Bo Joshua babapila kwa America ili bane baizo sebeleza mwa naha ya Guyana ka nakonyana batalusa kuli: “Kusebeleza kwa sibaka kokutokwahala hahulu bakutazi ba Mubuso neku nitahiselize tabo yetuna luli!” Lipaki za Jehova babañata babakile basebeleza kwa naha a yeo yefumaneha kwa South America, ili ko batu babañata batabela kuituta za Jehova, ni bona baikutwa cwalo. Ki lika mañi zelukona kuituta kwa Lipaki za Jehova ba babakile basebeleza kwa libaka kokutokwahala hahulu bakutazi ba Mubuso? Haiba mubata kuyo sebeleza kwa sibaka kokutokwahala hahulu bakutazi ba Mubuso, kunyakisisa zeneezahezi kwa Lipaki ba kukona kumitusa cwañi?

 Muzwale yabizwa Linel pili asikaya kale kwa Guyana, naakutalezanga mwa libaka zenesa kutalezwangi hahulu mwa naha yahabo yena ya America. Muzwale yo utalusa kuli: “Mwa sikwata saluna nekunani mizwale ni likaizeli ba 20, mi nelulumilwe kuyo kutaleza mwa sibaka sa kwa matakanyani mwa West Virginia. Neniikozi hahulu musebezi wa kukutaza ni kuikola siango ni mizwale ni likaizeli bao, mi nto yeo neicincize bupilo bwaka! Naikatulela kusebeleza Jehova ka mone nikonela kaufela.”

 Bo mutu ni musalaa hae bababizwa bo Garth ni bo Erica nebanahananga za kuyo kutaleza mwa naha isili, mi sebaketa kuyo sebeleza kwa naha ya Guyana. Ki kabakalañi hane baketile naha yeo? Bo Erica batalusa kuli: “Na ni bakuluna neluzibana ni bo mutu ni musalaa hae bane batutezi mwa naha yeo. Bakeñisa kuli nebanani tukufalelo mwa musebezi wa kukutaza mi nebalata hahulu musebezi wo, ni luna lwaba ni takazo ya kututela mwa naha yeo.” Bo Erica ni bo Garth nebatandile lilimo zetaalu mwa naha yeo inze baikola kueza musebezi one batabela hahulu wa kukutaza. Bo Garth babulela kuli: “Lukile lwayo sebeleza kwa naha isili, mi luiponezi kuli ki nto yende luli.” Hasamulaho, Bo Garth ni bakubona bo Erica nebamemilwe kuyo kena Sikolo sa Giliadi, mi ka nako ya cwale basebeleza mwa Bolivia.

 Likuka za mwa Bibele lilususueza kupila bupilo bobubunolo. (Maheberu 13:5) Hape lususuezwanga kubala lisinyehelo halubata kueza likatulo zetuna mwa bupilo. (Luka 14:26-33) Mi taba yeo ikopanyeleza ni katulo ya kututela kwa naha isili. Bo Garth batalusa kuli: “Na ni bakuluna bo Erica nelunolofalize mupilelo waluna pili lusika tutela kale kwa naha ya Guyana. Mi neluezize cwalo ka kulekisa pisinisi yaluna, ndu yaluna, mane ni lika zeñwi zene lusatokwi zene lubulukile mwa ndu yaluna. Nekuungile lilimo lisikai kuli lufeze kueza cwalo. Neluzwezipili kunahana za sikonkwani saluna sa kuyo sebeleza kwa Guyana, mi silimo ni silimo neluyanga kuyo pota mwa naha yeo.”

 Hape muswanela kunyakisisanga za momuka fumanela masheleñi a kuipilisa ka ona. Lipaki babañwi babayo sebelezanga mwa naha isili fokuñwi balumelezwanga ki muuso kusebeza inze bali mwa naha yeo. Babañwi bazwelangapili kueza musebezi one baezanga hane bali mwa naha yahabo bona ka kuitusisa kompyuta. Mi babañwi bona bakutelanga kwa naha yahabo bona ka nakonyana ilikuli bayo sebeza. Bo Paul ni bakubona bo Sinead nebakutelanga kwa naha yahabo bona ya Ireland hañwi ka silimo ilikuli bayo sebeza. Kuezanga cwalo neku batusize kusebeleza mwa naha ya Guyana ka lilimo ze 18, mi mwahalaa lilimo zeo, nebaikozi kusebeleza kwateñi ka lilimo ze 7 hase babile ni mwana wamusizana.

 Liñolo la Samu 37:5 libulela kuli: “Ufe Jehova nzila yahao; uitinge ku yena, mi uka kutusa.” Bo Christopher ni bo Lorissa ba kwa America hañata nebalapelanga ka za sikonkwani sabona sa kuyo sebeleza mwa naha isili. Hape ka nako ya kulapela sina lubasi, nebanyakisisanga zene baswanela kueza kuli bakondise, ili taba yenekopanyeleza kunyakisisa bunde ni bumaswe bwa kututela kwa naha isili. Bakeñisa kuli nebasa zibi lipuo zenebulelwa mwa linaha zeñwi, baketa kuya kwa Guyana kakuli puo yeitusiswa hahulu mwa naha yeo ki Sikuwa.

 Hasamulaho, balatelela sikuka sesi kwa Liproverbia 15:22 sesili: “Milelo haikondangi hakusina kulelisana, kono lika zakonda hakunani baelezi babañata.” Bañolela kwa ofisi ya mutai yeokamela musebezi wa kukutaza mwa naha ya Guyana, b mi batalusa simuluho yabona ni fone bakakona kututa kuli bayo sebeleza mwa naha yeo. Hape babuza mone bakona kufumanela likalafo habali mwa naha yeo, ni za haiba naha yeo neicisa hahulu kamba kubata hahulu, mi babuza ni za lizo za mwa naha yeo. Ofisi ya mutai neialabile lipuzo zabona kaufela, mi yalukisa kuli baambole ni baana-bahulu ba mwa sibaka sene bakayo sebeleza.

 Bo Linel, babatalusizwe kwamulaho, ka nako ya cwale basebeza sina muokameli wa mupotoloho mwa naha ya Guyana. Bo Linel pili basika tutela kale mwa naha yeo, ni bona nebalatelezi sikuka sesi kwa Liproverbia 15:22. Batalusa kuli: “Kwandaa kubuluka masheleñi a kuyo itusisa, neniambozi ni batu babañwi babakile basebeleza mwa naha isili. Hape neninyakisize taba yeo ni lubasi lwaka, baana-bahulu ba mwa puteho yaluna, mane ni muokameli waluna wa mupotoloho. Mi nenibalile lihatiso kaufela zene nifumani ka za kusebeleza kwa sibaka kokutokwahala hahulu bakutazi.”

 Batu babañata bababata kuyo sebeleza kwa naha isili baanganga muhato wa kuyo pota kwa naha yeo pili basika tutela kale kwateñi. Bo Joseph ni bakubona bo Christina batalusa kuli: “Hane luile kwa Guyana lwapili, neluizo ina kwateñi likweli zetaalu. Mwa likweli zetaalu zeo nelukonile kuziba hande sibaka seo. Lwakutela kwa naha yahabo luna mi hasamulaho lwatutela kwateñi.”

 Kuli batu babasebeleza mwa naha isili bakondise, baswanela kuba ni moya wa buitomboli ni kutwaela miinelo ni lizo za mwa naha yeo. Ka mutala, batu babazwa kwa libaka kokubata hahulu ni kuya kwa libaka kokucisa, balemuhanga kuli mwa libaka zeo kunani likokwani zeñata zeshutana-shutana. Bo Joshua bababulezwi kwamulaho batalusa kuli: “Nenisika twaela kupila kokunani likokwani zeñata. Mi nekubonahala kuli mwa Guyana kunani likokwani zeñata hahulu! Kono hamulaho wa nako, nakala kutwaela. Mi hape nenilemuhile kuli likokwani halibangi zeñata hahulu haiba ndu ikenile. Kueza cwalo kukopanyeleza kutapisa mikeke yenani masila, kuyumba manyalala, ni kukenisa mwa ndu kamita.”

 Kutwaela kupila mwa naha isili hape kukopanyeleza kutwaela kuca lico za mwa naha yeo, mane ni kuziba kuliapeha. Bo Joshua batalusa kuli: “Na ni muzwale yene niina ni yena nelukupile mizwale ni likaizeli ba mwa naha yeo kuli balulute mwa kuapehela lico za mwa naha yeo. Hase luzibile mwa kuapehela lico zeo, nelumemanga mizwale ni likaizeli babañwi mwa puteho kuli luto ca ni bona. Yeo neli nzila yende ya kuzibana hande ni kutiisa silikani saluna ni mizwale ni likaizeli.”

 Bo Paul ni bo Kathleen babulela cwana ka za lizo za mwa naha isili: “Nelutokwa kuziba mikwa yenengiwa kuli yaswanela ni mutinelo one baanga batu ba mwa naha yeo kuli ulukile. Lo neli lona lwapili kuipumana mwa muinelo ocwalo. Kacwalo, nelutokwa kuba ni buikokobezo ni kueza licinceho zeswanela, kono hape nelutokwa kubona teñi kuli halulobi likuka za mwa Bibele. Kutwaela lizo za mwa sibaka seo neku lutusize kuba bukaufi hahulu ni mizwale ni likaizeli mwa puteho ni kupeta hande musebezi wa kukutaza mwa bukombwa.”

 Batu babañata baikutwa sina mobaikutwela bo Joseph ni bo Christina, bane babulezi kuli: “Limbuyoti zeluikozi ki zeñata hahulu halibapanywa kwa miinelo yetaata yelukopani ni yona. Kueza lika zenca ni kueza nto yenebonahala kuba yetaata, kulutusize kuziba zelutokwa kubeya mwa sibaka sapili mwa bupilo bwaluna. Cwale lika zene luunga kuba za butokwa hahulu mwa bupilo bwaluna halisali za butokwa. Zene luipumani ku zona lilususuelize kueza molukonela kaufela kuzwelapili kusebeleza Jehova. Mi cwale selukolwa ka lika zelunani zona mi lunani tabo yetuna.”

 Bo Erica, bababulezwi kwamulaho batalusa kuli: “Kusebeleza kwa sibaka kokutokwahala hahulu bakutazi kutusize na ni bakuluna kuutwisisa luli sekutalusa kusepa Jehova ka kutala. Luiponezi mo Jehova alutuselize mwa miinelo yeshutana-shutana. Mi kueza lika zenca hamoho kulutusize kutiisa linyalo laluna.”