La May 6, 2017, ibato ba Lipaki za Jehova ba 130 nebatusize mwa musebezi wa kukenisa Mushitu wa Bryukhovychi bukaufi ni muleneñi wa Lviv, kwa Ukraine. Baitateli bane batusize mwa musebezi wo nebanani lilimo ze mwahalaa 22 ni 80, mi bapila ni kusebeleza fa mutai wa Lipaki za Jehova mwa Ukraine ofumaneha bukaufi ni mushitu wo. Nebakenisize sibaka sesibato eza lihekele ze 50 ni kunopa manyalala abato ba likilo zeeza 600 mwa lihora feela zetaalu.

Bo Mykhailo Splavinskyi, bo manjinela babatumile mwa kampani ya muuso yebizwa Lviv Forest Breeding and Drilling Center, batalusa kuli: “Lipaki za Jehova neli bona bapili kuitatela kutusa mwa musebezi wa kukenisa mushitu, ili musebezi oezahalanga ka silimo, mi bazwezipili kueza cwalo silimo ni silimo kuzwa feela ka silimo sa 2014.”

Bo Splavinskyi batalusa kuli: “Kunani lika zepeli zetahisanga kuli mushitu ube ni manyalala. Sapili kikuli batu babañwi babatahanga mwa mushitu wo bato siyanga masila mwateñi. Mi sabubeli kikuli babañwi bato yumbelanga manyalala azwa fa musebezi wa kuyaha ni amañwi cwalo mwa mushitu wo.”

Haiba mwa mushitu kuba ni manyalala, kukona kuba ni likozi zetuna. Bo Splavinskyi batalusa kuli: “Manyalala aanganga nako yetelele kuli abole.” Hape nebaize: “Manyalala asinyanga mezi a mwa mubu ni kutahisa butata kwa lika zepila.” Liseli la lizazi halinata fa magilasi ayumbezwi mwa mushitu, kubanga ni mufutumala omutuna, ili kutahisa mulilo. Mi magilasi a pwacehile ni lindonga zeyumbezwi mwa mushitu likona kutahisa likolofalo, sihulu kwa banana babanyinyani. Bo Splavinskyi hape bali: “Butata bo kaufela bwakona kuambukiwa haiba manyalala azwisiwa mwa mushitu.”

Kukenisa sibaka sa mushitu sesieza lihekele ze 3,300, haki nto yebunolo. Bo Splavinskyi baekeza bali: “Bababaleli ba mushitu bolunani bona ki baketalizoho feela, mi halukoni kukenisa sibaka sesituna cwalo. Kabakaleo, hañwi ka silimo lukupanga batu kaufela kuli batuse mwa musebezi wa kukenisa mushitu.”

Lipaki babaitatelanga kutusa mwa musebezi wo batinanga magilavu kwa mazoho, kushimba mapulasitiki mwa kuyumbela manyalala, ni lihara, mi banopanga mabotela ayumbilwe, mawili a mota, magilasi, lisipi, mapepa, mapulasitiki, ni lindonga zeitusisizwe. Bo Ihor Fedak, babasebeza sina bababaleli ba mushitu balemuhile buikatazo bobaezanga Lipaki za Jehova mi batalusa kuli: “Sibaka sebasebelezanga ku sona Lipaki za Jehova sikenile hahulu.”

Nihaike kuli hakusika tomiwa kale mulao wa kuli manyalala aalulwangwe, Lipaki za Jehova baaalulanga ni kuabeya mwa mapulasitiki ka kuya ka mifuta yaona, ibe kuli ki magilasi, mapepa, kamba mapulasitiki, ili kutusa kuli lika zeo likone kupangiwa sinca. Hasamulaho, manyalala ao ashimbiwanga ki kampani yeyumba manyalala ya mwa sibaka seo. Kuzwa feela ka silimo sa 2016, Lipaki za Jehova baitombozi kulifela manyalala abanopanga. Bo Fedak batalusa kuli: “Niitumela hahulu kwa Lipaki za Jehova bakeñisa musebezi obaeza. Balutusanga luli.”

Lipaki za Jehova baikolanga kueza musebezi wa kukenisa mushitu oeziwanga ka silimo. Batabelanga kueza musebezi otusa batu babañwi mwa sibaka sebapila ku sona ni kutusa kuli mushitu ube okenile. Muuna yabizwa Volker, utalusa mwaikutwelanga ni mobaikutwelanga Lipaki za Jehova sina yena ka kubulela kuli: “Haniikutwangi kuli musebezi wa kukenisa ki musebezi onisa swaneli kueza. Kueza musebezi otusa batu babañwi ki nto yende, mi kunitahisezanga tabo.”

Musali yabizwa Anzhelika, uekeza uli: “Ku na, sa butokwa haki kuziba yasiile manyalala mwa mushitu, kono ki monikona kuazwiseza.” Bo Lois, babanani lilimo ze 78, ni bona baitatezi kutusa mwa musebezi wa kukenisa. Batalusa kuli: “Mwa sibaka sa kunyema hamubona manyalala, ki hande kuanopa ni kuayumbela mwa sibaka sesiswanela.”

Bo Wieslaw, batalusa kuli: “Batu hañata balubonanga feela inze luapezi hande ni kutina litai haluya kwa kukutaza. Kono hape lwaitatelanga kueza misebezi ya kukenisa mushitu kamba kueza misebezi yemiñwi yetusa batu.”