ໃນຄຳພີໄບເບິນສະບັບພາສາດັ້ງເດີມ ມີການໃຊ້ຄຳພາສາເຫບເລີເຊໂອນ ແລະຄຳພາສາກະເລັກຮາເດສ ທີ່ມີຄວາມໝາຍຄືກັນຫຼາຍກວ່າ 70 ເທື່ອ. ທັງສອງຄຳນີ້ກ່ຽວຂ້ອງກັບຄວາມຕາຍ. ຄຳພີໄບເບິນບາງສະບັບແປສອງຄຳນີ້ວ່າ “ນາລົກ.” ການແປແບບນີ້ບໍ່ຖືກຕ້ອງ. ຄຳເຫຼົ່ານີ້ມີຄວາມໝາຍແທ້ໆວ່າແນວໃດ? ຂໍໃຫ້ສັງເກດວ່າມີການກ່າວເຖິງສອງຄຳນີ້ແນວໃດໃນຂໍ້ຄວາມຕ່າງໆຂອງຄຳພີໄບເບິນ.

ຜູ້ເທສະໜາປ່າວປະກາດ 9:10 ກ່າວວ່າ “ເຫດວ່າໃນບ່ອນທີ່ຕາບໍ່ເຫັນ [ເຊໂອນ] ທີ່ເຈົ້າໄປນັ້ນບໍ່ມີກິດຈະການ ບໍ່ມີຄວາມຄຶດ ບໍ່ມີວິຊາຄວາມຮູ້ ບໍ່ມີຄວາມປັນຍາ.” ນີ້ໝາຍຄວາມວ່າເຊໂອນ ໝາຍເຖິງບ່ອນຝັງສົບບ່ອນໃດບ່ອນໜຶ່ງສະເພາະທີ່ເຮົາຝັງສົບຂອງຄົນທີ່ເຮົາຮັກບໍ? ບໍ່ແມ່ນ. ເມື່ອກ່າວເຖິງບ່ອນຝັງສົບແບບນັ້ນ ຄຳພີໄບເບິນມັກໃຊ້ຄຳພາສາເຫບເລີແລະພາສາກະເລັກຄຳອື່ນ ບໍ່ແມ່ນຄຳເຊໂອນ ແລະຮາເດສ. (ຕົ້ນເດີມ 23:7-9; ມັດທາຍ 28:1) ນອກຈາກນັ້ນ ຄຳພີໄບເບິນບໍ່ໄດ້ໃຊ້ຄຳເຊໂອນ ສຳລັບບ່ອນຝັງສົບທີ່ມີຫຼາຍສົບຝັງໄວ້ນຳກັນເຊັ່ນ ບ່ອນຝັງສົບຂອງວົງຕະກູນ ຫຼືບ່ອນຝັງຫຼາຍສົບນຳກັນ.—ຕົ້ນເດີມ 49:30, 31.

ຄັນຊັ້ນເຊໂອນ ໝາຍເຖິງສະຖານທີ່ແບບໃດ? ພະຄຳຂອງພະເຈົ້າຊີ້ບອກວ່າເຊໂອນ ແລະຮາເດສ ບໍ່ໄດ້ໝາຍເຖິງແຕ່ບ່ອນຝັງສົບຂະໜາດໃຫຍ່ທີ່ຝັງສົບຄົນຈຳນວນຫຼາຍໄວ້ເທົ່ານັ້ນ. ຕົວຢ່າງ ເອຊາອີ 5:14 ຊີ້ບອກວ່າ “ບ່ອນທີ່ຕາບໍ່ເຫັນ [ເຊໂອນ] ໂລບມາກຂຶ້ນແລະອ້າປາກເຫຼືອກຳນົດ.” ເຖິງແມ່ນອາດເວົ້າໄດ້ວ່າເຊໂອນ ໄດ້ກືນຄົນຕາຍຈຳນວນນັບບໍ່ຖ້ວນໄປແລ້ວກໍຕາມ ແຕ່ເບິ່ງຄືວ່າເຊໂອນ ແຮ່ງຫິວຫຼາຍຂຶ້ນເລື້ອຍໆ. (ສຸພາສິດ 30:15, 16) ບໍ່ຄືກັບສະຖານທີ່ຝັງສົບຄົນຕາຍບ່ອນໃດບ່ອນໜຶ່ງແທ້ໆເຊິ່ງອາດຝັງສົບໄດ້ຈຳນວນຈຳກັດເທົ່ານັ້ນ ແຕ່ “ບ່ອນທີ່ຕາບໍ່ເຫັນ [ເຊໂອນ] . . . ບໍ່ຮູ້ອີ່ມ.” (ສຸພາສິດ 27:20) ນັ້ນຄືເຊໂອນ ບໍ່ມີວັນເຕັມ ແລະບໍ່ມີຂີດຈຳກັດ. ດ້ວຍເຫດນີ້ ເຊໂອນ ຫຼືຮາເດສ ຈຶ່ງບໍ່ແມ່ນສະຖານທີ່ແທ້ຕາມໂຕທີ່ຕັ້ງຢູ່ບ່ອນໃດບ່ອນໜຶ່ງສະເພາະ. ແທນທີ່ຈະເປັນແນວນັ້ນ ເຊໂອນ ແລະຮາເດສ ເປັນສະຖານທີ່ໃນລັກສະນະປຽບທຽບເຊິ່ງເປັນບ່ອນທີ່ມະນຸດສ່ວນຫຼາຍຫຼັບຢູ່ໃນຄວາມຕາຍ.

ຄຳສອນໃນຄຳພີໄບເບິນກ່ຽວກັບການຄືນມາຈາກຕາຍຊ່ວຍໃຫ້ເຮົາມີຄວາມເຂົ້າໃຈທີ່ຈະແຈ້ງຫຼາຍຂຶ້ນອີກໃນເລື່ອງຄວາມໝາຍຂອງເຊໂອນ ແລະຮາເດສ. ພະຄຳຂອງພະເຈົ້າລວມເອົາຄຳເຊໂອນ ແລະຮາເດສ ເຂົ້າກັບຄວາມຕາຍຊະນິດທີ່ຈະມີການຄືນມາ ຈາກຕາຍ. * (ໂຢບ 14:13; ກິດຈະການ 2:31; ຄຳປາກົດ 20:13) ພະຄຳຂອງພະເຈົ້າຍັງສະແດງໃຫ້ເຫັນວ່າຜູ້ທີ່ຢູ່ໃນເຊໂອນ ຫຼືຮາເດສ ນອກຈາກຈະມີຜູ້ຮັບໃຊ້ຂອງພະເຢໂຫວາແລ້ວ ຍັງລວມເອົາຜູ້ທີ່ບໍ່ໄດ້ຮັບໃຊ້ພະອົງນຳອີກ. (ຕົ້ນເດີມ 37:35; ຄຳເພງ 55:15) ດ້ວຍເຫດນັ້ນຄຳພີໄບເບິນຈຶ່ງສອນວ່າ “ທັງຜູ້ຊອບທຳແລະຜູ້ບໍ່ຊອບທຳຈະຄືນມາຈາກຕາຍ.”—ກິດຈະການ 24:15.