Sitopa Sesietelela ki sikwatanyana sa Bakreste babahulile kwa moya, ili babaokamela musebezi wa Lipaki za Jehova mwa lifasi kaufela. Musebezi wabona uama lika zepeli ze:

•   Baokamela musebezi wa kulukisa litaba za mwa Bibele zefumanehanga mwa lihatiso zaluna, litaba zeitusiswanga kwa mikopano ya puteho ni zelutiwanga kwa likolo za Lipaki za Jehova.—Luka 12:42.

•   Baokamela musebezi wa Lipaki za Jehova mwa lifasi kaufela ka kuonga-onga musebezi wa kukutaza, hamohocwalo ni kufa ketelelo ya mwakuitusiseza lika zefilwe sina linubu.

 Bakreste ba mwa Sitopa Sesietelela balikanyisa mutala wa “baapositola ni baana-bahulu mwa Jerusalema,” bane baezanga likatulo zenetusa Bakreste babañwi mwa liputeho kaufela. (Likezo 15:2) Ka kuswana ni baana bane basepahala bao, ba mwa Sitopa Sesietelela haki bona babazamaisa kopano yaluna. Balatelelanga ketelelo ya mwa Bibele mi balemuha kuli Jehova Mulimu uketile Jesu Kreste kuli abe Toho ya puteho.—1 Makorinte 11:3; Maefese 5:23.

 Baba mwa Sitopa Sesietelela ki bo Kenneth Cook, Jr., bo Gage Fleegle, bo Samuel Herd, bo Geoffrey Jackson, bo Jody Jedele, bo Stephen Lett, Gerrit Lösch, bo Jacob Rumph, bo Mark Sanderson, bo David Splane, ni bo Jeffrey Winder. Basebeleza kwa ofisi yetuna yezamaisa musebezi waluna mwa lifasi kaufela kwa Warwick, mwa New York, kwa U.S.A

 Ba mwa Sitopa Sesietelela balukisize tutengo totu 6 kuli tuokamele likalulo zeshutana-shutana za musebezi waluna, mi yomuñwi ni yomuñwi wa mizwale ba mwa sitopa se, u mwa katengo kalikañwi kamba mane kufitelela, kwa tutengo totu 6 to.

•   Katengo ka Baswalisanisi: Katengo ka ki kona kakatalima za litaba za mulao ni kuokamela musebezi wa kutusa babatahezwi ki likozi, kutusa mizwale baluna babanyandiswa kabakala tumelo yabona, ni kutalima litaba zeñwi zeama Lipaki za Jehova.

•   Katengo Kakatalima za Babasebeleza fa Betele: Katengo ka kaokamela misebezi yeama batu babasebeleza fa Betele.

•   Katengo ka Bahatisi: Katengo ka kaokamela musebezi wa kuhatisa lihatiso zetomile fa Bibele ni kulilumela mwa lifasi kaufela, kuyaha libaka za kulapelela teñi, liofisi za toloko, ni liofisi za mutai.

•   Katengo ka Sebelezo: Katengo ka kaokamela musebezi waluna wa kukutaza ‘taba yende ya Mubuso.’—Mateu 24:14.

•   Katengo ka Tuto: Katengo ka ki kona kakaokamela musebezi wa kulukisa litaba za mwa Bibele zeitutiwanga kwa mikopano ya puteho, likolo zaluna, ni mwa litaba za kuteeleza kamba mavidio a kopano.

•   Katengo ka Bañoli: Katengo ka ki kona kakaokamela musebezi wa kulukisa litaba za mwa Bibele zekahatiswa, litaba zefumaneha fa webusaiti yaluna, ni kuokamela musebezi wa kutoloka oezwa ki kopano yaluna.

 Kwandaa misebezi yeo yebaezanga mwa tutengo tobaswalisana ni tona, ba mwa Sitopa Sesietelela hape bakopananga sunda ni sunda kunyakisisa zebatokwa mizwale ni likaizeli mwa lifasi kaufela. Ka nako ya mikopano yeo, mizwale bao banyakisisanga Mañolo, kulatelela ketelelo ya moya wa Mulimu, ni kulika ka taata kulumelelana mwa likatulo kaufela zebaeza.—Likezo 15:25.

 Ba ki Bakreste babasepahala babatusa mwa tutengo twa Sitopa Sesietelela. (1 Makorinte 4:2) Mizwale bao banani buikoneli ni yeloseli mwa musebezi ookamelwa ki tutengo tobaswalisana ni tona, mi bafumanehanga kwa mikopano ya tutengo to sunda ni sunda. Nihaike kuli mizwale bao habaezangi likatulo, basebezanga hamoho ni ba mwa Sitopa Sesietelela ka kubatusa kufumana litaba zeñwi zebatokwa, mi batusi bao babonanga teñi kuli likatulo zesieza sitopa zalatelelwa, mi kamita banyakisisanga zezwile mwa likatulo zeo. Hape fokuñwi, ba Sitopa Sesietelela balumanga batusi babona kuli bapotele mizwale ni likaizeli mwa linaha zeshutana-shutana za lifasi, mi fokuñwi mizwale ba bakupiwanga kufa lingambolo fa mikopano ya ka silimo kamba mikopano ya kukwaza Sikolo sa Giliadi.