ຊາຕານ​ແລະ​ຜີສາດ​ຂອງ​ມັນ​ບໍ່​ຕ້ອງການ​ໃຫ້​ທ່ານ​ຮັບໃຊ້​ພະເຈົ້າ. ພວກ​ມັນ​ຢາກ​ໃຫ້​ທຸກໆ​ຄົນ​ຖອຍ​ຫ່າງ​ໄປ​ຈາກ​ພະເຈົ້າ​ຖ້າ​ພວກ​ມັນ​ສາມາດ​ເຮັດ​ໄດ້. ພວກ​ມັນ​ພະຍາຍາມ​ເຮັດ​ສິ່ງ​ນີ້​ໂດຍ​ວິທີ​ໃດ? ທາງ​ໜຶ່ງ​ແມ່ນ​ໂດຍ​ທາງ​ສາສະໜາ​ປອມ. (2 ໂກລິນໂທ 11:13-15) ສາສະໜາ​ແມ່ນ​ສາສະໜາ​ປອມ​ຫາກ​ບໍ່​ໄດ້​ສອນ​ຄວາມ​ຈິງ​ຈາກ​ຄຳພີ​ໄບເບິນ. ສາສະໜາ​ປອມ​ກໍ​ຄື​ກັນ​ກັບ​ເງິນ​ປອມ—ມັນ​ອາດ​ເບິ່ງ​ຄື​ຂອງ​ແທ້ ແຕ່​ເງິນ​ນັ້ນ​ບໍ່​ມີ​ຄ່າ. ສາສະໜາ​ປອມ​ອາດ​ກໍ່​ບັນຫາ​ໃຫ້​ທ່ານ​ຫຼາຍ​ຢ່າງ.

ຄຳ​ສອນ​ປອມ​ທາງ​ສາສະໜາ​ບໍ່​ສາມາດ​ເຮັດ​ໃຫ້​ພະ​ເຢ​ໂ​ຫວາ​ພະເຈົ້າ​ແຫ່ງ​ຄວາມ​ຈິງ​ພໍ​ພະໄທ. ເມື່ອ​ພະ​ເຍຊູ​ຢູ່​ເທິງ​ແຜ່ນດິນ​ໂລກ​ມີ​ກຸ່ມ​ສາສະໜາ​ຊຶ່ງ​ຢາກ​ຂ້າ​ພະອົງ. ພວກ​ເຂົາ​ຄິດ​ວ່າ​ແນວ​ທາງ​ການ​ນະມັດສະການ​ຂອງ​ເຂົາ​ແມ່ນ​ແນວ​ທາງ​ທີ່​ຖືກ​ຕ້ອງ. ພວກ​ເຂົາ​ກ່າວ​ວ່າ “ພວກ​ເຮົາ​ມີ​ພໍ່​ອົງ​ດຽວ ເປັນ​ພະເຈົ້າ.” ພະ​ເຍຊູ​ເຫັນ​ດີ​ນຳ​ບໍ? ບໍ່! ພະອົງ​ກ່າວ​ແກ່​ພວກ​ເຂົາ​ວ່າ “ທ່ານ​ທັງ​ຫຼາຍ​ມາ​ຈາກ​ພະຍາມານ​ຊຶ່ງ​ເປັນ​ພໍ່​ຂອງ​ທ່ານ.” (ໂຍຮັນ 8:41, 44, ລ.ມ.) ປັດຈຸບັນ​ ນີ້​ຫຼາຍ​ຄົນ​ຄິດ​ວ່າ​ພວກ​ເຂົາ​ພວມ​ນະມັດສະການ​ພະເຈົ້າ ແຕ່​ແທ້​ຈິງ​ແລ້ວ​ພວກ​ເຂົາ​ພວມ​ຮັບໃຊ້​ຊາຕານ​ແລະ​ຜີສາດ​ຂອງ​ມັນ!—1 ໂກລິນໂທ 10:20.

ແບບ​ດຽວ​ກັບ​ຕົ້ນ​ໄມ້​ບໍ່​ດີ​ໃຫ້​ເກີດ​ໝາກ​ບໍ່​ດີ ສາສະໜາ​ປອມ​ເປັນ​ສາເຫດ​ໃຫ້​ຜູ້​ຄົນ​ເຮັດ​ສິ່ງ​ທີ່​ບໍ່​ດີ. ໂລກ​ເຕັມ​ໄປ​ດ້ວຍ​ຄວາມ​ຫຍຸ້ງຍາກ​ເນື່ອງ​ຈາກ​ສິ່ງ​ບໍ່​ດີ​ທີ່​ມະນຸດ​ເຮັດ. ການ​ຜິດ​ສິນລະທຳ, ການ​ຕໍ່​ສູ້, ການ​ລັກ, ການ​ກົດ​ຂີ່, ການ​ຄາຕະກຳ, ແລະ​ການ​ຂົ່ມຂືນ. ຫຼາຍ​ຄົນ​ທີ່​ເຮັດ​ສິ່ງ​ບໍ່​ດີ​ເຫຼົ່າ​ນີ້​ມີ​ສາສະໜາ ແຕ່​ສາສະໜາ​ຂອງ​ເຂົາ​ບໍ່​ໄດ້​ກະຕຸ້ນ​ເຂົາ​ໃຫ້​ປະຕິບັດ​ສິ່ງ​ທີ່​ດີ. ພວກ​ເຂົາ​ບໍ່​ສາມາດ​ເປັນ​ເພື່ອນ​ຂອງ​ພະເຈົ້າ​ໄດ້​ຈົນ​ກວ່າ​ເຂົາ​ຈະ​ເຊົາ​ເຮັດ​ສິ່ງ​ທີ່​ບໍ່​ດີ.—ມັດທາຍ 7:17, 18.

ສາສະໜາ​ປອມ​ສອນ​ຜູ້​ຄົນ​ໃຫ້​ອະທິດຖານ​ຕໍ່​ຮູບ​ເຄົາລົບ. ພະເຈົ້າ​ກ່າວ​ວ່າ​ຢ່າ​ອະທິດຖານ​ຕໍ່​ຮູບ​ເຄົາລົບ. ສິ່ງ​ນີ້​ແມ່ນ​ມີ​ເຫດຜົນ. ທ່ານ​ຈະ​ມັກ​ບໍ​ຖ້າ​ບາງ​ຄົນ​ບໍ່​ເຄີຍ​ລົມ​ກັບ​ທ່ານ​ແຕ່​ເຂົາ​ລົມ​ກັບ​ຮູບ​ຂອງ​ທ່ານ​ເທົ່າ​ນັ້ນ? ຄົນ​ຜູ້​ນັ້ນ​ຈະ​ສາມາດ​ເປັນ​ເພື່ອນ​ທີ່​ແທ້​ຈິງ​ຂອງ​ທ່ານ​ບໍ? ບໍ່ ເຂົາ​ບໍ່​ສາມາດ​ເປັນ​ໄດ້. ພະ​ເຢໂຫວາ​ຢາກ​ໃຫ້​ປະຊາຊົນ​ເວົ້າ​ກັບ​ພະອົງ ບໍ່​ແມ່ນ​ກັບ​ຮູບ​ປັ້ນ​ຫຼື​ຮູບ​ພາບ​ຊຶ່ງ​ບໍ່​ມີ​ຊີວິດ.—ອຸປະຍົກໜີ 20:4, 5.

ສາສະໜາ​ປອມ​ສອນ​ວ່າ​ເປັນ​ເລື່ອງ​ເໝາະ​ສົມ​ທີ່​ຈະ​ຂ້າ​ຜູ້​ອື່ນ​ໃນ​ເວລາ​ສົງຄາມ. ພະ​ເຍຊູ​ກ່າວ​ວ່າ​ເພື່ອນ​ຂອງ​ພະເຈົ້າ​ຈະ​ມີ​ຄວາມ​ຮັກ​ທ່າມກາງ​ພວກ​ເຂົາ. ເຮົາ​ບໍ່​ຂ້າ​ຄົນ​ທີ່​ເຮົາ​ຮັກ. (ໂຍຮັນ 13:35) ມັນ​ແມ່ນ​ການ​ຜິດ​ຄື​ກັນ​ສຳລັບ​ເຮົາ​ທີ່​ຈະ​ຂ້າ​ຄົນ​ບໍ່​ດີ. ເມື່ອ​ສັດຕູ​ຂອງ​ພະ​ເຍຊູ​ເຂົ້າ​ມາ​ເພື່ອ​ຈັບ​ພະອົງ ພະອົງ​ບໍ່​ໄດ້​ປ່ອຍ​ໃຫ້​ອັກຄະສາວົກ​ຂອງ​ພະອົງ​ຕໍ່​ສູ້​ເພື່ອ​ປົກ​ປ້ອງ​ພະອົງ.—ມັດທາຍ 26:51, 52.

ສາສະໜາ​ປອມ​ສອນ​ວ່າ​ຄົນ​ຊົ່ວ​ຮ້າຍ​ຈະ​ຖືກ​ຄວາມ​ທຸກ​ທໍລະມານ​ໃນ​ໄຟ​ນາລົກ. ແຕ່​ວ່າ​ຄຳພີ​ໄບເບິນ​ສອນ​ວ່າ​ບາບ​ນຳ​ໄປ​ສູ່​ຄວາມ​ຕາຍ. (ໂລມ 6:23) ພະ​ເຢໂຫວາ​ແມ່ນ​ພະເຈົ້າ​ແຫ່ງ​ຄວາມ​ຮັກ. ພະເຈົ້າ​ທີ່​ມີ​ຄວາມ​ຮັກ​ຈະ​ທໍລະມານ​ຜູ້​ຄົນ​ຕະຫຼອດ​ໄປ​ບໍ? ບໍ່​ແມ່ນ​ແນ່ນອນ! ໃນ​ອຸທິຍານ​ຈະ​ມີ​ພຽງ​ແຕ່​ສາສະໜາ​ດຽວ​ເທົ່າ​ນັ້ນ ສາສະໜາ​ທີ່​ພະ​ເຢໂຫວາ​ພໍ​ພະໄທ. (ຄຳປາກົດ 15:4) ທຸກ​ສາສະໜາ​ທີ່​ມີ​ພື້ນ​ຖານ​ຈາກ​ຄຳ​ຕົວະ​ຂອງ​ຊາຕານ​ຈະ​ໝົດ​ສິ້ນ​ໄປ.