ບົດຄວາມສຶກສາທີ 2
ສັນລະເສີນພະເຢໂຫວາໃນການປະຊຸມ
“ຂ້ານ້ອຍຈະສັນລະເສີນພະອົງໃນທ່າມກາງພວກຊຸມນຸມ [“ໃນທີ່ປະຊຸມ,” ລ.ມ.]”—ເພງ. 22:22
ເພງ 59 ມາສັນລະເສີນພະເຢໂຫວາຮ່ວມກັນ
ໃຈຄວາມສຳຄັນ *
1. ດາວິດຮູ້ສຶກແນວໃດຕໍ່ພະເຢໂຫວາ ແລະນີ້ກະຕຸ້ນລາວໃຫ້ເຮັດຫຍັງ?
ກະສັດດາວິດຂຽນວ່າ: ‘ພະເຢໂຫວາຍິ່ງໃຫຍ່ແລະສົມຄວນຈະໄດ້ຄວາມສັນລະເສີນ.’ (ເພງ. 145:3) ດາວິດຮັກພະເຢໂຫວາ ແລະຄວາມຮັກນີ້ໄດ້ກະຕຸ້ນລາວໃຫ້ສັນລະເສີນພະອົງ “ໃນທ່າມກາງພວກຊຸມນຸມ [“ໃນທີ່ປະຊຸມ,” ລ.ມ.]” (ເພງ. 22:22; 40:5) ແນ່ນອນວ່າເຈົ້າເອງກໍຮັກພະເຢໂຫວາຄືກັນ ແລະເຫັນດີກັບຄຳເວົ້າຂອງດາວິດທີ່ວ່າ: “ໂອ້ພະເຢໂຫວາພະເຈົ້າແຫ່ງຍິດສະລາເອນປູ່ຂອງພວກຂ້ານ້ອຍ ຕັ້ງແຕ່ຄາວທັງປວງທີ່ກາຍແລ້ວແລະສືບໆໄປເປັນນິດ ພະອົງຈົ່ງມີຄວາມສັນລະເສີນ.”—1 ຂ່າວ. 29:10-13
2. (ກ) ເຮົາຈະສັນລະເສີນພະເຢໂຫວາໄດ້ແນວໃດ? (ຂ) ບາງຄົນອາດຮູ້ສຶກແນວໃດ ແລະເຮົາຈະທົບທວນເລື່ອງຫຍັງ?
2 ທຸກມື້ນີ້ ວິທີໜຶ່ງທີ່ເຮົາຈະສັນລະເສີນພະເຢໂຫວາໄດ້ກໍຄື ການອອກຄວາມຄິດເຫັນໃນການປະຊຸມ. ແຕ່ພີ່ນ້ອງບາງຄົນກໍຮູ້ສຶກວ່າເປັນເລື່ອງຍາກ. ເຂົາເຈົ້າຢາກອອກຄວາມຄິດເຫັນແຕ່ກໍຢ້ານ. ເຂົາເຈົ້າຈະເອົາຊະນະຄວາມຢ້ານນີ້ໄດ້ແນວໃດ? ມີຄຳແນະນຳຫຍັງແດ່ທີ່ຈະຊ່ວຍເຮົາທຸກຄົນໃຫ້ອອກຄວາມຄິດເຫັນທີ່ໃຫ້ກຳລັງໃຈ? ກ່ອນຈະຕອບຄຳຖາມເຫຼົ່ານີ້ ທຳອິດໃຫ້ເຮົາມາທົບທວນ 4 ເຫດຜົນຫຼັກທີ່ເຮົາຄວນອອກຄວາມຄິດເຫັນໃນການປະຊຸມ.
ເປັນຫຍັງເຮົາຈຶ່ງອອກຄວາມຄິດເຫັນໃນການປະຊຸມ
3-5. (ກ) ຕາມທີ່ອະທິບາຍໄວ້ໃນເຫບເລີ 13:15 ເປັນຫຍັງເຮົາຈຶ່ງອອກຄວາມຄິດເຫັນໃນການປະຊຸມ? (ຂ) ເຮົາຕ້ອງອອກຄວາມຄິດເຫັນແບບດຽວກັນບໍ? ຂໍໃຫ້ອະທິບາຍ.
3 ພະເຢໂຫວາໃຫ້ເຮົາທຸກຄົນມີສິດທິພິເສດທີ່ຈະສັນລະເສີນພະອົງ. (ເພງ. 119:108) ການອອກຄວາມຄິດເຫັນຂອງເຮົາຢູ່ການປະຊຸມເປັນສ່ວນໜຶ່ງຂອງ ‘ການຖວາຍຄຳສັນລະເສີນພະເຈົ້າ.’ (ອ່ານເຫບເລີ 13:15) ພະເຢໂຫວາຮຽກຮ້ອງໃຫ້ເຮົາທຸກຄົນຖວາຍຄຳສັນລະເສີນ ຫຼືອອກຄວາມຄິດເຫັນໃນແບບດຽວກັນບໍ? ບໍ່ ພະອົງບໍ່ໄດ້ຕ້ອງການແບບນັ້ນ!
4 ພະເຢໂຫວາຮູ້ວ່າເຮົາມີຄວາມສາມາດແລະສະພາບການແຕກຕ່າງກັນ ພະອົງເຫັນຄຸນຄ່າສິ່ງທີ່ເຮົາສາມາດຖວາຍໃຫ້ພະອົງ. ຂໍໃຫ້ຄິດເຖິງເຄື່ອງບູຊາຊະນິດຕ່າງໆທີ່ພະອົງຍອມຮັບຈາກຊາວອິດສະລາແອນ. ບາງຄົນສາມາດໃຫ້ແກະຫຼືແບ້ໄດ້ ແຕ່ຄົນທຸກຍາກກໍອາດຈະໃຫ້ “ນົກເຂົາ 2 ຕົວຫຼືລູກນົກກາງແກ 2 ຕົວ” ແລະຖ້າບໍ່ສາມາດໃຫ້ນົກ 2 ຕົວ ພະອົງກໍອະນຸຍາດໃຫ້ເອົາ “ແປ້ງລະອຽດ 1 ສ່ວນ 10” ມາຖວາຍ. (ເລວີ. 5:7, 11) ເຖິງວ່າແປ້ງຈະລາຄາຖືກ ແຕ່ຖ້າເປັນ “ແປ້ງລະອຽດ” ພະອົງກໍເຫັນຄຸນຄ່າຂອງຖວາຍນັ້ນ.
5 ທຸກມື້ນີ້ພະເຢໂຫວາຍັງຮູ້ສຶກຄືເກົ່າ. ເມື່ອເຮົາອອກຄວາມຄິດເຫັນ ພະອົງກໍບໍ່ໄດ້ຄາດໝາຍວ່າເຮົາຕ້ອງຊ່າງເວົ້າຄືກັບອະໂປໂລ ຫຼືເວົ້າໂນ້ມນ້າວໃຈເກັ່ງຄືໂປໂລ. (ກິດ. 18:24; 26:28) ພະອົງຢາກໃຫ້ເຮົາອອກຄວາມຄິດເຫັນໃຫ້ດີທີ່ສຸດເທົ່າທີ່ເຮົາເຮັດໄດ້. ຂໍໃຫ້ຄິດເຖິງແມ່ໝ້າຍທີ່ບໍລິຈາກເງິນ 2 ຫຼຽນນ້ອຍໆ. ພະອົງເຫັນວ່າລາວມີຄ່າຫຼາຍເພາະລາວໃຫ້ສິ່ງທີ່ດີທີ່ສຸດກັບພະອົງ.—ລືກາ 21:1-4
ການອອກຄວາມຄິດເຫັນເປັນປະໂຫຍດຕໍ່ເຮົາແລະຄົນອື່ນໆໃນປະຊາຄົມ (ເບິ່ງຂໍ້ 6-7) *
6. (ກ) ຕາມທີ່ຂຽນໄວ້ເຫບເລີ 10:24, 25 ເຮົາອາດຮູ້ສຶກແນວໃດເມື່ອໄດ້ຟັງຄຳຕອບຂອງຄົນອື່ນ? (ຂ) ເຈົ້າຈະສະແດງໃຫ້ເຫັນແນວໃດວ່າເຈົ້າເຫັນຄຸນຄ່າຄຳຕອບທີ່ໃຫ້ກຳລັງໃຈເຈົ້າ?
6 ເຮົາໃຫ້ກຳລັງໃຈຄົນອື່ນເມື່ອເຮົາອອກຄວາມຄິດເຫັນ. (ອ່ານເຫບເລີ 10:24, 25) ເຮົາທຸກຄົນມີຄວາມສຸກທີ່ໄດ້ຍິນຄວາມຄິດເຫັນຫຼາກຫຼາຍໃນການປະຊຸມ. ເຮົາມັກເມື່ອໄດ້ຍິນເດັກນ້ອຍຕອບແບບງ່າຍໆແລະຈິງໃຈ. ເຮົາໄດ້ຮັບກຳລັງໃຈຫຼາຍເມື່ອບາງຄົນອອກຄວາມຄິດເຫັນແບບຕື່ນເຕັ້ນຈາກສິ່ງໃໝ່ໆທີ່ເຂົາເຈົ້າໄດ້ຄົ້ນພົບ. ເຮົາປະທັບໃຈຄົນທີ່ “ກ້າ” ອອກຄວາມຄິດເຫັນ ເຖິງວ່າເຂົາເຈົ້າຈະອາຍຫຼືຫາກໍຮຽນພາສາໃໝ່. (1 ເທ. 2:2) ເຮົາຈະສະແດງໃຫ້ເຫັນແນວໃດວ່າເຮົາເຫັນຄຸນຄ່າຄວາມພະຍາຍາມຂອງເຂົາເຈົ້າ? ໂດຍຂອບໃຈເຂົາເຈົ້າຫຼັງຈາກເລີກການປະຊຸມ ແລະໂດຍເຮົາເອງກໍອອກຄວາມຄິດເຫັນ. ເມື່ອເຮົາເຮັດແບບນັ້ນ ເຮົາບໍ່ພຽງແຕ່ໄດ້ຮັບກຳລັງໃຈ ແຕ່ເຮົາຍັງໃຫ້ກຳລັງໃຈຄົນອື່ນນຳ.—ໂລມ 1:11, 12
7. ເຮົາໄດ້ຮັບປະໂຫຍດແນວໃດເມື່ອເຮົາອອກຄວາມຄິດເຫັນ?
7 ເຮົາໄດ້ຮັບປະໂຫຍດເມື່ອເຮົາອອກຄວາມຄິດເຫັນ. (ເອຊາ. 48:17) ເຮົາໄດ້ຮັບປະໂຫຍດແນວໃດ? ທຳອິດ ຖ້າເຮົາວາງແຜນທີ່ຈະຕອບໃນການປະຊຸມ ເຮົາຈະຖືກກະຕຸ້ນເປັນພິເສດໃຫ້ກຽມຕົວຢ່າງດີສຳລັບການປະຊຸມ. ເມື່ອເຮົາເຮັດແບບນັ້ນ ເຮົາກໍຈະເຂົ້າໃຈພະຄຳຂອງພະເຈົ້າຫຼາຍຂຶ້ນ ແລະແຮ່ງເຮົາເຂົ້າໃຈຫຼາຍຂຶ້ນ ເຮົາກໍແຮ່ງຮູ້ຈັກເອົາໄປນຳໃຊ້ໃນຊີວິດຫຼາຍຂຶ້ນ. ສອງ ເຮົາຈະມີຄວາມສຸກຫຼາຍຂຶ້ນເມື່ອເຮົາໄດ້ມີສ່ວນຮ່ວມ. ສາມ ຍ້ອນເຮົາໃຊ້ຄວາມພະຍາຍາມໃນການກຽມເພື່ອຈະອອກຄວາມຄິດເຫັນຈຶ່ງເຮັດໃຫ້ເຮົາຈື່ສິ່ງທີ່ເຮົາຕອບ ເຖິງວ່າຈະຈົບການປະຊຸມໄປແລ້ວ.
8-9. (ກ) ຕາມທີ່ເປີດເຜີຍໃນມາລາກີ 3:16 ເຈົ້າຄິດວ່າພະເຢໂຫວາຮູ້ສຶກແນວໃດເມື່ອເຮົາອອກຄວາມຄິດເຫັນ? (ຂ) ແຕ່ບາງຄົນຍັງບໍ່ກ້າເຮັດຫຍັງ?
8 ພະເຢໂຫວາພໍໃຈເຮົາເມື່ອເຮົາສະແດງຄວາມເຊື່ອ. ເຮົາໝັ້ນໃຈໄດ້ວ່າພະເຢໂຫວາຟັງແລະເຫັນຄຸນຄ່າທີ່ເຮົາພະຍາຍາມອອກຄວາມຄິດເຫັນໃນການປະຊຸມ. (ອ່ານມາລາກີ 3:16) ພະອົງສະແດງໃຫ້ເຫັນວ່າເຫັນຄຸນຄ່າໂດຍອວຍພອນເຮົາເມື່ອເຮົາພະຍາຍາມຢ່າງເຕັມທີເພື່ອເຮັດໃຫ້ພະອົງພໍໃຈ.—ມລກີ. 3:10
9 ເຫັນໄດ້ແຈ້ງວ່າ ເຮົາມີເຫດຜົນທີ່ດີຫຼາຍຢ່າງທີ່ຈະອອກຄວາມຄິດເຫັນໃນການປະຊຸມ. ແຕ່ບາງຄົນກໍຍັງບໍ່ກ້າທີ່ຈະຍົກມື. ຖ້າເຈົ້າຮູ້ສຶກແບບນັ້ນ ຢ່າຟ້າວທໍ້ໃຈ. ໃຫ້ເຮົາມາເບິ່ງບາງຫຼັກການໃນຄຳພີໄບເບິນ ຕົວຢ່າງຂອງບາງຄົນ ແລະຄຳແນະນຳບາງຢ່າງທີ່ຈະຊ່ວຍເຮົາທຸກຄົນໃຫ້ພະຍາຍາມອອກຄວາມຄິດເຫັນຫຼາຍຂຶ້ນ.
ເອົາຊະນະຄວາມຢ້ານ
10. (ກ) ພວກເຮົາຫຼາຍຄົນຢ້ານຫຍັງ? (ຂ) ເປັນຫຍັງການທີ່ເຮົາບໍ່ກ້າຕອບຈຶ່ງເປັນສັນຍານທີ່ດີ?
10 ແມ່ນແຕ່ຄິດວ່າຈະຍົກມືຂຶ້ນ ເຈົ້າກໍຮູ້ສຶກກັງວົນແລະຢ້ານທຸກຄັ້ງບໍ? ຖ້າແມ່ນ ເຈົ້າກໍບໍ່ແມ່ນຄົນດຽວທີ່ຮູ້ສຶກແບບນັ້ນ. ຄວາມຈິງຄືພວກເຮົາສ່ວນຫຼາຍຮູ້ສຶກຢ້ານເມື່ອອອກຄວາມຄິດເຫັນ. ກ່ອນຈະເອົາຊະນະຄວາມຮູ້ສຶກນີ້ ເຈົ້າຕ້ອງຮູ້ສາເຫດທີ່ເຈົ້າຢ້ານ. ເຈົ້າຢ້ານລືມຄຳຕອບບໍ ຫຼືຢ້ານຕອບຜິດ? ເຈົ້າຢ້ານວ່າຈະຕອບບໍ່ໄດ້ດີເທົ່າຄົນອື່ນບໍ? ທີ່ຈິງ ການຢ້ານແບບນັ້ນເປັນສັນຍານທີ່ດີ ເພາະສະແດງໃຫ້ເຫັນວ່າເຈົ້າເປັນຄົນຖ່ອມຕົວແລະເບິ່ງວ່າຄົນອື່ນດີກວ່າເຈົ້າ. ພະເຢໂຫວາຮັກຄົນທີ່ມີຄຸນລັກສະນະແບບນັ້ນ. (ເພງ. 138:6; ຟີລິບ 2:3) ແຕ່ພະອົງກໍຍັງຢາກໃຫ້ເຈົ້າສັນລະເສີນພະອົງແລະໃຫ້ກຳລັງໃຈພີ່ນ້ອງນຳ. (1 ເທ. 5:11) ຂໍໃຫ້ໝັ້ນໃຈວ່າພະອົງຮັກເຈົ້າແລະຈະໃຫ້ເຈົ້າກ້າຫານ.
11. ມີຂໍ້ເຕືອນໃຈຫຍັງແດ່ຈາກຄຳພີໄບເບິນທີ່ຈະຊ່ວຍເຮົາ?
11 ຂໍໃຫ້ຄິດເຖິງຂໍ້ເຕືອນໃຈບາງຢ່າງໃນຄຳພີໄບເບິນ. ຄຳພີໄບເບິນບອກວ່າເຮົາທຸກຄົນຜິດພາດທັງຄຳເວົ້າຫຼືວິທີເວົ້າ. (ຢໂກ. 3:2) ພະເຢໂຫວາແລະພີ່ນ້ອງຄົນອື່ນບໍ່ໄດ້ຄາດໝາຍວ່າເຮົາຕ້ອງສົມບູນແບບ. (ເພງ. 103:12-14) ເຂົາເຈົ້າເປັນຄອບຄົວດຽວກັບເຮົາແລະກໍຮັກເຮົາ. (ມໂກ. 10:29, 30; ໂຢ. 13:35) ເຂົາເຈົ້າເຂົ້າໃຈວ່າບາງເທື່ອເຮົາກໍຕອບຜິດ.
12-13. ເຮົາໄດ້ຮຽນຮູ້ຫຍັງຈາກຕົວຢ່າງຂອງເນເຫມີແລະໂຢນາ?
12 ຂໍໃຫ້ຄິດເຖິງບາງຕົວຢ່າງໃນຄຳພີໄບເບິນທີ່ຈະຊ່ວຍເຈົ້າໃຫ້ເອົາຊະນະຄວາມຢ້ານ. ຕົວຢ່າງຂອງເນເຫມີ. ລາວຮັບໃຊ້ໃນວັງຂອງກະສັດອົງໜຶ່ງທີ່ມີອຳນາດຫຼາຍ. ເນເຫມີຮູ້ສຶກເສົ້າໃຈຫຼາຍຍ້ອນໄດ້ຍິນວ່າກຳແພງແລະປະຕູເມືອງເຢຣຶຊາເລມພັງລົງແລ້ວ. (ນເຫ. 1:1-4) ລອງນຶກພາບເບິ່ງວ່າລາວຈະກັງວົນແລະຢ້ານຫຼາຍສ່ຳໃດ ເມື່ອກະສັດບອກໃຫ້ລາວອະທິບາຍເຫດຜົນວ່າເປັນຫຍັງລາວຈຶ່ງເສົ້າໃຈແທ້! ເນເຫມີໄດ້ອະທິດຖານທັນທີແລ້ວກໍຕອບກະສັດ. ຜົນກໍຄື ກະສັດໄດ້ເຮັດຫຼາຍຢ່າງເພື່ອຊ່ວຍປະຊາຊົນຂອງພະເຈົ້າ. (ນເຫ. 2:1-8) ນອກຈາກນັ້ນ ລອງຄິດເຖິງຕົວຢ່າງຂອງໂຢນາ. ເມື່ອພະເຢໂຫວາບອກໃຫ້ລາວໄປປະກາດກັບຊາວນີນີເວ ລາວຢ້ານຫຼາຍຈົນໜີໄປອີກທາງໜຶ່ງ. (ໂຢນາ 1:1-3) ແຕ່ໂຢນາກໍເຮັດວຽກມອບໝາຍນັ້ນສຳເລັດຍ້ອນພະເຢໂຫວາຊ່ວຍລາວ. ສິ່ງທີ່ໂຢນາເວົ້າກັບຊາວນີນີເວກໍຊ່ວຍເຂົາເຈົ້າຄືກັນ. (ໂຢນາ 3:5-10) ຈາກຕົວຢ່າງຂອງເນເຫມີ ເຮົາໄດ້ຮຽນຮູ້ຄວາມສຳຄັນຂອງການອະທິດຖານກ່ອນຈະໃຫ້ຄຳຕອບ ແລະຈາກຕົວຢ່າງຂອງໂຢນາເຮົາໄດ້ຮຽນຮູ້ວ່າພະເຢໂຫວາຈະຊ່ວຍເຮົາເຖິງວ່າເຮົາອາດຈະຢ້ານຫຼາຍກໍຕາມ. ໃນຕົວຈິງແລ້ວ ບໍ່ມີໃຜໃນປະຊາຄົມທີ່ເປັນຕາຢ້ານສ່ຳຊາວນີນີເວ.
13 ມີຄຳແນະນຳຫຍັງທີ່ຈະຊ່ວຍເຮົາອອກຄວາມຄິດເຫັນທີ່ໃຫ້ກຳລັງໃຈໃນການປະຊຸມ? ໃຫ້ເຮົາພິຈາລະນາຄຳແນະນຳບາງຢ່າງນຳກັນ.
14. ເປັນຫຍັງເຮົາຄວນກຽມຢ່າງດີສຳລັບການປະຊຸມ ແລະເຮົາອາດຈະກຽມຕອນໃດໄດ້ແດ່?
14 ກຽມສຳລັບການປະຊຸມທຸກຄັ້ງ. ເມື່ອເຈົ້າກຽມລ່ວງໜ້າຢ່າງດີ ເຈົ້າຈະໝັ້ນໃຈຫຼາຍຂຶ້ນທີ່ຈະອອກຄວາມຄິດເຫັນ. (ສຸພາ. 21:5) ແນ່ນອນວ່າຕາຕະລາງວຽກປະຈຳວັນຂອງແຕ່ລະຄົນບໍ່ຄືກັນ. ພີ່ນ້ອງແອລອຍເຊິ່ງເປັນແມ່ໝ້າຍອາຍຸ 80 ປາຍປີກຽມຫໍສັງເກດການ ໃນຕອນຕົ້ນຂອງອາທິດ. ລາວບອກວ່າ: “ເມື່ອຂ້ອຍໄດ້ກຽມກ່ອນ ຂ້ອຍຈະມີຄວາມສຸກກັບການປະຊຸມຫຼາຍກວ່າ.” ພີ່ນ້ອງຈອຍທີ່ເຮັດວຽກເຕັມເວລາໄດ້ຈັດເວລາວັນເສົາເພື່ອກຽມຫໍສັງເກດການ ລາວບອກວ່າ: “ຂ້ອຍມັກຈະຈື່ໄດ້ດີ ເມື່ອກຽມຕອນໃກ້ຈະຮອດມື້ປະຊຸມ.” ພີ່ນ້ອງໄອ້ເຊິ່ງເປັນຜູ້ເຖົ້າແກ່ແລະໄພໂອເນຍທີ່ເຮັດວຽກຢ່າງໜັກບອກວ່າ: “ສຳລັບຂ້ອຍດີທີ່ສຸດ ແມ່ນແບ່ງກຽມເທື່ອລະໜ້ອຍໃນລະຫວ່າງອາທິດ ແທນທີ່ຈະກຽມທັງໝົດບາດດຽວ.”
15. ເຈົ້າຈະເຮັດແນວໃດເພື່ອຈະກຽມຢ່າງດີສຳລັບການປະຊຸມ?
15 ເພື່ອຈະກຽມຢ່າງດີສຳລັບການປະຊຸມ ເຮົາຕ້ອງເຮັດແນວໃດ? ກ່ອນຈະເລີ່ມກຽມແຕ່ລະຄັ້ງ ໃຫ້ອະທິດຖານຂໍພະລັງບໍລິສຸດຈາກພະເຢໂຫວາ. (ລືກາ 11:13; 1 ໂຢ. 5:14) ຈາກນັ້ນ ໃຊ້ເວລາບໍ່ເທົ່າໃດນາທີເບິ່ງພາບລວມຂອງບົດຄວາມ ເຊັ່ນ: ເບິ່ງຫົວຂໍ້ຫຼັກ ຫົວຂໍ້ຍ່ອຍ ຮູບພາບ ແລະຂອບຕ່າງໆ. ເມື່ອກຽມແຕ່ລະຂໍ້ໃຫ້ອ່ານຂໍ້ຄຳພີທີ່ອ້າງອີງເທົ່າທີ່ເປັນໄປໄດ້. ຈາກນັ້ນ ໃຫ້ຄິດຕຶກຕອງກ່ຽວກັບເນື້ອໃນນັ້ນໂດຍສະເພາະຈຸດທີ່ເຮົາຈະຕອບ. ແຮ່ງເຈົ້າກຽມຢ່າງດີ ເຈົ້າກໍແຮ່ງຈະໄດ້ຮັບປະໂຫຍດແລະກໍຈະງ່າຍຂຶ້ນທີ່ເຈົ້າຈະອອກຄວາມຄິດເຫັນ.—2 ໂກ. 9:6
16. ມີເຄື່ອງມືຫຍັງແດ່ທີ່ເຈົ້າຈະໃຊ້ເພື່ອກຽມສຳລັບການປະຊຸມ ແລະເຈົ້າໃຊ້ເຄື່ອງມືນີ້ແນວໃດ?
16 ຖ້າເປັນໄປໄດ້ ໃຫ້ໃຊ້ເຄື່ອງມືຕ່າງໆທີ່ມີໃນພາສາທີ່ເຈົ້າຮູ້. ພະເຢໂຫວາຈັດໃຫ້ມີເຄື່ອງມືຕ່າງໆໂດຍທາງອົງການຂອງພະອົງ ເຊັ່ນ: ແອັບJW Library® ຊ່ວຍເຮົາໃຫ້ດາວໂຫຼດປຶ້ມທີ່ເຮົາຈະສຶກສາໃສ່ໃນແທັບເລັດຫຼືໂທລະສັບມືຖື. ດັ່ງນັ້ນ ເຮົາຈຶ່ງສາມາດກຽມ ຫຼືຢ່າງໜ້ອຍກໍໄດ້ອ່ານຫຼືຟັງບົດຄວາມຢູ່ໃສຫຼືເວລາໃດກໍໄດ້. ບາງຄົນໃຊ້ແອັບນີ້ເພື່ອສຶກສາຄົ້ນຄວ້າຕອນທີ່ພັກກິນເຂົ້າສວຍຢູ່ບ່ອນເຮັດວຽກ ຢູ່ໂຮງຮຽນ ຫຼືຕອນທີ່ເດີນທາງ. ນອກຈາກນັ້ນກໍຍັງມີຫ້ອງສະໝຸດວັອດທາວເວີ (ພາສາອັງກິດ) ແລະຫ້ອງສະໝຸດອອນລາຍຂອງວັອດທາວເວີ ເຊິ່ງເຮັດໃຫ້ງ່າຍຂຶ້ນທີ່ເຮົາຈະສຶກສາຄົ້ນຄວ້າຈຸດຕ່າງໆຕື່ມອີກ..
ເຈົ້າກຽມສຳລັບການປະຊຸມຕອນໃດ? (ເບິ່ງຂໍ້ 14-16) *
17. (ກ) ເປັນຫຍັງການກຽມຄຳຕອບໄວ້ຫຼາຍໆຈຶ່ງດີ? (ຂ) ເຈົ້າໄດ້ຮຽນຫຍັງຈາກວິດີໂອມາເປັນໝູ່ກັບພະເຢໂຫວານຳກັນ—ກຽມຄຳຕອບຂອງລູກ?
17 ຖ້າເປັນໄປໄດ້ ໃຫ້ກຽມຄຳຕອບໄວ້ຫຼາຍໆ. ຍ້ອນຫຍັງ? ຍ້ອນເຈົ້າອາດຈະບໍ່ຖືກເລືອກເມື່ອຍົກມືຂຶ້ນ. ພີ່ນ້ອງຄົນອື່ນໆອາດຍົກມືພ້ອມກັນກັບເຈົ້າແລະຜູ້ນຳສ່ວນອາດຈະເລືອກຄົນອື່ນ. ເພື່ອຈະໃຫ້ການປະຊຸມຈົບກົງເວລາ ຜູ້ນຳສ່ວນອາດຈະກຳນົດວ່າຄຳຖາມໜຶ່ງຈະໃຫ້ຕອບຈັກຄົນ. ດັ່ງນັ້ນ ຢ່າຟ້າວຄຽດຫຼືທໍ້ໃຈທີ່ຜູ້ນຳສ່ວນບໍ່ໄດ້ເລືອກເຈົ້າໃນໄລຍະທຳອິດ. ຖ້າເຈົ້າກຽມຄຳຕອບໄວ້ຫຼາຍໆ ເຈົ້າກໍຍັງມີໂອກາດທີ່ຈະໄດ້ຕອບ. ສິ່ງໜຶ່ງທີ່ເຈົ້າກຽມສຳລັບການປະຊຸມແມ່ນການອ່ານຂໍ້ຄຳພີ ແຕ່ຖ້າເຈົ້າເຮັດໄດ້ກໍໃຫ້ກຽມຄຳຕອບເປັນຄຳເວົ້າຂອງຕົວເອງ. *
18. ເປັນຫຍັງຄວນຕອບແບບສັ້ນກະທັດຮັດ?
18 ໃຫ້ຕອບສັ້ນໆ. ສ່ວນຫຼາຍແລ້ວຄຳຕອບທີ່ສັ້ນກະທັດຮັດແລະເຂົ້າໃຈງ່າຍເປັນຄຳຕອບທີ່ໃຫ້ກຳລັງໃຈຫຼາຍທີ່ສຸດ. ດັ່ງນັ້ນ ໃຫ້ພະຍາຍາມຕອບສັ້ນໆບໍ່ເກີນ 30 ວິນາທີ. (ສຸພາ. 10:19; 15:23) ຖ້າເຈົ້າເຂົ້າຮ່ວມການປະຊຸມມາຫຼາຍປີແລ້ວ ແຮ່ງເປັນເລື່ອງສຳຄັນທີ່ເຈົ້າຈະວາງຕົວຢ່າງທີ່ດີໂດຍຕອບສັ້ນໆ. ແຕ່ຖ້າເຈົ້າຕອບແບບຊັບຊ້ອນແລະໃຊ້ເວລາຫຼາຍນາທີ ຄົນອື່ນອາດຈະຮູ້ສຶກທໍ້ໃຈວ່າເຂົາເຈົ້າບໍ່ສາມາດຕອບໄດ້ດີເທົ່າເຈົ້າ. ນອກຈາກນັ້ນ ຄຳຕອບທີ່ສັ້ນໆຈະເຮັດໃຫ້ຫຼາຍຄົນມີໂອກາດໄດ້ຕອບ. ໂດຍສະເພາະຖ້າເຈົ້າຕອບເປັນຜູ້ທຳອິດ ໃຫ້ຕອບແບບງ່າຍໆແລະກົງຈຸດ. ຢ່າຕອບແບບກວມລວມທຸກຈຸດ. ຫຼັງຈາກທີ່ຄົນອື່ນຕອບແນວຄິດຫຼັກແລ້ວ ເຈົ້າກໍອາດຈະຕອບເສີມຈຸດອື່ນໆໄດ້.—ເບິ່ງຂອບ “ ຂ້ອຍຈະອອກຄວາມຄິດເຫັນແບບໃດໄດ້ແດ່?”
19. ຜູ້ນຳສ່ວນສາມາດຊ່ວຍເຈົ້າໄດ້ແນວໃດ ແຕ່ເຈົ້າຕ້ອງເຮັດຫຍັງ?
19 ບອກຜູ້ນຳສ່ວນໃຫ້ຮູ້ວ່າເຈົ້າຢາກຕອບຂໍ້ໃດເປັນພິເສດ. ຖ້າເຈົ້າເລືອກເຮັດແບບນີ້ ເຈົ້າກໍຄວນບອກຜູ້ນຳສ່ວນລ່ວງໜ້າກ່ອນການປະຊຸມເລີ່ມ. ເມື່ອຮອດຂໍ້ທີ່ຈະຕອບກໍໃຫ້ຮີບຍົກມືສູງໆເພື່ອຜູ້ນຳສ່ວນຈະເຫັນເຈົ້າ.
20. ການປະຊຸມປະຈຳປະຊາຄົມປຽບຄືກັບການກິນເຂົ້າຊຸມກັນກັບໝູ່ທີ່ຮັກແພງແນວໃດ?
20 ໃຫ້ເບິ່ງການປະຊຸມວ່າເປັນຄືກັບການກິນເຂົ້າຊຸມກັນກັບໝູ່ທີ່ຮັກແພງ. ໃຫ້ນຶກພາບວ່າເຈົ້າຖືກເຊີນໃຫ້ໄປກິນເຂົ້າຊຸມກັນໃນປະຊາຄົມ ແລະຖືກຂໍໃຫ້ເຮັດອາຫານເຍື່ອງໜຶ່ງທີ່ງ່າຍໆໄປ ເຈົ້າຈະເຮັດແນວໃດ? ເຈົ້າອາດຮູ້ສຶກກັງວົນໜ້ອຍໜຶ່ງ ແຕ່ເຈົ້າກໍຈະເຮັດໃຫ້ດີທີ່ສຸດເພື່ອທີ່ທຸກຄົນຈະມັກ. ພະເຢໂຫວາເປັນເຈົ້າພາບ ພະອົງຈັດໃຫ້ເຮົາມີສິ່ງດີໆຫຼາຍຢ່າງເຕັມໂຕະເພື່ອເຮົາຢູ່ທີ່ການປະຊຸມ. (ເພງ. 23:5; ມັດ. 24:45) ພະອົງດີໃຈເມື່ອເຮົາເອົາຂອງຂວັນທີ່ງ່າຍໆມາ ແຕ່ເປັນຂອງຂວັນທີ່ດີທີ່ສຸດທີ່ເຮົາໃຫ້ໄດ້. ດັ່ງນັ້ນ ໃຫ້ກຽມຢ່າງດີແລະຕອບໃຫ້ຫຼາຍທີ່ສຸດເທົ່າທີ່ເຮັດໄດ້. ການເຮັດແບບນັ້ນ ເຈົ້າບໍ່ພຽງແຕ່ກິນອາຫານຢູ່ໂຕະຂອງພະເຢໂຫວາ ແຕ່ເຈົ້າຍັງຈະໃຫ້ຂອງຂວັນກັບພີ່ນ້ອງໃນປະຊາຄົມນຳອີກ.
ເພງ 2 ຊື່ຂອງພະອົງຄືເຢໂຫວາ
^ ຂໍ້ 5 ຄືກັບດາວິດຜູ້ຂຽນຄຳເພງ ເຮົາທຸກຄົນຮັກພະເຢໂຫວາແລະມີຄວາມສຸກທີ່ໄດ້ສັນລະເສີນພະອົງ. ໂອກາດໜຶ່ງທີ່ພິເສດທີ່ຈະສະແດງວ່າເຮົາຮັກພະອົງຄື ການອອກຄວາມຄິດເຫັນຢູ່ການປະຊຸມ. ແຕ່ພວກເຮົາບາງຄົນອາດຮູ້ສຶກວ່າການອອກຄວາມຄິດເຫັນໃນການປະຊຸມເປັນເລື່ອງຍາກຫຼາຍ. ຖ້າເຈົ້າເປັນແບບນັ້ນ ບົດຄວາມນີ້ຈະຊ່ວຍເຈົ້າໃຫ້ເຂົ້າໃຈວ່າເປັນຫຍັງເຈົ້າບໍ່ກ້າອອກຄວາມຄິດເຫັນ ແລະຊ່ວຍເຈົ້າໃຫ້ເອົາຊະນະຄວາມຢ້ານນັ້ນ.
^ ຂໍ້ 17 ເບິ່ງວິດີໂອມາເປັນໝູ່ກັບພະເຢໂຫວານຳກັນ—ກຽມຄຳຕອບຂອງລູກ ໃນຄຳສອນຂອງຄຳພີໄບເບິນ > ເດັກ (ບໍ່ມີໃນພາສາລາວ)
^ ຂໍ້ 63 ຄຳອະທິບາຍຮູບພາບ: ພີ່ນ້ອງໃນປະຊາຄົມໜຶ່ງມີຄວາມສຸກທີ່ໄດ້ອອກຄວາມຄິດເຫັນໃນການສຶກສາຫໍສັງເກດການ.
^ ຂໍ້ 65 ຄຳອະທິບາຍຮູບພາບ: ພີ່ນ້ອງບາງຄົນໃນປະຊາຄົມທີ່ສຶກສາຫໍສັງເກດການ ໃນຮູບຕອນຕົ້ນນັ້ນ. ເຂົາເຈົ້າຈັດເວລາໄວ້ເພື່ອກຽມສຳລັບການປະຊຸມ ເຖິງວ່າຈະຢູ່ໃນສະພາບການແຕກຕ່າງກັນ.
