ບົດຄວາມສຶກສາທີ 6

“ຜູ້ຊາຍເປັນຜູ້ນຳຂອງຜູ້ຍິງ”

ເປີດ

“ຜູ້ຊາຍເປັນຜູ້ນຳຂອງຜູ້ຍິງ.”—1 ກຣ. 11:3

ເພງ 13 ພະຄລິດເປັນແບບຢ່າງຂອງເຮົາ

ໃຈຄວາມສຳຄັນ *

1. ກ່ອນພີ່ນ້ອງຍິງຈະແຕ່ງດອງ ລາວຄວນຖາມຕົວເອງແນວໃດ?

ຄລິດສະຕຽນທຸກຄົນນັບຖືສິດອຳນາດຂອງພະເຢຊູເຊິ່ງເປັນຜູ້ນຳທີ່ສົມບູນແບບ. ແຕ່ເມື່ອຜູ້ຍິງແຕ່ງດອງແລ້ວ ລາວຕ້ອງນັບຖືສິດອຳນາດຂອງຜົວເຊິ່ງເປັນຜູ້ນຳທີ່ບໍ່ສົມບູນແບບ. ການເຮັດແບບນີ້ບໍ່ງ່າຍປານໃດ. ດັ່ງນັ້ນ ກ່ອນທີ່ຜູ້ຍິງຈະແຕ່ງດອງກັບຜູ້ໃດຜູ້ໜຶ່ງ ລາວຄວນຖາມຕົວເອງວ່າ: ‘ຜູ້ນີ້ຈະເປັນຫົວໜ້າຄອບຄົວທີ່ດີບໍ? ລາວໃຫ້ພະເຢໂຫວາສຳຄັນທີ່ສຸດໃນຊີວິດຂອງລາວບໍ? ຖ້າແຕ່ງດອງແລ້ວ ອັນໃດເຮັດໃຫ້ຂ້ອຍຄິດວ່າລາວຈະຊ່ອຍຂ້ອຍໃຫ້ມີຄວາມເຊື່ອທີ່ເຂັ້ມແຂງຂຶ້ນ?’ ແຕ່ຜູ້ຍິງກໍຄວນຖາມຕົວເອງນຳວ່າ: ‘ຂ້ອຍຄວນມີນິດໄສແບບໃດທີ່ຈະຊ່ອຍໃຫ້ຄອບຄົວມີຄວາມສຸກ? ຂ້ອຍເປັນຄົນອົດທົນແລະໃຈກວ້າງບໍ? ຂ້ອຍມີສາຍສຳພັນທີ່ດີກັບພະເຢໂຫວາບໍ?’ (ຜູ້ປ. 4:9, 12) ຖ້າລາວຕັດສິນໃຈດີໆກ່ອນແຕ່ງດອງ ລາວກໍຈະຊ່ອຍໃຫ້ຄອບຄົວມີຄວາມສຸກ.

2. ເຮົາຈະຮຽນຫຍັງໃນບົດຄວາມນີ້?

²ພີ່ນ້ອງຍິງຫຼາຍລ້ານຄົນເປັນຕົວຢ່າງທີ່ດີໃນການນັບຖືສິດອຳນາດຂອງຜົວ. ເຂົາເຈົ້າເປັນຕາໜ້າຊົມເຊີຍແທ້ໆ! ເຮົາດີໃຈຫຼາຍທີ່ໄດ້ຮັບໃຊ້ພະເຢໂຫວາຮ່ວມກັບເຂົາເຈົ້າ. ໃນບົດຄວາມນີ້ເຮົາຈະມາຕອບຄຳຖາມ 3 ຂໍ້ຕໍ່ໄປນີ້: (1) ເມຍທີ່ເປັນຄລິດສະຕຽນມີບັນຫາຫຍັງແດ່? (2) ເປັນຫຍັງລາວຄວນນັບຖືສິດອຳນາດຂອງຜົວ? (3) ຜົວເມຍຄລິດສະຕຽນຈະໄດ້ຮຽນຫຍັງຈາກເລື່ອງຂອງພະເຢຊູ ອາບີຄາລີ ແລະມາຣີແມ່ຂອງພະເຢຊູໃນການນັບຖືສິດອຳນາດ?

ເມຍທີ່ເປັນຄລິດສະຕຽນເຈິບັນຫາຫຍັງແດ່?

3. ເປັນຫຍັງທຸກຄົນທີ່ແຕ່ງດອງແລ້ວຈຶ່ງມີບັນຫາ?

³ການແຕ່ງດອງເປັນສິ່ງທີ່ພະເຢໂຫວາຈັດໃຫ້ຢ່າງສົມບູນແບບ ແຕ່ຄົນເຮົາພັດບໍ່ສົມບູນແບບ. (1 ຢຮ. 1:8) ດັ່ງນັ້ນ ຄຳພີໄບເບິນຈຶ່ງເຕືອນວ່າ: “ຄົນທີ່ແຕ່ງດອງຈະມີຄວາມຫຍຸ້ງຍາກໃນຊີວິດ.” (1 ກຣ. 7:28) ໃຫ້ເຮົາມາເບິ່ງບັນຫາບາງຢ່າງທີ່ພີ່ນ້ອງຍິງຈະເຈິໃນຊີວິດຄອບຄົວ.

4. ເປັນຫຍັງເມຍອາດຮູ້ສຶກວ່າການນັບຖືສິດອຳນາດຂອງຜົວເປັນເລື່ອງຕ່ຳຕ້ອຍ?

⁴ຍ້ອນວິທີທີ່ຖືກລ້ຽງມາ ເມຍອາດຮູ້ສຶກວ່າການນັບຖືສິດອຳນາດຂອງຜົວເປັນເລື່ອງທີ່ຕ່ຳຕ້ອຍ. ພີ່ນ້ອງຍິງຊື່ມາຣີໂຊທີ່ຢູ່ສະຫະລັດອາເມຣິກາບອກວ່າ: “ບ້ານຂ້ອຍສອນວ່າ ຜູ້ຍິງຕ້ອງທຽບເທົ່າກັບຜູ້ຊາຍທຸກຢ່າງ. ຂ້ອຍຮູ້ວ່າພະເຢໂຫວາໃຫ້ຜົວເປັນຫົວໜ້າຄອບຄົວແລະໃຫ້ເມຍເຊື່ອຟັງຜົວ ແຕ່ເມຍກໍຄວນໄດ້ຮັບຄວາມນັບຖືຄືກັນ. ມັນຍາກທີ່ຂ້ອຍຈະນັບຖືສິດອຳນາດຂອງຜົວເພາະຫຼາຍຄົນບໍ່ໄດ້ເຮັດແບບນັ້ນ.”

5. ບາງຄົນມີຄວາມຄິດແບບໃດຕໍ່ຜູ້ຍິງເຊິ່ງບໍ່ເປັນໄປຕາມຫຼັກການໃນຄຳພີໄບເບິນ?

⁵ພີ່ນ້ອງຍິງບາງຄົນມີຜົວທີ່ຖືວ່າຜູ້ຍິງຕ່ຳຕ້ອຍກວ່າຜູ້ຊາຍ. ພີ່ນ້ອງຊື່ອີວອນທີ່ຢູ່ອາເມຣິກາໃຕ້ບອກວ່າ: “ບ້ານທີ່ຂ້ອຍຢູ່ຕ້ອງໃຫ້ຜູ້ຊາຍກິນເຂົ້າກ່ອນຜູ້ຍິງ. ເດັກນ້ອຍຜູ້ຍິງຕ້ອງແຕ່ງກິນແລະອະນາໄມເຮືອນ ແຕ່ເດັກນ້ອຍຜູ້ຊາຍຈະຖ້າໃຫ້ແມ່ແລະເອື້ອຍນ້ອງມາຮັບໃຊ້. ເຂົາເຈົ້າຖືກສອນໃຫ້ຄິດວ່າຕົວເອງເປັນ ‘ນາຍ.’” ພີ່ນ້ອງຍິງທີ່ຊື່ຢິງຫຼິງເຊິ່ງຢູ່ອາຊີບອກວ່າ: “ໃນພາສາຂ້ອຍມີສຳນວນໜຶ່ງທີ່ມີຄວາມໝາຍວ່າ ຜູ້ຍິງບໍ່ຈຳເປັນຕ້ອງສະຫຼາດຫຼືມີຄວາມສາມາດຫຍັງເພາະໜ້າທີ່ຂອງລາວກໍມີແຕ່ເຮັດວຽກເຮືອນເທົ່ານັ້ນແລະບໍ່ມີສິດທີ່ຈະອອກຄວາມຄິດເຫັນກັບຜົວ.” ຜົວທີ່ມີຄວາມຄິດແບບນີ້ບໍ່ໄດ້ສະແດງຄວາມຮັກແລະບໍ່ໄດ້ເຮັດຕາມຫຼັກການໃນຄຳພີໄບເບິນ. ລາວເຮັດໃຫ້ຊີວິດຂອງເມຍຫຍຸ້ງຍາກເພາະລາວບໍ່ໄດ້ເຮັດຕາມຕົວຢ່າງຂອງພະເຢຊູ ແລະນີ້ເຮັດໃຫ້ພະເຢໂຫວາບໍ່ພໍໃຈ.—ອຟຊ. 5:28, 29; 1 ປຕ. 3:7

6. ເມຍຕ້ອງເຮັດຫຍັງເພື່ອຈະມີສາຍສຳພັນທີ່ໃກ້ຊິດກັບພະເຢໂຫວາ?

⁶ຄືກັບທີ່ເຮົາໄດ້ຮຽນໃນບົດຄວາມກ່ອນ ພະເຢໂຫວາຕ້ອງການໃຫ້ຜົວທີ່ເປັນຄລິດສະຕຽນເບິ່ງແຍງຄອບຄົວໃຫ້ມີສິ່ງຈຳເປັນເລື່ອງວັດຖຸ ອາລົມຄວາມຮູ້ສຶກແລະຊ່ອຍຄອບຄົວໃຫ້ມີຄວາມເຊື່ອທີ່ເຂັ້ມແຂງ. (1 ຕມ. 5:8) ເຖິງວ່າເມຍຈະມີວຽກຫຼາຍ ແຕ່ລາວກໍຕ້ອງຈັດເວລາທີ່ຈະອ່ານຄຳພີໄບເບິນ ຄິດຕຶກຕອງ ແລະອະທິດຖານເຖິງພະເຢໂຫວາທຸກໆມື້. ການເຮັດແບບນີ້ບໍ່ງ່າຍເລີຍ. ເມຍມີວຽກຫຼາຍຢ່າງທີ່ຕ້ອງເຮັດ ດັ່ງນັ້ນລາວອາດຈະຮູ້ສຶກວ່າບໍ່ມີເວລາແລະບໍ່ມີແຮງທີ່ຈະເຮັດສິ່ງທີ່ເສີມຄວາມເຊື່ອ. ແຕ່ມັນເປັນເລື່ອງສຳຄັນທີ່ລາວຕ້ອງເຮັດ. ຍ້ອນຫຍັງ? ກໍຍ້ອນວ່າພະເຢໂຫວາຢາກໃຫ້ເຮົາແຕ່ລະຄົນເສີມສ້າງຄວາມເຊື່ອ ແລະມີສາຍສຳພັນທີ່ໃກ້ຊິດກັບເພິ່ນສະເໝີ.—ກຈກ. 17:27

7. ອັນໃດຈະຊ່ອຍເມຍໃຫ້ເຮັດຕາມສິ່ງທີ່ພະເຢໂຫວາຕ້ອງການໄດ້ງ່າຍຂຶ້ນ?

⁷ແນ່ນອນວ່າມັນເປັນເລື່ອງຍາກທີ່ເມຍຈະນັບຖືສິດອຳນາດຂອງຜົວທີ່ເປັນຄົນບໍ່ສົມບູນແບບ. ແຕ່ມັນຈະງ່າຍຂຶ້ນທີ່ເມຍຈະເຮັດຕາມສິ່ງທີ່ພະເຢໂຫວາຕ້ອງການ ຖ້າລາວເຂົ້າໃຈແລະຍອມຮັບເຫດຜົນໃນຄຳພີໄບເບິນທີ່ໃຫ້ນັບຖືສິດອຳນາດຂອງຜົວ.

ເປັນຫຍັງເມຍຈຶ່ງນັບຖືສິດອຳນາດຂອງຜົວ?

8. ຕາມເອເຟໂຊ 5:22-24 ເປັນຫຍັງເມຍຈຶ່ງເລືອກທີ່ຈະນັບຖືສິດອຳນາດຂອງຜົວ?

⁸ເມຍທີ່ເປັນຄລິດສະຕຽນຄວນນັບຖືສິດອຳນາດຂອງຜົວຍ້ອນເປັນສິ່ງທີ່ພະເຢໂຫວາຢາກໃຫ້ລາວເຮັດ. (ອ່ານເອເຟໂຊ 5:22-24) ລາວໝັ້ນໃຈວ່າພະເຢໂຫວາຮັກລາວແລະຂໍໃຫ້ລາວເຮັດສິ່ງທີ່ເປັນປະໂຫຍດຕໍ່ລາວ.—ບັນຍັດ. 6:24; 1 ຢຮ. 5:3

9. ຈະເປັນແນວໃດຖ້າເມຍນັບຖືສິດອຳນາດຂອງຜົວ?

⁹ຄົນໃນໂລກນີ້ມັກສົ່ງເສີມຜູ້ຍິງບໍ່ໃຫ້ເຮັດຕາມຄຳສອນຂອງພະເຈົ້າ ແລະເບິ່ງວ່າການນັບຖືສິດອຳນາດຂອງຜົວເຮັດໃຫ້ຕົວເອງຕ່ຳຕ້ອຍ. ຄົນທີ່ມີຄວາມຄິດແບບນີ້ບໍ່ໄດ້ຮູ້ຈັກພະເຈົ້າທີ່ເປັນຄວາມຮັກ. ພະເຢໂຫວາບໍ່ເຄີຍບອກຜູ້ຍິງທີ່ເປັນຄືກັບລູກສາວຂອງເພິ່ນໃຫ້ເຮັດສິ່ງທີ່ເຮັດໃຫ້ເຂົາເຈົ້າຖືກດູຖູກ. ພີ່ນ້ອງຍິງທີ່ພະຍາຍາມເຮັດສິ່ງທີ່ພະເຢໂຫວາຕ້ອງການໃຫ້ເຮັດ ຈະຊ່ອຍໃຫ້ຄອບຄົວມີຄວາມສຸກຫຼາຍຂຶ້ນ. (ເພງ. 119:165) ເມື່ອລາວເຮັດແບບນີ້ກໍເຮັດໃຫ້ທັງຜົວ ລູກ ແລະຕົວລາວເອງໄດ້ຮັບປະໂຫຍດ.

10. ເຮົາໄດ້ບົດຮຽນຫຍັງຈາກຄຳເວົ້າຂອງພີ່ນ້ອງແຄຣໍ?

¹⁰ເມື່ອເມຍນັບຖືສິດອຳນາດຂອງຜົວທີ່ເປັນຄົນບໍ່ສົມບູນແບບ ລາວກໍສະແດງໃຫ້ເຫັນວ່າລາວຮັກແລະນັບຖືພະເຢໂຫວາຜູ້ທີ່ໃຫ້ສິດອຳນາດກັບຫົວໜ້າຄອບຄົວ. ພີ່ນ້ອງແຄຣໍທີ່ຢູ່ອາເມຣິກາໃຕ້ບອກວ່າ: “ຂ້ອຍຮູ້ວ່າຜົວຈະເຮັດຜິດພາດຕະຫຼອດ ແຕ່ສິ່ງທີ່ຂ້ອຍເຮັດເມື່ອຜົວເຮັດຜິດພາດຈະສະແດງໃຫ້ເຫັນວ່າສາຍສຳພັນຂອງຂ້ອຍກັບພະເຢໂຫວາເປັນແນວໃດ. ດັ່ງນັ້ນ ຂ້ອຍຈຶ່ງພະຍາຍາມນັບຖືສິດອຳນາດຂອງຜົວເພາະຂ້ອຍຢາກເຮັດໃຫ້ພະເຢໂຫວາພໍໃຈໃນໂຕຂ້ອຍ.”

11. ອັນໃດຊ່ອຍໃຫ້ພີ່ນ້ອງແອັນນີດສ໌ຍົກໂທດໃຫ້ຄົນອື່ນ ແລະເຮົາໄດ້ຮຽນຫຍັງຈາກສິ່ງທີ່ລາວເວົ້າ?

¹¹ມັນຍາກທີ່ເມຍຈະນັບຖືສິດອຳນາດຂອງຜົວຖ້າລາວຮູ້ສຶກວ່າຜົວບໍ່ໄດ້ຄິດເຖິງຄວາມຮູ້ສຶກຂອງລາວ ແລະບໍ່ໃສ່ໃຈສິ່ງທີ່ລາວອຸກໃຈ. ຂໍໃຫ້ສັງເກດວ່າພີ່ນ້ອງແອັນນີດສ໌ໄດ້ເຮັດແນວໃດເມື່ອເຈິເລື່ອງແບບນີ້. ລາວບອກວ່າ: “ຂ້ອຍພະຍາຍາມທີ່ຈະບໍ່ຄຽດ. ຂ້ອຍເຂົ້າໃຈວ່າເຮົາທຸກຄົນເຮັດຜິດພາດ ສະນັ້ນຂ້ອຍຈຶ່ງຢາກຍົກໂທດໃຫ້ຄົນອື່ນຄືກັບພະເຢໂຫວາເຮັດ. ເມື່ອເຮັດແບບນັ້ນຂ້ອຍກໍຮູ້ສຶກສະບາຍໃຈຂຶ້ນ.” (ເພງ. 86:5) ເມື່ອເມຍຍົກໂທດໃຫ້ຜົວ ມັນກໍງ່າຍຂຶ້ນທີ່ລາວຈະນັບຖືສິດອຳນາດຂອງຜົວ.

ເຮົາໄດ້ບົດຮຽນຫຍັງຈາກເລື່ອງຂອງຄົນໃນຄຳພີໄບເບິນ?

12. ຄຳພີໄບເບິນມີຕົວຢ່າງຂອງຫຼາຍຄົນທີ່ເປັນແນວໃດ?

¹²ບາງຄົນອາດຮູ້ສຶກວ່າການນັບຖືສິດອຳນາດຂອງຄົນອື່ນເຮັດໃຫ້ເຂົາເຈົ້າເປັນຄົນອ່ອນແອ. ແຕ່ນັ້ນບໍ່ແມ່ນຄວາມຈິງ ເພາະຄຳພີໄບເບິນມີຕົວຢ່າງຂອງຫຼາຍຄົນທີ່ນັບຖືສິດອຳນາດຂອງຄົນອື່ນ ແຕ່ເຂົາເຈົ້າບໍ່ໄດ້ເປັນຄົນອ່ອນແອ. ໃຫ້ເຮົາມາເບິ່ງວ່າເຮົາໄດ້ຮຽນຫຍັງຈາກເລື່ອງຂອງພະເຢຊູ ອາບີຄາລີ ແລະມາຣີ.

13. ເປັນຫຍັງພະເຢຊູຈຶ່ງນັບຖືສິດອຳນາດຂອງພະເຢໂຫວາ? ຂໍໃຫ້ອະທິບາຍ.

¹³ພະເຢຊູ ນັບຖືສິດອຳນາດຂອງພະເຢໂຫວາ. ແຕ່ນີ້ບໍ່ໄດ້ໝາຍຄວາມວ່າພະເຢຊູເປັນຄົນບໍ່ສະຫຼາດຫຼືບໍ່ມີຄວາມສາມາດ. ຍ້ອນວ່າສິ່ງທີ່ເພິ່ນສອນເຂົ້າໃຈງ່າຍແລະຈະແຈ້ງເຊິ່ງສະແດງໃຫ້ເຫັນວ່າເພິ່ນເປັນຄົນສະຫຼາດ. (ຢຮ. 7:45, 46) ພະເຢໂຫວາເຫັນວ່າພະເຢຊູມີຄວາມສາມາດຫຼາຍ ເຖິງຂັ້ນໃຫ້ພະເຢຊູເຮັດວຽກກັບເພິ່ນໃນການສ້າງເອກະພົບ. (ສຸພາ. 8:30; ຮຣ. 1:2-4) ແລະຕອນທີ່ພະເຢຊູຄືນມາຈາກຕາຍ ພະເຢໂຫວາກໍມອບອຳນາດໃຫ້ເພິ່ນ “ປົກຄອງທຸກສິ່ງໃນສະຫວັນແລະໃນໂລກນີ້.” (ມທ. 28:18) ເຖິງພະເຢຊູຈະມີຄວາມສາມາດຫຼາຍ ແຕ່ເພິ່ນກໍຍັງຂໍຄຳຊີ້ນຳຈາກພະເຢໂຫວາພໍ່ຂອງເພິ່ນ. ຍ້ອນຫຍັງ? ຍ້ອນວ່າເພິ່ນຮັກພໍ່.—ຢຮ. 14:31

14. ຜົວໄດ້ບົດຮຽນຫຍັງຈາກ (ກ) ວິທີທີ່ພະເຢໂຫວາເບິ່ງຜູ້ຍິງ? (ຂ) ຄຳເວົ້າໃນສຸພາສິດ 31?

¹⁴ບົດຮຽນສຳລັບຜົວ: ພະເຢໂຫວາໃຫ້ເມຍນັບຖືສິດອຳນາດຂອງຜົວບໍ່ແມ່ນຍ້ອນເພິ່ນຖືວ່າຜູ້ຍິງຕ່ຳຕ້ອຍກວ່າຜູ້ຊາຍ. ເຮົາຮູ້ເລື່ອງນີ້ໄດ້ຍ້ອນພະເຢໂຫວາໄດ້ເລືອກທັງຜູ້ຍິງແລະຜູ້ຊາຍໃຫ້ຮ່ວມປົກຄອງກັບພະເຢຊູໃນສະຫວັນ. (ຄລຕ. 3:26-29) ພະເຢໂຫວາໄວ້ໃຈພະເຢຊູໂດຍມອບສິດອຳນາດໃຫ້ກັບເພິ່ນ. ຄ້າຍຄືກັນ ຜົວກໍຕ້ອງໄວ້ໃຈເມຍໂດຍໃຫ້ເມຍມີສິດອຳນາດໃນລະດັບໜຶ່ງ. ຄຳພີໄບເບິນເວົ້າເຖິງສິ່ງທີ່ເມຍທີ່ດີໄດ້ເຮັດເຊັ່ນ: ລາວເຮັດວຽກເຮືອນວຽກຊານ ຄ້າຂາຍ ແລະຈັດການເລື່ອງເງິນຢ່າງດີ. (ອ່ານສຸພາສິດ 31:15, 16, 18) ຜົວບໍ່ຄວນເບິ່ງວ່າເມຍເປັນຄືກັບທາດທີ່ບໍ່ມີສິດອອກຄຳຄິດເຫັນຫຍັງ ແຕ່ລາວຄວນໄວ້ໃຈເມຍແລະຟັງຄຳຄິດເຫັນຂອງເມຍ. (ອ່ານສຸພາສິດ 31:11, 26, 27) ຖ້າຜົວໃຫ້ກຽດເມຍ ເມຍກໍຈະມີຄວາມສຸກທີ່ໄດ້ນັບຖືແລະເຊື່ອຟັງຜົວ.

ເມຍທີ່ດີໄດ້ຮຽນຫຍັງຈາກຕົວຢ່າງຂອງພະເຢຊູໃນການນັບຖືສິດອຳນາດຂອງພະເຢໂຫວາ? (ເບິ່ງຂໍ້ 15)

15. ເມຍໄດ້ບົດຮຽນຫຍັງຈາກຕົວຢ່າງຂອງພະເຢຊູ?

¹⁵ບົດຮຽນສຳລັບເມຍ: ເຖິງວ່າພະເຢຊູຈະມີຄວາມສາມາດ ເພິ່ນກໍບໍ່ໄດ້ຄິດວ່າການນັບຖືສິດອຳນາດຂອງພະເຢໂຫວາຈະເຮັດໃຫ້ຮູ້ສຶກຕ່ຳຕ້ອຍ. (1 ກຣ. 15:28; ຟລປ. 2:5, 6) ຄ້າຍຄືກັນ ເມຍທີ່ເຮັດຕາມຕົວຢ່າງຂອງພະເຢຊູກໍຈະບໍ່ຄິດວ່າການນັບຖືສິດອຳນາດຂອງຜົວຈະເຮັດໃຫ້ຕົວເອງຮູ້ສຶກຕ່ຳຕ້ອຍ. ລາວນັບຖືຜົວບໍ່ພຽງແຕ່ຍ້ອນວ່າລາວຮັກຜົວ ແຕ່ຍ້ອນລາວຮັກແລະນັບຖືພະເຢໂຫວາ.

ຫຼັງຈາກກຽມອາຫານແລ້ວ ອາບີຄາລີກໍເອົາໄປໃຫ້ດາວິດກັບທະຫານຂອງລາວ. ຈາກນັ້ນ ອາບີຄາລີກໍຄູ້ເຂົ່າລົງຕໍ່ໜ້າດາວິດກັບທະຫານຂອງລາວແລະຂໍດາວິດບໍ່ໃຫ້ແກ້ແຄ້ນເຊິ່ງເປັນການເຮັດຜິດທີ່ຮ້າຍແຮງ (ເບິ່ງຂໍ້ 16)

16. ຕາມ 1 ຊາເມືອນ 25:3, 23-28 ອາບີຄາລີເຈິບັນຫາຫຍັງແດ່? (ເບິ່ງຮູບໜ້າປົກ)

¹⁶ຜົວຂອງອາບີຄາລີ ຊື່ນາບາລ. ນາບາລເປັນຄົນເຫັນແກ່ໂຕ ຍິ່ງຈອງຫອງ ແລະບໍ່ສຳນຶກບຸນຄຸນຂອງຄົນອື່ນ. ທີ່ຈິງອາບີຄາລີຈະຫາທາງປະຜົວກໍໄດ້ໂດຍໃຫ້ດາວິດກັບກອງທະຫານມາຈັດການຜົວລາວ. ແຕ່ລາວພັດບໍ່ໄດ້ເຮັດແບບນັ້ນ. ລາວໄດ້ເຮັດສິ່ງທີ່ປົກປ້ອງນາບາລແລະຄົນອື່ນໆໃນເຮືອນ. ລອງນຶກພາບວ່າ ລາວຕ້ອງກ້າຫານຫຼາຍສ່ຳໃດທີ່ຈະໄປເວົ້າກັບດາວິດດ້ວຍຄວາມນັບຖືຕໍ່ໜ້າທະຫານ 400 ຄົນທີ່ມີອາວຸດ ແລະລາວຍັງເຕັມໃຈຍອມຮັບຄວາມຜິດທຸກຢ່າງທີ່ຜົວລາວເຮັດ. (ອ່ານ 1 ຊາເມືອນ 25:3, 23-28) ດາວິດຮູ້ເລີຍວ່າພະເຢໂຫວາໃຊ້ຜູ້ຍິງທີ່ກ້າຫານຄົນນີ້ມາໃຫ້ຄຳແນະນຳລາວບໍ່ໃຫ້ເຮັດຜິດຮ້າຍແຮງ.

17. ຜົວໄດ້ບົດຮຽນຫຍັງຈາກເລື່ອງຂອງດາວິດກັບອາບີຄາລີ?

¹⁷ບົດຮຽນສຳລັບຜົວ: ອາບີຄາລີເປັນຜູ້ຍິງທີ່ສະຫຼາດແລະຮອບຄອບ. ດັ່ງນັ້ນດາວິດຈຶ່ງຟັງຄຳແນະນຳຂອງລາວ ແລະນີ້ຊ່ອຍໃຫ້ດາວິດບໍ່ໄດ້ຂ້າຄົນທີ່ບໍ່ມີຄວາມຜິດ. ຄ້າຍຄືກັນ ກ່ອນທີ່ຈະຕັດສິນໃຈເລື່ອງສຳຄັນຜົວກໍຕ້ອງຟັງຄຳຄິດເຫັນຂອງເມຍ ເພາະບາງເທື່ອຄຳຄິດເຫັນຂອງເມຍອາດຈະຊ່ອຍລາວບໍ່ໃຫ້ເຈິບັນຫາ.

18. ເມຍໄດ້ບົດຮຽນຫຍັງຈາກຕົວຢ່າງຂອງອາບີຄາລີ?

¹⁸ບົດຮຽນສຳລັບເມຍ: ເມຍທີ່ຮັກແລະນັບຖືພະເຢໂຫວາຈະຊ່ອຍຄອບຄົວໄດ້ ເຖິງວ່າຜົວຈະບໍ່ໄດ້ຮັບໃຊ້ພະເຢໂຫວາຫຼືບໍ່ໄດ້ເຮັດຕາມຫຼັກການໃນຄຳພີໄບເບິນ. ລາວຈະບໍ່ຫາທາງປະຜົວ ແຕ່ລາວຈະນັບຖືສິດອຳນາດຂອງຜົວ ແລະນີ້ອາດຈະກະຕຸ້ນຜົວໃຫ້ຢາກຮຽນຮູ້ເລື່ອງຂອງພະເຢໂຫວາ. (1 ປຕ. 3:1, 2) ເຖິງວ່າຕົວຢ່າງທີ່ດີຂອງເມຍຈະບໍ່ໄດ້ເຮັດໃຫ້ຜົວປ່ຽນກໍຕາມ ແຕ່ພະເຢໂຫວາກໍເຫັນຄ່າທີ່ລາວສັດຊື່ຕໍ່ເພິ່ນໂດຍນັບຖືສິດອຳນາດຂອງຜົວ.

19. ໃນກໍລະນີໃດທີ່ເມຍບໍ່ຄວນເຮັດຕາມຜົວບອກ?

¹⁹ເຖິງວ່າເມຍຈະນັບຖືສິດອຳນາດຂອງຜົວ ແຕ່ລາວຈະບໍ່ເຮັດຕາມສິ່ງທີ່ຜົວເວົ້າຖ້າສິ່ງນັ້ນຜິດກັບຫຼັກການໃນຄຳພີໄບເບິນເຊັ່ນ: ຜົວທີ່ບໍ່ເຊື່ອໃນພະເຢໂຫວາອາດຈະບອກລາວໃຫ້ຕົວະ ລັກ ຫຼືເຮັດສິ່ງຕ່າງໆທີ່ພະເຢໂຫວາບໍ່ພໍໃຈ. ຄລິດສະຕຽນທຸກຄົນລວມທັງຜູ້ຍິງທີ່ແຕ່ງດອງແລ້ວຕ້ອງເຊື່ອຟັງພະເຢໂຫວາກ່ອນ. ຖ້າມີໃຜບອກໃຫ້ພີ່ນ້ອງຍິງເຮັດຜິດຫຼັກການໃນພະຄຳພີ ລາວຄວນປະຕິເສດຢ່າງໜັກແໜ້ນ ແຕ່ອະທິບາຍຢ່າງອ່ອນໂຍນວ່າເປັນຫຍັງລາວບໍ່ເຮັດແບບນັ້ນ.—ກຈກ. 5:29

ເບິ່ງຂໍ້ 20 *

20. ເຮົາຮູ້ໄດ້ແນວໃດວ່າມາຣີມີສາຍສຳພັນທີ່ໃກ້ຊິດກັບພະເຢໂຫວາ?

²⁰ມາຣີ ມີສາຍສຳພັນທີ່ໃກ້ຊິດກັບພະເຢໂຫວາ ລາວຮູ້ຈັກຂໍ້ພະຄຳພີເປັນຢ່າງດີ. ລາວໄດ້ເວົ້າເຖິງຂໍ້ພະຄຳພີພາກພາສາເຮັບເຣີຫຼາຍກວ່າ 20 ເທື່ອຕອນທີ່ລົມກັບເອລີຊາເບັດແມ່ຂອງໂຢຮັນຜູ້ໃຫ້ບັບເຕມາ. (ລກ. 1:46-55) ຂໍໃຫ້ຄິດເຖິງເຫດການນີ້: ເຖິງວ່າມາຣີຈະໝັ້ນກັບໂຢເຊັບແລ້ວ ແຕ່ທູດສະຫວັນກໍມາຫາມາຣີກ່ອນແລະບອກລາວວ່າເຈົ້າຫາຈະຖືພາແລະເກີດລູກຊາຍທີ່ເປັນລູກຂອງພະເຈົ້າ. (ລກ. 1:26-33) ພະເຢໂຫວາຮູ້ຈັກມາຣີເປັນຢ່າງດີແລະໝັ້ນໃຈວ່າລາວຈະຮັກແລະເບິ່ງແຍງລູກຂອງເພິ່ນ ແລະເຮົາກໍໝັ້ນໃຈວ່າຫຼັງຈາກທີ່ພະເຢຊູຕາຍແລະຖືກປຸກໃຫ້ໄປສະຫວັນ ມາຣີກໍຍັງມີສາຍສຳພັນທີ່ໃກ້ຊິດກັບພະເຢໂຫວາຕໍ່ໆໄປ.—ກຈກ. 1:14

21. ຜົວໄດ້ບົດຮຽນຫຍັງຈາກເລື່ອງຂອງມາຣີ?

²¹ບົດຮຽນສຳລັບຜົວ: ຜົວຈະດີໃຈທີ່ເຫັນວ່າເມຍຮູ້ຈັກຂໍ້ພະຄຳພີເປັນຢ່າງດີ. ລາວບໍ່ໄດ້ຢ້ານເມຍລື່ນແລະຄິດວ່າເມຍຢາກເປັນຫົວໜ້າຄອບຄົວ. ລາວຮູ້ວ່າຖ້າເມຍຮູ້ຈັກຫຼັກການໃນຄຳພີໄບເບິນຢ່າງດີເມຍກໍຈະຊ່ອຍຄອບຄົວໄດ້. ເຖິງວ່າເມຍຈະມີຄວາມຮູ້ຫຼາຍກວ່າຜົວ ແຕ່ຜົວກໍຍັງເປັນຜູ້ນຳໃນເລື່ອງການນະມັດສະການພະເຢໂຫວາເຊັ່ນ: ຜົວຈະເປັນຜູ້ຈັດການນະມັດສະການປະຈຳຄອບຄົວ.—ອຟຊ. 6:4

ເມຍໄດ້ຮຽນຫຍັງຈາກຕົວຢ່າງຂອງມາຣີແມ່ຂອງພະເຢຊູໃນການສຶກສາຄຳພີໄບເບິນແລະຄິດຕຶກຕອງ? (ເບິ່ງຂໍ້ 22) *

22. ເມຍໄດ້ບົດຮຽນຫຍັງຈາກຕົວຢ່າງຂອງມາຣີ?

²²ບົດຮຽນສຳລັບເມຍ: ເມຍຕ້ອງນັບຖືສິດອຳນາດຂອງຜົວ. ແຕ່ລາວກໍຕ້ອງຊ່ອຍຕົວເອງໃຫ້ມີຄວາມເຊື່ອທີ່ເຂັ້ມແຂງຢູ່ສະເໝີ. (ຄລຕ. 6:5) ເພື່ອຈະເຮັດແບບນັ້ນໄດ້ ລາວຕ້ອງຈັດເວລາສຶກສາສ່ວນຕົວແລະຄິດຕຶກຕອງ. ນີ້ຈະຊ່ອຍລາວໃຫ້ຮັກແລະນັບຖືພະເຢໂຫວາແລະມີຄວາມສຸກໃນການນັບຖືສິດອຳນາດຂອງຜົວ.

23. ເມຍທີ່ນັບຖືສິດອຳນາດຂອງຜົວຈະເຮັດໃຫ້ຄອບຄົວ ປະຊາຄົມແລະຕົວເອງໄດ້ຮັບປະໂຫຍດແນວໃດ?

²³ເມຍທີ່ນັບຖືສິດອຳນາດຂອງຜົວຍ້ອນຮັກພະເຢໂຫວາຈະມີຄວາມສຸກແລະຄວາມອີ່ມໃຈພໍໃຈຫຼາຍກວ່າເມຍທີ່ບໍ່ໄດ້ເຮັດຕາມຄວາມຕ້ອງການຂອງພະເຢໂຫວາ. ເມຍທີ່ເຊື່ອຟັງຜົວເປັນຕົວຢ່າງທີ່ດີໃຫ້ທັງຜູ້ຍິງແລະຜູ້ຊາຍທີ່ຍັງໜຸ່ມ. ແລະເຂົາເຈົ້າຍັງຊ່ອຍໃຫ້ທັງຄອບຄົວແລະປະຊາຄົມມີຄວາມສຸກ. (ຕຕ. 2:3-5) ໃນປັດຈຸບັນຜູ້ຮັບໃຊ້ທີ່ສັດຊື່ຂອງພະເຢໂຫວາສ່ວນຫຼາຍກໍເປັນຜູ້ຍິງ. (ເພງ. 68:11) ເຮົາທຸກຄົນບໍ່ວ່າຈະເປັນຜູ້ຍິງຫຼືຜູ້ຊາຍກໍມີສ່ວນຊ່ອຍໃຫ້ປະຊາຄົມມີຄວາມສຸກ. ໃນບົດຄວາມຕໍ່ໄປເຮົາຈະມາເບິ່ງວ່າເຮົາແຕ່ລະຄົນມີໜ້າທີ່ຮັບຜິດຊອບຫຍັງ.

ເພງ 131 “ພະເຈົ້າໄດ້ເຮັດໃຫ້ຜູກພັນກັນແລ້ວ”

^ ຂໍ້ 5 ພະເຢໂຫວາຕ້ອງການໃຫ້ຜູ້ຍິງທີ່ແຕ່ງດອງແລ້ວນັບຖືສິດອຳນາດຂອງຜົວ. ແຕ່ການນັບຖືສິດອຳນາດໝາຍຄວາມວ່າແນວໃດ? ຜົວເມຍຄລິດສະຕຽນສາມາດຮຽນເລື່ອງນີ້ໄດ້ຈາກຕົວຢ່າງຂອງພະເຢຊູແລະເລື່ອງຂອງຜູ້ຍິງຄົນອື່ນໆທີ່ຢູ່ໃນຄຳພີໄບເບິນ.

^ ຂໍ້ 68 ຄຳອະທິບາຍຮູບພາບ: ຕອນທີ່ມາຣີລົມກັບເອລີຊາເບັດແມ່ຂອງໂຢຮັນຜູ້ໃຫ້ຮັບບັບເຕມາ ມາຣີໄດ້ເວົ້າເຖິງຂໍ້ຄຳພີຫຼາຍຂໍ້ຈາກພະຄຳພີພາກພາສາເຮັບເຣີ.

^ ຂໍ້ 70 ຄຳອະທິບາຍຮູບພາບ: ເພື່ອຈະມີຄວາມເຊື່ອທີ່ເຂັ້ມແຂງ ເມຍທີ່ເປັນຄລິດສະຕຽນກໍຕ້ອງຈັດເວລາສຶກສາຄຳພີໄບເບິນເປັນສ່ວນຕົວ.

ຫໍສັງເກດການສະບັບສຶກສາ