລາວໄດ້ໃຫ້ຄຳເຕືອນຕື່ມອີກວ່າ “ບ່ອນນອນຈົ່ງໃຫ້ . . . ປາສະຈາກການຖ່ອຍຮ້າຍ ເຫດວ່າຄົນຜິດຊາຍຍິງແລະຄົນຫລິ້ນຊູ້ສູ່ຜົວເມຍທ່ານ ພະເຈົ້າຈະຕັດສິນ.” (ເຫບເລີ 13:4) ໂປໂລໃຊ້ຄຳ “ບ່ອນນອນ” ເພື່ອກ່າວເຖິງຄວາມສຳພັນທາງເພດ. ຄວາມສຳພັນເຊັ່ນນັ້ນຈະ “ປາສະຈາກການຖ່ອຍຮ້າຍ” ຫລືສະອາດທາງດ້ານສິນລະທຳ ຖ້າຈຳກັດໄວ້ສະເພາະກັບຄົນທີ່ແຕ່ງດອງກັນແລ້ວເທົ່ານັ້ນ. ດັ່ງນັ້ນ ຄລິດສະຕຽນເອົາໃຈໃສ່ຖ້ອຍຄຳທີ່ຂຽນຂຶ້ນໂດຍການດົນໃຈທີ່ວ່າ “ຈົ່ງຊົມຊື່ນຍິນດີດ້ວຍເມຍທີ່ເຈົ້າໄດ້ເອົາເວລາຍັງຫນຸ່ມຢູ່.”—ສຸພາສິດ 5:18.
17. (ກ) ເປັນຫຍັງທັດສະນະຂອງໂລກເລື່ອງການຫລິ້ນຊູ້ຈຶ່ງບໍ່ຄວນມີອິດທິພົນຕໍ່ຄລິດສະຕຽນ? (ຂ) ເຮົາຈະຕິດຕາມຕົວຢ່າງຂອງໂຢບແນວໃດ?
17 ຜູ້ທີ່ມີເພດສຳພັນກັບຄົນອື່ນນອກຈາກຄູ່ສົມລົດຂອງຕົນສະແດງໃຫ້ເຫັນວ່າເຂົາເຈົ້າບໍ່ໄດ້ນັບຖືກົດດ້ານສິນລະທຳຂອງພະເຈົ້າຈັກດີ້. ແມ່ນຢູ່ ຫລາຍຄົນໃນທຸກມື້ນີ້ຖືວ່າການຫລິ້ນຊູ້ເປັນການປະພຶດທີ່ທຳມະດາ. ແຕ່ບໍ່ວ່າຄົນອື່ນ ອາດເບິ່ງການຫລິ້ນຊູ້ແນວໃດກໍຕາມ ນັ້ນກໍບໍ່ຄວນມີອິດທິພົນຕໍ່ທັດສະນະຂອງຄລິດສະຕຽນໃນເລື່ອງນີ້. ເຂົາເຈົ້າສຳນຶກວ່າໃນທີ່ສຸດ “ຄົນຜິດຊາຍຍິງແລະຄົນຫລິ້ນຊູ້ . . . ພະເຈົ້າ ຈະຕັດສິນ” ບໍ່ແມ່ນມະນຸດ. (ເຫບເລີ 10:31; 12:29) ດັ່ງນັ້ນ ຄລິດສະຕຽນແທ້ຍຶດຫມັ້ນກັບທັດສະນະຂອງພະເຢໂຫວາໃນເລື່ອງນີ້. (ໂລມ 12:9) ຂໍໃຫ້ຈື່ໄວ້ວ່າໂຢບບຸລຸດຕົ້ນຕະກູນໄດ້ກ່າວວ່າ “ຂ້ອຍໄດ້ທຳສັນຍາກັບຕາ [ຕົນ] ເອງ.” (ໂຢບ 31:1) ແມ່ນແລ້ວ ເພື່ອຈະຫລີກລ່ຽງແມ່ນແຕ່ບາດກ້າວດຽວທີ່ອາດນຳໄປສູ່ການຫລິ້ນຊູ້ ຄລິດສະຕຽນແທ້ຄວບຄຸມຕາຂອງຕົນເອງແລະບໍ່ຍອມເບິ່ງຜູ້ທີ່ບໍ່ແມ່ນຄູ່ຂອງຕົນດ້ວຍຄວາມປາຖະຫນາໃນຕົວຄົນນັ້ນ.—ເບິ່ງພາກຜະຫນວກ “ທັດສະນະຂອງຄຳພີໄບເບິນໃນເລື່ອງການຢ່າຮ້າງແລະການແຍກກັນຢູ່.”
18. (ກ) ຕາມທັດສະນະຂອງພະເຢໂຫວາ ການຫລິ້ນຊູ້ເປັນເລື່ອງຮ້າຍແຮງເຖິງຂະຫນາດໃດ? (ຂ) ການຫລິ້ນຊູ້ແລະການບູຊາຮູບປັ້ນຄ້າຍຄືກັນແນວໃດ?
18 ໃນທັດສະນະຂອງພະເຢໂຫວາ ການຫລິ້ນຊູ້ເປັນເລື່ອງຮ້າຍແຮງເຖິງຂະຫນາດໃດ? ພະບັນຍັດຂອງໂມເຊຊ່ວຍເຮົາໃຫ້ເຂົ້າໃຈຄວາມຮູ້ສຶກຂອງພະເຢໂຫວາໃນເລື່ອງນີ້. ໃນອິດສະລາແອນ ການຫລິ້ນຊູ້ແລະການບູຊາຮູບປັ້ນແມ່ນຢູ່ໃນບັນດາຄວາມຜິດທີ່ມີໂທດປະຫານຊີວິດ. (ພວກເລວີ 20:2, 10) ເຈົ້າເຫັນຄວາມຄ້າຍກັນລະຫວ່າງການກະທຳສອງຢ່າງນີ້ບໍ? ຂໍໃຫ້ພິຈາລະນາກໍລະນີຕໍ່ໄປນີ້ ຖ້າຊາວອິດສະລາແອນນະມັດສະການຮູບປັ້ນ ລາວລະເມີດຄຳສັນຍາທີ່ໄດ້ເຮັດກັບພະເຢໂຫວາ. ໃນທຳນອງດຽວກັນ ຊາວອິດສະລາແອນທີ່ຫລິ້ນຊູ້ກໍລະເມີດຄຳສັນຍາທີ່ເຮັດກັບຄູ່ຂອງຕົນ. ການກະທຳທັງສອງຢ່າງເປັນການທໍລະຍົດ. (ອົບພະຍົບ 19:5, 6; ພະບັນຍັດ 5:9; ມາລາກີ 2:14) ດັ່ງນັ້ນ ການກະທຳທັງສອງສົມຄວນໄດ້ຮັບໂທດຈາກພະເຢໂຫວາ ພະເຈົ້າຜູ້ສັດຊື່ແລະໄວ້ໃຈໄດ້.—ຄຳເພງ 33:4.
19. ອັນໃດອາດເສີມຄວາມຕັ້ງໃຈຂອງຄົນເຮົາໃຫ້ປະຕິເສດການຫລິ້ນຊູ້ ແລະເພາະເຫດໃດ?
19 ແນ່ນອນວ່າຄລິດສະຕຽນບໍ່ໄດ້ຢູ່ພາຍໃຕ້ພະບັນຍັດຂອງໂມເຊ. ເຖິງຢ່າງນັ້ນ ການຈື່ໄວ້ວ່າໃນອິດສະລາແອນບູຮານການຫລິ້ນຊູ້ຖືວ່າເປັນບາບທີ່ຮ້າຍແຮງອາດເສີມຄວາມຕັ້ງໃຈຂອງຄລິດສະຕຽນບໍ່ໃຫ້ເຮັດບາບດັ່ງກ່າວ. ເພາະເຫດໃດ? ຂໍໃຫ້ພິຈາລະນາການສົມທຽບນີ້ ເຈົ້າຈະເຂົ້າໄປໃນໂບດ ຄູ້ເຂົ່າລົງ ແລະອະທິດຖານເຖິງຮູບປັ້ນບໍ? ເຈົ້າຈະຕອບວ່າ ‘ບໍ່ເຮັດດອກ!’ ແຕ່ຖ້າມີການສະເຫນີເງິນຈຳນວນຫລາຍໃຫ້ເຈົ້າ ເຈົ້າຈະເຮັດບໍ? ເຈົ້າຈະຕອບວ່າ ‘ບໍ່ເຮັດດອກ!’ ທີ່ຈິງ ພຽງແຕ່ຄິດເຖິງການທໍລະຍົດຕໍ່ພະເຢໂຫວາໂດຍນະມັດສະການຮູບປັ້ນກໍເປັນເລື່ອງທີ່ຫນ້າລັງກຽດສຳລັບຄລິດສະຕຽນແທ້. ໃນລັກສະນະຄ້າຍກັນ ຄລິດສະຕຽນຄວນຈະຮູ້ສຶກລັງກຽດຄວາມຄິດກ່ຽວກັບການທໍລະຍົດຕໍ່ພະເຢໂຫວາພະເຈົ້າຂອງຕົນ ອີກທັງການທໍລະຍົດຕໍ່ຄູ່ສົມລົດໂດຍການຫລິ້ນຊູ້ ບໍ່ວ່າແຮງກະຕຸ້ນໃຫ້ເຮັດບາບແບບນັ້ນຈະເປັນອັນໃດກໍຕາມ. (ຄຳເພງ 51:1, 4; ໂກໂລດ 3:5) ເຮົາບໍ່ຕ້ອງການເຮັດໃນສິ່ງທີ່ເຮັດໃຫ້ຊາຕານຍິນດີ ແຕ່ຈະນຳຄວາມເສື່ອມເສຍມາສູ່ພະເຢໂຫວາແລະການຈັດຕຽມທີ່ສັກສິດກ່ຽວກັບຊີວິດສົມລົດ.
ວິທີເສີມສ້າງຄວາມຜູກພັນໃນຊີວິດສົມລົດຂອງເຈົ້າໃຫ້ແຫນ້ນແຟ້ນຂຶ້ນ
20. ມີຫຍັງເກີດຂຶ້ນກັບຊີວິດສົມລົດຂອງບາງຄົນ? ຂໍໃຫ້ຍົກຕົວຢ່າງ.
20 ນອກຈາກຈະຫລີກລ່ຽງການປະພຶດທີ່ເຮັດໃຫ້ຊີວິດສົມລົດບໍ່ເປັນຕານັບຖືແລ້ວ ມີຂັ້ນຕອນອັນໃດແດ່ທີ່ເຈົ້າສາມາດເຮັດໄດ້ເພື່ອຟື້ນຟູຄວາມນັບຖືຕໍ່ຄູ່ສົມລົດຂອງເຈົ້າ? ເພື່ອຕອບຄຳຖາມນີ້ ຂໍໃຫ້ສົມທຽບຊີວິດສົມລົດວ່າເປັນຄືກັບເຮືອນ. ຕໍ່ຈາກນັ້ນກໍໃຫ້ຄິດເຖິງຄຳເວົ້າທີ່ສະແດງຄວາມກະລຸນາ ການກະທຳທີ່ຄຳນຶງເຖິງຄົນອື່ນ ແລະຄຳເວົ້າທີ່ຫນ້ານັບຖືລະຫວ່າງຄູ່ສົມລົດວ່າເປັນຄືກັບເຄື່ອງທີ່ຕົກແຕ່ງເຮືອນໃຫ້ສວຍງາມຂຶ້ນ. ຖ້າເຈົ້າຮູ້ສຶກໃກ້ຊິດກັນແລະກັນ ຊີວິດສົມລົດຂອງເຈົ້າກໍປຽບຄືກັບເຮືອນທີ່ຕົກແຕ່ງດ້ວຍເຄື່ອງເຮືອນທີ່ມີສີສັນແລະຕື່ມຄວາມອົບອຸ່ນ. ຖ້າຄວາມຮັກໄຄ່ຂອງເຈົ້າຫລຸດຫນ້ອຍລົງ ເຄື່ອງຕົກແຕ່ງດັ່ງກ່າວກໍຄ່ອຍໆຫາຍໄປ ເຮັດໃຫ້ຊີວິດສົມລົດຂອງເຈົ້າບໍ່ສົດໃສຄືກັບເຮືອນທີ່ບໍ່ມີເຄື່ອງຕົກແຕ່ງໃດໆເລີຍ. ເນື່ອງຈາກເຈົ້າປາຖະຫນາທີ່ຈະປະຕິບັດຕາມຄຳສັ່ງຂອງພະເຈົ້າທີ່ວ່າ “ການເອົາຜົວເອົາເມຍຈົ່ງໃຫ້ເປັນທີ່ນັບຖື” ເຈົ້າຄົງໄດ້ຮັບການກະຕຸ້ນໃຫ້ປັບປຸງສະພາບການໃຫ້ດີຂຶ້ນ. ທີ່ຈິງແລ້ວ ສິ່ງທີ່ມີຄ່າແລະເປັນຕານັບຖືຍ່ອມຄູ່ຄວນທີ່ຈະປົວແປງ ຫລືເຮັດໃຫ້ດີຄືເກົ່າ. ເຈົ້າຈະເຮັດເຊັ່ນນັ້ນໄດ້ແນວໃດ? ພະຄຳຂອງພະເຈົ້າກ່າວວ່າ “ເຂົາກໍ່ສ້າງເຮືອນໄວ້ດ້ວຍຄວາມປັນຍາແລະເຂົາໃຫ້ເຮືອນຕັ້ງຫມັ້ນຄົງຢູ່ດ້ວຍຄວາມເຂົ້າໃຈ. ແລະດ້ວຍຄວາມຮູ້ເຂົາໂຮມສິ່ງຂອງປະເສີດກັບຂອງທີ່ຊອບໃຈທຸກຢ່າງໃຫ້ຫ້ອງທັງຫລາຍເຕັມ.” (ສຸພາສິດ 24:3, 4) ຂໍໃຫ້ພິຈາລະນາເຖິງວິທີທີ່ຖ້ອຍຄຳເຫລົ່ານີ້ສາມາດໃຊ້ໄດ້ກັບຊີວິດສົມລົດ.
21. ເຮົາຈະຄ່ອຍໆເສີມສ້າງຊີວິດສົມລົດຂອງເຮົາໃຫ້ຫມັ້ນຄົງຂຶ້ນໄດ້ໂດຍວິທີໃດ? (ເບິ່ງຂອບ “ ຂ້ອຍຈະເຮັດໃຫ້ຊີວິດສົມລົດດີຂຶ້ນໄດ້ແນວໃດ?”)
21 ໃນບັນດາ “ສິ່ງຂອງປະເສີດ” ທີ່ເຮັດໃຫ້ຄອບຄົວມີຄວາມສຸກໄດ້ແກ່ຄຸນລັກສະນະຕ່າງໆເຊັ່ນ ຄວາມຮັກແທ້ ຄວາມຢ້ານຢຳພະເຈົ້າ ແລະຄວາມເຊື່ອທີ່ເຂັ້ມແຂງ. (ສຸພາສິດ 15:16, 17; 1 ເປໂຕ 1:7) ຄຸນລັກສະນະດັ່ງກ່າວເສີມສ້າງສາຍສົມລົດໃຫ້ຫມັ້ນຄົງ. ແຕ່ເຈົ້າສັງເກດບໍວ່າຫ້ອງທັງຫລາຍທີ່ກ່າວໃນສຸພາສິດຂ້າງເທິງເຕັມໄປດ້ວຍສິ່ງຂອງປະເສີດໂດຍວິທີໃດ? ໂດຍອາໄສ “ຄວາມຮູ້.” ແມ່ນແລ້ວ ຄວາມຮູ້ໃນຄຳພີໄບເບິນ ເມື່ອເອົາມາໃຊ້ຍ່ອມມີພະລັງທີ່ຈະເຮັດໃຫ້ຄົນປ່ຽນແປງຄວາມຄິດແລະກະຕຸ້ນເຂົາເຈົ້າໃຫ້ຟື້ນຟູຄວາມຮັກທີ່ມີຕໍ່ກັນ. (ໂລມ 12:2; ຟີລິບ 1:9) ດັ່ງນັ້ນ ເມື່ອໃດກໍຕາມທີ່ເຈົ້າແລະຄູ່ສົມລົດໃຊ້ເວລາລົມກັນແລະພິຈາລະນາຂໍ້ຄວາມຕອນຫນຶ່ງຈາກພະຄຳພີແບບໃຈເຢັນໆ ເຊັ່ນຂໍ້ພະຄຳພີປະຈຳວັນ ຫລືຫົວເລື່ອງທີ່ອາໄສຄຳພີໄບເບິນເປັນຫລັກໃນຫໍສັງເກດການ ແລະຕື່ນເຖີດ! (ພາສາໄທ) ເຊິ່ງກ່ຽວຂ້ອງກັບຊີວິດສົມລົດ ກໍເປັນຄືກັບວ່າເຈົ້າກຳລັງພິຈາລະນາເບິ່ງເຄື່ອງຕົກແຕ່ງເຮືອນທີ່ງົດງາມເຊິ່ງອາດເຮັດໃຫ້ເຮືອນຂອງເຈົ້າງາມຂຶ້ນ. ເມື່ອຄວາມຮັກທີ່ມີຕໍ່ພະເຢໂຫວາກະຕຸ້ນເຈົ້າໃຫ້ເອົາຄຳແນະນຳທີ່ຫາກໍພິຈາລະນາມາໃຊ້ໃນຊີວິດສົມລົດ ກໍຄືກັບວ່າເຈົ້າກຳລັງເອົາເຄື່ອງຕົກແຕ່ງເຮືອນນັ້ນເຂົ້າມາໃນ “ຫ້ອງທັງຫລາຍ.” ຜົນກໍຄື ຄວາມເບີກບານຍິນດີແລະຄວາມອົບອຸ່ນທີ່ເຈົ້າເຄີຍມີໃນຊີວິດສົມລົດອາດກັບຄືນມາໄດ້.
22. ເຮົາຈະມີຄວາມພໍໃຈຫຍັງຫາກເຮົາພະຍາຍາມເຮັດສ່ວນຂອງຕົນເອງໃນການເສີມສ້າງຊີວິດສົມລົດ?
22 ແມ່ນຢູ່ ອາດຕ້ອງໃຊ້ເວລາແລະຄວາມພະຍາຍາມຫລາຍເພື່ອຈະເອົາເຄື່ອງຕົກແຕ່ງດັ່ງກ່າວກັບຄືນມາເທື່ອລະຢ່າງ. ຖ້າເຈົ້າພະຍາຍາມເຮັດສ່ວນຂອງຕົນເອງ ເຈົ້າຈະມີຄວາມພໍໃຈຢ່າງຍິ່ງທີ່ຮູ້ວ່າຕົນເອງກຳລັງເຊື່ອຟັງຄຳສັ່ງໃນຄຳພີໄບເບິນທີ່ວ່າ “ຝ່າຍການທີ່ນັບຖືກັນແລະກັນນັ້ນຈົ່ງເປັນຕົ້ນ.” (ໂລມ 12:10; ຄຳເພງ 147:11) ເຫນືອສິ່ງອື່ນໃດທັງຫມົດ ການທີ່ເຈົ້າພະຍາຍາມຢ່າງຈິງຈັງເພື່ອໃຫ້ຊີວິດສົມລົດເປັນຕານັບຖືຈະເຮັດໃຫ້ເຈົ້າຮັກສາຕົວໄວ້ໃນຄວາມຮັກຂອງພະເຈົ້າ.
^ ຂໍ້ 6 ເນື້ອໃນສະແດງວ່າຄຳແນະນຳຂອງໂປໂລໃນເລື່ອງຊີວິດສົມລົດເປັນສ່ວນຫນຶ່ງຂອງຄຳກະຕຸ້ນເຕືອນຫລາຍໆຢ່າງ.—ເຫບເລີ 13:1-5.
