ບົດຄວາມສຶກສາທີ 36
ຄົນຂອງພະເຢໂຫວາຮັກຄວາມຖືກຕ້ອງຊອບທຳ
“ຄົນທີ່ຫິວກະຫາຍຢາກເຫັນຄວາມຍຸຕິທຳ [ຄວາມຖືກຕ້ອງຊອບທຳ, ໄຂເງື່ອນ] ກໍມີຄວາມສຸກ.”—ມທ. 5:6
ເພງ 9 ພະເຢໂຫວາເປັນກະສັດຂອງພວກເຮົາ!
ໃຈຄວາມສຳຄັນ a
1. ໂຢເຊັບເຈິການລໍ້ໃຈຫຍັງ ແລະລາວໄດ້ເຮັດແນວໃດ?
ໂຢເຊັບລູກຂອງຢາໂຄບເຈິການລໍ້ໃຈທີ່ຍາກຫຼາຍ ເພາະເມຍຂອງໂປຕີຟາເຊິ່ງເປັນນາຍຂອງລາວໄດ້ຊວນລາວວ່າ: “ມາແມ້ ມານອນນຳຂ້ອຍ.” ແຕ່ໂຢເຊັບບໍ່ໄດ້ເຮັດຕາມທີ່ລາວບອກ. ບາງຄົນໃນທຸກມື້ນີ້ອາດຈະຄິດວ່າ: ‘ເປັນຫຍັງໂຢເຊັບຈຶ່ງບໍ່ເຮັດຕາມທີ່ເມຍຂອງໂປຕີຟາບອກ?’ ທັງໆທີ່ໂປຕີຟາກໍບໍ່ໄດ້ຢູ່ເຮືອນ. ແລະໂຢເຊັບກໍເປັນທາດໃນເຮືອນນັ້ນ ຖ້າບໍ່ເຮັດຕາມທີ່ເມຍນາຍບອກ ລາວຕ້ອງມີບັນຫາແທ້ໆ. ເຖິງວ່າເມຍຂອງໂປຕີຟາຈະຊວນໂຢເຊັບມານອນນຳຫຼາຍເທື່ອແລ້ວ ແຕ່ລາວກໍປະຕິເສດ. ຍ້ອນຫຍັງ? ລາວບອກວ່າ: “ຂ້ອຍຈະເຮັດຊົ່ວແບບນີ້ແລະເຮັດບາບຕໍ່ພະເຈົ້າບໍ່ໄດ້.”—ປຖກ. 39:7-12, ລ.ມ.
2. ໂຢເຊັບຮູ້ໄດ້ແນວໃດວ່າການຫຼິ້ນຊູ້ເປັນການເຮັດບາບຕໍ່ພະເຈົ້າ?
2 ໂຢເຊັບຮູ້ໄດ້ແນວໃດວ່າພະເຢໂຫວາຖືວ່າການຫຼິ້ນຊູ້ເປັນການກະທຳທີ່ “ຊົ່ວ” ແລະເຮັດບາບຕໍ່ພະເຈົ້າໃນເມື່ອກົດໝາຍຂອງໂມເຊທີ່ບອກຢ່າງຈະແຈ້ງວ່າ “ຫ້າມຫຼິ້ນຊູ້” ໄດ້ຂຽນຫຼັງຈາກສະໄໝຂອງລາວ 200 ປີຕໍ່ມາ. (ອພຍ. 20:14, ລ.ມ.) ຍ້ອນໂຢເຊັບຮູ້ຈັກພະເຢໂຫວາດີ ລາວຈຶ່ງຮູ້ວ່າພະເຢໂຫວາບໍ່ມັກການຫຼິ້ນຊູ້. ລາວຮູ້ວ່າພະເຢໂຫວາໄດ້ຈັດໃຫ້ມີການແຕ່ງດອງໂດຍມີຜົວໜຶ່ງເມຍດຽວ. ລາວໄດ້ຍິນເລື່ອງທີ່ພະເຢໂຫວາເຄີຍຊ່ວຍຊາຣາແມ່ຕູ້ທວດຂອງລາວເຖິງສອງເທື່ອເພື່ອຊ່ວຍໃຫ້ຊາຣາຮັກສາຄວາມສັດຊື່ຕໍ່ອັບຣາຮາມໄດ້. ແລະພະເຢໂຫວາກໍໄດ້ຊ່ວຍເຣເບກາແມ່ຕູ້ຂອງລາວໃນແບບດຽວກັນນີ້. (ປຖກ. 2:24; 12:14-20; 20:2-7; 26:6-11) ເມື່ອໂຢເຊັບຄິດຕຶກຕອງໃນເລື່ອງເຫຼົ່ານີ້ ລາວກໍເຂົ້າໃຈວ່າພະເຢໂຫວາຖືວ່າສິ່ງໃດຖືກແລະສິ່ງໃດຜິດ. ຍ້ອນໂຢເຊັບຮັກພະເຢໂຫວາແລະຮັກຄວາມຖືກຕ້ອງຊອບທຳຂອງເພິ່ນ ລາວຈຶ່ງເຮັດຕາມທີ່ເພິ່ນຕ້ອງການ.
3. ເຮົາຈະຮຽນຫຍັງໃນບົດຄວາມນີ້?
3 ເຈົ້າອາດຮັກຄວາມຖືກຕ້ອງຊອບທຳຂອງພະເຢໂຫວາຄືກັບໂຢເຊັບ. ແຕ່ຍ້ອນເຮົາບໍ່ສົມບູນແບບ ຄວາມຖືກຕ້ອງຊອບທຳແບບຄົນໃນໂລກນີ້ກໍອາດຈະສົ່ງຜົນຕໍ່ເຮົາ. (ເອຊາ. 5:20; ໂຣມ 12:2) ໃນບົດຄວາມນີ້ເຮົາຈະມາເບິ່ງວ່າ ຄວາມຖືກຕ້ອງຊອບທຳແມ່ນຫຍັງ? ແລະເຮົາຈະໄດ້ຮັບປະໂຫຍດຫຍັງຈາກການເຮັດສິ່ງທີ່ຖືກຕ້ອງຊອບທຳ? ແລະມີ 3 ຢ່າງຫຍັງແດ່ທີ່ຈະຊ່ວຍເຮົາໃຫ້ຮັກຄວາມຖືກຕ້ອງຊອບທຳໃຫ້ຫຼາຍຂຶ້ນ?
ຄວາມຖືກຕ້ອງຊອບທຳແມ່ນຫຍັງ?
4. ຄົນທີ່ເຮັດຕາມສິ່ງທີ່ພະເຢໂຫວາຖືວ່າຖືກຕ້ອງຊອບທຳຈະບໍ່ເປັນຄົນແບບໃດ?
4 ຕອນທີ່ພະເຢຊູຢູ່ໃນໂລກນີ້ ເພິ່ນໄດ້ຕຳໜິພວກຫົວໜ້າສາສະໜາຢ່າງຮຸນແຮງ ຍ້ອນເຂົາເຈົ້າວິພາກວິຈານຄົນອື່ນແລະຕັ້ງກົດເອົາເອງວ່າອັນໃດຖືກອັນໃດຜິດ. (ຜູ້ປ. 7:16; ລກ. 16:15) ບາງຄົນໃນທຸກມື້ນີ້ກໍເປັນແບບນັ້ນ ເຂົາເຈົ້າຖືວ່າຕົວເອງສຳຄັນ ມັກວິພາກວິຈານຄົນອື່ນ ແລະຄິດວ່າຕົວເອງດີກວ່າຄົນອື່ນ. ແຕ່ພະເຢໂຫວາບໍ່ມັກຄົນແບບນີ້ ແລະຄົນທີ່ເຮັດຕາມສິ່ງທີ່ພະເຢໂຫວາຖືວ່າຖືກຕ້ອງຊອບທຳກໍຈະບໍ່ຄິດວ່າຕົວເອງດີກວ່າຄົນອື່ນ.
5. ຄວາມຖືກຕ້ອງຊອບທຳໃນຄຳພີໄບເບິນໝາຍເຖິງຫຍັງ? ຂໍໃຫ້ຍົກຕົວຢ່າງ.
5 ຄວາມຖືກຕ້ອງຊອບທຳເປັນຄຸນລັກສະນະທີ່ດີເຊິ່ງເວົ້າງ່າຍໆກໍຄື ຄວາມຖືກຕ້ອງຊອບທຳໝາຍເຖິງການເຮັດຕາມສິ່ງທີ່ພະເຢໂຫວາຖືວ່າຖືກຕ້ອງ. ໃນຄຳພີໄບເບິນ ຄຳວ່າຖືກຕ້ອງຊອບທຳໝາຍເຖິງການໃຊ້ຊີວິດຕາມມາດຕະຖານອັນສູງສົ່ງເຊິ່ງກໍຄື ມາດຕະຖານຂອງພະເຢໂຫວາ. ຕົວຢ່າງເຊັ່ນ ພະເຢໂຫວາບອກວ່າພວກພໍ່ຄ້າຄວນໃຊ້ “ຊິງທີ່ມັນທ່ຽງ” (ພບຍ. 25:15, ລ.ມ.) ຄຳວ່າ “ທ່ຽງ” ຫຼື ສັດຊື່ ໃນພາສາເຮັບເຣີບູຮານຍັງສາມາດແປໄດ້ວ່າ “ຖືກຕ້ອງ.” ດັ່ງນັ້ນ ຄລິດສະຕຽນທີ່ຢາກເຮັດສິ່ງທີ່ພະເຢໂຫວາຖືວ່າຖືກຕ້ອງຈະສັດຊື່ໃນການເຮັດທຸລະກິດທຸກຢ່າງ. ນອກຈາກນັ້ນ ລາວຍັງກຽດຊັງຄວາມບໍ່ຍຸຕິທຳ ແລະບໍ່ມັກເມື່ອເຫັນບາງຄົນເຮັດສິ່ງທີ່ບໍ່ຍຸຕິທຳ ແລະເພື່ອຈະ “ເຮັດໃຫ້ພະເຢໂຫວາພໍໃຈສະເໝີ” ລາວຈະຄິດກ່ອນວ່າພະເຢໂຫວາຄິດແນວໃດກັບການຕັດສິນໃຈຂອງລາວ.—ກລຊ. 1:10
6. ເປັນຫຍັງເຮົາຈຶ່ງໝັ້ນໃຈວ່າມາດຕະຖານຂອງພະເຢໂຫວາດີທີ່ສຸດ? (ເອຊາອີ 55:8, 9)
6 ຄຳພີໄບເບິນບອກວ່າຄວາມຖືກຕ້ອງຊອບທຳມາຈາກພະເຢໂຫວາ ແລະ “ຄວາມຖືກຕ້ອງຊອບທຳ . . . ເປັນຮາກຖານແຫ່ງບັນລັງຂອງພະອົງ.” (ເພງ. 89:14, ລ.ມ.) ຍ້ອນພະເຢໂຫວາເປັນຜູ້ສ້າງ ເພິ່ນຈຶ່ງເປັນຜູ້ດຽວທີ່ມີສິດຕັ້ງມາດຕະຖານວ່າອັນໃດຖືກອັນໃດຜິດ. ນອກຈາກນັ້ນ ພະເຢໂຫວາຍັງເປັນພະເຈົ້າທີ່ສົມບູນແບບ ເພິ່ນຈຶ່ງຮູ້ດີວ່າອັນໃດຖືກອັນໃດຜິດ ເຊິ່ງຕ່າງຈາກເຮົາທີ່ເປັນມະນຸດບໍ່ສົມບູນແບບແລະມີບາບ ເຮົາບໍ່ສາມາດຮູ້ໄດ້ແທ້ໆວ່າອັນໃດຖືກອັນໃດຜິດ. (ສຸພາ. 14:12; ອ່ານເອຊາອີ 55:8, 9) ຍ້ອນເຮົາຖືກສ້າງຕາມແບບຂອງພະເຢໂຫວາ ເຮົາຈຶ່ງສາມາດໃຊ້ຊີວິດຕາມມາດຕະຖານເລື່ອງຄວາມຖືກຕ້ອງຊອບທຳຂອງພະເຢໂຫວາໄດ້. (ປຖກ. 1:27) ແລະຍ້ອນເຮົາຮັກພະເຢໂຫວາ ເຮົາຈຶ່ງຢາກຮຽນແບບເພິ່ນແລະເຮັດຕາມສິ່ງທີ່ເພິ່ນຕ້ອງການ.—ອຟຊ. 5:1
7. ເປັນຫຍັງເຮົາຕ້ອງມີມາດຕະຖານທີ່ເຊື່ອຖືໄດ້? ຂໍໃຫ້ຍົກຕົວຢ່າງ.
7 ເຮົາຈະໄດ້ຮັບປະໂຫຍດຫຼາຍຖ້າເຮົາເຮັດຕາມມາດຕະຖານຂອງພະເຢໂຫວາທີ່ບອກວ່າອັນໃດຖືກອັນໃດຜິດ. ຍ້ອນຫຍັງ? ລອງນຶກພາບວ່າຈະເກີດຫຍັງຂຶ້ນຖ້າທຸກໆທະນາຄານກຳນົດມູນຄ່າຂອງເງິນຕາເອົາເອງ ຫຼືບໍລິສັດກໍ່ສ້າງແຕ່ລະແຫ່ງກຳນົດມາດຕະຖານການວັດແທກເອົາເອງ ມັນຄືຊິສັບສົນວຸ່ນວາຍແທ້ໆ! ຫຼືຖ້າແພດໝໍບໍ່ໄດ້ປິ່ນປົວຕາມຫຼັກການທາງການແພດເດ ອາດຈະເຮັດໃຫ້ຄົນເຈັບເສຍຊີວິດກໍໄດ້. ເຫັນໄດ້ວ່າ ການມີມາດຕະຖານດຽວທີ່ເຊື່ອຖືໄດ້ຈະຊ່ວຍປົກປ້ອງເຮົາ ມາດຕະຖານຂອງພະເຢໂຫວາທີ່ບອກວ່າອັນໃດຖືກອັນໃດຜິດກໍຈະຊ່ວຍປົກປ້ອງເຮົາຄືກັນ.
8. ຜູ້ທີ່ເຮັດຕາມມາດຕະຖານຂອງພະເຢໂຫວາຈະໄດ້ຮັບສິ່ງທີ່ດີຫຍັງແດ່?
8 ພະເຢໂຫວາອວຍພອນຜູ້ທີ່ພະຍາຍາມໃຊ້ຊີວິດຕາມມາດຕະຖານຂອງເພິ່ນ. ເພິ່ນສັນຍາວ່າ: “ຄົນດີຈະໄດ້ຢູ່ໃນໂລກ ພວກເຂົາຈະໄດ້ຢູ່ໃນໂລກຕະຫຼອດໄປ.” (ເພງ. 37:29, ລ.ມ.) ລອງນຶກພາບວ່າ ຖ້າທຸກຄົນເຮັດຕາມມາດຕະຖານຂອງພະເຢໂຫວາ ເຂົາເຈົ້າຈະມີຄວາມສຸກ ສະຫງົບສຸກ ແລະເປັນນ້ຳໜຶ່ງໃຈດຽວກັນຫຼາຍສ່ຳໃດ. ພະເຢໂຫວາຢາກໃຫ້ເຈົ້າມີຊີວິດທີ່ມີຄວາມສຸກແບບນັ້ນແຫຼະ! ດັ່ງນັ້ນ ເຮົາຈຶ່ງມີເຫດຜົນທີ່ຈະຮັກມາດຕະຖານຂອງພະເຢໂຫວາໃນເລື່ອງຄວາມຖືກຕ້ອງຊອບທຳ. ໃຫ້ເຮົາມາເບິ່ງ 3 ຢ່າງທີ່ຊ່ວຍເຮົາໃຫ້ຮັກມາດຕະຖານຂອງພະເຢໂຫວາຫຼາຍຂຶ້ນ.
ສິ່ງທີ່ຊ່ວຍເຮົາໃຫ້ຮັກມາດຕະຖານຂອງພະເຢໂຫວາຫຼາຍຂຶ້ນ
9. ສິ່ງໃດຈະຊ່ວຍເຮົາໃຫ້ຮັກຄວາມຖືກຕ້ອງຊອບທຳ?
9 ຢ່າງທີ 1: ຮັກຜູ້ທີ່ຕັ້ງມາດຕະຖານ. ເພື່ອທີ່ເຮົາຈະຮັກຄວາມຖືກຕ້ອງຊອບທຳ ເຮົາກໍຕ້ອງຮັກພະເຢໂຫວາຜູ້ທີ່ຕັ້ງມາດຕະຖານວ່າອັນໃດຖືກອັນໃດຜິດ. ແຮ່ງເຮົາຮັກພະເຢໂຫວາຫຼາຍເທົ່າໃດ ເຮົາກໍແຮ່ງຢາກຈະໃຊ້ຊີວິດຕາມມາດຕະຖານຂອງເພິ່ນຫຼາຍເທົ່ານັ້ນ. ເຮົາເຫັນເລື່ອງນີ້ໄດ້ຈາກຕົວຢ່າງຂອງອາດາມແລະເອວາ ຖ້າເຂົາເຈົ້າຮັກພະເຢໂຫວາ ເຂົາເຈົ້າກໍຄືຊິເຊື່ອຟັງກົດໝາຍຂອງເພິ່ນ.—ປຖກ. 3:1-6, 16-19
10. ອັບຣາຮາມໄດ້ເຮັດຫຍັງເພື່ອຈະເຂົ້າໃຈຄວາມຄິດຂອງພະເຢໂຫວາຫຼາຍຂຶ້ນ?
10 ຖ້າເຮົາບໍ່ຢາກເຮັດຜິດຄືກັບອາດາມແລະເອວາ ເຮົາກໍຕ້ອງຮຽນຮູ້ກ່ຽວກັບພະເຢໂຫວາແລະຄຸນລັກສະນະຕ່າງໆຂອງເພິ່ນ ແລະພະຍາຍາມເຂົ້າໃຈວ່າພະເຢໂຫວາຄິດແນວໃດຕໍ່ເລື່ອງຕ່າງໆ. ເມື່ອເຮົາເຮັດແບບນັ້ນ ເຮົາກໍຈະຮັກພະເຢໂຫວາຫຼາຍຂຶ້ນ. ໃຫ້ເຮົາມາເບິ່ງຕົວຢ່າງຂອງອັບຣາຮາມ. ລາວຮັກພະເຢໂຫວາແທ້ໆ ເຖິງວ່າລາວຈະບໍ່ເຂົ້າໃຈການຕັດສິນໃຈຂອງພະເຢໂຫວາ ແຕ່ລາວກໍພະຍາຍາມເຊື່ອຟັງເພິ່ນແລະຮູ້ຈັກເພິ່ນໃຫ້ດີຂຶ້ນ. ຕົວຢ່າງເຊັ່ນ ເມື່ອລາວຮູ້ວ່າພະເຢໂຫວາຕັດສິນໃຈຈະທຳລາຍເມືອງໂຊໂດມແລະເມືອງໂກໂມຣາ ທຳອິດລາວກໍຢ້ານວ່າພະເຢໂຫວາ “ຜູ້ຕັດສິນທົ່ວໂລກ” ຈະທຳລາຍຄົນດີໄປພ້ອມກັບຄົນຊົ່ວ. ແຕ່ເລິກໆແລ້ວອັບຣາຮາມກໍຮູ້ວ່າພະເຢໂຫວາຄືຊິບໍ່ເຮັດແບບນັ້ນ ລາວຈຶ່ງໄດ້ຖາມເພິ່ນຫຼາຍເທື່ອ ແລະພະເຢໂຫວາກໍໄດ້ອົດທົນຟັງແລະຕອບລາວ. ໃນທີ່ສຸດ ອັບຣາຮາມກໍໄດ້ຮູ້ວ່າ ພະເຢໂຫວາຮູ້ຈັກມະນຸດແຕ່ລະຄົນດີແລະເພິ່ນຈະບໍ່ທຳລາຍຄົນດີໄປພ້ອມກັບຄົນຊົ່ວ.—ປຖກ. 18:20-32
11. ອັບຣາຮາມສະແດງໃຫ້ເຫັນແນວໃດວ່າລາວຮັກແລະໄວ້ໃຈພະເຢໂຫວາ?
11 ຕັ້ງແຕ່ອັບຣາຮາມໄດ້ລົມກັບພະເຢໂຫວາກ່ຽວກັບເມືອງໂຊໂດມກັບເມືອງໂກໂມຣາ ລາວກໍຮູ້ຈັກພະເຢໂຫວາ ຮັກແລະນັບຖືເພິ່ນຫຼາຍກວ່າເກົ່າ. ຫຼາຍປີຕໍ່ມາ ອັບຣາຮາມກໍເຈິເລື່ອງທີ່ຍາກທີ່ຈະໄວ້ໃຈພະເຢໂຫວາ. ພະເຢໂຫວາໄດ້ຂໍໃຫ້ລາວຖວາຍອີຊາກເປັນເຄື່ອງບູຊາ. ແຕ່ຍ້ອນເທື່ອນີ້ອັບຣາຮາມຮູ້ຈັກພະເຢໂຫວາດີລາວຈຶ່ງໄດ້ເຮັດຕາມທີ່ພະເຢໂຫວາບອກໂດຍບໍ່ໄດ້ຖາມຫຍັງເລີຍ. ລອງນຶກພາບເບິ່ງວ່າອັບຣາຮາມຈະຮູ້ສຶກເຈັບປວດໃຈຫຼາຍສ່ຳໃດຕອນທີ່ກຽມເຄື່ອງບູຊາ! ລາວຄືຊິຄິດຢ່າງເລິກເຊິ່ງກ່ຽວກັບຄຸນລັກສະນະຕ່າງໆຂອງພະເຢໂຫວາແລະຮູ້ວ່າພະເຢໂຫວາບໍ່ມີທາງເຮັດສິ່ງທີ່ບໍ່ຖືກຕ້ອງແລະບໍ່ສະແດງຄວາມຮັກຕໍ່ລາວ. ໂປໂລໄດ້ເວົ້າເຖິງອັບຣາຮາມວ່າ ອັບຣາຮາມຄິດເຖິງຄຳສັນຍາທີ່ພະເຢໂຫວາບອກວ່າລູກຫຼານຂອງອີຊາກຈະກາຍເປັນຊົນຊາດໃຫຍ່ທັງໆທີ່ຕອນນັ້ນອີກຊາກກໍຍັງບໍ່ມີລູກເທື່ອ ແຕ່ອັບຣາຮາມກໍໝັ້ນໃຈວ່າພະເຢໂຫວາຈະປຸກອີຊາກໃຫ້ຄືນມາຈາກຕາຍ. (ຮຣ. 11:17-19) ຍ້ອນອັບຣາຮາມຮັກພະເຢໂຫວາ ລາວຈຶ່ງໝັ້ນໃຈວ່າພະເຢໂຫວາຈະເຮັດສິ່ງທີ່ຖືກຕ້ອງຊອບທຳສະເໝີ. ດັ່ງນັ້ນ ລາວຈຶ່ງເຊື່ອຟັງພະເຢໂຫວາແລະເຮັດຕາມຄຳສັ່ງຂອງເພິ່ນເຖິງວ່າຈະເປັນເລື່ອງຍາກ.—ປຖກ. 22:1-12
12. ເຮົາຈະຮຽນແບບອັບຣາຮາມໄດ້ແນວໃດ? (ຄຳເພງ 73:28)
12 ເຮົາຈະຮຽນແບບອັບຣາຮາມໄດ້ແນວໃດ? ເຮົາຕ້ອງຮຽນຮູ້ກ່ຽວກັບພະເຢໂຫວາຕໍ່ໆໄປ. ເມື່ອເຮົາເຮັດແບບນັ້ນ ເຮົາກໍຈະຮັກແລະໃກ້ຊິດກັບພະເຢໂຫວາຫຼາຍຂຶ້ນ. (ອ່ານຄຳເພງ 73:28) ນອກຈາກນັ້ນ ໃຈຮູ້ຜິດ ຮູ້ຖືກ ຂອງເຮົາກໍຈະໄດ້ຮັບການຝຶກຈາກພະເຈົ້າ. (ຮຣ. 5:14) ເມື່ອມີຄົນມາລໍ້ໃຈເຮົາໃຫ້ເຮັດຜິດເຮົາກໍຈະປະຕິເສດໄດ້ ແລະເຮົາກໍຈະບໍ່ຄິດຫຼືເຮັດສິ່ງໃດກໍຕາມທີ່ເຮັດໃຫ້ພະເຢໂຫວາເສຍໃຈຫຼືທຳລາຍສາຍສຳພັນຂອງເຮົາກັບເພິ່ນ. ແລ້ວມີຫຍັງອີກທີ່ຈະຊ່ວຍເຮົາໃຫ້ຮັກຄວາມຖືກຕ້ອງຊອບທຳ?
13. ເຮົາຈະພະຍາຍາມເຮັດສິ່ງທີ່ຖືກຕ້ອງຊອບທຳໄດ້ແນວໃດ? (ສຸພາສິດ 15:9)
13 ຢ່າງທີ 2: ພະຍາຍາມທີ່ຈະຮັກຄວາມຖືກຕ້ອງຊອບທຳທຸກມື້. ຖ້າເຮົາຢາກໃຫ້ກ້າມເນື້ອຂອງເຮົາແຂງແຮງ ເຮົາກໍຕ້ອງອອກກຳລັງກາຍທຸກມື້. ຄ້າຍຄືກັນ ຖ້າເຮົາຢາກຮັກມາດຕະຖານຂອງພະເຢໂຫວາໃນເລື່ອງຄວາມຖືກຕ້ອງຊອບທຳຫຼາຍຂຶ້ນ ເຮົາກໍຕ້ອງອອກຄວາມພະຍາຍາມເລື້ອຍໆ. ການເຮັດແບບນີ້ບໍ່ໄດ້ຍາກເກີນໄປ. ພະເຢໂຫວາເປັນພະເຈົ້າທີ່ມີເຫດຜົນ ແລະເພິ່ນກໍບໍ່ເຄີຍຄາດໝາຍໃນສິ່ງທີ່ເຮົາເຮັດບໍ່ໄດ້. (ເພງ. 103:14) ເພິ່ນຮັບຮອງກັບເຮົາວ່າ ເພິ່ນ “ຮັກຄົນທີ່ພະຍາຍາມ ເຮັດສິ່ງທີ່ຖືກຕ້ອງ.” (ອ່ານສຸພາສິດ 15:9, ລ.ມ.) b ຖ້າເຮົາມີເປົ້າໝາຍໃນການຮັບໃຊ້ພະເຢໂຫວາ ເຮົາກໍຈະພະຍາຍາມເຮັດຕາມເປົ້າໝາຍນັ້ນໃຫ້ສຳເລັດ. ຄ້າຍກັນ ຖ້າເຮົາພະຍາຍາມເຮັດສິ່ງທີ່ຖືກຕ້ອງ ພະເຢໂຫວາກໍຈະຊ່ວຍເຮົາໃຫ້ເຮັດໄດ້ຕໍ່ໆໄປ.—ເພງ. 84:5, 7
14. “ເສື້ອເກາະປ້ອງກັນເອິກ” ໝາຍເຖິງຫຍັງ? ແລະເປັນຫຍັງເຮົາຕ້ອງໃສ່ມັນ?
14 ພະເຢໂຫວາບອກວ່າການເຮັດສິ່ງທີ່ຖືກຕ້ອງບໍ່ໄດ້ເປັນພາລະ. (1 ຢຮ. 5:3) ແຕ່ມັນຊ່ວຍປົກປ້ອງເຮົາແລະເຮົາເອງກໍຈຳເປັນທີ່ຈະຕ້ອງໄດ້ຮັບການປົກປ້ອງທຸກໆມື້. ຂໍໃຫ້ຄິດເຖິງຊຸດຮົບທີ່ຄົບຊຸດທີ່ໂປໂລເວົ້າເຖິງ. (ອຟຊ. 6:14-18) ສ່ວນໃດຂອງຊຸດຮົບທີ່ຊ່ວຍປົກປ້ອງຫົວໃຈຂອງທະຫານ? ນັ້ນກໍຄື “ເສື້ອເກາະປ້ອງກັນເອິກ” ຄືກັບທີ່ເສື້ອເກາະປົກປ້ອງຫົວໃຈທະຫານ ຄວາມຖືກຕ້ອງຊອບທຳເຊິ່ງໝາຍເຖິງມາດຕະຖານຂອງພະເຢໂຫວາທີ່ບອກວ່າອັນໃດຖືກອັນໃດຜິດກໍຈະຊ່ວຍປົກປ້ອງຫົວໃຈຂອງເຮົາຄືກັນ. ດັ່ງນັ້ນ ຂໍເຮັດໃຫ້ແນ່ໃຈວ່າເຈົ້າໄດ້ເອົາຄວາມຖືກຕ້ອງຊອບທຳມາໃສ່ເປັນເສື້ອເກາະປ້ອງກັນເອິກແລ້ວ!—ສຸພາ. 4:23
15. ເຮົາຈະເອົາຄວາມຖືກຕ້ອງຊອບທຳມາໃສ່ເປັນເສື້ອເກາະປ້ອງກັນເອິກໄດ້ແນວໃດ?
15 ເຮົາຈະເອົາຄວາມຖືກຕ້ອງຊອບທຳມາໃສ່ເປັນເສື້ອເກາະປ້ອງກັນເອິກໄດ້ແນວໃດ? ເຮົາຈະເຮັດແບບນັ້ນໄດ້ໂດຍຄິດເຖິງສິ່ງທີ່ພະເຢໂຫວາບອກວ່າອັນໃດຖືກອັນໃດຜິດກ່ອນທີ່ເຮົາຈະຕັດສິນໃຈໃນແຕ່ລະມື້. ຕົວຢ່າງເຊັ່ນ: ເມື່ອເຮົາເລືອກສິ່ງທີ່ຈະເວົ້າ ເພງທີ່ຈະຟັງ ໜັງທີ່ຈະເບິ່ງ ຫຼືປຶ້ມທີ່ຈະອ່ານ ຂໍໃຫ້ເຮົາຖາມຕົວເອງກ່ອນວ່າ ‘ຂ້ອຍຢາກໃຫ້ສິ່ງໃດເຂົ້າມາໃນຄວາມຄິດຈິດໃຈຂອງຂ້ອຍ? ເລື່ອງນີ້ເຮັດໃຫ້ພະເຢໂຫວາພໍໃຈບໍ? ຫຼືມັນເປັນເລື່ອງທີ່ພະເຢໂຫວາຖືວ່າບໍ່ຖືກຕ້ອງ ເຊັ່ນ: ມັນເປັນເລື່ອງທີ່ສົ່ງເສີມການເຮັດຜິດສິນລະທຳ ຄວາມຮຸນແຮງ ຄວາມຍິ່ງ ແລະຄວາມເຫັນແກ່ຕົວ?’ (ຟລປ. 4:8) ຖ້າເຮົາເລືອກສິ່ງທີ່ເຮັດໃຫ້ພະເຢໂຫວາພໍໃຈ ຫົວໃຈຂອງເຮົາກໍຈະໄດ້ຮັບການປົກປ້ອງຈາກສິ່ງທີ່ບໍ່ດີ.
ຄວາມຖືກຕ້ອງຊອບທຳຂອງເຈົ້າເປັນ “ຄືກັບຄື້ນທີ່ຢູ່ໃນທະເລ” (ເບິ່ງຂໍ້ 16-17)
16-17. ເອຊາອີ 48:18 ຊ່ວຍເຮົາໃຫ້ໝັ້ນໃຈໄດ້ແນວໃດວ່າ ເຮົາຈະສາມາດໃຊ້ຊີວິດຕາມມາດຕະຖານຂອງພະເຢໂຫວາໄດ້ຕໍ່ໆໄປ?
16 ເຈົ້າເຄີຍຢ້ານບໍວ່າມື້ໃດມື້ໜຶ່ງຈະໃຊ້ຊີວິດຕາມມາດຕະຖານຂອງພະເຢໂຫວາບໍ່ໄດ້? ໃຫ້ເຮົາມາເບິ່ງຕົວຢ່າງທີ່ພະເຢໂຫວາໃຊ້ເຊິ່ງຢູ່ໃນເອຊາອີ 48:18, ລ.ມ. c (ອ່ານ) ໃນນັ້ນພະເຢໂຫວາສັນຍາວ່າ ຄວາມດີຫຼືຄວາມຖືກຕ້ອງຊອບທຳຂອງເຮົາຈະເປັນ “ຄືກັບຄື້ນທີ່ຢູ່ໃນທະເລ.” ຂໍໃຫ້ນຶກພາບວ່າເຈົ້າກຳລັງຢືນຢູ່ແຄມທະເລທີ່ກວ້າງໃຫຍ່ ແລະຫຼຽວເບິ່ງຄື້ນທະເລທີ່ຊັດເຂົ້າມາແຄມຝັ່ງເປັນໄລຍະໆ. ເຈົ້າເຄີຍຢ້ານບໍວ່າມື້ໃດມື້ໜຶ່ງຈະບໍ່ມີຄື້ນໃນທະເລ? ບໍ່ ເພາະເຈົ້າຮູ້ວ່າຄື້ນໃນທະເລມີຢູ່ຫຼາຍພັນປີມາແລ້ວແລະມັນກໍຈະເປັນແບບນີ້ຕະຫຼອດໄປ.
17 ຄວາມຖືກຕ້ອງຊອບທຳຂອງເຮົາຈະເປັນຄືກັບຄື້ນໃນທະເລແນວໃດ? ເມື່ອເຮົາຈະຕັດສິນໃຈເລື່ອງໃດເລື່ອງໜຶ່ງ ຂໍໃຫ້ເຮົາຄິດກ່ອນວ່າພະເຢໂຫວາຢາກໃຫ້ເຮົາເຮັດແນວໃດ ແລ້ວຈາກນັ້ນກໍເຮັດຕາມ. ບໍ່ວ່າເຮົາຈະຕ້ອງຕັດສິນໃຈເລື່ອງທີ່ຍາກຫຼາຍສ່ຳໃດ ພະເຢໂຫວາກໍພ້ອມທີ່ຈະໃຫ້ກຳລັງກັບເຮົາແລະຊ່ວຍເຮົາໃຫ້ເຮັດສິ່ງທີ່ຖືກຕ້ອງໄດ້ຕໍ່ໆໄປໃນແຕ່ລະມື້.—ເອຊາ. 40:29-31
18. ເປັນຫຍັງເຮົາຕ້ອງລະວັງທີ່ຈະບໍ່ຕັດສິນຄົນອື່ນຕາມມາດຕະຖານຂອງຕົວເອງ?
18 ຢ່າງທີ 3: ໃຫ້ພະເຢໂຫວາເປັນຜູ້ຕັດສິນ. ຕອນທີ່ເຮົາພະຍາຍາມໃຊ້ຊີວິດຕາມມາດຕະຖານຂອງພະເຢໂຫວາ ເຮົາຕ້ອງລະວັງທີ່ຈະບໍ່ຄິດວ່າຕົວເອງດີກວ່າຄົນອື່ນແລະຕັດສິນຄົນອື່ນຕາມມາດຕະຖານຂອງຕົວເອງ. ແທນທີ່ຈະເຮັດແບບນັ້ນ ຂໍໃຫ້ເຮົາຈື່ວ່າພະເຢໂຫວາເປັນ “ຜູ້ຕັດສິນທົ່ວໂລກ.” (ປຖກ. 18:25, ລ.ມ.) ແລະເພິ່ນກໍບໍ່ໄດ້ໃຫ້ເຮົາມີສິດທີ່ຈະຕັດສິນຄົນອື່ນ. ດັ່ງນັ້ນ ພະເຢຊູຈຶ່ງບອກວ່າ “ໃຫ້ເຊົາຕັດສິນຄົນອື່ນ ເພື່ອພະເຈົ້າຈະບໍ່ຕັດສິນພວກເຈົ້າ.”—ມທ. 7:1. d
19. ໂຢເຊັບສະແດງໃຫ້ເຫັນແນວໃດວ່າລາວໃຫ້ພະເຢໂຫວາເປັນຜູ້ຕັດສິນ?
19 ໃຫ້ເຮົາມາເບິ່ງຕົວຢ່າງຂອງໂຢເຊັບອີກເທື່ອໜຶ່ງ. ລາວບໍ່ໄດ້ຕັດສິນຄົນອື່ນເຖິງວ່າລາວຈະຖືກເຂົາເຈົ້າເຮັດບໍ່ດີໃສ່ກໍຕາມ. ເຊັ່ນ ພວກອ້າຍຂອງລາວໄດ້ທຳຮ້າຍຮ່າງກາຍລາວ ຂາຍລາວໄປເປັນທາດ ແລະຕົວະພໍ່ວ່າລາວຕາຍແລ້ວ. ຫຼາຍປີຕໍ່ມາ ລາວກໍໄດ້ພົບກັບພວກອ້າຍອີກ ແຕ່ເທື່ອນີ້ໂຢເຊັບກາຍເປັນຜູ້ປົກຄອງທີ່ມີອຳນາດຫຼາຍ ຖ້າລາວຈະແກ້ແຄ້ນແລະເຮັດບໍ່ດີໃສ່ພວກອ້າຍຄືນກໍເຮັດໄດ້. ພວກອ້າຍຂອງໂຢເຊັບຮູ້ສຶກຢ້ານຫຼາຍ ເພາະຄິດວ່າໂຢເຊັບຈະແກ້ແຄ້ນຄືນເຖິງວ່າເຂົາເຈົ້າຈະເສຍໃຈກັບສິ່ງທີ່ເຄີຍເຮັດກໍຕາມ. ແຕ່ໂຢເຊັບບອກກັບເຂົາເຈົ້າວ່າ: “ບໍ່ຕ້ອງຢ້ານເດີ້. ຂ້ອຍບໍ່ແມ່ນພະເຈົ້າທີ່ຈະຕັດສິນພວກອ້າຍ.” (ປຖກ. 37:18-20, 27, 28, 31-35; 50:15-21, ລ.ມ.) ເຫັນໄດ້ວ່າໂຢເຊັບຖ່ອມໃຈແລະຮູ້ວ່າມີພຽງພະເຢໂຫວາເທົ່ານັ້ນທີ່ມີສິດຕັດສິນພວກອ້າຍ.
20-21. ເຮົາຈະບໍ່ຄິດວ່າຕົວເອງດີກວ່າຄົນອື່ນໄດ້ແນວໃດ?
20 ຄືກັບໂຢເຊັບ ເຮົາຄວນໃຫ້ພະເຢໂຫວາເປັນຜູ້ຕັດສິນ. ຕົວຢ່າງເຊັ່ນ: ເຮົາບໍ່ຄວນຄິດເອົາເອງວ່າເປັນຫຍັງພີ່ນ້ອງຈຶ່ງເຮັດແບບນັ້ນແບບນີ້ ເພາະເຮົາບໍ່ສາມາດອ່ານຫົວໃຈເຂົາເຈົ້າໄດ້ ມີແຕ່ພະເຢໂຫວາເທົ່ານັ້ນທີ່ “ຮູ້ເຈຕະນາຂອງເຂົາເຈົ້າ.” (ສຸພາ. 16:2, ລ.ມ.) ພະເຢໂຫວາຮັກທຸກຄົນບໍ່ວ່າເຂົາເຈົ້າຈະມີເຊື້ອຊາດແລະວັດທະນາທຳແບບໃດ ແລະພະເຢໂຫວາກໍຢາກໃຫ້ເຮົາ “ເປີດໃຈໃຫ້ກວ້າງ.” (2 ກຣ. 6:13) ດັ່ງນັ້ນ ເຮົາຄວນຈະຮັກພີ່ນ້ອງທຸກຄົນແລະບໍ່ຕັດສິນເຂົາເຈົ້າ.
21 ນອກຈາກນັ້ນ ເຮົາກໍບໍ່ຄວນຕັດສິນຄົນອື່ນທີ່ບໍ່ໄດ້ມີຄວາມເຊື່ອແບບດຽວກັບເຮົາ. (1 ຕມ. 2:3, 4) ເຈົ້າເຄີຍຕັດສິນຍາດພີ່ນ້ອງທີ່ບໍ່ມີຄວາມເຊື່ອແບບດຽວກັບເຈົ້າບໍໂດຍເວົ້າວ່າ: “ລາວບໍ່ມີທາງເຂົ້າມາໃນຄວາມຈິງດອກ”? ເຮົາຈະບໍ່ເຮັດແບບນັ້ນ ເພາະມັນເປັນການເຮັດເກີນສິດແລະຄິດວ່າຕົວເອງດີກວ່າຄົນອື່ນ. ພະເຢໂຫວາໃຫ້ໂອກາດກັບ “ມະນຸດທຸກຄົນໃນທຸກຫົນທຸກແຫ່ງ” ທີ່ຈະກັບໃຈ. (ກຈກ. 17:30) ຂໍໃຫ້ຈື່ໄວ້ວ່າ ພະເຢໂຫວາເບິ່ງຄົນທີ່ຄິດວ່າຕົວເອງດີກວ່າຄົນອື່ນເປັນຄົນທີ່ບໍ່ໄດ້ເຮັດສິ່ງທີ່ຖືກຕ້ອງຊອບທຳ.
22. ເປັນຫຍັງເຮົາຈຶ່ງຕັ້ງໃຈທີ່ຈະຮັກຄວາມຖືກຕ້ອງຊອບທຳ?
22 ເມື່ອເຮົາຮັກແລະເຮັດຕາມສິ່ງທີ່ພະເຢໂຫວາຖືວ່າຖືກຕ້ອງຊອບທຳ ເຮົາກໍຈະມີຄວາມສຸກແລະຊ່ວຍຄົນອື່ນໃຫ້ຮັກແລະໃກ້ຊິດກັບພະເຢໂຫວາຫຼາຍຂຶ້ນ. ຂໍໃຫ້ເຮົາເປັນ “ຄົນທີ່ຫິວກະຫາຍຢາກເຫັນຄວາມຍຸຕິທຳ [ຄວາມຖືກຕ້ອງຊອບທຳ,ໄຂເງື່ອນ]” ຕໍ່ໆໄປ. (ມທ. 5:6) ຂໍໃຫ້ເຮົາໝັ້ນໃຈວ່າພະເຢໂຫວາເຫັນສິ່ງທີ່ເຮົາເຮັດແລະຈະພໍໃຈເຮົາເມື່ອເຮົາພະຍາຍາມເຮັດສິ່ງທີ່ຖືກຕ້ອງ. ເຖິງວ່າຄົນໃນໂລກນີ້ຈະນັບມື້ນັບຊົ່ວຫຼາຍຂຶ້ນເລື້ອຍໆ ແຕ່ຂໍໃຫ້ເຮົາຈື່ໄວ້ວ່າພະເຢໂຫວາ “ຮັກຄົນທີ່ພະຍາຍາມເຮັດສິ່ງທີ່ຖືກຕ້ອງ.”—ສຸພາ. 15:9, ລ.ມ.
ເພງ 139 ນຶກພາບເມື່ອທຸກສິ່ງກາຍເປັນສິ່ງໃໝ່
a ເຖິງວ່າຈະເປັນເລື່ອງຍາກທີ່ຈະພົບຄົນທີ່ເຮັດສິ່ງທີ່ຖືກຕ້ອງຊອບທຳໃນໂລກທີ່ຊາຕານປົກຄອງ ແຕ່ກໍຍັງມີຫຼາຍລ້ານຄົນທີ່ເຮັດສິ່ງທີ່ຖືກຕ້ອງຊອບທຳ. ເຈົ້າກໍຄືຊິເປັນໜຶ່ງໃນນັ້ນແມ່ນບໍ. ເຈົ້າພະຍາຍາມທີ່ຈະເຮັດສິ່ງທີ່ຖືກຕ້ອງຊອບທຳຍ້ອນວ່າເຈົ້າຮັກພະເຢໂຫວາ ແລະພະເຢໂຫວາກໍຮັກຄົນທີ່ເຮັດສິ່ງທີ່ຖືກຕ້ອງຊອບທຳ. ເຈົ້າຈະຮັກຄວາມຖືກຕ້ອງຊອບທຳຫຼາຍຂຶ້ນໄດ້ແນວໃດ? ໃນບົດຄວາມນີ້ເຮົາຈະມາເບິ່ງວ່າ ຄວາມຖືກຕ້ອງຊອບທຳແມ່ນຫຍັງ ແລະເຮົາຈະໄດ້ຮັບປະໂຫຍດຫຍັງຈາກການເຮັດສິ່ງທີ່ຖືກຕ້ອງຊອບທຳ. ແລະເຮົາຍັງຈະມາເບິ່ງວ່າ ເຮົາຕ້ອງເຮັດຫຍັງແດ່ເພື່ອຈະຮັກຄວາມຖືກຕ້ອງຊອບທຳຫຼາຍຂຶ້ນ.
b ສຸພາສິດ 15:9 (ລ.ມ.) ອ່ານວ່າ: “ພະເຢໂຫວາກຽດຊັງການກະທຳຂອງຄົນຊົ່ວ ແຕ່ຮັກຄົນທີ່ພະຍາຍາມເຮັດສິ່ງທີ່ຖືກຕ້ອງ.”
c ເອຊາອີ 48:18, (ລ.ມ.) ອ່ານວ່າ: “ຖ້າເຈົ້າເຮັດຕາມກົດໝາຍຂອງເຮົາ ເຈົ້າຈະມີຄວາມສະຫງົບສຸກຄືກັບນ້ຳທີ່ຢູ່ໃນແມ່ນ້ຳ ແລະຄວາມດີທີ່ເຈົ້າເຮັດຈະມີຫຼາຍຄືກັບຄື້ນທີ່ຢູ່ໃນທະເລ.”
d ບາງເທື່ອຜູ້ດູແລຕ້ອງໄດ້ຕັດສິນເລື່ອງທີ່ກ່ຽວກັບການເຮັດຜິດຮ້າຍແຮງແລະການກັບໃຈ. (1 ກຣ. 5:11; 6:5; ຢກບ. 5:14, 15) ເຂົາເຈົ້າຕ້ອງຖ່ອມໃຈແລະຈື່ວ່າເຂົາເຈົ້າອ່ານຫົວໃຈຄົນບໍ່ໄດ້ແລະເຂົາເຈົ້າກໍກຳລັງຕັດສິນໃຫ້ພະເຢໂຫວາ. (ສົມທຽບກັບ 2 ຂ່າວຄາວ 19:6) ດັ່ງນັ້ນ ເຂົາເຈົ້າຕ້ອງໄດ້ຮຽນແບບພະເຢໂຫວາໂດຍຕັດສິນຢ່າງມີເຫດຜົນ ເມດຕາ ແລະຍຸຕິທຳ.
