Eni. Lipaki za Jehova balumela kuli Bibele mukatumbi ‘iñozwi ka kususumezwa ki moya wa Mulimu mi yatusa.’ (2 Timotea 3:16) Taba yeo ikopanyeleza Testamente Yakale ni Testamente Yenca, sina molibizezwa ki batu babañata. Hañata, Lipaki za Jehova babizanga likalulo za Bibele zeo kuli ki Mañolo A Siheberu ni Mañolo A Sigerike A Sikreste. Halubati kubonisa inge kuli likalulo zeñwi za Bibele halikoni kulutusa kamba kuli haki za butokwa.

 Ka kususumezwa ki moya wa Mulimu, muapositola Paulusi naañozi kuli: “Lika kaufela zeneñozwi kwamulaho neliñolezwi kululuta.” (Maroma 15:4) Kacwalo, mwa Mañolo A Siheberu kunani litaba za butokwa zekona kulutusa. Ka mutala, mañolo ao alutusa kuziba litaba za butokwa zeneezahezi kwamulaho ni likelezo zetusa.

•   Litaba za butokwa zeneezahezi kwamulaho. Mwa Mañolo A Siheberu, kufumaneha litaba zetalusa hande mone libupezwi lika ni mone kutezi kuli batu babe ni sibi. Kambe litaba zeo nelisiyo, nelusike lwafumana likalabo zekolwisa kwa lipuzo zecwale ka: Lusimuluha kai? Ki kabakalañi batu habashwa? (Genese 2:7, 17) Hape, mwa Mañolo A Siheberu kufumaneha litaba zebonisa mo Jehova Mulimu naasebelisanezi ni batu bane babile ni tabo kabakala kumusebeleza ni bane bakopani ni miinelo yetaata sina luna.​—Jakobo 5:17.

•   Likelezo zetusa. Mwa libuka za mwa Bibele za Liproverbia ni Muekelesia, ili zeli kalulo ya Mañolo A Siheberu, kunani litaba zeñata zelutusa kuba ni butali. Libuka zeo lilutusa kuziba zekona kulutusa kuba ni tabo mwa lubasi (Liproverbia 15:17), molukona kubela ni mubonelo oswanela ka za kusebeza (Liproverbia 10:4; Muekelesia 4:6), ni zebakona kueza babanca kuli babe ni tabo sakata (Muekelesia 11:9–12:1).

 Hape, lukatusiwa hahulu haiba luituta Mulao wa Mushe, ili ofumaneha mwa libuka za Bibele zapili zeketalizoho. Nihaike kuli Bakreste habatokwi kumamela Mulao wo, mwateñi kunani likuka za butokwa zekona kulutusa kuba ni tabo mwa bupilo.​—Livitike 19:18; Deuteronoma 6:5-7.