ເຈົ້າເບິ່ງເລື່ອງຄວາມຍຸຕິທຳຄືກັບພະເຢໂຫວາບໍ?
“ເຮົາຈະປ່າວປະກາດນາມຊື່ແຫ່ງພະເຢໂຫວາ . . . ພະເຈົ້າອົງສັດຊື່ ແລະໃນພະອົງບໍ່ມີການຊົ່ວຮ້າຍ [“ຍຸຕິທຳສະເໝີ,” ລ.ມ.].”—ພະບັນຍັດ 32:3, 4
ເພງ: 110, 2
1, 2. (ກ) ນາບອດແລະລູກຊາຍປະສົບກັບຄວາມບໍ່ຍຸຕິທຳຫຍັງ? (ຂ) ໃນບົດຄວາມນີ້ເຮົາຈະຮຽນກ່ຽວກັບສອງຄຸນລັກສະນະຫຍັງແດ່?
ຄົນຊົ່ວສອງຄົນໄດ້ໃສ່ຮ້າຍຊາຍຄົນໜຶ່ງວ່າເຮັດຜິດຮ້າຍແຮງ. ເຂົາເຈົ້າເວົ້າຕົວະ. ແຕ່ຜູ້ຊາຍຄົນນັ້ນຖືກຕັດສິນວ່າມີຄວາມຜິດແລະຈະຖືກປະຫານຊີວິດ. ໃຫ້ນຶກພາບວ່າຄົນທີ່ຮັກຄວາມຍຸຕິທຳຈະຮູ້ສຶກແນວໃດເມື່ອເຫັນຊາຍບໍລິສຸດຄົນນີ້ແລະພວກລູກຊາຍຂອງລາວຖືກຄວ່າງຫີນໃສ່ຈົນຕາຍ! ເລື່ອງນີ້ບໍ່ແມ່ນນິຍາຍ. ແຕ່ເປັນເລື່ອງທີ່ເກີດຂຶ້ນແທ້ໆກັບນາບອດເຊິ່ງເປັນຜູ້ຮັບໃຊ້ທີ່ສັດຊື່ຂອງພະເຢໂຫວາ ລາວມີຊີວິດຕອນກະສັດອາກາບປົກຄອງອິດສະລາແອນ.—1 ກະສັດ 21:11-13; 2 ກະສັດ 9:26
2 ໃນບົດຄວາມນີ້ເຮົາຈະຮຽນສິ່ງທີ່ເກີດຂຶ້ນກັບນາບອດ. ນອກຈາກນັ້ນ ເຮົາຍັງຈະຮຽນເລື່ອງຄວາມຜິດພາດຮ້າຍແຮງຂອງຜູ້ເຖົ້າແກ່ຄົນໜຶ່ງຢູ່ປະຊາຄົມຄລິດສະຕຽນໃນສະຕະວັດທຳອິດ. ສອງຕົວຢ່າງນີ້ຈະຊ່ວຍເຮົາໃຫ້ເຫັນວ່າ ຖ້າເຮົາຢາກເບິ່ງເລື່ອງຄວາມຍຸຕິທຳຄືກັບພະເຢໂຫວາ ເຮົາຕ້ອງມີຄວາມຖ່ອມແລະເຕັມໃຈໃຫ້ອະໄພ.
ຄວາມບໍ່ຍຸຕິທຳທີ່ໂຫດຮ້າຍ
3, 4. ນາບອດເປັນຄົນແນວໃດ ແລະເປັນຫຍັງລາວຈຶ່ງບໍ່ຂາຍສວນອະງຸ່ນໃຫ້ກະສັດອາກາບ?
3 ນາບອດສັດຊື່ຕໍ່ພະເຢໂຫວາໃນຂະນະທີ່ຊາວອິດສະລາແອນສ່ວນຫຼາຍເຮັດຕາມຕົວຢ່າງທີ່ບໍ່ດີຂອງກະສັດອາກາບແລະເມຍຂອງລາວ ລາຊີນີເຢຊາເບນຜູ້ທີ່ຊົ່ວຮ້າຍ. ເຂົາເຈົ້າບໍ່ນັບຖືພະເຢໂຫວາຫຼືກົດໝາຍຂອງພະອົງ ແລະນະມັດສະການບາອານພະເຈົ້າປອມ. ແຕ່ນາບອດຖືວ່າສາຍສຳພັນຂອງລາວກັບພະເຢໂຫວາມີຄ່າຫຼາຍກວ່າຊີວິດຂອງຕົວເອງຊໍ້າ.
4 ອ່ານ 1 ກະສັດ 21:1-3. ເມື່ອກະສັດອາກາບສະເໜີວ່າຈະເອົາສວນອະງຸ່ນທີ່ດີກວ່າມາປ່ຽນກັບສວນຂອງນາບອດ ຫຼືບໍ່ດັ່ງນັ້ນກໍຈະຊື້ເອົາ ແຕ່ນາບອດໄດ້ປະຕິເສດ. ຍ້ອນຫຍັງ? ລາວອະທິບາຍດ້ວຍຄວາມນັບຖືວ່າ: ‘ພະເຢໂຫວາຫ້າມຂ້ານ້ອຍຈາກຍົກມູນແຕ່ປູ່ຍ່າຕານາຍໃຫ້ທ່ານ.’ ນາບອດປະຕິເສດຂໍ້ສະເໜີນັ້ນເພາະກົດໝາຍຂອງພະເຢໂຫວາຫ້າມບໍ່ໃຫ້ຊາວອິດສະລາແອນຂາຍດິນມູນຢ່າງຖາວອນ. (ພວກເລວີ 25:23; ຈົດເຊັນບັນຊີ 36:7) ເຫັນໄດ້ແຈ້ງວ່ານາບອດເຊື່ອຟັງພະເຢໂຫວາ.
5. ເພື່ອຈະເອົາສວນອະງຸ່ນຂອງນາບອດ ເຢຊາເບນໄດ້ເຮັດຫຍັງ?
5 ເມື່ອນາບອດບໍ່ຍອມຂາຍສວນອະງຸ່ນ ກະສັດອາກາບແລະເມຍໄດ້ເຮັດສິ່ງທີ່ໂຫດຮ້າຍຫຼາຍ. ເພື່ອຈະເອົາສວນນັ້ນ ລາຊີນີເຢຊາເບນບອກຊາຍສອງຄົນໃຫ້ໃສ່ຮ້າຍວ່ານາບອດເຮັດຜິດ ດັ່ງນັ້ນ ນາບອດແລະພວກລູກຊາຍຈຶ່ງຖືກຂ້າ. ພະເຢໂຫວາໄດ້ເຮັດຫຍັງຕໍ່ກັບຄວາມບໍ່ຍຸຕິທຳທີ່ໂຫດຮ້າຍນີ້?
ການຕັດສິນທີ່ຍຸຕິທຳຂອງພະເຈົ້າ
6, 7. ພະເຢໂຫວາສະແດງໃຫ້ເຫັນແນວໃດວ່າຮັກຄວາມຍຸຕິທຳ ແລະເປັນຫຍັງເລື່ອງນີ້ປອບໂຍນຄອບຄົວແລະໝູ່ເພື່ອນຂອງນາບອດ?
6 ພະເຢໂຫວາໄດ້ສົ່ງເອລີຢາໄປຫາອາກາບທັນທີ. ເອລີຢາບອກວ່າອາກາບເປັນຄາຕະກອນແລະເປັນຂີ້ລັກ. ພະເຢໂຫວາຕັດສິນແນວໃດ? ພະອົງຕັດສິນວ່າອາກາບ ເມຍ ແລະພວກລູກຊາຍຈະຖືກຂ້າຄືກັບນາບອດແລະພວກລູກຂອງລາວ.—1 ກະສັດ 21:17-25
7 ຄອບຄົວແລະໝູ່ເພື່ອນຂອງນາບອດໂສກເສົ້າຫຼາຍກັບເລື່ອງໂຫດຮ້າຍທີ່ອາກາບໄດ້ເຮັດ. ແຕ່ພະເຢໂຫວາເຫັນຄວາມບໍ່ຍຸຕິທຳນັ້ນແລະໄດ້ລົງມືຈັດການທັນທີ. ເລື່ອງນີ້ຕ້ອງປອບໂຍນເຂົາເຈົ້າແທ້ໆ. ຢ່າງໃດກໍຕາມ ສິ່ງທີ່ເກີດຂຶ້ນຕໍ່ຈາກນີ້ຈະທົດສອບຄວາມຖ່ອມແລະຄວາມໄວ້ວາງໃຈຂອງເຂົາເຈົ້າທີ່ມີຕໍ່ພະເຢໂຫວາ.
ເອລີຢາບອກອາກາບວ່າ ຍ້ອນລາວຖ່ອມຕົວ ພະເຢໂຫວາຈະບໍ່ລົງໂທດລາວ
8. ເມື່ອອາກາບໄດ້ຍິນຄຳຕັດສິນຂອງພະເຢໂຫວາ ລາວເຮັດຫຍັງ ແລະຜົນເປັນແນວໃດ?
8 ເມື່ອອາກາບໄດ້ຍິນຄຳຕັດສິນຂອງພະເຢໂຫວາ ລາວກໍ “ຈີກເສື້ອດ້ວຍຄວາມເສຍໃຈ ນຸ່ງຜ້າກະສອບ ອົດອາຫານ ນອນໃນຊຸດກະສອບ ແລະຍ່າງໂສກເສົ້າ.” ອາກາບໄດ້ຖ່ອມຕົວ. ຜົນເປັນແນວໃດ? ພະເຢໂຫວາບອກເອລີຢາວ່າ: ‘ເພາະເຮົາເຫັນວ່າລາວຖ່ອມຕົວລົງ ເຮົາຈະບໍ່ເຮັດໃຫ້ເກີດຄວາມຫາຍະນະຕອນທີ່ລາວຍັງມີຊີວິດຢູ່ ແຕ່ຈະເຮັດໃຫ້ລາຊະວົງຂອງລາວພົບຄວາມຫາຍະນະໃນສະໄໝລູກຂອງລາວ.’ (1 ກະສັດ 21:27-29, ລ.ມ.; 2 ກະສັດ 10:10, 11, 17) ພະເຢໂຫວາເປັນຜູ້ “ລອງເບິ່ງ [“ກວດເບິ່ງ,” ລ.ມ.] ໃຈ” ຈຶ່ງເຫັນວ່າເຮົາເປັນຄົນແນວໃດແທ້ໆ ດັ່ງນັ້ນ ພະອົງຈຶ່ງສະແດງຄວາມເມດຕາຕໍ່ອາກາບ.—ສຸພາສິດ 17:3
ຄວາມຖ່ອມປົກປ້ອງເຮົາ
9. ເປັນຫຍັງຄວາມຖ່ອມຈຶ່ງປົກປ້ອງຄອບຄົວແລະໝູ່ເພື່ອນຂອງນາບອດ?
9 ເມື່ອຄອບຄົວແລະໝູ່ເພື່ອນຂອງນາບອດໄດ້ຍິນວ່າຄົນໃນຄອບຄົວຂອງອາກາບຈະບໍ່ຖືກລົງໂທດຈົນກວ່າອາກາບຈະຕາຍ ເລື່ອງນີ້ອາດທົດສອບຄວາມເຊື່ອຂອງຄົນເຫຼົ່ານີ້. ແຕ່ຄວາມຖ່ອມຈະຊ່ວຍເຂົາເຈົ້າໃຫ້ຮັກສາຄວາມເຊື່ອໄວ້ໄດ້. ຍ້ອນຫຍັງ? ຖ້າເຂົາເຈົ້າຖ່ອມກໍຈະນະມັດສະການພະເຢໂຫວາຕໍ່ໄປ ໂດຍໝັ້ນໃຈວ່າພະອົງຈະສະແດງຄວາມຍຸຕິທຳສະເໝີ. (ອ່ານພະບັນຍັດ 32:3, 4) ໃນອະນາຄົດ ພະເຢໂຫວາຈະອວຍພອນຄອບຄົວຂອງນາບອດໃຫ້ໄດ້ເຫັນຄົນທີ່ເຂົາເຈົ້າຮັກຟື້ນຂຶ້ນມາຈາກຕາຍ. ສ່ວນນາບອດແລະພວກລູກຂອງລາວກໍຈະໄດ້ຮັບຄວາມຍຸຕິທຳແທ້. (ໂຢບ 14:14, 15; ໂຢຮັນ 5:28, 29) ຄົນຖ່ອມຮູ້ວ່າ “ພະເຈົ້າ [ທ່ຽງແທ້] ຈະຕັດສິນກິດຈະການທຸກປະການກັບການທັງປວງທີ່ເຊື່ອງໄວ້ ທັງການດີທັງການຊົ່ວຮ້າຍ.” (ຜູ້ເທສະໜາປ່າວປະກາດ 12:14) ພະເຢໂຫວາຮູ້ຈັກຄວາມຈິງທີ່ເຮົາບໍ່ຮູ້. ດັ່ງນັ້ນ ຄວາມຖ່ອມປົກປ້ອງເຮົາບໍ່ໃຫ້ສູນເສຍຄວາມເຊື່ອໃນພະອົງ.
ຄວາມຖ່ອມປົກປ້ອງເຮົາບໍ່ໃຫ້ສູນເສຍຄວາມເຊື່ອໃນພະເຢໂຫວາ
10, 11. (ກ) ມີເລື່ອງໃດແດ່ທີ່ອາດທົດສອບວິທີທີ່ເຮົາເບິ່ງເລື່ອງຄວາມຍຸຕິທຳ? (ຂ) ຄວາມຖ່ອມຈະປົກປ້ອງເຮົາແນວໃດ?
10 ເຈົ້າຈະມີທ່າທີແນວໃດ ຖ້າເຈົ້າບໍ່ເຂົ້າໃຈຫຼືບໍ່ເຫັນດີນຳການຕັດສິນໃຈຂອງຜູ້ເຖົ້າແກ່? ຕົວຢ່າງເຊັ່ນ: ເຈົ້າຈະເຮັດແນວໃດ ຖ້າເຈົ້າຫຼືຄົນທີ່ເຈົ້າຮັກສູນເສຍວຽກມອບໝາຍໃນການຮັບໃຊ້ພະເຢໂຫວາ? ຈະວ່າແນວໃດຖ້າຜົວຫຼືເມຍຂອງເຈົ້າ ລູກຊາຍຫຼືລູກສາວ ຫຼືໝູ່ສະໜິດຖືກຕັດສຳພັນ ແລະເຈົ້າບໍ່ເຫັນດີກັບຄຳຕັດສິນຂອງຜູ້ເຖົ້າແກ່? ເຈົ້າຈະເຮັດແນວໃດ ຖ້າເຈົ້າໝັ້ນໃຈວ່າຜູ້ເຖົ້າແກ່ເຮັດບໍ່ຖືກທີ່ເມດຕາຄົນທີ່ເຮັດຜິດ? ເລື່ອງເຫຼົ່ານີ້ອາດທົດສອບຄວາມເຊື່ອທີ່ເຮົາມີຕໍ່ພະເຢໂຫວາແລະວິທີທີ່ພະອົງຈັດລະບຽບປະຊາຄົມໃນທຸກມື້ນີ້. ຄວາມຖ່ອມຈະປົກປ້ອງເຈົ້າແນວໃດ ຖ້າຖືກທົດສອບດ້ວຍເລື່ອງແບບນີ້? ໃຫ້ເຮົາເບິ່ງສອງຂອບເຂດນຳກັນ.
ເຈົ້າຈະມີທ່າທີແນວໃດຖ້າຜູ້ເຖົ້າແກ່ປະກາດຄຳຕັດສິນເລື່ອງໜຶ່ງທີ່ເຈົ້າບໍ່ເຫັນດີນຳ? (ເບິ່ງຂໍ້ 10, 11)
11 ທຳອິດ ຖ້າເຮົາຖ່ອມ ເຮົາຈະຍອມຮັບວ່າເຮົາບໍ່ຮູ້ຄວາມຈິງທັງໝົດ. ເຖິງຈະຄິດວ່າເຮົາຮູ້ທຸກສິ່ງກ່ຽວກັບເລື່ອງນັ້ນ ແຕ່ມີພຽງພະເຢໂຫວາເທົ່ານັ້ນທີ່ຮູ້ຈັກສິ່ງທີ່ຢູ່ໃນຫົວໃຈຂອງຄົນເຮົາ. (1 ຊາເມືອນ 16:7) ຖ້າສຳນຶກໃນເລື່ອງນີ້ ເຮົາຈະຍອມຮັບຢ່າງຖ່ອມໃຈວ່າເຮົາມີຂີດຈຳກັດແລະຕ້ອງປັບຄວາມຄິດຂອງເຮົາ. ທີສອງ ຖ້າເຮົາເຫັນຫຼືປະສົບກັບຄວາມບໍ່ຍຸຕິທຳ ຄວາມຖ່ອມຈະຊ່ວຍເຮົາໃຫ້ເຊື່ອຟັງ ອົດທົນ ແລະຄອຍຖ້າໃຫ້ພະເຢໂຫວາແກ້ໄຂເລື່ອງນັ້ນ. ຄຳພີໄບເບິນບອກວ່າ: “ຈະມີການດີແກ່ຄົນທັງຫຼາຍທີ່ຢ້ານຢຳພະເຈົ້າ [ທ່ຽງແທ້]” ແລະຍັງບອກອີກວ່າ “ແຕ່ວ່າບໍ່ມີຄວາມສຸກສຳລັບຄົນຮ້າຍ ແລະມັນຈະບໍ່ມີອາຍຸຍືນຍາວຕໍ່ໄປ.” (ຜູ້ເທສະໜາປ່າວປະກາດ 8:12, 13) ຖ້າເຮົາເປັນຄົນຖ່ອມຕໍ່ໆໄປ ເຮົາຈະໄດ້ຮັບປະໂຫຍດແລະຄົນອື່ນກໍເຊັ່ນດຽວກັນ.—ອ່ານ 1 ເປໂຕ 5:5
ຄວາມໜ້າຊື່ໃຈຄົດໃນປະຊາຄົມ
12. ເຮົາຈະຮຽນເລື່ອງຫຍັງໃນຕອນນີ້ ແລະຍ້ອນຫຍັງ?
12 ຄລິດສະຕຽນໃນສະຕະວັດທຳອິດທີ່ຢູ່ເມືອງອັນຕີອົກໃນຊີລີປະສົບກັບເລື່ອງທີ່ທົດສອບຄວາມຖ່ອມແລະຄວາມເຕັມໃຈໃຫ້ອະໄພ. ໃຫ້ເຮົາຮຽນຮູ້ແລະໃຊ້ເລື່ອງນີ້ເພື່ອກວດເບິ່ງວ່າເຮົາມີທ່າທີແນວໃດຕໍ່ການໃຫ້ອະໄພ. ການເຮັດແບບນີ້ອາດຊ່ວຍເຮົາໃຫ້ເຂົ້າໃຈເຫດຜົນທີ່ພະເຢໂຫວາສາມາດໃຊ້ຄົນບໍ່ສົມບູນແບບໃຫ້ເຮັດບາງສິ່ງໂດຍບໍ່ໄດ້ຫຼຸດມາດຕະຖານຂອງພະອົງລົງ.
13, 14. ເປໂຕຖືກມອບໝາຍໃຫ້ເຮັດຫຍັງ ແລະລາວສະແດງໃຫ້ເຫັນແນວໃດວ່າມີຄວາມກ້າຫານ?
13 ອັກຄະສາວົກເປໂຕເປັນຜູ້ເຖົ້າແກ່ທີ່ຄລິດສະຕຽນຫຼາຍຄົນໃນສະຕະວັດທຳອິດຮູ້ຈັກດີ. ລາວເປັນໝູ່ສະໜິດຂອງພະເຍຊູແລະໄດ້ຮັບວຽກມອບໝາຍທີ່ສຳຄັນ. (ມັດທາຍ 16:19) ຕົວຢ່າງເຊັ່ນ: ໃນປີ ຄ.ສ. 36 ເປໂຕຖືກມອບໝາຍໃຫ້ປະກາດນຳໂຄເນເລຍແລະທຸກຄົນເຊິ່ງຢູ່ເຮືອນຂອງລາວ. ເປັນຫຍັງວຽກມອບໝາຍນີ້ຈຶ່ງພິເສດ? ຍ້ອນວ່າໂຄເນເລຍບໍ່ແມ່ນຄົນຢິວ ລາວເປັນຄົນຕ່າງຊາດທີ່ບໍ່ໄດ້ຮັບສິນຕັດ. ເມື່ອໂຄເນເລຍແລະຄົນທີ່ຢູ່ເຮືອນຂອງລາວໄດ້ຮັບພະລັງບໍລິສຸດ ເປໂຕຈຶ່ງເຫັນວ່າເຂົາເຈົ້າສາມາດຮັບບັບເຕມາເປັນຄລິດສະຕຽນໄດ້. ລາວເວົ້າວ່າ: “ໃຜຈະຫ້າມພວກເຂົາບໍ່ໃຫ້ຮັບບັບເຕມາໃນນໍ້າໄດ້ ເພາະພວກເຂົາໄດ້ຮັບພະລັງບໍລິສຸດຄືພວກເຮົາ.”—ກິດຈະການ 10:47, ລ.ມ.
14 ໃນປີ ຄ.ສ. 49 ພວກອັກຄະສາວົກແລະພວກຜູ້ເຖົ້າແກ່ໃນເມືອງເຢຣຶຊາເລມໄດ້ປະຊຸມກັນເພື່ອຕັດສິນວ່າຄົນຕ່າງຊາດທີ່ເຂົ້າມາເປັນຄລິດສະຕຽນຕ້ອງຮັບສິນຕັດຫຼືບໍ່. ໃນການປະຊຸມນີ້ ເປໂຕກ້າເຕືອນພີ່ນ້ອງວ່າ ເມື່ອບໍ່ດົນມານີ້ ລາວເຫັນຄົນຕ່າງຊາດທີ່ບໍ່ຮັບສິນຕັດໄດ້ຮັບພະລັງບໍລິສຸດ. ປະສົບການຂອງເປໂຕຊ່ວຍຄະນະກຳມະການປົກຄອງໃຫ້ຕັດສິນໃຈໃນເລື່ອງນັ້ນ. (ກິດຈະການ 15:6-11, 13, 14, 28, 29) ທັງຄລິດສະຕຽນທີ່ເປັນຄົນຢິວແລະຄົນຕ່າງຊາດຕ້ອງດີໃຈແທ້ໆທີ່ເປໂຕກ້າບອກຄວາມຈິງຂໍ້ນີ້. ດັ່ງນັ້ນຈຶ່ງບໍ່ຍາກເລີຍທີ່ຄລິດສະຕຽນໃນສະຕະວັດທຳອິດຈະໄວ້ວາງໃຈຊາຍຄົນນີ້ທີ່ທັງສັດຊື່ແລະອາວຸໂສ!—ເຫບເລີ 13:7
15. ເມື່ອຢູ່ເມືອງອັນຕີອົກໃນຊີລີ ເປໂຕເຮັດຜິດພາດຫຍັງ? (ເບິ່ງຮູບທຳອິດ)
15 ຫຼັງຈາກການປະຊຸມໃນເມືອງເຢຣຶຊາເລມ ເປໂຕກໍໄປຢາມເມືອງອັນຕີອົກໃນຊີລີທັນທີ. ເມື່ອຢູ່ຫັ້ນ ລາວຄົບຫາກັບພີ່ນ້ອງຄົນຕ່າງຊາດ. ເຮົານຶກພາບໄດ້ວ່າພີ່ນ້ອງເຫຼົ່ານັ້ນຕ້ອງມັກຮຽນຮູ້ແລະຟັງປະສົບການຂອງເປໂຕຫຼາຍແທ້ໆ. ແຕ່ເຂົາເຈົ້າຕ້ອງຕົກໃຈແລະເສຍໃຈທີ່ຢູ່ດີໆເປໂຕກໍເຊົາກິນເຂົ້ານຳເຂົາເຈົ້າ. ການກະທຳຂອງເປໂຕໄດ້ຊັກຈູງຄລິດສະຕຽນຊາວຢິວໃຫ້ເຮັດແບບລາວ ແລະໃນນັ້ນກໍມີບານາບານຳ. ເປັນຫຍັງຜູ້ເຖົ້າແກ່ທີ່ອາວຸໂສຄົນນີ້ຈຶ່ງເຮັດຜິດຮ້າຍແຮງແບບນັ້ນເຊິ່ງອາດເຮັດໃຫ້ປະຊາຄົມແຕກແຍກ? ຖ້າຜູ້ເຖົ້າແກ່ເວົ້າຫຼືເຮັດໃຫ້ເຮົາເສຍໃຈ ຄວາມຜິດພາດຂອງເປໂຕຈະຊ່ວຍເຮົາແນວໃດ?
ຄລິດສະຕຽນທີ່ເປັນຄົນຕ່າງຊາດເຊິ່ງເປໂຕເຮັດໃຫ້ເສຍໃຈຈະມີທ່າທີແນວໃດຕໍ່ຄວາມບໍ່ຍຸຕິທຳນີ້?
16. ເປໂຕຖືກແກ້ໄຂແນວໃດ ແລະນັ້ນເຮັດໃຫ້ເກີດຄຳຖາມຫຍັງ?
16 ອ່ານຄາລາຊີ 2:11-14. ເປໂຕກາຍເປັນຄົນຢ້ານໜ້າມະນຸດ. (ສຸພາສິດ 29:25) ເຖິງລາວຮູ້ວ່າພະເຢໂຫວາບໍ່ມີອະຄະຕິຕໍ່ຄົນຕ່າງຊາດ ແຕ່ເປໂຕກໍຢ້ານວ່າຄລິດສະຕຽນຄົນຢິວທີ່ຮັບສິນຕັດເຊິ່ງມາຈາກເມືອງເຢຣຶຊາເລມຈະນັບຖືລາວໜ້ອຍລົງຍ້ອນວ່າຄົບຫາກັບຄລິດສະຕຽນທີ່ເປັນຄົນຕ່າງຊາດ. ອັກຄະສາວົກໂປໂລບອກວ່າເປໂຕເປັນຄົນໜ້າຊື່ໃຈຄົດ ເພາະຢູ່ທີ່ການປະຊຸມໃນເມືອງເຢຣຶຊາເລມໃນປີ ຄ.ສ. 49 ໂປໂລໄດ້ຍິນເປໂຕເວົ້າປົກປ້ອງຄລິດສະຕຽນທີ່ເປັນຄົນຕ່າງຊາດ ແຕ່ຕອນນີ້ລາວພັດປະຕິບັດກັບເຂົາເຈົ້າອີກແບບໜຶ່ງ. (ກິດຈະການ 15:12; ຄາລາຊີ 2:13) ຄລິດສະຕຽນທີ່ເປັນຄົນຕ່າງຊາດທີ່ເປໂຕເຮັດໃຫ້ເສຍໃຈຈະມີທ່າທີແນວໃດ? ເຂົາເຈົ້າຈະຍອມໃຫ້ຕົວເອງສະດຸດບໍ? ເປໂຕຈະສູນເສຍວຽກມອບໝາຍຍ້ອນຄວາມຜິດພາດຂອງລາວບໍ?
ໃຫ້ອະໄພ
17. ເປໂຕໄດ້ຮັບປະໂຫຍດແນວໃດຈາກການທີ່ພະເຢໂຫວາໃຫ້ອະໄພລາວ?
17 ເປໂຕເປັນຄົນຖ່ອມແລະຍອມຮັບການແກ້ໄຂຈາກໂປໂລ. ໃນພະຄຳພີບໍ່ໄດ້ບອກວ່າເປໂຕສູນເສຍວຽກມອບໝາຍໃດໆ. ແຕ່ສິ່ງທີ່ແນ່ນອນ ເຮົາຮູ້ວ່າຕໍ່ມາລາວໄດ້ຮັບການດົນໃຈໃຫ້ຂຽນຈົດໝາຍສອງສະບັບທີ່ເປັນສ່ວນໜຶ່ງຂອງຄຳພີໄບເບິນ. ໃນຈົດໝາຍສະບັບທີສອງ ລາວເວົ້າເຖິງໂປໂລວ່າເປັນ “ພີ່ນ້ອງທີ່ຮັກຂອງພວກເຮົາ.” (2 ເປໂຕ 3:15) ຄວາມຜິດພາດຂອງເປໂຕຕ້ອງເຮັດໃຫ້ຄລິດສະຕຽນທີ່ເປັນຄົນຕ່າງຊາດເສຍໃຈ ແຕ່ພະເຍຊູທີ່ເປັນຫົວໜ້າຂອງປະຊາຄົມຍັງໃຊ້ລາວຕໍ່ໄປ. (ເອເຟດ 1:22) ພີ່ນ້ອງຊາຍຍິງໃນປະຊາຄົມມີໂອກາດຮຽນແບບພະເຍຊູແລະພໍ່ຂອງພະອົງໃນການໃຫ້ອະໄພເປໂຕຢ່າງໃຈກວ້າງ. ເຮົາຫວັງວ່າຈະບໍ່ມີໃຜປ່ອຍໃຫ້ຕົວເອງສະດຸດພຽງເພາະຄວາມຜິດພາດຂອງຄົນທີ່ບໍ່ສົມບູນແບບ.
18. ເມື່ອໃດທີ່ເຈົ້າຕ້ອງໄດ້ເບິ່ງເລື່ອງຄວາມຍຸຕິທຳຄືກັບພະເຢໂຫວາ?
18 ປະຊາຄົມຄລິດສະຕຽນໃນສະຕະວັດທຳອິດບໍ່ມີຜູ້ເຖົ້າແກ່ທີ່ສົມບູນແບບ ແລະກໍເປັນເຊັ່ນນັ້ນໃນປະຊາຄົມທຸກມື້ນີ້. ຄຳພີໄບເບິນບອກວ່າ: “ເຮົາທຸກຄົນເຮັດຜິດພາດຢູ່ເລື້ອຍໆ.” (ຢາໂກໂບ 3:2, ທ.ປ.) ເຮົາອາດຍອມຮັບຄວາມຈິງຂໍ້ນີ້ ແຕ່ບໍ່ງ່າຍເລີຍເມື່ອເຮົາໄດ້ຮັບຜົນກະທົບຈາກຄວາມຜິດພາດຂອງພີ່ນ້ອງຮ່ວມຄວາມເຊື່ອ? ເຈົ້າເບິ່ງເລື່ອງຄວາມຍຸຕິທຳຄືກັບພະເຢໂຫວາບໍ? ຕົວຢ່າງເຊັ່ນ: ເຈົ້າຈະມີທ່າທີແນວໃດຖ້າຜູ້ເຖົ້າແກ່ສະແດງຄວາມຄິດເຫັນແບບມີອະຄະຕິ? ເຈົ້າຈະສະດຸດບໍ ຖ້າຜູ້ເຖົ້າແກ່ເວົ້າບາງສິ່ງແບບບໍ່ໄດ້ຄິດເຊິ່ງເຮັດໃຫ້ເຈົ້າເສຍໃຈ? ແທນທີ່ຈະຟ້າວສະຫຼຸບວ່າລາວບໍ່ສົມຄວນເປັນຜູ້ເຖົ້າແກ່ ເຈົ້າຈະອົດທົນຄອຍຖ້າໃຫ້ພະເຍຊູຜູ້ເປັນຫົວໜ້າປະຊາຄົມແກ້ໄຂເລື່ອງນັ້ນບໍ? ແທນທີ່ຈະເລັງໃສ່ຄວາມຜິດພາດ ດີກວ່າບໍຖ້າເຈົ້າຈະຈື່ວ່າລາວຮັບໃຊ້ຢ່າງສັດຊື່ມາຫຼາຍປີແລ້ວ? ຖ້າພີ່ນ້ອງທີ່ເຮັດຜິດຕໍ່ເຈົ້າຍັງຮັບໃຊ້ພະເຢໂຫວາຕໍ່ໄປໃນການເປັນຜູ້ເຖົ້າແກ່ ຫຼືແມ່ນແຕ່ໄດ້ຮັບວຽກມອບໝາຍເພີ່ມຂຶ້ນ ເຈົ້າຈະດີໃຈນຳລາວບໍ? ຖ້າເຈົ້າເຕັມໃຈໃຫ້ອະໄພ ເຈົ້າກໍກຳລັງເບິ່ງເລື່ອງຄວາມຍຸຕິທຳຄືກັບພະເຢໂຫວາ.—ອ່ານມັດທາຍ 6:14, 15
19. ເຮົາຄວນຕັ້ງໃຈທີ່ຈະເຮັດຫຍັງ?
19 ຍ້ອນວ່າເຮົາຮັກຄວາມຍຸຕິທຳ ເຮົາຈຶ່ງຕັ້ງໜ້າຄອຍຖ້າໃຫ້ເຖິງມື້ທີ່ພະເຢໂຫວາຈະກຳຈັດຄວາມບໍ່ຍຸຕິທຳທຸກຮູບແບບເຊິ່ງເກີດຈາກຊາຕານແລະລະບົບຊົ່ວຂອງມັນ. (ເອຊາອີ 65:17) ຈົນກວ່າຈະຮອດມື້ນັ້ນ ຖ້າເຮົາປະສົບຄວາມບໍ່ຍຸຕິທຳ ໃຫ້ເຮົາຖ່ອມໃຈຍອມຮັບວ່າເຮົາອາດບໍ່ຮູ້ຄວາມຈິງທັງໝົດ ແລະໃຫ້ເຮົາໃຫ້ອະໄພຢ່າງໃຈກວ້າງຕໍ່ຄົນທີ່ເຮັດຜິດກັບເຮົາ. ຖ້າເຮົາເຮັດແບບນີ້ ເຮົາກໍຈະເບິ່ງເລື່ອງຄວາມຍຸຕິທຳຄືກັບພະເຢໂຫວາ.
